Tönge Kotlau

(yumoreska)
Kiçen, hatını yoklap kitkäç, Gomär şıpırt kına bädräfkä kerep biklände dä, tämäkesen kabızdı. "Ällä nindi naçar eş eşlägän keşe kebek kaçıp utır inde menä! – dip uyladı ul. – Bar ide irekle çaklar".

Öylänüeneñ ikençe könendä ük hatını anı borıp aldı. Gomärneñ ayu kuışın pıran-zaran kiterde. Yäş irgä öydä tämäke tartmaska, bädräftä gazeta ukımaska, östäl artında trusiktan gına çäy çömerep utırmaska digän ämer birelde.

Gomär şularnı uylap utırganda gına kolaknı yarıp telefon çıltıradı:

– Karale, hatınıñ öydäme? – dide karlıkkan, yämsez tavış.

– Öydä, – dide aptıraşta kalgan Gomär. Annan huşına kilep ısıldadı:

– Sin närsä?! Tön urtasında! Küzeñ çıkmagandır bit, nomerıñnı döres cıy!

Ber mizgeldän telefonga tagın can kerde:

– Hatınıñnı çakır dilär siña! – dide tege kabahät tavış.

Gomärneñ açuınnan yañakları kızışa başladı-

Karale, sin! Minem hatında sineñ ni eşeñ bar? Kem ul siña minem hatın?

Kem dip, häzer berkem tügel. Kayçandır berençe hatınım bulganga gına 8 Mart belän kotlarga dip çıltıratuım.

Gomär ber mälgä önsez kaldı, tını kısıldı. Ber mizgeldä başınnan meñ törle uy yögerep uzdı: "Ah, imansız! Dimäk, miña tikle kiyäüdä bulgan! Ä min açık avız, anıñ "yaratam" digänenä kolagımnı şälperäytep... İçmasam, iskitärlek cire bulsa ikän. Ayakları da yonlırak, kolakları da tırpayganrak... Atlandırgan agaç atka!..

Ä tege adäm haman da nider söyli ide:

– Sin, iptäş, açulanma borçıganım öçen. Butaluım gacäp tügel. Zakunnıyların gına çutlasañ dacämgıse dürtäü buldı bit.Äle haman da dürtesen tiñ yaratam. Sineñ bäheteñ bar ikän, iñ çibären eläkterdeñ, sabakı! İseme genä dä ni tora bit – Gölyözem.

Gomärgä şul çak bik rähät bulıp kitte:

– Nomerıñnı döres cıy dip äyttem bit min siña, alkaş! Naciyä minem hatınnıñ iseme, Naciyä!

Tege başta ber süz däşmiçä "şalt" itep trubkanı kuydılar. Gomär isä, avır sulap, divanga audı. "Aldıymı soñ inde mine Naciyä, – dip uyladı ul hatını yoklagan yakka karap. – Gomerdä aldamıy. Üze bulgan, üze uñgan, öydä tärtip.

Şulay da gacäp, kayda şomardı ikän bu Naciyä ir zatın şulay osta itep kulda totarga? Tıñlata da bit. Ni äytsäñ dä, täcribäse bar. Ällä çınlap ta kiyäügä çıgıp kerergä ölgergänme? Işan sin alarga..."

Gomärne alda yokısız, ozın tön kötä ide. Ul tämäkese belän şırpısın aldı da, uyların dävam itär öçen tagın bädräfkä kerep kitte.

Click or select a word or words to search the definition