Şiğırlär - Lenar Şayıh

LİRİKA

Tañ kızına

A.-ga

Sin yırakta.
Tonık şäüläñ genä
Küz aldımda bii yalgızı.
Bügen dä kiç.
Koyaş bayıp bara –
Kayçan kiläseñ soñ, Tañ kızı?

Min berüzem.
Sine uylıy-uylıy,
Fikerlärem, uyım çualgan.
Tatlı hıyal
Koyaş belän bergä
Ak ofıkka kitep yugalgan.

Yuk, kiräkmi
Yaktı yoldız, ayı.
Yuk, kiräkmi tönge manzara.
Kiçke salkın
Tänne çımırdata –
Kayçan kiläseñ soñ, can yaram.

Kerfek kakmıym.
Alsu tañnı kötäm.
Vakıt aga. Küñel yalgızı...
Sine ezläp,
Ak ofıknı küzläp,
Tönge yulga çıgam, Tañ kızı...



İmänkiskä kızına Taktalaçık yegetennän açık hat

Küp baş vattım bu hakta:
Sin – İmän, ä min – Takta,
Bik kızık bit, çınlap ta.

Kürep toram ap-açık –
Sin – Kiskä, min – Alaçık,
Yörim şulay fal açıp.

Uñda, sulda gel urman...
Min – Agıydel, sin – Çulman,
İkese dä ber yuldan.

Uylanam, panimayış –
Min – Aktanış, sin – Layış,
Koyaş çıgış häm bayış...

Taktası da kiräkle,
İmäne dä kiräkle –
Bulıyk tırma-köräkle!..

Äytäm açıktan-açık:
Bulsın İmänalaçık,
İseñ kitmäsen hiç tä –
Bulsın, şät, Taktakiskä!

...Yözgä cılı cil bärä...
İ. kızına T. yegete
Kaynar sälam cibärä.



* * *

Küzläreñä kararga da
Kıyalmıym –
Ällä nindi oyalçan min,
Hıyalıy.

Söyü tulı karaşımnı
Tıyalmıym,
Mähäbbätle küzläreñnän
Tuyalmıym...

Yannan uzsañ, uylarımnı
Cıyalmıym...
Töştä genä nikter sinnän
Oyalmıym.



* * *

Yoldızlarga söylär idem
söyüemne.
Alar äyter: «Yulärländem
diyüeñme?..»

Kuş kayınga bäyän itsäm
sineñ hakta,
Äytmäsme ul, däşmäsme ul:
«Söyü – hata...»?..

...Turgaylar da yuatmasmı:
«Söyär...» – diyep,
Ällä äyter: «Akılıña
iyär, » – diyep?..

Hör cillärgä citkeralsam,
«Yaratam...» – dip,
Äytmäsme soñ: «Ay kürä dä,
ala tañ...» – dip?..

Akkoşlarga söyläp birsäm,
alar äyter:
«Utka kerdeñ, kem häleñne
ciñeläyter?..»

Yaz cırı

Söyügä susagan küñelgä
Taşkınday saf hislär tügelä.
Serle köç bar sıman,
Yöräk tä yarsıgan,
Bar halät göl-nazga kümelä.

Mähäbbät yazlarga törengän,
Kış buyı tilmerep yörelgän.
Canımda ällä ni,
Ällä-li, bällä-li –
Mähäbbätter inde. Kem belgän?..



* * *

Tatlı sagışım,
Serle tabışım.
Ällä yazmışım?..
Ällä yalgışım?..

Önemme?.. Töşem?..
Hörmä cimeşem,
Minem öleşkä
Tigän kömeşem.

Böten halätem,
Barlık hayatem,
Sin – berdän-berem,
Sin – mähäbbätem.



Ägär çınlap yaratmasañ...

Ägär mine yaratmasañ,
Töşemä dä kermäs ideñ.
Şatlanıp häm kanatlanıp,
Yanımda da yörmäs ideñ.

Ägär çınlap yaratmasañ,
Kulıñ birer ideñmeni?..
Eşeñ taşlap, cil-cil atlap,
Yanga kiler ideñmeni?..

Ägär mine yaratmasañ,
Küzgä turı bakmas ideñ.
Küñeleñneñ iñ türendä
Naz yılgası akmas ide.

Ägär çınlap yaratmasañ,
Mine koçar ideñmeni?..
Söyläşkändä süzläreñä
Söyü kuşar ideñmeni?..

