Şiğırlär - Nuri Gazizoviç Arslanov

ATLANTİDA

Atlantida buldı mikän çınlap?
Tıngı birmi sorau hiç kenä:
Ällä kaydan, yırak-eraklardan
Hälakätle ber moñ işetelä.
Kinät yukka çıkkan böten kıytga,
Tau dulkınnar kükkä aşkannar:
Ber mizgeldä illär, şähärlärne,
Häykällärne sular baskannar.

Okean upkan kebek Atlant ciren,
Däülätlärne monda cir upkan:
Däşti-Kıpçak, Bolgar, Altın Urda.
Ber-berseneñ tamırın korıtkan.

Niçä tapkır kilgän monda yaular,
Kiçergännär ilne kılıçtan...
Kaldıgın da kölgä dünderergä
Missionerlar küpme tırışkan.

Sähifälär tuzgan, yukka çıkkan...
Ä bez — menä, bez — bar, bulganbız!
Fal açabız , läkin baş vatabız;
Ällä kıpçak, ällä bolgar bez?

Kem bulgandır babam! Kıpçakmı ul,
Bolgarmı ul? Nindi ayırma?!
Tatar digän isem yörtäbez bez —
Tatar kanı aga tamırda!

Atlantida! Atlantida batkan!
Ez kalmagan böyek halıktan...
Ä bez — menä, bez — bar, ez bar cirdä —
Bez batırgan sayın kalıkkan.

Atlantida yazmışı yuk bezgä,
Onıklarnıñ açık babası:
— Näseleñ kem? — dip sorasalar ägär,
Äyterlär: — Bez — tatar balası!
Tatarstan digän vatanım bar,
Tatar digän halkım bar minem.
Uzgannardan tügel, min halkıma
Kiläçäktän urın barlıymın.
1969 yıl.

YaZ

Matur çaklar!
Östän ence tamıp tora,
Erganaklar,
Kar suları agıp tora,
Dımlı, salkın
Cirne nurga manıp kına
Koyaş altın
Litavrasın kagıp tora.
Kitte kışlar
Mamık tunın salıp kına,
Kayttı koşlar
Kanatların kagıp kına,
Karda posıp,
Umırzaya kalkıp çıga,
Kilsä gıyşık—
Urın kalmıy vak borçuga.
Tirämdä yäm,—
Min şul häyät tämen beläm!
Şuña söyäm
Sezne canım-tänem belän.
1986 yıl.

TÄLGÄŞ-TÄLGÄŞ MİLÄŞ

Miläşlärem minem tälgäş-tälgäş,
Oyışkannar kızıl märcännän.
Baş iyälär alar mine kürgäç,
Yakın alar miña bar yämnän.
Täräzämnän karap köndez-kiçen,
Süzsez genä nider serläşep,
Cır çıgara alar minem öçen...
Başka tallar tora könläşep.

Miläşlärdän kızlar kolagına
İke börtek alıp tagası! —
Yansın ide alka bulıp kına...
Kızık ta sin adäm balası! —

Miläşne dä, nazlı kızlarnı da,—
Yaratkanga böten häyätnı,—
Gel töşäseñ bähet tozagına.
Bütännärgä ällä bu yatmı?

Yat tügel! Bar tormış qaderen belep
Yaşäüçelär, Häyyam şikelle:
Alarga cir cännät bulgan kebek,
Alar belän cir dä söykemle.

1988 yıl.

Click or select a word or words to search the definition