Tabışmaklar - Şäükät Galiyev

Közme, kışmı, yazmı, cäyme,
Tıñlamıy, nişlätäseñ —
Kar-buranda, cil-yañgırda
Salmıy ul eşläpäsen.
(Kadak.)

Avızına başnı tıgıp
Karadım, kurıkmadım.
Annarı, başına menep,
Rähätlänep yokladım.
(Miç.)

Başka cirläre bik döres,
Ber genä yalgış monda:
Tügel nikter urınında
Mögeze — borınında!
(Mögezborın.)

Sakallı bulıp tugan ul,
Sakallı sabıy bulgan.
Parikmaherga kermägän,
Sakalın kistermägän.
(Käcä.)

Su östendä cäyäü yörim,
Tıp-tıp basıp atlıym min,
İñ tirän cirdän ütäm,
Öz genä dä batmıym min.
(Boz östendä.)

Bar cirne kızılga buyar,
Ämma kanga buyamas.
Kayçan gına atsa da ul,
Berkem kurkıp uyanmas.
(Tañ.)

Bik küp tellärne belsä dä
Söyläşmi ber teldä dä.
Öyränim disäñ öyrätä,
Karışmıy berkemgä dä.
(Süzlek.)

Yörtälär anı härvakıt
Katı-katı tipkeläp,
Can-färmanga yögerä ul,
Tormıy ber dä üpkäläp.
(Futbol tubı.)

Morze azbukası belän
Tukıldata tuk-tuk-tuk:
— Tik torganım yuk, yuk, yuk,
Şuña kürä min tuk, tuk!
(Tukran.)

Eşne genä yarata ul,
Bulganı yuk uyında;
Annan başka ütkärälär —
Üze kilmi tuyına.
(Saban.)