Ägär mine yaratmasañ...
Ägär çınlap yaratmasañ...



Miña üzeñ kiräk...

Küzläremä kara –
Anda sineñ surät,
Erak tügel ara –
Canda sineñ surät.

Küñelemä küz sal –
Anda sineñ räsem.
Hıyalımda da sin,
Uçlarımda – yäşem...

Ütkänemdä dä sin,
Bügengemdä dä sin...
Ul surätkä, belmim,
Närsä diyep däşim?..

Räsem, salkın räsem...
Närsä birä surät?..
Añlarsıñmı? Yukmı?.. –
Miña üzeñ kiräk...



* * *

Säbäp tä kiräk tügel,
Şärab tä kiräk tügel.
Sin üzeñ isertäseñ,
Canga hör his kertäseñ.

İlham da kiräk tügel,
Cihan da kiräk tügel.
Sin üzeñ dä citäseñ,
Koyasıñ küñel bäsen.

Yaktı da kiräk tügel,
Çatkı da kiräk tügel.
Üzeñ – nur çıganagı,
Yaktılık yırganagı.

Yoldızlar... kiräk tügel,
Bar kızlar... kiräk tügel.
Sin – koyaşım, ayım da,
Sin – küñel sarayımda!



Kızıl alma...

Kızıl alma kullarıñda –
Kaynar koyaş şikelle.
Şul almañnı miña suzdıñ –
Yöräk şaştı, sikerde.

Bitläreñ dä alma kebek –
Tulıp peşkän, kızargan.
Küñeleñä yazlar kilgän,
Bozlı kıllar kuzgalgan.

Elmayasıñ da köläseñ,
Sin – yaznıñ üze kebek.
Kızıl almañ, serle almañ
Küñeleñ küze kebek.

Kullarıñda kızıl alma –
Ul sineñ ut-yöräkter.
Tulı bähet öçen minem
Yöräk kenä kiräkter.

* * *

Bolay bulmas çüldä dä...
Cäyge esse çellädä
Tuñdırma aşıy kızlar.
Yörägem yarsıy, kızlar!..

Yörägem yarsuları!..
Äyterseñ kar suları –
Basmas tuñdırma gına.
Canga kundırma gına
Tuñdırmanıñ tuñnarın.
Tıñla yöräk moñnarın,
Küñel kılı çıñnarın...

Cäyge esse çellädä
Yazlar belän çirlä dä,
Niçek tik yatmak kiräk?!
Yarsıp sikerä yöräk...

...Tuñdırma aşıy kızlar.
Yörägem yarsıy, kızlar!..
Basmas tuñdırma gına...
Basmas tuñdırma gına...

* * *

Zäñgär kükneñ upkın-dulkınında
Turgay bulıp canım atına.
Kayda, diyep mine soramagız –
Min bähetneñ öske katında.

Bar yörägem kubarılıp tibä,
Mähäbbätkä küñel talpına.
Ällä kayda, diyep uylamagız –
Min söyüneñ öske katında.

Ällä kayda tügel, monda gına,
Min hıyalnıñ uynak atında.
Äydä, bergä, sez dä soñlamagız –
Min hıyalnıñ öske katında.

Ak bolıttay ak uylarga çumıp,
Basıp toram dönya çatında.
Kaya kitte, diyep soramagız –
Min yäşäüneñ öske katında.

Cibärmim

Sin genä, sin genä
uyımda.
Sin minnän kitärgä
cıyınma.

Söyüdän tilergän
cülär min.
Berkaya, berkaya
cibärmim!



Kötä-kötä...

Kötä-kötä kötek buldım,
Kilmäüeñder, mögayın.
Uy häm üzem tik utıram
Cirdä tön bulgan sayın.

Uyım gadi uy tügel şul,
Anda sin, tik sin genä...
Kötä-kötä “ütük” buldım,
Kil yanıma, kil genä...



* * *

Min sine ber kön buyına
Uylamam, digän idem.
Uylamagan keşe bulıp
Kılanam digän idem.

Min sine ber kön buyına
Sagınmam digän idem.
Yörägemne karga saldım –
Kabınmam digän idem...

Yuk. Bulmadı. Minem küñel
Moñga uralgan kebek...
Ber kön tügel, ber säğat tä
Sinsez toralmam kebek.



