Şiğırlär - Sara Sadıykova

Tugan şähri Kazanım
Äy, rähät lä bu Kazanda,
Üz şähäreñ, üz cireñ.
Kaya barsañ bar da tanış,
Sin beläseñ här ciren.

Ul uramnardan bargan çakta
Kilep oçrıy tanışıñ,
Rähätlänep söyläşäbez,
Çatka işetelä tavışıñ.

Teatrda, tramvaylarda,
Uramnarda yörgändä,
Tugan halkım sälam birep
Hörmät itü kürgändä.

Rähät bula oçrasalar
Tanışlarıñ-duslarıñ,
Tınıç ildä şulay görläp
Yäşik äle, duslarım!

Frontovik-şağıyrgä

Möhämmät Sadrıyga

Ciñü köne belän kotlıym Sine!
Anda Sineñ bik zur öleşeñ.
Sugış dähşätlären kürgän şağıyr
Tatıp açı häsrät cimeşen.

Şuña kürä kisken Sineñ süzlär,
Şağıyr süze, soldat avazı.
Şigıreñdä Sineñ çın hakıykat
Alda - köze-kışı häm yazı!

Küptän inde

Könnärneñ berendä, çakırıp alıp
Raykomdagı matur ber hanım (rus hatını),
Dide: "Partoyışmadan çıgarabız,
Sayla başka oyışma, sin, canım".

Nindi oyışma saylıym, didem aña,
Beläsez bit, min barı tik artistka,
Gomerem sänğat belän ütte minem,
Min bit belmim başka ber eş tä.

"Eşlisez bugay sez "Spartak"nıñ
Klubında, küçegez şunda", - di;
Ayak kiyeme tekkän "Spartak"ta
Närsä beläm soñ ul eştä, dim.

Şul vakıtta kilde minem yulga
Märhämätle matur ber bändä.
Ul bändäne gomer onıta alamam -
- Läbibämne, hätta ülgändä,

Dide miña şunda İhsanova -
- "Ker sin bezgä, äydä, gam çikmä.
Sin bezgä bik kiräk keşe,
Cır yazarsıñ bezgä, soñ çiktä"

Kerdem şunda Bauman raykomına,
Didem - küçäm yazuçılar yanıma.
Hanım äytte: "Nişlärseñ soñ anda,
Sin barı tik tolko artistka"

Nu tak çto, didem, alar şiğır yazsa,
Min cır yazam alar şigırenä.
"Alay bulsa yarıy, bolay bulgaç
Eşlär caylı bulıp kürenä..."

Sıkrıy yörägem

Ällä nigä avır bügen miña,
Ällä nigä sıkrıy yörägem.
Canga caylı urın tabalmıyça
Ärnep ütä matur könnärem.

Nigä keşe kebek şatlanalmıym,
Nigä kölä almıym min bügen?
Nik karalgan tormışım koyaşı,
Ni kaplagan bähetemneñ kügen?

Ällä nigä bügen küñelem bizgän
Keşelärdän, barlık dönyadan.
Ällä nigä bügen häterem kalgan
Dönyadagı barlık dorfadan.

Şulay ütär mikän bu gomerlär,
Şulay ütärmenme dönyadan?
Bu dönyanıñ çiksez güzällegen
Äle küñlem söyep tuymagan.

Yaşel ülännärgä yatıp aunar idem,
Sular idem çäçäk islären.
Tıp-tın gına tıñlap torır idem
Yomşak tañ cilläre iskänen...

Şağıyrlär-romantiklar

Min yarattım häzer ädiplärne,
Şağıyrlärne-romantiklarnı,
Neçkä halık alar, kızık halık,
Niçek yaratmıysıñ, alarnı?

Ber vakıtnı, bulgan alar barı
Yalan ayak yörgän malaylar,
Avıl malayları ğalim bulıp
Çıkkanın kürgäneñ kayda bar?

İlebezneñ cılı koçagında
Üskän alar - bezneñ malaylar.
Gıylem granitın kimerep üskän,
Tormış açısın kürgän alar.

Şuña kürä olı yöräklelär.
Şuña kürä insaflı alar.
Şuña kürä söyäm ädiplärne,
Şağıyrlärne-romantiklarnı,

Neçkä halık alar, kızık halık,
Niçek yaratmıysıñ alarnı.

Click or select a word or words to search the definition