Şiğırlär - Kadriyä Fatıhova-Badrtdinova

YaÑA ŞİGIRLÄR...
Yaznı büläk itäm...

Büläk itäm sezgä yaznı duslar,
Nazlı nurga kümgän koyaşın.
Cemeldäşep tamgan tamçıların,
Tılsımnarga tulı sulışın.
Çıltırap akkan şayan görläveklär,
Yazgı saflık tik sezneñ öçen.
Yöräklärgä salam ihlas söyü,
Tatıgız sez mähäbbät köçen.
Sezneñ öçen,barı, sezneñ öçen
Almagaçlar çäçäk atuı...
Bar dönyanı sihri moñga kümgän,
Därtle sıyırçıklar kaytuı.
Börelärneñ tulgan mizgellären,
Bozlar kubıp yılga taşuın.
Yazgı ömet,yazgı hıyal birgän
Läzzätlärdän yöräk şaşuın.
Şuşı büläklärne kabul itep,
Riza bulıp,duslar,alıgız!
Bar dönyanı yämgä törgän yaznıñ,
Kaderlären belep kalıgız!

İseñdäme bäğrem...

İseñdäme bäğrem ul vakıtlar?
Görlävekle, yazgı kiçälär...
Äle bulsa şuşı çıltıraular ,
Yäşlegemä mine iltälär.
Mähäbbätkä tulı yazlarıma,
Alıp kayta mine yazgı su.
Häteremä töşsä ul vakıtlar,
Cannarıma härçak yamansu.
İskä töşä utlı karaşlarıñ
Yazgı küktä yoldız atılsa.
Bik azga da sinsez kalmas idem,
Ul çaklarga kire kaytılsa.
Här yıl sayın, yaznıñ islärenä,
İsergändäy çumam hislärgä.
Tik ber genä kaytıp kiler idem,
Söyulärgä törgän kiçlärgä.
Ofıklarnı al töslärgä manıp,
Bezne nazga kümgän tañnarga.
Yäşlek därten alıp kaytır idem.
Sagışlardan sulgan cannarga .

Üpkälämä irkäm...

Üpkälämä irkäm ,üpkälämä
Gomeremne sinsez ütkängä.
Tormış yullarımda sine tügel,
Başkalarnı yuldaş itkängä.
Üpkälämä zinhar,üpkälämä
Gafu itçe, sinnän ütenäm!
Başkalarnı yar itkänem öçen,
Min üzem dä çiksez ükenäm.
Kiçerä kür, yäşli söygän yarım,
Hıyallarım sindä bulganga.
Töşläremne sineñ belän gizep,
Tañnarımda moñga tulganga.
Söymägängä söykälgänem öçen,
Kiçerä kür, soñlap bulsada.
Yörägeñdä yalgışlarım yargan,
Yaralardan ezlär torsada.
Küñeleñneñ sünder sagışların,
Yafraklarga küçä kürmäsen!
Közlär äle bezgä kiräk tügel,
Yaşäü därte sünmi,dörläsen!
Üpkälämä inde.üpkälämä...
Yörägemneñ gel sin türendä.
Zäñgär küzläreñneñ zäñgärlegen,
Küräm köndä, dönyam kügendä.

Moñsulana küñel...

Ällä nigä küñel moñsulana,
Eçem poşa, tik, ber säbäpsez.
Ällä niçek kenä ütä gomer
Yäşim kebek kayçak yöräksez.

Şuşı mikän ällä gomer köze?
Därtle hislär kalgan cäylärdä.
Ciläk cıyıp yörgän urmannarda,
Peçän çapkan yäşel cäyläüdä.

Sarı basularga karap toram,
Äyterseñ dä közge karşında.
Yakkan uçaklarnıñ kölläre dä,
Kalgan zäñgär toman astında.

Eh,yäşise ide,ber yanası...
Közge kırau kilep sukkançı.
Min uzası çuar yullarımnı,
Yafrak burannarı yapkançı.

Tormış yılgasında tagın da ber,
Agar idem taşkın hälendä.
Kışkı davıl bulıp uzar idem.
Cäydän közgä küçkän mälemdä.

Ber Allah...

Dönyalıknı Allah büläk itkän,
Tüşäk yasap ul cirne birgän.
Här keşeneñ üz yazmışın yazıp,
Barıbızda izge can kürgän.

Bändälärneñ hakın beler öçen,
Sınar öçen birgän avırlık.
Cibärgän ul cirgä ilçelären,
Keşelekkä iman salırlık.

Kodräte kiñ Allah Täğaläneñ,
Barısı da anıñ kulında.
Anı tanımagan hälaq bulır,
Tabır cähännämne yulında.

İzgelärne ocmahlarga yullap,
Güzäl cännätenä aldırır.
Namussıznı kılgan ğamälläre,
Tämuğ utlarında yandırır.

Savab cıyıp uzsın gomerebez,
Täübä itik kılgan eşlärgä.
Rähmätlären teläp Allabıznıñ
Haklı tormış sorap yäşärgä.

Hak Täğalä cavap alası...

İke küzne, Allah, tigez birgän,
Ä karaşlar bik küp törledän.
Beräülärgä tormış ak häm kara,
İkençelär kürä tösledän.
Kayberebez ciñel ciñgän eşne,
Bik küplärgä uyga sıymagan.
Yahşılıknı alga algannar küp,
Küp yamanlık eşläp tuymagan.
Kemder itä bulganına şöker,
Vakıtında barın añlagan.
İman belän üz tormışın nurlap,
Allah kuşkan yuldan atlagan.
Şaytan yulın saylauçı da baytak,
Mal tuplauga canın ul satkan.
Kara könläş belän könen kötep,
Hösetlekkä başınnan batkan.
Mögcizaga tulı cir yözendä,
Bik küp törle Ädäm balası.
Niçek kenä cirdä törlänsäk tä,
Hak Täğalä cavap alası.
Aldan uylık şuşı ğamällärne,
Hatalardan arçıyk añnarnı!
İhlas küñel belän täübä itik,
Nur eçenä salıyk cannarnı!

Üzem öçen...

Üzem öçen kilgän min bu cirgä,
Üzem öçen - korgan tormışım.
Üzem öçen - özelep söygän yarım,
Hoday büläk itkän yazmışım.
Üzem öçen - minem balalarım,
Üzem öçen - kılgan eşlärem.
Üzem öçen - gafu itülärem,
Küñelemdä bulgan hislärem!
Üzem öçen - bulgan uñışlarım,
Üzem öçen - tamgan küz yäşe.
Üzem genä belgän yalgışlarım,
Berkemneñdä anda yuk eşe!

Därt häm Därman...

Därt häm Därman yäştän dus idelär,
Kiñäşläşep gomer ittelär.
Ber beresen añlap ,tatu gına,
Gomer közlärenä cittelär.
Därmanıbız, kinät, moñsulandı,
Därttän aralana başladı.
Häle kämegänen toygan Därman,
Därt yagına küzen taşladı.
Ä Därt haman unsigezdä kebek,
Çatkı oça baskan cirendä.
Nigä tormış şulay ayausız soñ,
Kayda şundıy çagım minemdä?".
Başın aska ide Därmanıbız:
"Eh,kayda soñ uzgan gomerlär?
Tipterergä ide tagın da ber,
Sünep ölgergänçe kümerlär".
Duslık bette duslar arasında,
Därt kürälmi häzer Därmannı.
Tik Därmansız berni eşli almıy,
Uza almıy Hoday birgänne.

Mähäbbätkä süzlär kiräk tügel...

Mähäbbätkä süzlär kiräk tügel,
Mähäbbättä yöräk serläşä.
Cannar eri cankay kuyınında,
İke kaynar sulış berläşä.
Küzlär irkälänä karaşlardan,
Tänne läzzät çornıy sorausız.
Tatlı yäşlär uynıy kerfeklärdä,
Şatlık yäşe bigräk çıdamsız.
Ay,yoldızlar kiräk tügel hätta,
Küñel türen koyaş bizägän.
Cannar kuşıludan moñnar tuıp,
Mäñgelekkä hislär bäylängän.
Bılbıl bulıp sayrau kiräk tügel,
Süzlär artık söyü bulganda.
Küz nurınnan tugan çatkılardan,
Yöräklärne yalkın alganda.

İke "Min"...

Ber tänemä ike «Min» caylaşkan,
İkesenä barı ber yöräk...
Özgälilär minem ber canımnı
Här kaysında üzençä teläk.
Berse «Äye»disä,tege karşı kilä,
Ayak çala alga barganda.
Cankayıma uçlap borıç sibä,
İkençese balga manganda.
Kannarıma toz koyalar tämam,
Bägıremne bülep telälär.
Yörägemneñ tınıçlıgın alıp,
Üzägemne tämam özälär...
Cilättelär,tämam cilättelär,
Bolgattılar yomşak küñelne.
Tüzemlekneñ çige tämam bette,
Añlamıylar rähät tügelne.
Ber kazanga ike at başınıñ,
Sıymaganın beläm bik yahşı.
İke «Min»gä niçek huca bulıym,
Niçek barıym alarga karşı?

Parlı tormış...

Ädäm belän Havanı da ALLAH,
Parlı itep cirdä yaratkan.
Ä alardan tugan balalarnı,
Törle yazmış birep taratkan.
Tormış yäme- parlı buludadır,
Avır yögen bergä tartuda.
İke cannıñ bergä kuşıluı,
Yaşäü tämen bergä tatuda.
Tulı tormış şuşı buladır ul,
Işanırga keşeñ bulganda.
İñne-iñgä teräp tormış yulın,
Citäkläşep bergä uzganda.

İzgelek....

"Min izgemen!" -diyep maktanmıylar,
İzgelek ul - Allahtan büläk!
Teläp kenä izge bulıp bulmıy,
İzge bulıp tuarga kiräk.
İzgelek ul-böyek sıyfatlardan,
Urınlaşkan yöräk türenä.
Yardäm kirägen ul härçak belä,
Avırlıklar aña kürenä.
İzge küñel telim barçagızga,
İzgeleklär eşli küregez!
Barıbızda Ädäm balaları,
Onıtmagız şunı,belegez!