Ber cılı süz...

Ber cılı süz kötä küñel:
berkayçan da
işetmägän,
yarattırgan,
üçeklägän.

Ber cılı süz kötä küñel:
yörägemne
kubarırlık,
hisläremne
tugarırlık.

Ber cılı süz kötä küñel:
küñelemne
buşatırga,
cannı canga
kuşa torgan.

Ber cılı süz kötä küñel:
hıyallarga
iltä torgan,
bähet sazın
çiyertä torgan.

Ber cılı süz kötä küñel:
salkın boznı
ereterlek,
can üzägen
çemeterlek.

Ber cılı süz kötä küñel...

Äyterseñme?..

Su taşıy kız...

Su taşıy kız Ak çişmädän,
Köyäntä, çiläkläre...
Köyäntäsen koçıp algan
Ak şoma beläkläre...

Su taşıy kız Ak çişmädän,
Susavın basmakçımı?..
Yulına söygäne çıksa,
Yörägen açmakçımı?..

Su taşıy kız Ak çişmädän,
Tamçıday adımnarı...
Mölderämä küzlärendä
Saf çişmä çalımnarı...

Su taşıy kız Ak çişmädän,
Ofıkka karıy-karıy...
Tolımlar ürgän çäçlären
Yaz cile genä tarıy...

Su taşıy kız Ak çişmädän...
Eh, çişmä bulsañ ikän!..
Par çiläkneñ irnävennän
Su belän tulsañ ikän!..

Su taşıy kız Ak çişmädän,
İrenendä çık suı...
Yulına söygäne çıksa,
Kuzgalır can yarsuı...



Sineñ küzlär

Yaktı koñgırt küzlär,
Min tabıngan küzlär.
Küktä yoldız bulıp
Tön kabıngan küzlär...

Bähet söyeneçe
Gel agılgan küzlär.
Ömet çatkıları –
Nur kagılgan küzlär.

Küzläreñne kürep,
Meñ abıngan süzlär...
Canım aşa karıy
Min sagıngan küzlär...

Yaktı koñgırt küzlär,
Moñ çagılgan küzlär...

Sagınu c ırı

Utlı söyü hisläremne
Kömeş ceptäy sapladım.
Ak bolıtka hatlar yazdım,
Aktı-kitte hatlarım.

Koyaş nurlarına törep,
Siña sälam cibärdem.
Ul ofıkka battı-kitte,
Yözgä tönge cil bärde.

Ay yaktısın karam itep,
Siña şiğır yulladım.
Küp tormadı, kaçtı-kitte –
Tañ atuga – ber adım.

...Cil artınnan hatlar yazdım,
Oçtı-kitte hatlarım...
İñ-iñ kaynar hisläremne
Küreşügä sakladım...



Äydä, min kötüçe bulam...

Äydä, min kötüçe bulam,
Kitäbez tauga karap.
Elmayıp kön karşılarsıñ,
Cildä çäçeñne tarap.

İrtä tañnan min kötüdä,
Sin uçakta kalırsıñ.
Tirmäbezneñ tirälären
Üz kulıña alırsıñ.

Kiç citkändä min kaytırmın
Huş isle uçagıña.
Ä sin kilep sarılırsıñ
Kaynar kiñ koçagıma.

Min sine söyep tuyalmam,
Nazlarmın, irkälärmen...
Eh, sineñ ködrä çäçläreñ,
Çäçtäge täñkäläreñ...

...Küpme yansañ, tartışsañ da,
Bulmıy tormışka yarap...
Äydä, min kötüçe bulam,
Kitäbez tauga karap...



Aynıñ yaktısında

Bolıt arasınnan,
Tönneñ karasınnan
Uyçan gına güzäl ay çıga.

Dönya hozurında,
Aynıñ paq nurında
Küñel belän yözär cay çıga.

Aynıñ yaktısında,
Ellar çatkısında
Utıram min kükkä küz salıp.

Ayım balkıy kölep,
Salkın cılı örep,
Kara töngä kaynar ez salıp.

Başta ayga karıym,
Annan yoldız sanıym,
Üzem belän üzem söyläşep.

Ä ay uyçan gına,
Bik oyalçan gına
Küktä yata nurın öläşep.

Soñgı yafrak
( közge cır)

Sarı közneñ moñsu-uyçan cile
Yafraklarda sarı fal açkan.
Ak kayınım bügen boyık kına –
Soñgı yafrak yılıy agaçta.

