Şiğırlär - Sabirov Ravil

Yalgızlık-Köz


Közen...

Min çıgam kiçen,

Tartıp uylanır öçen,

Uram

karaga çumgan,

Nik bolay bulgan,

Bez yalgız kalgan...


Közgele yoldızlar seren açmıylar –

Uylar töten suräte kük kaçmıylar,

Bez ikäü Yalgızlık-Köz belän bergä,

Soraulıybız: bu – nigä?


Köz ul –

Yalgızlık yäşe,

Yalgız – ul yarım keşe,

Östän

Yoldızlar tizdän

Kölerlär bezdän –

Yalgızlık-Közdän...


Közen...

Min çıgam kiçen,

Beläm, bar äle köçem,

Kaytam

Uylarga batam,

Balkonga çıgam,

Tönne oçratam...


Közgele yoldızlar seren açmıylar –

Uylar töten suräte kük kaçmıylar,

Bez ikäü Yalgızlık-Köz belän bergä,

Soraulıybız: bu – nigä?




Tönge kübäläk


Kübäläktäy biyerseñ sin

Tönge reklam utlarında…

Sin oçasıñ, kübälägem

Sihri tönneñ koçagında


Sin kübäläk – yalgız kilen,

Kiñ uramnar – sineñ öyeñ,

Tıñlap tönneñ salkın köyen

Keräseñ yämgä

Gomer kıska – kötmi yöräk,

Ciz hıyalıy töngä tizräk,

Cilkendäy güzäl kübäläk,

Oçasıñ şämgä…


Ozın ükçälärdä şähär

Çaykala moñsu valsında,


Yaktı neon sataştıra

Alar yaktı, ämma räşä…

Sin işetäseñ, karşıda

Siña, ügi, kemder däşä…


Sine tormışıñ könläşä,

Yaktılıkka ğaşıyq kalma…


İrtän uramnar uyanır,

Koyaş saran gına karar –


Kay sine irtä oçratır

Kemder siña salkın karar

Kanatlarıñnan koyılır

Töndä ütkän macaralar…



Bauman uramında


Cäyäüle uramda

Uynıy ber malay garmunda…

Anıñ köye yaktı yañgırıy,

Ul yılmaep siña karıy.


Kilegez, tıñlagız, karagız

Bu tormış mizgellären,

İşetegez sez, añlagız,

Şul malaynıñ teläklären…


Kil,

Tıñla uram köyen,

Kil

Garmun belän söyen,

Uyansın yäşlegeñ

Sin

Ahäñ koçagında,

Sin

Bauman uramında,

Tizräk vak akçalar äzerlä


Cırga sädakañnı cällämä…


Cäyäüle uramda,

Malay cırlıy, garmun yılıy…

Cäyäüle uramnan

Bitaraflı vakıt atlıy…


Tormışıbız uyın gına,

Mäñgelek bolınnarında,

Äydä, uyna, malay, uyna,

Cäyäüle uramda…



Yaratu


Özlep-özlep yaratam min,

Häsrätem kükkä terälgän,

Ämma sin töşenmiseñ,

Ämma sin añlamıysıñ,

Oçraşkanda tanıymıysıñ...

Ämma sin añlamıysıñ,

Ämma sin yaratmıysıñ,

Oçraşkanda tanıymıysıñ sin.


Özlep-özlep yaratam dim,

Mähäbbät pıyalay sına,

Yañgırlar canga señä,

Yörägemdä sin genä,

Baglışlarımnı sizmiseñ...

Yañgırlar canga tünä,

Şatlıklarda sin genä,

Baglışlarımnı belmiseñ.


Özlep-özlep yaratam min,

Yafraktay söyü sargaya,

Tormışlar alga çaba,

Ömet koyaştay baya,

Büläk itäm yanularımnı...

Kara, tormış yılmaya,

Kızlar da yılmayuda,

Cırlarım siña büläkter...


Tormış tulı balkısın,

Alla sine saklasın,

Ülgänemne dä belmässeñ...




Bez – yoldızlar


Sähnälärgä bezneñ yullarıbız törleçä,

Hıyal-ömetlärebez dä ayırıla,

Maksatlarga ireşü ciñel bulmasa da,

ämma kükkä haman

yöräk yangınınnan

cır-şiğırlärdän bez küperlär tözibez.