Zaman ahrı...

"Zaman ahrı bula!"- dilär, tizdän,
Cir teteräü dilär kötelä!
Vulkan taşıp tirä-yaknı kaplıy,
Okeannar erep kitelä.
Küräzäçe halık söylävençä
İsän kalır barı tik Seber.
Bar tirä-yak dörläp yanar imeş,
Bezneñ başlar inde ni kürer?
Närsä genä inde söylämilär,
Niçek kurkıtırga belmilär...
Ahrı zaman bolay da bit citkän,
Ällä inde şunı kürmilär?
Ahrı zaman - cirdä imansızlık.
Ahrı zaman - cirdä vähşilek.
Ahrı zaman - akıl saylıgıdır,
Tuganına bulgan karşılık.
Ahrı zaman - täübä itä belmäü,
Ahrı zaman - gönah ileder.
Ahrı zaman - miherbansız bulu,
Şaytannı dus itep kürüder.
Bügenge kön şuşı sıyfatlarnı,
Sıydırgan ul teläp üzenä.
Zaman ahrı şunda tügel mikän?
Sezneñ küñel nilär sizenä?

Kurka belik Hodaydan...

Gomerlärneñ ozınlıgın
Ber Alla tik beläder.
Nilär genä kılansak ta,
Barısın da küräder.
Ni çäçsäñ,şunı urırsıñ,
Arpadan boday tumas.
Yavızlık çäçep berkayçan,
Yahşılık cıyıp bulmas.
Hoday büläk itkän gomer,
Yaktılıkka omtılsın,
Ä yavızlık çıdıy almıy,
Üz başına kotırsın.
Örgän etkä karşı örep,
Ciñep bulmıy,beläbez.
Etlär belän etlär bulsak,
Kaya barıp citärbez?
Balalar bar üsteräse,
Nindi ürnäk birerbez?
Üzebezneñ kılanışnı,
Onıklarda kürerbez.
Alamadan ürnäk almıyk,
Arpa kötmik bodaydan.
Cavap birü ansat bulmas,
Kurka belik Hodaydan.

Tormışıma kilep kerdeñ...

Tormış yullarımnıñ urtasına,
Avırlıklar belän citkändä.
Bar ömetem çälpärämä kilep,
Yözläremneñ nurı kitkändä.
Yalgız gına tartkan tormış yöge,
Avırlaşıp iñne baskanda.
Salkın tüşäklärne cılıtalmıy,
Yoklıy almıy tañnar atkanda.
Kilep kerdeñ minem tormışıma,
Canım bähetennän tilerde.
Yörägemdä ömet çäçäk attı,
Kükne nurlap koyaş kürende.
Cilkän bulıp bastıñ cilgä karşı,
Kar -yañgırdan mine kapladıñ.
İñnäremä iñnäreñne teräp,
Yanäşämnän minem atladıñ.
Mäñgelekkä bergä bulırbız dip,
Bähetemnän şaşıp iserdem.
Dönya bulgaç törle hällär buldı,
Barısın da canıyım kiçerdem.
Bergä çaknıñ qaderlären belep,
Kügärçennär kebek görläşep,
Eh,yaşäsäk ide söygän yarım,
Dus tügellär yanır könläşep.
Tormış sınauların uza alsak,
Bireşmäsäk açı cillärgä.
Bergälekneñ tatlı cimeşlären,
Nasıyp bulır bälki tämlärgä!

*******

Gomeremneñ çäçkä çagı ide,
Ğaşıyq buldım siña özelep.
Bergä uzar kebek ide tormış,
Şatlık –kuanıçka kümelep.
Büläk ittem siña yäşlegemne,
Büläk ittem siña üzemne.
Yalgan bulganlıgın añlamıyça,
Kabul ittem härber süzeñne.
Altın baldak miña kidergändä,
Çiksez ide minem şatlıgım.
Söygänemneñ cılı kuyınında,
Kiler kebek ide kartlıgım.
Vakıtlıça buldı barısıda,
Baldaklarnıñ nurı tiz sünde.
Här tugan kön yaña yara salıp,
Küzläremne yäşlärgä kümde.
Hisläremne salıp tapadıñ sin,
Gomeremneñ inde tañında.
Kırau suktı şunda yäşlegemne,
Şau çäçäkle kersez çagında.
Yaşärgä köç birep ulım tudı,
Yaña tamır cäyde tormışım.
Tamırlarım tiränäygän sayın,
Yaña sınau birde yazmışım.
Barısı da küptän artta kaldı.
Sin dä inde gürdä küptännän.
Onıtırga küpme tırışsamda.
Hätirälär kilä ütkännän.

Keşe bulıp kalıyk...

Gel şatlıktan gına bulmıy tormış,
Äzer bulu kiräk barsına.
Tırışırga kiräk bireşmäskä,
Avırlıklar bassa karşıña.
Ciñel tügel tormış yulın ütü,
Kalgan keşe yuktır sınausız.
Öleş belän birä bezgä Allah,
Rähät tormış bulmıy çamasız.
Könnär tönnär belän almaş kebek,
Şatlık belän kaygı yänäşä.
İrsemiçä yäşi belsäk ide,
Keşe bulıp soñgı köngäçä!

Özgälänmä irkäm...

Yarat dimim siña,özgälänmä!
Min yaratam,miña şul citkän.
Sinnän söyü ömetlänep kötep,
Yartı gomer uzıp ta kitkän.
Yarata bir äydä üz-üzeñne!
Añlarsıñ da läkin soñ bulır.
Yalgız bulu rähät bulmas irkäm,
Bar tormışıñ sagışka tulır.
Alga-artka karagannı kötmi,
Yäş gomerlär uza da kitä.
Bergälekneñ qaderlären belep,
Yaşäülärgä canım ni citä?

Bähet...

Bähetne bez niçek añlıybız soñ,
Kemnär, kaysı cirdä kullana?
Minem öçen Bähet-tugan härber köndä,
Tañ nurları belän başlana.
Hoday birgän gomer-ul zur Bähet,
Tazalıgı belän birelsä.
Şöker itep birgän barısına,
Riza bulıp köneñ kürelsä.
Bezne tapkan,nazlap bezne bakkan,
Äti-äni isän bulsalar.
Kaytkan çakta tugan nigezlärgä,
Kapka açıp karşı alsalar.
Tugannarıñ tatu bulsa Bähet,
Urtak bulsa şatlık -kaygılar.
Küñellärdä bulsa yahşı uylar,
Taza bulıp tusa sabıylar!
Här närsädän Bähet tabıp bula,
Belü kiräk yäşäü qaderen.
Terelärne hörmät itä belep,
Ülgännärneñ karıyk kaberen.
Dönya yortı-sınau yortı bit ul,
Kemnär üzen-niçek kürsätä.
Sınau birep Allah ,sabırlıkka
Döreslekkä bezne öyrätä.
Bar närsädä Bähet kürä belsäk,
Sabır kalsak avır çaklarga.
Yanäşädä bezneñ Allah bulır,
Ciñel bulır alga atlarga!

Mähäbbätem...

Gayıbebez tigez ikebezneñ,
Arabızga kerttek yatlarnı.
Riza buldık yazmış cillärenä,
Onıtırga teläp antlarnı.
Bergä bulu nasıyp bulmadı şul,
Onıtırga köçem citmäde.
Sin atladıñ härçak yänäşämnän,
Küz aldımnan sınıñ kitmäde.
Küñelemneñ tirän poçmagında,
Gel çatkısı buldı ömetneñ.
Bik küp yıllar ärnülärdä yäşäp,
Küreşüne kötep özlektem.
Hisläremä huca bula almıy,
Canım urtalayga bülende.
Yörägemneñ ärnüenä tüzmi.
Küzläremnän yäşlär tügelde.
Küpme yıllar saklap serläremne,
Küñelemä avır yök saldım.
Uylarımda sineñ belän bulıp,
Hıyalımnan sihri naz aldım.
Açısın da,töçesen dä tatıp,
Oçraştık bez közlär citkändä.
Mañgaylarga inde sırlar sızıp,
Çäçkäylärgä ak bäs sipkändä.
Tik mähäbbät kalgan yäş köyençä,
Urın alıp yöräk türendä.
Yaşägän ul canga nurlar sibep,
Ömet birep tormış kügemdä.

Yaratasım kilä...

Yaratasım kilä minem şaşıp,
Ğaşıyq bulıp yanıp-köyäsem.
Söygänemne sihri nazga törep,
Söyeläsem kilä,söyäsem!
Taralasım kilä koçagında,
Yörägemne büläk itäsem.
Söygänemneñ bähet nurı bulıp,
Gomeremne kilä ütäsem!
Mähhäbbätneñ tatlı şäräplären,
Kilä minem tatıp karıysım.
Bähet diñgezenä bergä çumıp,
Dulkınnarı belän uynıysım.
Mähäbbätneñ utlı çatkıları,
Canıma nur bulıp sibelsen.
Ğaşıyq cannı yalkın kamap alsın,
Yöräk mähäbbättän tilersen!

Bügen min,irtägä sin...

Aşlar belän bargan çakta,
Taşlar belän bärmägez.
Keşelärdän östen bulıp,
Kükkä borın çöymägez!
Kön artınnan tönnär bula,
Koyaşnı bolıt kaplıy.
Dönyalar da alsu tösle ,
Göllärdän genä tormıy.
Törle hällär buluı bar,
Bügen min,irtägä sin.
Bik biyekkä kütärelsäñ,
Töşkändä bulır çiten.
Uynap äytsäñ dä uylap äyt,
Räncetmä sin süz belän.
Keşelärdän kurıkmasañ,
Alla bar bezne kürgän.
Allabıznı sanla disäk,
İman tulır cannarga.
Tugan-tugannı belmi bit,
Niçek şunı añlarga?
Elek hatlar yazışkannar,
Tuganlık köçle bulgan.
Kürşe-külän tugannarday,
Görläşep yäşäp torgan.
Häzer başka sıymas hällär,
Bezgä yañalık tügel.
Ahırı zaman citä ällä?
Şomlanıp kuya küñel.