Özelde dä töşte soñgı yafrak,
Ak kayında sagış sizelde.
Bar hıyalım çälpärämä kilde,
Ömetlärem sünde, özelde.

Cilfer-cilfer kilä soñgı yafrak
Sagışlarga çumgan irtädä.
Ak kayınım bügen boyık kına –
Küñlem yılıy, küñlem ürtälä.

Soñgı yafrak cillär belän kitte,
Ömetlänep közlär tañına.
Ak kayınım bügen ber süz däşmi –
Közlär iñde minem canıma.

Özelde dä töşte soñgı yafrak,
Ak kayında sagış sizelde.
Bar hıyalım çälpärämä kilde,
Ömetlärem sünde, özelde.

İldar abıy
İldar Yüzeyev istälege

Küñellärne telep töşä,
Yöräklärne meñ yaralıy
Sineñ yuklık, salkın buşlık,
İldar abıy, İldar abıy...

Ap-ak kışnıñ moñlı köne.
Böten canım gamgä tarıy.
Sinsez avır.
Karlar yavar,
İldar abıy, İldar abıy...

Änä, dımlı täräzädän
Moñsu itep koyaş karıy.
Ul da sine sagınadır,
İldar abıy, İldar abıy...

...Yazlar citär, karlar kitär,
Tamçı tamar bertuktamıy.
Küzem yäşle. Kemder däşte:
“İldar abıy, İldar abıy...”

Yafrak bulıp şıbırdaşkan
Gomerlärne yıllar sanıy...
Kol Galidäy basıp tora
İldar abıy, İldar abıy...

Tupıl mamıgı

İyün başı. Tupıl mamık koya.
Bar cihanga çäçä aklıgın.
Cäy eçendä ak kar yavamıni –
Nindi serle kön bu, aklı kön!..

Täräzädän kerä, işeklärdän –
Anda-monda tupıl mamıgı.
Çäçläremä kungan ak mamıktan,
Äni, küñel sine tanıdı...

Sineñ dä çäç tupıl mamıgıday,
Üze yomşak, üze ak kına.
Ak tös siña bik kileşä, äni –
Köläç çagıñ, matur çak kına...

...İyün başı. Tupıl mamık koya.
Äyterseñ lä dönya ak bolıt...
Här yıl yaugan mamık
äniyemneñ
Çäçlärenä kungan ak bulıp.

Tatar yäşläre gimnı

Bezdäge gorurlık
Meñ zatka torırlık
Bezdäge gorurlık citärlek.
Halkıbız öçen lä,
Ut-yalkın eçendä
Barırbız taularnı kütärep.

Uyan, tatar!..

Uyan, tatar!.. Uyan halkım!..
Kütärel!..
Bu häleñdä babañ kürsä,
ürtäler.
Alda bezne bik küp eşlär
kötäder,
Tatar bulsañ, tatarlıgıñ
kütär ber!..

Yoklap yatma, sikerep töş
yataktan!
Änä kemder muyınıña
bau takkan,
Kollık bavı tışaulagan
här yaktan,
Ükeneçlär yılap kaldı
eraktan.

Añıña kil, küzeñne aç,
tatarım!
Süzsez başıñ iyep toru
hatadır.
Bezne kötep alda al tañ
atadır...
«Bu – tatar!» – dip üzeñne ber
atattır...

Millät tösen cuygan halık
betäder,
Hör älämeñ zäñgär kükkä
kütär ber!
Kara pärdäñne alıp at,
çeltär el...–
Uyan tatar!.. Uyan, halkım!..
Kütärel!..


Sala tele

Kala tele tügelseñ sin –
Sala tele.
İ bülenmäs häm ser birmäs
Ana telem.

Avıl saklıy sineñ tirän
Tamırıñnı.
Ä şähärdä «Yavız İvan»
Yabırıldı.

Sabıylarıñ urıs tele
Koçagında.
Kara börket üz notıgın
Kuşa monda.

Yalgız kalgan Robinzonday
Bügen häleñ.
Kaya sineñ gorurlıgıñ
Häm mönbäreñ?..

Kaya sineñ kükräk kiyerep
Yörgän çagıñ?..
Kaya sineñ törkilegeñ?..
Kaya çañıñ?..