Bügen bez – yoldızlar bit häm bötenesenä,

Üz utın yandırırga yoldızlar kügenä,

Köylärebezdä oçıp yugarıda yanıyk

Bügen bez yoldızlar bit – cırlarda yañgırıyk,

Bügen bez yoldızlar bit – cırlarda yañgırıyk!


Kem ışanıp ezlägän, şul küklärgä mengän,

Kem cır belän üzeneñ yazmışın bäylägän,

Şuña meñlägän küzlär soklanıp yılmaer,

häm hıyallar çınga aşar,

çäçäklär, alkışlar

belän bergä hitlarıbız yañgırayır…




Kafeda


Gomer kıska, könnär ozın, mizgellär ütken,

Könnäşep yazmış nider pışıldıy bügen,

Sin aldıysıñ tagın, min yañaça aldaşam –

Gıyşık belän huşlaşam…

Gıyşık belän huşlaşam…


Yäşim, tormış bezneñ oçraklı tulay torak,

Bügen yalgızım min, yazmışlar birä sabak,

Min ışanam, min ışanmıym, uylıym, sataşam

Gıyşık belän huşlaşam….

Gıyşık belän huşlaşam….


Däşmim, kafeda täräz aşa karap utıram,

Anda yazgı küñellärdä selkenä uram,

İseräm häm yazmışımnan tagın soraşam –

Gıyşık belän huşlaşam…

Gıyşık belän huşlaşam….


Tormış sähifälärendä butalıp bettem,

Şul töyenne sütä-sütä yalgışıp kittem –

Sine onıtırga härvakıtta tırışam –

Gıyşık belän huşlaşam…

Gıyşık belän huşlaşam….


Gomer kıska, könnär ozın, mizgellär ütken,

Könnäşep yazmış nider pışıldıy bügen,

Mähäbbätem belän soñgı tapkır sataşam –

Sineñ belän huşlaşam

Sineñ belän huşlaşam




Kem cırı?


1


Babalarıbız bezgä korgannar

Sataşu yortları, zindannar –

Andagı Salahov-Tufannar

Yaktılık kötep utırgannar

Kiläçäk tözep kaldırgannar


Kanlı

Korban

Cannar



Rähim it,

İregeñne hur it –

Rähim it,


Kullarıñnı artka!

Tik tor sin, uylama berkayçan

Eştä genä azatlık bulaçak –

Yaktı yul bulaçak!



2


Atalarıbız bezgä kordılar

Zur zallı uyın avtomatlar,

Eşlämä, uyna irtän töngä,

Işançı şul sukır tiyengä,

Kiläçäk bähete – ber täñkä,


Gomer

Sukır

Täñkä


Rähim it,

Akçañnı korban it,

Rähim it –


Min berkullı bandit,

Tik torıp, akçañnı sal gına,

Bähet sal kiläçäk buınga –

Uyınga suınma!



3


Bezgä soñ närsälär korırga

Kiläçäk bähetle buınga?

Uylama, vakıt yuk uylarga –

Bezneñ täñrebezgä sıgıl

Bez haklı! Gıybaräteñne kıl:


Çeltär

Dönya

Utır…



Rähim it,

Canıñnı korban it,

Rähim it,


Çeltärne doga it,

Kiläçäkkä bezneñ belän ışan,

Kiler ul, kiler ahırzaman,

Mineke bul haman…



Könyak trassa


Könyak trassada ni kötäseñ sin?

Faralar yaktısı astında.

İşeklär açıla, kemnärder çakıra

Häm sineñ bäyäñne sorıylar.


Könyak trassa –

Mähäbbät kibete,

Könyak trassa –

Bäyälär bilgele,

Könyak trassa berkayçan könläşmi,

Könyak trassa –

Monda bähet yäşämi…


Egeteñ sine sagınıp ışana:

Mähäbbät satılmıy, mähäbbät satılmıy,

Bäyäse anıñ yuk, bäyäse anıñ ber –

Bäyäse anıñ – gomer…


Yazmışlarnı ciñülär kıyın,

Yäşlek çatlarda yanıp betär,

Bertön şul yeget könyak trassa yulın

Ber çatta sine kürep ütär.


Ul ütär, borılıp karamas,

Ul gazga moñsulanıp basar,

Maşina tägärmäçe armas.

Sau bul! – dip utlar küzen kısar.