Sineñ küzlär...

Küzläreñä karap sineñ irkäm,
Bähetemne küräm üzemneñ.
Kalır idem mäñge-mäñgelekkä,
Karasında sineñ küzeñneñ.
Küzläreñneñ töpsez däryasına,
Kilä minem çumıp alasım.
Küz nurıñnıñ ber çatkısı bulıp,
Mäñgelekkä sindä kalasım.
Karaşıñnıñ kaynar yalkınnarı,
Yörägemne yalmap aldılar.
Cankayımnı sihri hiskä törep,
Küñelemä moñnar saldılar.

2.GOMER YuLI-OZIN SÄFÄR...(İKENÇE BÜLEK)

1.GOMER YuLI-OZIN SÄFÄR...

Gomerkäylär - ozın säfär,
Törle yullar, tuktalışlar...
Oçraşular, kaışular
Yugaltu-uftanışlar.
Kemnär atlıy , kem yögerä
Kauşap kala kayberäülär.
Sikältäle çokırlarda
Egılgannar äz tügellär.
Beräülärgä ak tös yakın,
Yahşılıkka ul omtıla.
Karañgılık saylauçılar
Bozıklıklar belä tula.
Bara torgaç säfär yulı
Näq urtaga ayırıla.
Berse Cännät , ikençese
Cähännägä kayırıla.
Dönya şulay yaratılgan
Yulnı härkem üze saylıy.
Nindi yuldan barganlıgın
Kayçagında soñlap añlıy.

2.CAN ÖZELÄ...

Moñ da tügel, zar da tügel...
Can özelä duslarım.
Yäş gomerlär artka çigä
Şunı sizä başladım.
Borılıp karagan bulam
Kaşlarımda kullarım.
Açulanmasınnar inde
Alda barır yullarım.
Könnän-kön aralar arta
Yäşlek tañnarı belän.
Erakta kalgan hislärne.
Yañarta bäbkä ülän.
Can özelä, can özelä
İrtäsendä, kiçendä.
Añlaşılmıy ikän barda
Ber gomerneñ eçendä.

3.GOMER KÖZE...

El mizgele alışıngan kebek
Gomer mizgelendä köz bula.
Üzäklärne özep, bäğırlärne telep
Küñellärgä közge şom tula.

Kemder barlıy artta kalgan ezen,
Yalgışular birmi tıngılık.
Kemder bireşmiçä alga atlıy
Anıñ öçen yuk ber karşılık.

Kemder ğaşıyq bula yaña başlap
Yöräklärdä sihri his kaynıy.
Mähäbbättän şaşkan cankaylarga
Kartayırga hiç vakıt kalmıy.

Şulay inde "Gomer"- digänebez,
Kemgä küpme kodrät birelgän.
Ä kaysıbız irtä kartayudan
Cirgä qadär başı iyelgän.

Yazmışlar da çittä kalmagandır
Kemne sınıy, kemne sındıra.
Kemgä közlärendä bähet büläk itep,
Kemnärneder yalgız kaldıra.

Gomer közlärenä kerü ber häl
Küñellärdä közlär bulmasın.
Cäyge köneñ sagışlarga çumıp
Ükeneçlär belän tulmasın.

4.GOMER BER GENÄ...

Kemgäder kiräk mähäbbät,
Kemder şöhrät yarata.
Däräcägä omtılgannar,
Yakının taptıy, sata.

Kemder aşap-eçep yäşi,
Kemne baylıkka tarta.
Bar tazalıgın kızganmıy,
Hätta namusın sata.

Kemder käyef-safa kora,
Tän ihtiyäcı tuymıy.
Hayvan räveşenä kerä,
Näfeskä huca bulmıy.

Barıbızda ber gomer bit,
Nik şunı añlamıybız?
Vakıtlı hiskä birelep,
Allahnı sanlamıybız.

Allah kuşkança yäşäsäk,
Tıyganınnan tıyılıp.
Küñellärdä torır ide,
Yaşäü şatlıgı tulıp.

5.KÄFENLEKNEÑ KESÄSE YuK DİLÄR...

«Käfenlekneñ kesäse yuk!»-dilär
Kemder bälki: «Bar!»- dip uylıydır.
Bar dönyasın akça belän bäyläp,
Mal cıyudan hiçber tuymıydır.
Ber genä yort citmi andıylarga,
Zatlı maşinası berniçä.
Barısın da satıp ala alsa,
Yaşär kebek mihnät kürmiçä.
Gomereneñ küpme buluı da,
Äyterseñ dä tora baylıktan.
Bu şaşunıñ säbäpläre nidän
Ällä mikän akıl saylıktan?
Birsä- birä hoday barın öyep,
Alganda da sorap tormıy ul.
Tazalıgın , gomeren alganda da
Baylıgına karap tormıy şul
Taza keşe alay kılanmastır
«Çama belmäü»- digän çir bardır.
Näfes kesäläre kiñnän bulıp
Küñel kesäläre bik tardır.
Tugannarın tugan kürä belmäs,
Doşman ezlär dus-işlärennän.
Ülçäülärdä gel dä akça bulır,
Mährüm bulır yaktı hislärdän.
Hoday birgän fani dönyalarda,
Çama belep yäşäü bik kiräk.
Baylık tuplau uyı belän şaşıp,
Rähät tormış kürgän bik siräk.

6.HODAYGA RÄHMÄT...

Hoday birgänenä riza bulıp,
Hoday birgän barın qaderläp,
Tugannarnı tugan kürä belep,
Yäşik äle duslar bergäläp.

Rähmät äytik tugan yaktı köngä,
Östäl tulıp rizık birgängä.
Küñelegez härçak irken bulsın,
Türdän urın birik kergängä.

Sin biräseñ ikän -hoday siña birä,
Cällämägez artık bulgannı.
Açu saklap, könläş belän yäşäp,
Räncetmägez kürşe-tugannı

7.BER ALLAH...

Işanganım ber Allah,
Uylarımda gel Allah.
Şatlansam da kaygırsam da,
Yannarımda gel Allah.
Birüçem dä sin Allah,
Aluçım da sin Allah.
Nindi eşlär başkarsam da
Kurıkkanım sin Allah!
Bar ömetem sin Allah,
Berdänber hucam Allah.
Cen-pärilärdän kotılıp,
Sıyınganım sin Allah,
İñ şäfkatle sin Allah,
Paqlardan da paq Allah.
Sin kiñlek belän birüçe,
Berdänber Gaziz Allah.

8.BER GOMER CİTMİ İKÄN...

Niçek kenä yäşäsäñ dä
Gomerlär uza ikän.
Tüzmästäy hällärne tüzep,
Yöräklär tuza ikän.
Ber gomerlär bigräk kıska
Nigä ikäü bulmagan?
Başkaylarga nik akıllar
Bez tuganda tulmagan?
Hodaydan birelgän yazmış
Telägänçä tukmagan.
Kayberäülär bardan çittä
Kakmagan da sukmagan.
Kemgä yazgan aldan-göldän,
Beräüne zarga mangan.
Yalgız tormış yöge basıp
İñnäre yalsız talgan.
Ber gomerlär citmi ikän
Tormış tämen tatırga.
Eh, kabattan bu tormışnı
Ber äylänep kaytırga.

9.BER ALLAH...

Allah karşısında başnı iyep,
Yöräklärgä kurku çornasak.
Barlıgıbız belän anı söyep
Canıbıznı ägär nurlasak.
İñ Böyek Zat - Allah bulganlıgın
Ber mizgel dä istän almasak.
İhlas küñlebezdän taşıp torgan
Dogalardan ägär kalmasak.
Ber Allahnıñ bezgä huca bulıp
Kolı bulganlıknı añlasak.
Dönyalıkta sabır bula belep
Rabbıbızga sıyınıp yaklansak.
Zäm-zäm sularıday bulsa namus
Tapkan mallar bulsa häläldän.
Dönya baylıgına baş imiçä
Çittä bula alsak harämnän.
Bargan yullar bulsa märhämätle
Uy-fikerlär bulsa izgedän.
Dönyalıkta gomer itüçegä
Bulıp kilsäk ägär ölgedän.
Niğmätenä törer bezne Allah,
Ruhi baylık birer cannarga.
Maktaularga layık itär bezne
Vakıtında kiräk añlarga.

10.ONITABIZ...

Allahnı iskä alabız
Kaygı häsrät baskanda.
Ata-ana kiräk bula
Uydan başlar katkanda.
Dus -, tugannarnı barlıybız
Burıç alırga bulsa.
Barısı da onıtıla
Kesägä akça tulsa.
Onıtıla Allahıbız
Hätta ata-anabız.
Çönki alardan başkada
Tormış kötä alabız.

11.KİLER UL KÖN...

Kiler ul kön-yöräk tuktap kalır
Kul-ayaklar yörmäs bulırlar.
Küzlärebez kürmäs koyaş nurın
Kolaklar da tonıp kalırlar.
Huşlaşırga vakıt citär berkön
Ayırılırga dönya yortınnan.
Ahirätkä açık bulır yullar
Äcäl tartır üze artınnan.
Yortlarıbız, tapkan mallarıbız
Başkalarga torıp kalırlar.
Cavap birer öçen cannarıbız
Allah karşısına barırlar
Gomer betkäç berkem yärdäm itmäs
Kotkaralmas Äcäl kulınnan.
Yäşlegeñ dä alıp kala almas
Soramas ul kızıñ-ulıñnan.
Ülgän tännär kalır karañgıda
Tönnär kaplar yaktı könnärne.
Mäñgelekkä koçagına alır
Cir yurganı cansız tännärne.
Hisap birü ciñellärdän bulmas
Gönahlarlardan tıyıla belmäsäk.
Namaz ukıp, urazalar totıp
Rabbıbıznı hörmät itmäsäk.
İzgelekkä aşkınırga kiräk
Barıbızga dönya kötkändä.
Soñlap ükenülär yärdäm itmäs
Sirat küperlären ütkändä.
Yä , İlahım, kiçer gönahlarnı
Ayırmaçı bezne täüfıyqtan.
Ahirättä nasıyp itsäñ ide
Bähet işeklären açıktan.

