Şiğırlär - Mustafa Sabitov

Bähetsez kızga

Tükmä yäşeñ, yığlamaçı, äy bähetsez kız bala,
Siña çaklı tükte küz yäş niçä bähetsez ana!

Kıylmadı bit dönya vafa(1) hiç alarnıñ bersenä,
Ber-ber artlı törle mihnät yaudı alar östenä.

Sin dä bit şul ber bähetsez; ezlämä, ul — yuk siña,
Äldä dä şul: iske — dönya, bulmayaçak ul yaña.

Tatar yoklıy

Küzen yomgan, totaş yoklıy tatarlık —
Gırıldıy: örketerlek, at kaçarlık!

Küñelsez barlık eş, tämsez vä nursız;
Böten tormışı tar — yuk irek açarlık.

Hävef yuk iç: babay bar maktanırlık,
Bötenseneñ süzen astka basarlık.

Gacäp tatar: «gakıllı» ul — belemsez;
Belek sata bütängä — şakkatırlık.

(1) Vafa — tuğrılık.

Avıl kızı

Ber şähärneñ kızlarınnan küp matur, küp yämle ul;
Bizänüsez h alsu yözle, tabigıy ber sänle ul.

Ul taza, paq; yuk añarda häylä, mäker zärräçä;
Saf — eçe, saftır küñel, paqter uyı ülgängäçä.

Taptisä, süz söyli kersez: yuk täkällef, yuk buyak,
Yuk bozıklıklar, karalıklar — anıñ bit küñle ak.

Ul tabigıy ber matur, bizänmiçä kaş-kerpegen;
Kükräge — kalku, çäçe — bödrä, kabartmıy ber tögen.

Kiñ anıñ küñle: eçe-tışı barı çın bit anıñ;
Eşli tuktausız: tayanıçı, köçe — eş bit anıñ.

Yuk añarda aldalap söyü — ğaşıyqlık yalganı,
Maktap anı citkerä almıym — hisapsız kalganı.

Saf mähäbbät yalkınınıñ märkäze bit ul matur;
Ayga tiñ kilgän yöze nurlar, yözeñne nurlatır.

Ul miña ak teşlären kürsätte dä kölde karap —
Şul çagında kiste küñlemne mähäbbät urtalap.

Toman

Tirä-yaknı tınlık, toman baskan:
Berni kürenmider küzlärgä;
Karañgılık basa säğat sayın,
Kürenmi yul, kaydan ezlärgä?

Yöräk mayım sıza — sızlandıra,
Ärni, tüzmi — yana ul tagın.
Täqdir bezgä şulay kürsätmäsme

Ällä bu dönyanıñ ak yagın?
Betmi tormas toman! Betär äle,
Nurlı könnär tuar! Şul çakta
Tar kükräklär kiñläp sular äle,
Hörlek hökem sörer ul çakta!

(1) Bizänüsez — kitapta: ber bizänüsez.

Click or select a word or words to search the definition