Tamagı Tuygan

(yumoreska)
Galävetdin bazarda kolbasalar sata torgan rätkä kilep kerde dä, yak-yagına karañgalap algaç, kükräk kesäsennän tuzıp-tauşalıp betkän kün «bumacnik» tartıp çıgardı. Läkin anı açarga aşıkmadı, kulında selekkäläp torgaç, däräcäsen belep, vak-vak kına atlap, yänäşädäge distälägän sortlı kolbasalar tezelep yatkan prilavka aldına kilep bastı.

- Nindi sort kolbasalarıñ bar, tutaş?- dip yuhalandı Galävi, iğtibar belän kolbasalarnı küzlägän bulıp.

- Canıñ kaysın teli, şunısı bar bezdä,- dide satuçı, küzen-kaşın uynatkalap.- Menä Appetitnıy sortı bik tämle, alıgız. Menä busı...

Därtlänep sayrıy başlagan koşnı cırınnan bülgän kebek, Galävetdin satuçını yartı süzdän tuktattı:

- Äpititniy kolbasasın äytäseñme? Yuk, almıym! Yaratmıym min anı! Uzgan alganda da aldandım, tozlısı turı kilde.

- Nitkän tozlı bulsın?! Bik tämle! Menä ışanmasañ kabıp kara.

Satuçı hatın kolbasadan tırnak kalınlıgında gına ber telem kisep birde. Galävi isä ber-ike märtäbä irennären çäpeldätep algaç, muyın töyeren uynatkalap, yotıp ta cibärde häm yözenä kanäğatsezlek bilgeläre çıgardı.

- Äytäm bit, tozlı dip. Toznı çamasın belmiçä salalar. Öydä hatınnıñ tozlı aşlarınnan da muyınnan garık...

- Ä menä monısın kabıp karagız,- dip satuçı ikençe ber sortlı kolbasadan şulay uk yuka gına telem kisep, Galävigä suzdı.

Galävetdinneñ bugaz töyere yänä uynaklap aldı. Läkin busı da oşamadı bugay. Ul tagın çırayın sıttı.

- Borıçnı küp salgannar.

Satuçı hanım älege «palka»dan üze dä ber telem kisep alıp kaptı da, anı läzzät belän çäyni-çäyni:

- Çeo tı? Nitkän borıçlı bulsın bu? Nap-narmalnıy bit!

Läkin Galävi anı tıñlamıy ide inde. Ul ikençe prilavka artında üz tovarın maktap toruçı tuzgak başlı satuçı kız yanına küçkän ide.

- Sezdä kolbasalarnıñ nindiläre bar?

- Menä busın alıgız. Doktorskiy. Keşelär bik yaratıp alalar.

- Kaya avız itep karıyk inde alaysa.

Satuçı «palka»dan keçeräk kenä ber kıypık kisep, Galävigä suzdı. Galävi monısın ütä ber läzzät belän ozaklap çäynäde.

- Menä busı äybät bulırga ohşıy,- dide ul. Häm şunda uk kolbasanı ülçäügä salırga cıyıngan satuçını kulınnan totıp tuktattı. - Sabır, sabır, señelkäş, änä tege apanıñ kolbasasın da karıym äle. Bik tämle kürenä.

Galävi yänäşädäge prilavka yanına küçte:

- Apası, sezneñ menä bu kolbasagız nindi?

- Varenıy!

- Menä-menä, miña şundıyı kiräk tä inde. Tämleme soñ?

Satuçı kisep birgän telemne yalt kına ipi şürlegenä ozatkaç, Galävineñ açıla başlagan çırayı tagın karañgılandı.

- Nişläp uñmagan ipi şikelle läçkeldäp tora ul? Varenıy digän bulasıñ tagın. Peşmägän bu. Lutçı min änä, señelkäşneñ duhtırskiyen alam.

Galävi yañadan tuzgak baş yanına kilep bastı.

- Kaya, ülçä tege duhtırskiyeñnı. Duhtırskiy bulgaç, yazvama da kileşer, bälki.

İnde ikençe märtäbä ülçäügä kolbasa sala başlagan kıznı Galävi kabat tuktattı:

- Yuk, duhtırskiynı tügel, änä tegesen bir lutçı. Kaya, tämle mikän, kabıp karıym äle?

Satuçı kız birgän telemne yotıp cibärgäç, monısınnan da ğayep taptı Galävi.

- İse tämsez, ozak torgan närsäder,- dide ul. Annan soñ bötenläy kire uylap, bernärsä dä almıyça, işekkä yünälde...

Uramga çıkkaç, Galävi, kanäğat ber kıyafät belän, korsagın sıpırdı. Tamak tuk! Göreldätep kikerep kuygaç, şul uk buş bumacnigın selki-selki, işegenä «Soki i vodı» dip yazılgan kibetkä yünälde ul.

Click or select a word or words to search the definition