Şiğırlär - Şamun Fidai

Kızılarmeetska

Al äydä, tot kılıç-mıltıklarıñnı,
Çäçep tor yak-yagıñda utlarıñnı.
Miherban kötmä baylardan, cihan ut,
Anıñ här yırtkıçında yöz meñär uk.
Cihan iblis vä şaytan berlä tulgan,
Fäkıyr mesken izelgän häm sıtılgan.
İzelsen vähşi yırtkıçlar cihanı,
Anıñ maldır, anıñ baldır imanı.
Kürerseñ bervakıt bäyrämnäreñne,
Kürerseñ bäyrämeñnän yämnäreñne.
Ülärlär ul yılannar, acdahalar,
Betär akça, betär häm kalmas alar.
Sine süksen vä kölsen häm kölüçe,
Sizäm, qadereñne dä küpter belüçe.
Sineñ atkan ugıñ hiç buşka kitmäs,
Matur cäyle ayıñ da kışka kitmäs.
Tüz äydä, tiz tuarlar bäyräm aylar,
Betär zalim, betärlär vähşi baylar.
Vä sin şul çakta çın bäyräm itärseñ,
Böten dönya eçen zur yäm itärseñ.

Tukay

Tön ide. Moñnar belän
Çirtep sazın, ul cırladı;
Moñ belän, häsrät belän
Tulgan ide bar cırları.

Tıñladı urman vä taular,
Tıñladı ay, yoldızı...
Şul moñınnan uyga kaldı
Cir kızı häm kük kızı.

Attı tañ äkren genä,
Näm sünde yoldız, sünde ay,
Şul matur yoldız belän
Äkren genä sünde Tukay.

Söylilär

Kiñ, matur, moñlı yalanda çäçkä, göllär tirbälep,
Zur kayınnarnıñ yäşel yafrakları häm tibränep.
Bormalangan zur agımsu, yılmaep häm yaltırap,
Akrın iskän cil belän dulkınlanıp häm kaltırap.
Yaktı yoldızlar kölep, nurlar sibep, tınlık belän,
Bar tabiğat, bar maturlık, barçası akrın gına,
Tın gına, nazlı gına, moñ gına... salkın gına
Söylilär: «Alda bähet, yäm, alda kön, alda irek!»
Bez barabız şul bähetkä, törle il-cirlär yörep...

«Kızıl mayak»

Cillär isä.
Diñgez, çep-çep itep,
Kiñ yarlarga bärelä-kagıla...
Çaypalışıp dulkın ber-ber artlı,
Bersen kua... berse tagıla...

Änä yıraklarda «Kızıl mayak»,
Näq yoldızday yana, yaltırıy...
Diñgezdäge yulçı, aña karap,
Alga bara... İzge yul sorıy...

Kurıkma sin, yulçı! Äydä alga!
Änä mayak, köräş yulı ul...
Änä mayak, ul bit yaña häyät,
Alda kızıl — şunıñ nurı ul...

* * *

Mökatdäs häncärem töşmäs kulımnan,
Böten sädne(1) kisärmen min yulımnan.

Oçabız, bez şulay mäñge oçarbız...
Kiler ber kön — säğadätlär koçarbız...

Bähet bakçasına barıp kererbez,
Säğadät çäçkäsen özep yörerbez.

1 Säd — kirtä.

Click or select a word or words to search the definition