3.UZGAN GOMER-AKKAN SU...(ÖÇENÇE BÜLEK)

1.BERGENÄM...

Bergenämneñ bergenäse
Bulırga ide uylar.
Gomeremneñ yazlarında,
Yasarga ide tuylar.

Uylaganım uyda kaldı,
Yalgız gomer itelde.
Gomeremneñ çäçkä çagı
Bergenämsez sütelde.

Yalgız gomer yarsız yılga,
Akkan su uzgan gomer.
Bergenämsez közlär citte,
Bäğır özelä häzer.

Yazlarında tüzep bulgan
Yalgız avır közlärdä.
Bergenämsez uzgan gomer,
Sagış tüşi küzlärdä.

2.GEL TIRMALI TORMIŞ YuLLARIM...

Gel tırmadan torgan yullarımda,
Tırışamın alga atlarga.
Tırmalardan barsam barırmın da,
Tik üzemne birmäm taptarga.

Adım sayın yalgış, ällä yazmış...
Tırmalarnı şulay tezgänme?
Bireşmäsne ällä minem belep,
Şundıy sınaularnı birgänme?

Yaña tırma, başka yaña sızlau...
Ayak basar cir dä kalmagan.
Sızlanular belän tulı tormış,
Barmı ikän şunı añlagan?

"Anda basma, monda bas!"-dilär dä,
Tagın tırmalarga törtälär.
Sızlaularga däva digän bulıp,
Yaralarga borıç sörtälär!

Kemder kötä minem bireşüne,
Ömet itä minem küz yäşen.
Yäşläremne yotıp tırmalarnıñ,
Bökli baram oçlı här teşen.

3.TORMIŞ -SINAU...

Tormış sınıy, haman sınıy mine
Sındırırga ällä süz birgän.
Üläselär kilä kayçagında
Kem hälenä kemnär soñ kergän?
«Nigä şulay?»-digän sorau tua,
Açı yazmış kuymıy kamçısın.
Kayızlıy ul mine uñlap-suñlap,
Bar açısın, diyep, tatısın.
Kis, äydä kis, sına bar yaklap ta
Köçeñ citmäs bögep salırga.
Egılsam da yatıp kalmasmın min,
Rabbım yärdäm birer torırga.

4.YaRATASIM KİLÄ...

Yaratasım kilä minem şaşıp
Ğaşıyq bulıp yanıp-köyäsem.
Söygänemne sihri nazga törep,
Söyeläsem kilä, söyäsem.

Taralasım kilä koçagında,
Yörägemne büläk itäsem.
Söygänemneñ bähet nurı bulıp
Gomeremne kilä ütäsem.

Mähhäbbätneñ tatlı şäräplären
Kilä minem tatıp karıysım.
Bähet diñgezenä bergä çumıp,
Dulkınnarı belän uynıysım.

Mähäbbätneñ utlı çatkıları,
Canıma nur bulıp sibelsen.
Ğaşıyq cannı yalkın kamap alsın
Yöräk mähäbbättän tilersen!

5.YaLGAN SÖYu..

Nigä kiräk miña şundıy söyü?
Tormışımnı nurga kümmägäç.
Yörägemne çiksez nazga törep,
Bähet diñgezende yözmägäç.

Nigä kiräk miña barı süzlär?
Kayda äytteñ-şunda kalganı.
Nigä kiräk yalgan väğdäläreñ?
Yörägemä yara salganı.

Nigä kiräk miña küz yäşläre?
Canım ärnüennän tügelgän.
Nigä kiräk miña şundıy tormış?
Ükeneçlär belän kümelgän.

Yalgan yamaulardan torgan söyü,
Can yafalar öçen yaralgan.
Işanıçsız söyü gazabınnan
K\unelemnen kuge karalgan

Äydä yäşä- üzeñ telägänçä
Zinhar öçen miña kagılma!
"Soñgı tapkır kiçer mine!"- diyep,
Kabat iñnäremä sarılma!

6.MÄHÄBBÄTEM MİNEM...

Mähäbbätem minem yörägemä
Mäñgelekkä urın algansıñ.
Onıtılmas söyü cırım bulıp
Cankayıma señep kalgansıñ.

Kaynar yalkınıña mine çornap
Läzzät däryasına salgansıñ.
Söyü kanatların cilkän itep
Sınaularga karşı bargansıñ.

Mäñge sünmäs minem mähäbbätem
Koyaşım sin gomer kügemdä.
Yörägemneñ yöräge sin buldıñ
Kiräkseñ sin miña bügendä!

7.HODAY NASIYP İTKÄN YaRMI SİN?

Öleşemä töşkän kömeşemme,
Ällä saylap algan parmı sin?
Gomrem buyı yänäş barır öçen,
Hoday nasıyp itkän yarmı sin?

Bähetemdä, betmäs şatlıgımda
Uy-hıyalım siña birelgän.
Bez kiçäse tormış yılgasında
Söyulärdän küper tözelgän.

Koyaş nurı bulır bezgä yuldaş,
Ay nurında bulır serlärem.
Siña bulgan söyü bähetennän,
Balkıp torır minem küzlärem.

İkebezdä ber ayaktan atlap,
Ber-berebezne qader-hörmätläp.
Başlıyk äle gomer yulıbıznı,
Dus-tugannar kilsen täbrikläp.

8.TİK ŞİKLÄREM TAŞLAP KİTMİLÄR...

Yaratam da kebek, yaratmıymda
İkelänü telä bäğırne.
Bergä çakta äzme räncetkäneñ?
Belmädeñ bit minem qaderne.

Küz yäşlärem äzme tügelgänder
Cıya barsañ küllär bulırlık.
Min tüzgänne barı Allam belä,
Tik ul birde miña sabırlık.

Häzer kilep «Min yaratam!»- diseñ,
«Sinnän başka yäşäü yuk!»- diseñ.
Yörägemne kabat telgäliseñ,
Minem hälläremä kermiseñ.

Allarıma kilep tezlänäseñ
Küz yäşeñne sörtep yañaktan.
«Tik sin genä kiräk miña!»- diseñ,
«Kaytçı canım, miña kabattan!»

Açularım minem bette inde,
Yäşlärem dä küptän kiptelär.
Kire kaytsam kabatlanır sıman
Tik şiklärem taşlap kitmilär.

Tormış ozın...Tik gomerlär kıska,
Soñga kalıp kına añlıybız.
Tel teşnärgä öyränäbez...Läkin
Tik tersäkne teşni almıybız.

9.RÄNCETMÄ...(KÖY YaZILGAN)

Avır süzlär äytep küñelemne
Räncetmä sin canım ütenäm.
Bolay da bit gomer küpme sagış
Gazaplarda ärnep ütelgän.

Uylarıña başkalarnı kertmä,
Yannarıñda min bit söygäneñ
Yörägemä häncär bulıp kerä
Saksız äytkän sineñ süzläreñ.

«Gafu it!»-dip sorıy belmäsäñ dä,
Gafu itä kersez saf yöräk.
Söyulärgä törenep, nazda gına
Yaşär öçen miña sin kiräk.

Äzgä genä kilgän gomerlärdä,
Cılı hisläreñne kızganma!
Yöräklärneñ därtle çagı äle,
Gomer uzdı diyep uylanma!

Ber-berebezdän ğayep kenä ezläp
Kuptarmıykçı tavış-gaugalar.
Ütkännärgä yabıyk işeklärne,
Tınıç kına barsın dönyalar!

10.TORMIŞIM BİZÄGE...

Tormışımnıñ bizäge sin,
Bähettän çigelgäne.
Küzläremne kamaştırıp,
Läysännär sibelgäne.

Könemdä sin, tönem dä sin,
Şatlıgım , kaygım da sin.
Bar cihanda şundıy beräü
Sine yaratkan tik min.

Hıyallarım iñnäremä,
Kanatlar kuygan kebek.
Söyü kapkanına kaptım,
Mäñge bulmastır irek.

Gafu itçe mine täñrem,
Anı artık kürgängä.
Rähmätlemen sineñ alda.
Şundıy bähet birgängä.

11.SÖYu GÖLEM...

Gomeremneñ közlärenä keräm,
Tik küñeldä haman yaz äle.
Yörägem dä söyü belän yäşi,
Karaşlarım tulı naz äle.

Gomrem buyı kötkän söyü gölem,
Çäçkä büläk itte közemdä.
Bolıtlarnı aralap koyaş çıktı,
Ömet tudı gomer kügemdä.

Küñel tütälemdä tamırlangan
Söyü gölem mäñge sulmastır.
Yöräk yarsuların basa algan,
Mähäbbättän zur his bulmastır.

12.SERLÄREMNE ÇİŞÄM TAÑNARGA...

Cäy ayınıñ nazlı cile isä,
Küñellärgä ütep irkäli.
Koyaş nurı belän şayarganday,
Cäyge cılı yañgır sibäli.

Sandugaçta kungan miläşemä,
Sayrauınnan üzäk özelä.
Sagışlarım onıtıla hätta.
Ğaşıyq canım nurga kümelä.

Eraklardan kilgän torna tavışı,
Yöräklärne törä moñnarga.
Cankayımnı sagış basa kalsa,
Serläremne çişäm tañnarga.

İrtänge çık tamçıları belän,
Tañ nurları gıyşık uynıylar.
Ber-bersenä söyü büläk itep,
İrkälänep hiçber tuymıylar.

Kübäläklär su eçärgä kungan,
Çıktan cemeldäşkän göllärgä.
Sagınuımnı alar gına belä,
Alar şahit minem serlärgä.

13.ŞAYARIP KINA...

