Şiğırlär - Nais Gambär

Sin — ber genä

Meñnär arasında sin — berdänber,
Sin ber genä dönya yözendä;
Ber gomer ul närsä?!

Mömkin bulsa
Birer idem unın, yözen dä
Siña gına... Sin kaylarda häzer,
Cir şarınıñ kaysı töşendä?!

Nindi bilgelärdän tanıp däşim
Osrata kalsam töşemdä?!
Çäçläreñ kayda orlık koya,
Tufragına ninditütälneñ?!

Sin göl ideñ, señlem, hiçber kayçan
şiñmäs göle yırak ütkänneñ.
Duslar, iptäş, tanış, yakınnardan
Barmı keşeñ «abıy» diyärlek?!

Sin — berençe ideñ, sin — ber genä
«Señlem» itep başım iyärlek.
Mähäbbät

Äkiyätlär ukıy idem şaşıp:
«Tahir belän Zöhrä» kıyssasın —
Keşelärdän kaçıp tın bakçada.

...Ah,
Şul çakta uk uyda sin bulgansıñ.
Agaçlarga menep biyeklektän
Erak kırlar türen küzlädem, —
Açıldılar hozur manzaralar.

...Ah,
Şul çakta uk sine ezlädem.
Nindi kiñ bu dönya, — yöger, uyna, —
Yäşlek belmi kimlek, tarlıknı:
Küge biyek, yoldızları yaktı.

...Ah,
Beldem şul çak sineñ barlıknı.
Bolınnarga çıktık, tañga karşı
Kölä-kölä sütep tarattıñ,
Göllär ise señgän çäçläreñne.

...Ah,
Min şul çakta sine yarattım.
Çıktı cillär, ışıkladım sine,
Kulı katı bula ir-atnıñ, —
Koçagımda kileş suldı göllär.

...Ah,
Min şul çakta sine yılattım.
Tındı dönya kütärelde koşlar.
Min alarga tözäp uk attım, —
Berse töşte yıgılıp allarıma.

...Ah,
Min şul çakta sine yugalttım.
Min idem ul sıra zallarında
Ber poçmakta oyıp utırgan, —
Yäşlär tulı kasä kullarımda.

...Ah,
Min telädem sine onıtırga.
Bälki...

Bälki yukka barlık omtılışlar.
Buşka bälkem söyü-yanular?!
Poyızd kitkän inde... yullar yabık, —
Alda yana kızıl semafor.

Yögerep karşı çıktım... Utı gına
Çagılıp kaldı soñgı vagonnıñ;
Häm kürenep bardı — ofıkkaça —
Täräzädän suzılıp kulıñ.

Minme soñga kaldım, ällä sinme
İrtä kitteñ?! Kayda butalış?
Bälki minem soñgı vokzalımdır
Tanış tügel şuşı tuktalış?!

Bälki şulay üzeneke itär
Ärem baskan şuşı kır-üzän?!
Bez cirneke barber — kükrägenä
Kükräk kuyıp avam yöztübän.

Min yatarmın olı yul çitendä
Erak kiñleklärgä küz atıp:
Kiler poyızdlarnı karşı alıp
Kitärlären —
Häyerle yul teläp ozatıp.

Click or select a word or words to search the definition