Şiğırlär - Miñneruy Gayfullina-Häbibullina

Kartlar yortında
Gölle,cılı,yaktı bülmälär.
Täräzälär salkın nigäder..
Stenadan hiç tä cılı kilmi...
Sıyınası kilä kemgäder.
Yatim yortta gel ber tösle dönya:
Ah-zar ,tınlık, ayak tavışı.
Uñda da yuk,sul da da kürenmi
Balaları ,tugan,tanışı.
Sagışlanıp,kön dä koyaş çıga,
Ükengändäy irtä çıkkanga.
“Uyangansıñ ikän” digän sıman,
Nurın sibä tozlı çıklarga
Hava, nikter, citmi, kısıla tın,
Oyıkbaş kütärer därman yuk
Gazrail dä kilmi het ,içmasam,
Kotkarırga östän färman yuk.
Östälendä tora rizıkları.
Kaşık yata közge kük ,yaña
Çü, narasıyı kaşık yaktısınnan
Ellar aşa karıy kük aña.!.
Oyık baltırında töyençegen
Barlap,änä koyka kürşese.
Ber noktaga karap tön utıra:
Kayçan kiler bäğır türgese?
Yaltır –yoltır zatlı maşinası
Ölgermi dä kilep tuktarga,
Baltırınnan kaudarlanıp ana
Tiyennären ala çutlarga
Bar mölkäten ul da oyıgında
Saklıy ikän, bülmädäş., mesken,
Bar bulganın hoday gazizenä
“Küçtänäçkä nasıyplar itsen...”
Vakıtlıdır , boyırsa , vakıtlıdır
Yatim yortka kilep torular.
Citmi inde,gel küñelgä citmi
Üzeñçäläp tormış korular
.Bala söyep tuymagan kullarga
Karçıklarça mäşäqat kiräk.
Eh,nigezeñ bulsa,üz hisabıñ...,
Komganıñ da serdäş – ahirät
.Küp bit serlär: üzeñ genä kürgän,
Üzeñ genä belgän, vak –töyäk.
Rähätlänep, küzgä -küz karaşıp,
Ser söylärdäy tugan can kiräk.
Gölle,cılı,yaktı bülmälär.
Täräzälär salkın nigäder..
Stenadan hiç tä cılı kilmi...
Sıyınası kilä kemgäder.
Yoldız ezlim
Yoldızga can kayçan iñä, kaydan iñä?
İke dönya astarında asıl matdä.
Gareş säğate telläre küçkän mäldä,
Bakıy ildän gömbäzlärgä can küçenä.
Minle matdä kayçan iñgän, kaydan iñgän?
Astarlıgım nindi bulır, zatlıdanmı?
Bagışlavım ahäñdäşme kük zıñına,
İnsaniyät –gölstanga tatlıdanmı?
Yoldızlarga ğaşıyq canım küptän inde
Garasatlar göncäläsen yazıp sütte.
Barhannarnıñ batımınnan arulatıp,
Gosel suın canga koyıp, Kükräü ütte.
Kükräülärdän torgan zäñgär gömbäz buylap,
Döldel yalın tarıy-tarıy yoldız küzlim.
Gareş säğate telläre küçkän mäldä
Canım iñär mäñge yanar yoldız ezlim.
Duska
Ber tufrakta tuıp üskänbez dä,
Ciläk bulıp tulıp peşkänbez.
Alsu ükçälärne yaltıratıp,
Çişmälärgä suga töşkänbez.
Çişmä cırın tıñlap, häyran kalıp,
Moñın ürep Hıyal-tolımga
Gömbäzlärdän töşkän yaktılıkta
Yaşägänbez şulay tın gına.
Al tañ här kön sızılıp-sızılıp atkan,
Kerfeklärgä tezep çıkların.
Tal tibränep kuygan moñ cilennän
Çıltıratıp alka-çukların.
Berük talga kunıp, moñga tulıp,
Elmayışıp ike söykemle
Şul mizgeldä kamışlarga kuşılıp,
Cırlap cibärgänbez şikelle.
Ber ük ilgä, ber ük güzäl cirgä
Ğaşıyq bulıp, dustım, muyınnan
Sayrıybız da, sayrıybız ikäüläp
İlham alıp yazlar tuyınnan.
İzge teläk hiç tä artık bulmıy
Bezneñ moñnar mäñge yäşäsen,
Härber köne, dustım, bu dönyanıñ
Yäşiselär kilep yäşälsen.