Köndä tavış-gauga kuptarasıñ,
Säbäpläre nidän äyt zinhar?
Här närsädän çerçek çıgarasıñ,
Däşmi kötäm , kayçan -dim , tuktar.

"Nigä alay yata, nigä bolay tügel?
Aşnıñ bäräñgese peşmägän."
Bügen tagın närsä tabar inde,
Ällä inde döm "citeşmägän".

"Ul külmäkne kimä, monısın ki,
Kemneñ çäçe şulay buyalgan?"
Cilätteñ bit cen orgırı närsä,
Bulır mikän sine tıyalgan.

Betä bit baş muyın yalgız kala,
Tormış mondıy tärtiptä barsa.
Här adımnan ğayep kenä kürep,
Kön dä bolay "ırıldap" torsa.

14.TORMIŞIM...

Tormışımnıñ äle avır mäle,
Canım urtalayga bülenä.
Yörägemneñ ärnüenä tüzmi
Küzläremnän yäşlär tügelä.
Açı yazmış miña birde Allam,
Sınaularnıñ birde cillesen.
Yullarıma tezde avırlıklar,
Ciñä bardım anıñ härbersen.
Tormış kamçıladı , kayızladı
Bökläp cirgä başnı teräde.
Bireşmäsne sizep algan kebek,
Tagın nıgrak aska söyräde.
Härber könem köräş öçen buldı
Här adımda nider sagalıy.
Bähet ömet itkän gomer kügen,
Bik yış kara bolıt tomalıy
Özgälänä üzäk , yana yöräk,
Küz yäşläre yärdämçe tügel.
Gomer buyı tıngı belmi yarsıy,
Urın tapmıy tilmerä küñel.
Sınau sayın köçem arta bara,
Işanıçım ülmi tormışka.
Yardämennän kaldırmasa Allam,
Bireşmäsmen açı yazmışka

15.ONITIRGA SİNE MÖMKİN TÜGEL...

Onıtırga küpme tırışsamda
Onıtalmıym sine bäğrem.
Gönah bulıp tugan söyüemne,
Gafu itsen inde täñrem.
Gomerlekkä kerdeñ yörägemä,
Küz karamda sınıñ çigelgän,
Bu gönahım öçen toz-borıçı,
Cankayıma uçlap sibelgän.
Mähäbbätneñ yalkınıda yanam,
Kara kümer bulırmın inde.
Hislär belän tulı ğaşıyq canım,
Nazga susap sargayır inde.
Bergä bulu bezgä nasıyp tügel,
Hoday bezgä birgän tik söyü.
Söyü belän kilgän kavışunı,
Alıştırgan tik yanıp -köyü.
Tulgan ayga karap sine küräm,
Sandugaçta sineñ tavışıñ.
Koyaş nurlarında sineñ cılıñ
Talgın cildä moñlı sagışıñ.
Yaratasıñ, beläm yaratasıñ,
Cannarıbız teli kavışu.
Gazaplarda yäşär öçen genä
Kiräk bulgan bit bu tabışu.

16.HOLIK...

Sineñ alda gayıbem yuk minem
Tik sin genä kırıs holıklı.
Uylamagan cirdän säbäp tabıp,
Tormışıbız küge bolıtlı.
Taratırga küpme tırışsam da
Bolıtlarga citmi buylarım.
Tıngı birmi başlarımnı izä
Törle yaklap kergän uylarım.
Tañnar nurlap koyaş çıksa rähät,
Sandugaçlar sayrıy küñeldä.
Holıklarga huca bula alsak
Bolıt tormas tormış kügendä!

17.KERMÄ TÖŞLÄREMÄ...

Töşläremä kerep cannarımnı
Telmä canıyım, sinnän ütenäm!
Gomer yullarımda kirtä bulgan
Yalgışlarım öçen ükenäm.
Yullarımda kürep härçak sine
Serle karaşıñnan iseräm.
Hoday büläk itkän gomeremne
Önnäremdä yalgız kiçeräm.
Kullarıñnı suzıp yullarıma
Çıkma canım, çıkma töşemdä!
Uyanular bigräk avır sinsez,
Urın taba almıym önemdä.
Beläm canıyım , sin dä sagınasıñ,
Ellar huca tügel yöräkkä...
Töşläremä kerep tönnäremdä
Ütenäm sinnän , ütmä üzäkkä!

18.ÜTKÄNNÄRGÄ YuLLAR YaBIK..

Ütkännärgä yullar yabık küptän,
Ütkännärne bulmıy üzgärtep.
Yaralarnı yıllar kaplasa da,
Yalgışlarnı bulmıy tözätep.
Yazmışlarga karşı barıp bulmıy,
Sınaularga karşı barsak ta.
Ber adım da artka atlap bulmıy,
Ükeneçlär belän tulsak ta.
Bälki kiräge dä yuktır inde,
Ütkännärne iskä alırga.
Hätirälär belän añnı çornap,
Yaralarga tozlar salırga.
Arttagısı artta kala birsen
Alga taban bulsın karaşlar
Şul vakıtta tormış yämle bulır,
Urın taba almas sagışlar.

19.SÖYu KAYTTI...

Yamle yazlar bähet büläk itte,
Közge cillär nikter könläde.
Arabızga kinät kilep kerep,
Ayırılunı bezgä dimläde.
Ayırdılar bezne közge cillär,
Tuzgıttılar bezneñ bähetne.
Yöräklärne telep kisäklärgä,
Közge kırau suktı ömetne.
Bik küp yıllar uzgaç kayttı söyü,
Sagınudan şaşkan cannarga.
Yöräklärgä kabat yalkın salıp,
"Közebezne " törde nazlarga!
Canga däva bulıp kayttı söyü,
Adaşmıyça gomer yulında.
Ezläp taptı kötkän bähetebez,
Bulgan ikän yazmış kulında!

20.YaLGIZ TÜŞÄK...

Bügen tagın yalgız tüşägemne
Yäşläremä mançıp tüşädem.
Şundıy sınaularnı uzar öçen
Nindi gönahlar soñ eşlädem?
Tönnäremdä yokılarnı urlap
Uylar aldı minnän östenlek.
Yalgız tüşägemneñ öslärendä
Salkın sagış taptı irkenlek.
Yalgız tormış, salkın tüşäklärem
Yalgışlarım salgan cäzalar...
Sabırlıgım citep tınıçlanam
Sıkrasada canda yaralar...

21.KÖNLÄŞÄM...

Könçel ikänemne sizgän kebek
Talgın cillär şayan ürtäli.
İñnäreñnän ärsez koçıp alıp
Bitläreñnän nazlap irkäli.
Koyaş sine alıp koçagına
Kaynar sulış örep kızdıra.
Şundıy kılanışı anıñ kayçak
Könçel cankayımnı tuzdıra.
Ay nurları könläşterä hätta
Bigräk tä ölger üzläre.
Yabık täräzälär aşa kerep
Kuyınıñda sineñ küzläre.
Könläşämen şayan tamçısınnan
Cäyge cılı läysän yañgırnıñ.
Kerfekläreñ belän uynaganın
Kürep niçek tüzep torırsıñ.
Sine soklandırıp sayrıy algan
Könläşterä moñlı sandugaç.
Beläm dä soñ moñlı sayravınnan
Tuktaganın sızılıp tañ atkaç.
Könläşäm min köçle cil-davıldan
Yaşen uynatkan uttan...
Küñeleñä şiklär sala algan
Kara korım kebek bolıttan.
Min yaratıp, tik soklanıp kına
Bar dönyadan sine könläşäm.
"Sin bit minem söygän yarım "-diyep
"Berdänberem"- diyep endäşäm.
Söyep kenä sine "könläşäm".

22..CANIMDASIÑ SİN İRKÄM...

Yagımlı karaşlarıñnı
Küz karamda saklıymın.
Yörägemä sinnän yakın
Berkemne dä tapmıymın.
Sinnän başka tormışımnıñ
Yamen , tämen toymıymın.
Karşıma yılmaep kilsäñ
Tañ nurıday balkıymın.
Yannarımda bulmasañ da
Canımdasıñ sin irkäm.
Töşläremdä sine söyep
Elap uyanam irtän.
Bägerlärne sızıp telä
Sinsez atkan tañnarım.
Ayırılışu gazabınnan
Tomanlana añnarım.
Uzar idem gomeremne
Sıyınıp koçaklarıña
Ber yalgızım yanu avır
Söyü uçaklarında...

22.BER GOMER CİTMİ İKÄN...

Niçek kenä yäşäsäñ dä
Gomerlär uza ikän.
Tüzmästäy hällärne tüzep,
Yöräklär tuza ikän.
Ber gomerlär bigräk kıska
Nigä ikäü bulmagan?
Başkaylarga nik akıllar
Bez tuganda tulmagan?
Hodaydan birelgän yazmış
Telägänçä tukmagan.
Kayberäülär bardan çittä
Kakmagan da sukmagan.
Kemgä yazgan aldan-göldän,
Beräüne zarga mangan.
Yalgız tormış yöge basıp
İñnäre yalsız talgan.
Ber gomerlär citmi ikän
Tormış tämen tatırga.
Eh, kabattan bu tormışnı
Ber äylänep kaytırga.

23.EH, BULMADI KADERLÄR...

Mähäbbätem sandugaçı
Sagış talına kundı.
Yörägemne yalkın çornap,
Canım moñnarga tuldı.
Söyü gölem sınmasa da
Nazga susap bögelde.
Küzdän tügel , üzäklärdän
Ärnü yäşe tügelde.
Yalgışnıñ sazınnan çıgıp,
Upkınnarına kerdem.
Söyü gölennän takıya
Küñelem türendä ürdem.
Akkan sularday aşkınıp,
Sıkrap aktı gomerlär.
Yazmışlarnı ciñälmädem,
Eh, bulmadı qaderlär...