...«Ännä», – diyep açılmasa
Sabıy tele,
Kiläçäktä kem añlar soñ,
Telem, sine?..

Ütkännän kilgän ön

Suda yözä büränälär,
Yalgız büränälär...

Kayda sin, Bolgarım, Kaşanım?..
Kayda sin, Bilärem, Suvarım?.. –
Cide tön urtası citkändä,
Bu hakta küklärdän soradım.

Eraktan, ütkännär ilennän –
Çulmannan, Agıydel, İdeldän
Özeler-özelmäs ön kilde:
«Bez küptän bu cirdä yuk inde...

Tözedek Urdasın, hanlıgın,
Tau itep kaldırdık baylıgın.
Kaya ul bez salgan mämläkät? –
Ütkändä – hälaqät, hälaqät...

Kazannı ilbasar alganda,
(Yuk sezneñ aklanır hakıgız!)
Hanbikä, Ütämeşgäräyne
Känizäk ittegez, sattıgız.

Urıska kaldıgız ullıkka –
Sez häzer biş yöz yıl kollıkta,
Bez häzer biş yöz yıl kollıkta...
Bezneñ ruh kaygılı, borçulı,
Karşıda kiselgän kul çugı...

Tözedek Sarayın, Ükägen ,
Bez sezgä zur däülät kaldırdık.
Doşmannar mıskıllap köldelär:
«Ütkänen cimerdek, yandırdık!..»

Eraktan, göl-köllär ilennän –
Çulmannan, Agıydel, İdeldän
Süreler-sürelmäs ön kilde:
«Sal suda batalmas bit inde...»

Tatar moñına mädhiyä

İzräp yatkan tönne siskändergän
moñlı tavış min.
Küñellärgä kergän, canga señgän
ap-ak sagış min.

Buınnardan buınnarga küçkän
serle tabış min.
Cäber-zolımnarnı, darnı kiçkän
därtle çabış min.

Hör tatarnıñ canı aşa akkan
ap-ak sagış min.
Här yöräktä täqdir bulıp yatkan
açı yazmış min.



* * *

«Biye, biye, biye!» – disez,
biyemim.
Änä şundıy kire betkän
inde min.

«Cırla, cırla, cırla!» – disez,
cırlamıym.
Endäşmägez, süzegezne
tıñlamıym.

Bu süzlärneñ tamçısı da
hak tügel.
Küñel açıp yöri torgan
çak tügel.

Bäğırlärne taptap uza
zamana.
Huca bezgä «tämle telle»
tamada.

«Biyetä» dä, «cırlata» da,
«kölderä».
Üze, küzgä turı karap,
köl örä.

Şäp bulır da tamadaga
küz tisä...
Ul yalgannan, ul falştan
küz kisä...

...Ber bulmasa, yılıym äle
tuygançı.
Küz yäşlärem yalgan kölne
yugançı.

Ükäk – anıñ kaldıkları häzerge Saratovtan yırak tügel.




YuMOR
(şiğırlär)

Dekan bulasım kilä!..
(Berençe kurs studentınıñ hıyalları)

Citäkçelek eşenä min
Tugannän alıp ğaşıyq.
Nik cılı urın birmilär,
Küptännän kötäm şaşıp?..

...Starosta ittersälär,
Nişläsen beläçäkmen! –
Karşı äytkän şalapaynıñ
Kirägen biräçäkmen!..

Kultorg itep kuysalar,
«Tatfak» şaulap toraçak!
Minem kanatım astında
Ürlär yaulap toraçak!..

Proforg bulsam, akçanı
Kayırıp alaçak min!..
Biş kurs tipterep yörgäç,
Öç yılga kalaçak min!..

Kıyafätem koyıp kuygan,
Soklanamın közgegä:
Aspirant, doktor, professor
Bulaçak min tiz genä...

...Artka gına tipmäsennär –
Dekan bulasım kilä!..
Hiç yugı teläk ütäüçe
Çurtan bulası kilä!...

Bez kart idek...
Bez yäş idek...
Liliyä Gıybadullina.

Bez kart idek...
Sülpän koyaş idek,
Kışkı ak kar,
Tuñgan boz idek.
Yap-yäş kızlar,
Mähäbbätle kızlar
Ğaşıyq itte,
Şuña bozıldık.

