Timurçılar

(yumoreska)
Äye, äye, döres kilgänseñ, äbi. Timurçılar bez. «Timur i Ko» kompaniyäse, äbekäy. Äye, ölkän keşelärgä yärdäm... to yıst, hezmät kürsätäbez. Teläsä nindi eşne başkarabız. Äytik, su taşıybız, utın yarabız, ker yuabız, aş peşeräbez, bakçada çüp utıybız - sanıy kitsäñ, küp inde.

Sine, äbekäy, nindi eş kızıksındıra soñ? Ä-ä, kereñne yudırtmakçı bulasıñ inde, alaysa. Üzeñ buldıra almıysıñ, dimäk, ayak-kullarıñ, bileñ sızlıy, diseñ. Añlaşıla-a-a... Eşlibez anı, äbekäy, moment eşlibez! Häzer rastsenkasın gına, yağni bäyälären diyüem, karap äytim dä... Äye, tüläüle, älbättä. Barlık eşlär dä tüläüle. Soñ inde, äbekäy, sez yäş çakta buşlay bulgandır da bit... Ä häzer - yuk. Hozrasçetta bez, äbekäy!

Soñ üzeñ uylap kara, kompaniyäne terkise, litsenziyä alası, eşçelärgä zarplata tülise, nalogı-mazarı diseñme - barısına da akça, kem äytmeşli, titi-miti kiräk bit. Äle menä hezmätkärlärebezgä mahsus kiyemnär, kızıl galstuklar satıp aldık. Aları da akça anıñ. Yuk, äbi, bezdä berkemgä dä lğota yuk. Veterannarga da, inva¬lidlarga da. Hi-hi-hi, bezdä ul yaktan sotsializmdagı şikelle, bötenese tigez hokuklı. Barı tik tüläp kenä. Tüliseñ - eşlilär, tülämiseñ - gud bay, yağni, tärtäñne kire bor.

Äye inde, äbi, äye, timurçılar, didem bit. Bezneñ boss ta Timur isemle äle, östävenä. Närsä, min dä yäş çakta timurçı buldım diseñme? Kart-korıga bulışkanda akça almıy idek, diseñme? Soñ, äbekäy, ul zamanda böten halık buşlay eşli ide bit. Ä häzer yuk, buşlay barmak ta selketmilär häzer, äbekäy, färşteyn?! Añladıñmı, dim? Añlasañ, menä şul.

Ä-ä, ker yuu küpme tora, diseñme? Kıymmät tügel, şalkan bäyäse genä. Ber çiläk ker yuu 50 sum tiräse. Nindi ker buluına karap, bilgele. Niçek dip äytergä... Külmäk-koftalar yuu arzanrak, eçke kiyemnär kıymmätkäräk töşä. Patamu-şto, alar kerleräk bulalar. Ä-ä, sineñ kübräk eçke kiyemnär diseñ inde alaysa. Vät-vät, äbekäy, dimäk, kıymmäträk bula inde.

Häzer, çutka salıym äle. Tä-ä-äk, küpme cıyıldı inde? Kereñ diyüem? Dürt çiläk?! O-oho! Şaktıy cıyılgan ikän şul. Nişläp şulay ozak yumıy tordıñ? Avırdım, diseñ inde. Temperaturit itkänseñder äle? Gripp-mazar bulgandır? Äytäm bit anı. Temperatura yugarı bulganda, tirlämiçä bulmıy inde. Eçke kiyemnär dä kübräk kerlänä inde ul. Äbekäy, bäyäne beraz arttırırga turı kiler.

Tä-ä-äk, dürt çiläk, dideñ, dürtkä tapkırlıybız, plyus tirlägän öçen östämä. Niçek yuarga, äbi? Kul belänme, maşinaga salıpmı? Min kul belän genä yua idem, diseñ inde. Yarar, kul belän yuarbız alaysa. Tolko kıymmätkäräk töşäçäk. Kul hezmäten üzeñ beläseñ... Ä-ä, arzan bulgaç, maşina belän yuıgız, diseñme? Yarar, maşinada ikän, maşinada.

Täk, maşinañ nindi, iskeme, yañamı? Närsä? Ker yuu maşinañ da yukmıni? İ-i, äbekäy, bigräk artta kalgansıñ ikän tormıştan. Üzebezneñ maşinada yuarga turı kilä inde alaysa. Tik bu tagın östämä tüläü. Ni äytsäñ dä, elektr öçen tülise, tuda-suda taskat itkän öçen maşinaga yagulık ta kiräk, tuzuın da isäpkä alsañ, şularga östäp, en-dı-esı.

Şulay itep, cämgısı 320 sum bula, äbekäy. Kerläreñne kayçan barıp alıyk? Närsä, ul qadär akça birä almıym, üzem genä yuarmın, diseñme? Nu saran da ikän soñ üzeñ, kort¬ka. Şunıñ öçen monda qadär söyrälep kilep yördeñme?! Bälki öyeñä qadär ozatıp kuyarbız? Anısı kıym¬mät tügel, 10 täñkä genä. Yul arkılı çıgası da bar ahırısı anda, nu, küp digändä, unike bulsın. Yuk, üzem kaytam, diseñ inde.

Nu, yarar alaysa, dürt yagıñ kıybla. Bigaybä, kortka!

Click or select a word or words to search the definition