24.YaZMIŞ CİLLÄRE KAKMASA

Yalgışlar ayırmasa...
Gomer buyı sagışlardan
Cankaylar sargaymasa.
Yöräklärneñ ärnüennän
Küzlärgä yäş tulmasa.
Söygän yar yäşägän yakka
Karap küzlär talmasa.
Mähäbbät tulı karaşlar
Küz aldında tormasa.
Yanıñda parıñ bulıp ta
Onıtılıp bulmasa.
Ellar buyı ömetlänep
Özgälänsä bägırlär.
Tiñ tügellär belän yäşäp
Bulmagaçtın qaderlär.
Söygän yarnıñ nazlarına
Gomerlär susap uzsa.
Yalgışlarga cavap itep
Yazmış sınaular suzsa.
Şuşılarnıñ barısın da
Kiçergängä ällä - dim.
Bügen minnän yuk bähetle
Şatlıgıma yuktır tiñ.
Bik küp yıllar aşa kiçep
Kilde ul bähetle kön.
Oçraşular, kavışular
Söyulär bügen böten.
Söyeklem minem yanımda
Kaderledän qaderle.
Kulnı kulga totınışıp
Belep yäşik qaderne.

25.SÖYu KÖÇE...

Söygän yarlar bar yaklap ta kilgän
Söygännärgä bulmıy üpkäläp.
Söygännärne barı söyep bula
Tuyıp bulmıy hiçtä irkäläp.
Söygän yarnı läzzätlärgä kümep
Törep bula sihri nazlarga.
Saf söyüne yöräklärdä saklap
Kalıp bula mäñge yazlarda.
Söyü yäşi bezneñ canıbızda
Yöräklärne kısıp yögänli.
Akılıbız şaşıp çıga kayçak
Söyulärne berni ciñälmi!

25.ÖMET ÜLMİ...

Yaşädem min, yäşämädem tügel
Yäşnädem min tormış ilendä.
Abınsam da köçne taba aldım
Egılmaska doşman cirendä.
Teş-tırnagım belän yäbeştem min,
İtägenä zähär Yazmışnıñ...
Bar köçemne birdem kotılırga
Açı gazabınnan Yalgışnıñ.
Hıyallarga çumgan yulıbızga
Kuya aldı Yalgış kirtälär.
Şul mizgeldä sünde koyaş nurı,
Zar yıladı moñsu irtälär.
Könnäremne tönge toman sardı
Bähet sorap yöräk yıladı.
Yazmış burannarı haman dulap
Cannarıma sagış sıladı.
Cäberläügä tüzep özgälängän
Hälsez canım üksep ärnede.
Yörägemä señgän sünmäs söyü
Uylarımnı nurlap köç birde.
Här adımda kürdem söygänemne
Yörägeneñ toydım tibeşen.
Yanäşämnän bardı gomer buyı
Tik Yazmışım belde üz eşen.
Sagışlarnı sırlar itep saldı
Kömeş uka sipte çäçlärgä.
Söyulärgä birep sabırlıknı
Yögän kidertte ul hislärgä.
Ülem belän yäşäü arasında
Bireşmiçä Ömet köräşte.
Yazmışlarnı Ömet ciñde mikän
Ällä Yazmış üze kileşte...
Sınaularga salgan borma yullar
Ellar aşa kilep katıştı.
Söyü nazın kötep özgälängän
Cannar kabat kilep tabıştı

26. SİNE EZLÄDEM..

Gomrem buyı sine köttem canım,
Gomrem buyı sine sagındım.
Gomrem buyı özgälände üzäk,
Mähäbbätem siña tabındım.
Sine uylap tudı alsu tañnar,
Sine uylap battı koyaşım.
Sine uylap yandı yörägem dä,
Sin bit minem algan sulışım.
Gomrem buyı kürdem töşläremdä,
Gomrem buyı buldıñ hıyalım.
Gomrem buyı saklap yörägemdä,
Mähäbbätem sine uyladım..
Gomrem buyı minnän yırak buldıñ,
Gomrem buyı sine söylädem.
Gomrem buyı ömet belän yäşäp,
Mähäbbätem sine ezlädem.

27.SÖYu BOLINI...

Mäk çäçäkle yämle bolın ide
Kullarıñnı saldıñ bilemä.
Küzläremne nazlı irkälägän
Karaşlarıñ kerde küñlemä.
Yöräklärdä söyü börelände
Här tibeşe moñga çornaldı.
Bähet belän tulı kersez cannar
Mäñgelekkä bergä uraldı.
Bitemdäge kaynar sulışıñnan
Eregändäy yomdım küzlärem.
Sandugaçlar tındı sayravınnan
Taraldılar äyter süzlärem.
Kaynar irennären salmak kına
Minem irennärgä kagıldı.
Cir kuzgaldı ayak astıbızdan
Yöräklärdä koyaş çagıldı.
Söyü digän ocmah cimeşennän
Yazmış bezne avız itterde.
Bik küp yıllar uzgaç şul bolınga
Bezne tagın kabat kiterde.
Şul uk karaş, yakın häm yagımlı
Tik çäçlärdä sagış ezläre.
Billäremä salgan kullarınıñ
Tamır sayın söyü hisläre.
İsergändäy yomdım küzläremne
Töyerlände äyter süzlärem.
Yañak buylap äkren genä tamdı
Sine söyep cıygan yäşlärem.
Kızıl tösle mäkneñ çäçäkläre
Sezme ällä yalkın yaguçı?
Yöräklärdä uçak kabızuçı
Söyü taşkınına saluçı.
Hiçkenädä ışanasım kilmi
Yanäşämdä minem söygänem
Sulışında minem uzgan gomer
İrenendä yanıp-köygänem.
Söyüebez şahitları bulgan
Çäçäklärne cıydım kulıma.
Yazmış sınauların uzgan Bähetem
Çıksın ide inde yulıma.

28. GOMER UZA...

Közge cillär täräzämne kaga
Moñsulana küñel uylardan.
Gomerkäylär bigräk şaşıp uza
Hiç kalışmıy akkan sulardan.
Saubullaşıp yıllar arasınnan
Şayan yäşlek bolgıy kulların.
Hätirälär talkıy yörägemne
Kartlık ezli kiler yulların.
Sagındıra, çınlap sagındıra
Sandugaçlı yäşlek tañnarı.
Tönboyıklı külneñ yarlarında
Kötä kebek yäşlek yarları.
Çit cirlärdä yazmış yäşätsädä
Sagındıra tugan yaklarım.
Bildän uzgan çäçäläremne tarap
Tolımnarga ürgän çaklarım.
Ä cil haman täräzämä suga
Şomlandırıp yarsu canımnı.
Yöräk kenä bireşäse kilmi
Onıtalmıy därtle çagımnı.

29.KİRÄK MİKÄN TÜZÄSE...

Sin üzeñnän mine bizderäseñ,
Añlamıyça cannı teläseñ.
Minem yöräkne dä sinekedäy
Taştan diyep ällä beläseñ.
Onıtırga mäcbür itäseñ bit
Üzeñne sin teläp bergenäm.
Gayıpsezgä ğayep taguıñnan
Sular sipkän kebek süreläm.
«Söyü belän näfrät yänäşä»- dip
Belgän keşe äytkän küräseñ.
Nahak belän här kön cannı töygäç
Suınmıyça niçek tüzäseñ?
Gafu itep cilädem min irkäm,
Süzläreñ tik « Tukran täübäse».
Üz süzeñdä toralmıysıñ ikän
Kiräk mikän inde tüzäse?

30.HİS TAŞKINI...

Köz yañgırı sirpi täräzämä
Soñgı yäşen kuydı yaltırap.
His taşkını küñelemnän tulıp
Çişmä bulıp aktı çıltırap.
Täräzemne yudı közge yañgır,
Tamçılardan saflık taraldı.
Ömetemneñ ber çatkısı bulıp
Yörägemdä moñnar yaraldı.
Üzäklärem sagınudan köyde,
Küzläremnän taştı sagışlar.
Cannarımnı özep telgäläde
Gazaplarga saldı yalgışlar.
Yörägemne yarıp çañnar kaktı
Hıyallanıp özelep söyulär.
Täüge söyü kalgan şayan yäşlek
Mähäbbättän yanıp köyulär.
Yañgır yaudı tınıçlıgın cuyıp
Täräzämne yarsıp çılattı.
Hätirälär taşkınına salıp
Közge yañgır cannı yılattı.

31.BÄHET İŞEGE BİKLE...

Nasıyp yazmış bähetemä saldı bigen
Kara bolıt yalmap aldı tormış kügen
Kersez yöräk kaldı yalkın eçlärendä
Can yıladı irtäsen dä, kiçlärendä.
Gaziz gomer yazmışımnıñ kullarında
Niçek kenä kotılırga uylarında.
Mölderämä yäşlär tulı küzläremdä
Yaşäü nurı kürenmider yözläremdä.
Nigä yazmış miña şulay märhämätsez
Ber gomerem uzar mikän rähätsez?
Kemnär açar bikle bähet işeklären
Tibränderer küñelemneñ bişeklären.
Täqdirem ber kısuınnan tuyalırmı
Eçemdäge därlärem ber uyanırmı?
Mähäbbätem göle kabat terelerme
Yörägemneñ türlärenä ürelerme?

32.KİÇER İRKÄM...

Kiçer irkäm ütkännäremne
Kiçer minem äytkännäremne.
Onıt barlık hafalarıñnı.
Minnän kürgän yafalarıñnı

Tik üzemne genä sin onıtma
Hisläreñne miña suıtma.
Gomrem buyı sine söyüemne
Berkayçanda bäğrem onıtma.

33 KADERLE KEŞEM....

Kaderle keşem sin minem
Berdänber söygän keşem.
Hıyallarga mine salgan
Sin-onıtılmas töşem.
Kaderle keşem sin minem
Cäyen, közen häm kışın.
Yörägemneñ iñ türendä
Sayragan bähet koşım.
Sin minem qaderle keşem
Minem yäşäü kanatım.
Yarsu yazım, moñlı közem
Sagışlı mähäbbätem.

34.TİK SİN ONITMA...