Kiçermäslär
“Cirebezgä kabat kilde yazlar.
Dönya tınıç,dönya nindi kiñ!
Onıtırga vakıt sıkraularnı,
İnde tormış matur !”-dimä sin

Onıtam ikän Vatan sugışın,
Korbannarnıñ soñgı sulışın.
Kiçermäslär kebek gölle yazlar,
Kürmäm kebek böre tulışın

Faşizmnıñ külägäse poskan... .
Häter yöge kanlı şulçaklı!
Sündermäsen isän kalgan zolım
“Mäñgelek ut” yangan uçaknı.

Onıta ikän ägär yörägem
Sugış zähmäteneñ elmägen.
Kiçermäslär kanäferlär mine,
Şomırt kimäs ap-ak külmägen.

Färeştälär utka kunalar
Ciñü tañınıñ alsu pärdäsen
Yazlar sayın söyeneç yua.
Yap-yäş gomerlärneñ bayışınnan
Cil bitaraf tomannı kua.

Märmär taşlar kitä yaktırıp,
Cılı uçnı alar da toya.
Bügen tañda näfis ak şomırtlar
çäçkälären märmärgä koya

Ap-ak taclar uyılgan isemgä -
yarasına taşnıñ tulalar.
Bähilleklär sorıy färeştälär,
Färeştälär utka kunalar.

Häterlärdän yugalmıy
Yazlar kilsä yöräk yana başlıy,
Häter dörli uttay kabınıp.
Ärnüenä çıdar ämäl tapmıy
Can kaltırıy yafrak yabınıp.

Kildem cirgä tamırlarım tulı
Faşizmnı ötär ut belän.
Äniyemneñ yätim yäşe canda
Kümerlänep,karalıp köygän.

Tollar hıyalınıñ ak kölennän
Kuyıra kan tozlı cilemdäy.
Kaygı ötkän irennär yarası
Gel sulkıldıy tugan ciremdäy.

Köygän kerfek töbe dım tartalmıy.
Häterlärdän sugış yugalmıy.
Yazgı koyaş,bäyräm,matur tormış
Sagışlardan cirne yolalmıy.

Sugış
Äbi,äni, señel...-barçabızga,
Göllär genä üskän bakçabızga
Gazap alıp kilde sugış

Keşelekkä kıyu soldat birgän,
Tupırdatıp söyep ul üstergän
Ap – ak kulga bogau saldı sugış.

Zäñgär kükne iñlär börket – irgä
Söyü büläk itkän näfis iñgä -
Tollık alıp kilde sugış.

Alsu ükçä yaltıragan çiräm... .
Yäş kolınday uynaklagan cirdän
Sabıylıgın tartıp aldı sugış.

Bolın tulı çäçäklärneñ tınıç
Gomerlären sızıp kına ütte kılıç.
Üz utında üze yangan sugış.

Soldat karaşı.
1.
Ciñü tañınıñ alsu nurları
Küñel sayın çagılıp ala
Vintovkalı babam surätenä
Näselemneñ sagışı tama.

Töz sınına,gorur yöz – tösenä
Kileşep torgan gimnasterkaga.
Kısıp torgan soldat kayışına
Niçä buın inde küz sala.

İr zatıbız härçak soldat buldı
Kız – kırkınnar ğaşıyq härbigä.
Yazlar sayın yaña buın cırlıy
Kulyaulıgın elep särbigä

Babam küzlärendä moñlı karaş:
Küräçäklär,gomer agışı…,
Kiler buınnarnı tezlärendä
Söyä almıy kalu sagışı.

2.
Surät tora öyneñ iñ türendä -
İñ-iñ cılı matur urında
Süsez genä söyläp bügengegä
Gadi soldat –babam turında.

Söyli – söyli inde sarılangan
Ellar sıypap,tösen dä algan.
Tik surättä tez çükmägän karaş -
Kıyu soldat karaşı kalgan.

Tol yöräge
Tal börese irkälänä.
Kölgä basıp yaz sulıy.
Yarın sugışta yugaltkan
Can haman yamnsulıy.

Kölgä töşä dä yugala
Kurgaşınday küz yäşe.
Ordennarın tagıp kilä
Söygäneneñ yäştäşe.

Bu küreneş miña tanış:
(küz yäşe - minem yäştäş)
Yäşlege sugışta yangan.
Söyüe kalgan yäp-yäş

Çigälärdä ap-ak kırau.
Canda sugış salkını.
Sagış tulı tol yöräge -
“Mäñgelek ut” yalkını.

Kanäferlär –häter küzläre.
Yazgı tañda häterne öşetä
Sugış külägäse ezläre.
Göllämädä kızıl çäçkälär -
Kanäferlär– häter küzläre.