Bez kart idek...
Häzer bez yäş inde,
Küñel çıklı,
Küñel çılangan.
Egetlärdäy oçıp
Çıgıp kittek
«Kartlık» digän
Kara çolannan.

Bez kart idek...
Häzer bez yäş inde,
Yöräk söyä,
Yöräk söyelä.
Yäş kızlarnıñ
Cılı koçagında
Kartlıknıñ da
Başı iyelä.

Hodaymı şulay kuşkan?

Hodaymı şulay kuşkan? –
Sin – mäçe, ä min – tıçkan.
Eçemdä davıl bulsa da,
Sizdermi yörim tıştan.

Yazmışmı şulay korgan? –
Sin – yırtkıç, ä min – korban.
Sin aulagan tıçkan halkı –
İsäpläp bulmıy torgan.

Añlıy almıym hiç kenä –
Sin – olı, min – keçkenä.
Minem küñeldä izgelek,
Sinekendä – üç kenä.

Uylap kuyamın kayçak –
Sin – tiran, ä min – kaçak.
Aldıñda söt, kaymak... Ä min
Yörim bulganın aşap.

...Toram äle baş kaşıp –
Sin – söygänem, min – ğaşıyq.
Duslaşıyk, yä korban it –
Mäñgelekkä huşlaşıyk.


Mindäy keşegä...

Mataydan da oçkan bar,
Kızlarnı da koçkan bar.
Matay, kızlar – «çüp» ikän ul,
Öy bazında tıçkan bar.

Tön yoklatmıy häşärät,
Yoklamagaç, kaça rät.
Matay, kızlar uyda da yuk –
Yardäm itmi täharät.

Bitne dä yuıp karıym,
Küzne dä uıp karıym.
Yokı tuymagaç, äyt äle,
Min soñ kaylarga barıym?..

Alıp kayttım ber mäçe,
Avılda ul iñ yäşe.
«Tınıçlandıñmı soñ, tugan,» –
Dip soranıp yörmäçe...

Berse takta kimerä –
Simergännän simerä.
İkençese şatır-döber
Bazda nider cimerä.

Sükmim dä, yanamıym da,
Matayga karamıym da.
Kızlarga oşıym äle, dip,
Çäçemne taramıym la...

Añlamasın berse dä –
Kunam häzer kürşedä.
Üz öyendä üz köye yuk
Mindäy yuaş keşegä.

Kotyum kiyärgä mikän?

Vakıt-vakıt küz töşeräm
Kostyumıñ, çalbarıña...
Kilergä dä kurkam häzer
Min sineñ yannarıña.

Karaşlarıñ citdi-citdi,
Kıyafäteñ – akıllı.
Sine kürgän yegetlär dä
Ber tavıştan “ah” ordı.

Çittän torıp karaganda,
Mögallimä kebek sin.
Aspirantura betergän
Ber ğalimä kebek sin.

Deputat kız şikelle sin,
Citäkçe “apa” sıman.
Tik kostyum, çalbar artında
Gadi kız yata sıman...

...Ut kapkanday çabar idem
Min sineñ yannarıña...
Yon kabara, küzem salsam,
Kostyumıñ, çalbarıña...

...Telne teşläp karap toram –
Närsä diyärgä ikän?..
Sineñ yanga kiler öçen
Kostyum kiyärgä mikän?..

Akça äyläneşe...

Kiştä-kiştä arakılar,
Öyem-öyem sıralar.
Konyakları, şärabläre
Kızıktırıp toralar.

- Abzıkayım, alıp cibär, -
Di satuçı. – Salıp cibär...
- Apa, äydä, ber aknı al,
Yä bulmasa, konyaknı al!..

Töker, äydä, dönyasına,
Dönyası – et oyasına!..
Eçä-eçä tuganbız bez,
Başta täpi yuganbız bez...

Tormışıbız eçä-eçä,
Alga bara küçä-küçä.
Tugan könnär, yübileylar,
Här datada yübiley bar.

Bakça, mäktäp, çıgarılış,
Yaşäü rähät, yäşäü kırıs...
İnstitut, tulay torak –
Monda bäyräm uñaylırak.

Öyläneşü, bäbi tuyı,
Keşe eçä gomer buyı...
Meñ kışlıy da, meñ cäyli ul,
Korı cirdän bökäyli ul...

Gomerebez bara şunda,
Şeşä tavı arasında...

Click or select a word or words to search the definition