Onıtalmam sine hiçkayçanda
Yörägemnän sine cuyalmam.
Küklär tösen algan mölderämä
Küzläreñä karap tuyalmam.
Onıtalmam sine söygän yarım
Bik azga da sine onıtmam.
Yäşlek yazıbızda çäçäk atkan
Söyü gölebezne korıtmam.
Berkayçanda sine onıtalmam
Yanäşäñnän sineñ barırmın.
Arabızdan akkan yıllar aşa
Söyulärdän küper salırmın.
Siña bulgan söyü mäñge sünmäs
Salkınnarı kışnıñ suıtmas.
Közge yañgırlar da yua almas
Tik sin genä mine onıtma!

35.MİN KÖTÄRMEN...

Sagınsamda, sargaysamda, moñnarga çornalsamda
Tañnıñ nazlı cile bulıp muyınıña sarılsamda
Karnıñ ence börtegedän tınıñnan yugalsamda
Allarıña yoldız bulıp tönnärdä atılsamda.
Töşläremneñ barısına da oçraşu yurasamda.
Sineñ yöregän yullarıñnan küzlärem almasamda
Gomerem buyı kötülärdän özlegep arısamda.
Sagışlarga tüzä almıy özelep yılasamda
Bäğrem sine min kötärmen soñgı könem tugangaça
Hoday birgän canım minem tänem belän bulgangaça.
Yörägemneñ tibeşeneñ iñ soñgısı tipkängäçä.
Min kötärmen sine canım ülgängäçä...ülgängäçä.

36.************

CANIM, TÄNEM SİNE TELİ İRKÄM...
KOÇAGIÑDA KİLÄ ERİSEM.
CANNARIÑA KEREP TARALASIM,
YÖRÄGEÑNE YaLMAP DÖRLİSEM.
KUŞILASIM KİLÄ SULIŞIÑA
KÜÑELEÑNEÑ KÜGEN BİZİSEM.
SAGIŞLARIÑ BULSA TARATASIM
HIYALIÑA ÇUMIP YaŞİSEM.
TELİM İRKÄM BARI SİNEÑ BELÄN
SÖYu UTLARINDA YaNIRGA.
KAYNAR İRENEÑDÄ MÄÑGELEKKÄ
TATLI BER TÄM BULIP KALIRGA.

KÜÑELEM DÄFTÄRE

(bişençe bülek)

Üzgäräsem kilmi...

Üzgäräsem kilmi minem häzer,
Telägänçä kilä yäşisem.
Cavap itep uzgan yäşlegemä,
Közläremä kerep yäşnisem.
Niçek telim, şulay yäşisem!

Sagışlarga tulgan küñelemne,
Kilä cilpep , cildä, kagasım.
Mine ezläp arıgan bähetemne,
Karşısına barıp alasım.
Gomer buyı bergä barasım!

Koçagıma alıp kiläçäkne,
Nazlarıma kilä salasım.
Uzgannarga yabıp pärdälärne,
Canımdagı nurga manasım.
Söyeläsem kilä, yanasım!

Keşe tormışına kagılmagız...

Kagılmagız keşe tormışına,
Kermägez sez keşe aldına.
Berebezdä cavap birmi bulmas,
Basmıy kalmas Allah karşına.
Şul turıda añlıy belsäk ikän,
Kurka belsäk ide Hodaydan.
Yuknı tügel, barnı söylämiçä
Çittä kalsak naçar uylardan.
Keşe yamanatın satıp yörep
Gönahlarga batu nik kiräk?
Barıbız da sınau aldında bit,
Telne teşli belik äzeräk!
Alamalık ezläp tirä-yaktan,
Yahşılıknı uzmıyk kürmiçä.
Çitkä borıp yözne uzıp kitmik,
Keşe ayırıp, sälam birmiçä.
Törle hällär bula bu tormışta,
Sınaunıñ da bula törlese.
Yalgışmagan keşe yuktır berdä,
Kiräk tügel keşe söylise.
här keşe dä üz yulınnan bara,
Härber eşneñ bula säbäbe.
Üz dönyabız belän mäşgül bulıyk,
Yahşılık bit tormış bizäge!

Ğaşıyq itteñ...

Ber kürüdä ğaşıyq bulmasam da,
Karattıñ sin mine üzeñä.
Karşı kilep ber süz äytalmadım,
«Söyäm sine!»-digän süzeñä.
Küñeleñneñ bar saflıgın birdeñ,
Sizdermädeñ avır bulsada.
Bikle yörägemä açkıç tapmıy,
Canıñ sagışlarga tulsada.
Kötmägändä ber cılı his uzdı,
Canım aşa yöräk türenä.
Buldırdıñ bit, ğaşıyq itteñ mine.
Sabıştırdıñ söyü çirenä.
Yarattıra aldıñ sin, üzeñne,
His taşkını canga sibelde.
Tatlı moñga tördeñ tormışımnı,
Böten dönyam nurga kümelde.

Kül...

Tulgan aynı koçagına algan
Tönboyıklı külne könläşep,
Kır kazları töşte tezeleşep
Kıygak-kıygak kilep söyläşep.
Dulkınnarın yarlarına kagıp,
Koçagın kül cäyde kiñ(e)räk.
"Kilegez, kil, koşkaylarım minem
İrkälärmen sezne äzeräk!
Tizdän yulga, , yırak yulga sezgä
Karşı barıp bulmıy yazmışka.
Tönboyıklar sagınıp sargayırlar,
Min tulırmın tagın sagışka."
Kır kazları töşkän yämle külgä
Bähet dulkınnarı sibelde.
Bar tirä–yak sihri moñga tuldı,
Aydan nazlı nurlar tügelde.
Kül ösläre tizdän boyık kalır
Tınlık cäyer moñsu cäymäsen.
Kazlarına nazlar öläşkän kül
Kötep kalır yazlar kiläsen.

Tañ ...

Tañ atkanı kürenmäde bügen,
Ofıklarnı bolıt kaplagan.
Elga buylarına hucalarday
Ak tomannar töşep aklagan.

Nurga törep atkan alsu tañnı
Karşılavı çiksez kuanıç.
Alsu tañnar sihri köçkä iyä
Moñlılarga kayçak yuanıç.

Nurlarında mölderämä söyü
Bähet yurıy ğaşıyq cannarga.
Yöräklärdä gizep gomer buyı
Çakıradır nazlı tañnarga.

Bolıt sargan ofıklarga karap
Cannar tınıçlıgın yugalta.
Ä tomannar üzäklärgä uzıp
Şomlı sagışların tarata.

Törle hislär çornıy küñellärne,
Uylar yomgaklarga cıyıla.
Kiler bähet tomannarda kalıp,
Yulın tapmas kebek toyıla.

Kartlık...

Kartlık sorap tormıy ikän,
Bikle işeklärdän kurıkmıy.
Şakımıyça kerep türgä uza
Berkemne dä ikän onıtmıy.
Kapçıgında tulı ak buyauı
Çäçkäylärne manıp agarta.
Berkemne dä öleşennän özmi
Cıyırçıklar birep tarata.
Küzlärgä dä ak pärdäsen kora
Kemgä büläk tayak tottıra
Häter kapçıgın da cıya yırak.
Söyäklärne nıklap katıra.
Kartlık tuzannarı tınnı kısıp
Ükeneçlär hätsez cıyıla.
Şunda inde Hoday birgän gomer
Cırlangan cır kebek toyıla.

Onıtma onıtırga...

Onıtma sin - mine onıtırga,
Uylarıñnan alıp taşlarga...
Min yäşägän yakka küz salmıyça,
Başka yullar belän atlarga.
Onıtırga mine - onıtma sin,
Mähäbbätne salıp taptarga...
Yörägeñneñ kapkaların yabıp.
Biş kat yozak elep saklarga.
Mine onıtırga - sin onıtma,
Hisläreñä kirtä kuyarga.
Bäheteñne başkalarda kürep,
Sagış dönyasına çumarga.
Soñga kalma, aşık onıtırga...
Tizeräk bul, kotıl söyüdän.
Uylama sin :"Ükenermen"- diyep
Kurıkma sin yanıp - köyüdän.
Kütäralmas avır ber yök buldı
Sineñ öçen - bezneñ Mähäbbät...
Onıtalsañ bärem - kotılırsıñ,
Minsez kalsañ bulır gel rähät!

Sagınam... .

Sagınamın yäşlek yıllarımnı.
Oçkın oçkan utlı çagımnı.
Yäşlek ezläremne koçagına algan
Gaziz cirem - tugan yagımnı.
Citez cillär könläşerlek vakıt,
Cil-davılga karşı barırlık.
Yöräklärneñ därte taşkan mizgel,
Yalkınnarsız dörläp yanırlık.
Äle bulsa susap sagınamın,
Tatlı suın bähet küleneñ.
Eh, kabattan kullarıma alsam
Ber böresen söyü göleneñ.
Kükrägemä kıssam yäşlegemne
Tınım belän tatıp sulışın
Sagışlarım beraz tınar ide
Kuyınımda toysam cılısın.

Yakın keşemä...

Tugan köneñ belän yakın keşem
Kotlap yazam şiğır yulları.
Teläklärneñ telim izgelären
Taza bulsın ayak kullarıñ.
Allah bulsın härçak sineñ belän
Här eşeñdä bulsın uñışlar.
Yörägeñdä tipsen yäşäü därte
Urap uzsın sine sagışlar.
Aylı bulsın töneñ, härber köneñ
Koyaş nurlarına kümelsen.
Gomereñneñ här mizgele canım
Bähet-şatlıklarga törelsen.
Büläk kenä bulgan gomereñneñ
Belsäñ ikän canım qaderen.
Rabbı karşısına basıp sorıym
Cibärärmäsen siña cäberen.
İzge keşe-igelekle bula...
İman tulı bulsın canıñda.
Çista bulsa küñeleñneñ küge
Telägäneñ bulır aldıñda.
Balalarıñ sine şatlandırsın
Tugannarıñ tatu bulsınnar.
Öy eçeñdä görläp barsın tormış
Onıklarıñ sineñ tusınnar.
Tik ber tapkır kilgän gomerlärneñ
Här mizgele çiksez zur bähet.
Şunı añlap yäşi belsäñ ägär...
Bähet öçen kiräkmäs tähet.
Kaynar yörägemneñ türlärennän
Taşıp çıkkan barlık teläkne
Kabul it häm härçak toyıp yäşä
Sineñ miña mäñge kiräkne.

Balalarım... .

İke balam-ike zur bähetem
Yörägemneñ alar tibeşe.
Yazmışımnıñ miña zur büläge
Tormışımnıñ tatlı cimeşe.

Balalarım –minem uzgan gomer
Balalarım-minem kiläçäk.
Bähetlären genä birsen Allam,
Gel yaktıdan bulsın küräçäk.

Üz tiñnären tabıp tigezlektä
Gomer yulın tatu uzsınnar.
Kart könemdä minem küz nurlarım
Işanıçlı teräk bulsınnar.

Barıbızda tigez...

Bu yullarnıñ yazılu säbäpläre
Tanış hällär inde küplärgä.
Millät arasında tıngısızlık
Küñellärne telep ütkängä.
Bezneñ ilebezneñ kiñlekläre
Bik küp millät halkın sıydıra.
Ber millätneñ ikençesen hurlap
Tel çarlavı kayçak tuydıra.
Nindi genä millät bulsak ta bit
"Bez keşelär!"- şunı onıtmıyk.
Millät arasında çerçek ezläp
Näfrät dönyasına yulıkmıyk.
Millätne bit saylap alıp bulmıy
Hodayıbız birep tudırgan.
Barıbızda ike ayak belän yöri
İke kulıbız bar tuydırgan.
Şul uk uylar, ber ük teläk belän
Cir östenä bez bit kilgänbez.
İlebezgä doşman höcüm itkäç
Bergäläşep utka kergänbez.
Kaysı millät halkın: "Naçar!"- diyep
Kemneñ hakı bar soñ äytergä?
Saftan bulsın küñel türlärebez
Kiräk tatu gomer itergä!

Dustım Liliyäneñ , ike yıl elek, yaktı dönyanı taşlap
kitkän kızı Läysän isemennän... 2013 yıl...

Menä tagın citte yämle yazlar,
Kar suları erep aktılar.
Sıyırçıklar kayttı cılı yaktan,
Şomırtlar da çäçkä attılar.
Sandugaçlar moñlı cırın suzdı,
Bakça türendäge agaçta.
Dönya nurlap köndä koyaş çıga,
Moñga tulı ayga almaşka.
Tik min genä Ahirätkä küçtem,
Gomerkäyem yäşli özelde.
Uncidem dä tulıp ölgermäde
Tänem salkın cirgä birelde.
Öçençe yaz kilde minsez cirgä
Kaberemne yua kar suı.
Çiksez söyä idem min tormışnı
İrtä kilde gomer ahırı.
Berdänbere idem äniyemneñ
Kuyınında nazlap sakladı.
Käfenlekkä törgän saf gäüdämne
Gür balçıgı inde kapladı.
Äni genä haman tıngı tapmıy
Ärnep yılıy , avır yugaltu...
Berniçek tä yärdäm itep bulmıy
Mömkin tügel kabattan kaytu.
Ä ul kötä, haman kötä mine
Tınıçlanmıy ana yöräge.
Küñelennän alıp taşlıy almıy
Söygän kızın kürü telägen.
Kışlar kilsä kar börtege bulıp
Kerfegenä anıñ kunamın.
Sagış tulı küzlärenä karap
Ükneçlär belän tulamın.
Cäylärendä kübäläklär bulıp
Öy aldında kunam göllärgä.
Nazlarımnı citkersennär öçen
Başım iyäm iskän cillärgä.
Tönnärendä töşlärendä kiläm
Sagışların telim basırga.
Eh, äniyem, äni canıkayım...
Nigä bulmıy kire kaytırga?
Mine uylap cannarıñnı telmä
Elama sin äniyem, tüz inde.
Canıkayım Allah kullarında
Ocmahlarda urın birelde.
Küz yäşläreñ mine borçıy äniyem
Tıngı birmi moñlı zarlarıñ
Küñelläreñ tulsa dogalar sin yatla
Tınıçlanıp kalır cannarıñ.

Läysän istälegenä...

Kış ayınıñ salkın irtäsendä,
Avaz birdeñ kilep dönyaga.
Şatlık belän tulı äni canı,
Törde söyenep sine nazlarga.

"Läysän"-diyep siña isem birde,
Läysän yañgırına tiñläde.
Bar tormışın siña gına baglap,
Köne-töne bähet teläde.

İrtänge çık tamçıları kebek,
Saflık siña bik tä has buldı.
Sine nazlap tugan bähet belän,
Äni yöze çiksez nur aldı..

Sölek kebek sılu gäüdäñ sineñ,
Altınsıman tolım çäçläreñ.
Çıltırap akkan çişmä kebek tavış,
Nurlar çäçep torgan küzläreñ.

Eşkä uñgan , citez kız buldıñ sin,
Bar tirä-yak siña soklandı.
Ällä küzlär tide inde Läysän,
Ayaz kükne bolıt kapladı.

Uylamagan cirdän kinät suldıñ,
Moñsulandı sineñ karaşlar.
Äniyeñne kaygılarga saldıñ,
Mäñgelekkä kilde gazaplar.

Uncideñ dä tulıp ölgermäde,
Bakıylıkka Läysän sin kitteñ.
Küz nurıday kürep sine söygän,
Äni küñelen sin yalgız itteñ.

Äni canı haman özgälänä,
Yöräktäge sıkrau tuktamıy.
Bar cirdä dä , Läysän , sine kürä,
Äni küñele sine onıtalmıy.

Tañ nurların sineñ belän tiñli,
Sandugaçta sineñ tavışıñ.
Koyaş nurlarında - yaktı yözeñ,
İrtänge çık -sineñ sagışıñ.

"Läysänem"-dip ul yullarga çıga,
"Läysänem"-dip başlıy eşlären.
"Töşläremä kilçe , Läysänem!"-dip,
Teli äniyeñ här kön kiçlären.

Ocmahlarda bul sin , saf kız bala,
İzge cankay, Läysän tamçısı!
Äniyeñä sabırlıklar birsen,
Kauşatmasın yazmış açısı!

Allam sakla...

Bala kaygıları birmä Allam
Bäla -kazalardan saklıy kür.
İman nurı salıp cannarına,
Yazmışların bähetlärgä tör!
Akıl baylıgı bir Allakayım,
Açulardan yırak bulsınnar.
Küñel tınıçlıgı alır öçen,
Tugrı yulnı saylap bassınnar.
Oyat hisen onıttırma Allam,
Näfeslären ciñä belsennär.
Naçar uylar başlarına kertmi,
İzgeleklär eşli kürsennär.
Olılarga hörmät bulsın härçak,
Märhämätle bulsın tuganga.
Täübä itep härber kılgan eşkä,
Şöker itä belsen bulganga.
Korän Kärimne sal kullarına,
Namaz ukıp doga kılsınnar.
Kurka belep barı ber Allahtan
Allah kolı gına bulsınnar!

Ömet...

Küpme yıllar küñel yämle yaznı kötä,
Yazlar sayın yarsıp nider ömet itä.
Tik nigäder yazlar bik tiz uzıp kitä
Karlar belän ömetlär dä agıp betä.
Böre belän yarışkanday yöräk törtä.
Taşkın sular sagışların salıp ütä
Sanduçnıñ tavışları moñnar kertä.
Ömetlärgä yulnı açıp közlär citä.

Näfes...

Näfesneñ bar telägäne:
Rähätlek yausın koyıp.
Yokısı da tuysın anıñ,
Aşarga bulsın öyep.
Yalkaulıknıñ çaması yuk,
Eşsezlek aldan bargan.
Barmı anıñ telägenä
Kirtälär kuya algan?
Maktanırga disäñ inde,
Näfes yaulıy ürlärne.
İşetergä härçak äzer
Maktap äytkän süzlärne.
Buysınırga hiç yaratmıy,
Tıyalgan Ädäm siräk.
Näfes belän köräşergä
Sugışçı bulu kiräk.
Şul azgınnı tıya almıy,
Allahtan biyek kürep.
Cähännämgä kerä Ädäm,
Näfeskä rizık birep.
Tıya almasañ Näfesne,
Başka menep utıra.
Izgıştıra, sugıştıra
Yaman uylar tutıra.
Näfsebezneñ küñelen kürep,
Yaşämik äle, duslar!
Bar yaklap ta çama belsäk,
Rabbıbız bezne huplar!

Süzlär kiräk tügel...

Küzläreñnän küräm söyüeñne,
Süzläreñne kaldır üzeñdä.
Hisläreñneñ toyam ihlaslıgın,
Gacäyep tä serle yözeñdä.
Mähäbbätkä çumgan yörägeñneñ,
Här tibeşe miña arnalgan.
Nazga törgän serle karaşıña.
Baştan-ayak sınım çornalgan.
Canıñ cırlıy yannarıñda bulsam,
Boyık küñeleñ kitä därtlänep.
Söyü ugı kergän yörägeñdä,
Urın ala läzzät şäplänep.
Sagışlarga sindä urın betä,
Koçagıña mine alganda.
Oçar koştay alga omtılasıñ,
Yanäşäñnän sineñ barganda.
Çın küñeldän söygäneñne beläm,
Tik sizdermim siña belgänne.
Minem öçen genä yäşäveñne,
Küzläreñnän sineñ kürgänne.

Yöräklärgä därtle yaz ütä...

Cannar ürsälänä şul mizgeldä,
Därtle yazlar küñel "azdıra".
Cirneñ böten gönahların açıp,
Kıştan kalgan tunın saldıra.
Bar dönyaga huca bulgan kebek,
Der selketä yazlar küñelne.
Tınıçlıgın alıp, yöräklärgä
Şakımıyça kerä tügelme?
Hıyal däülätenä yul kürsätep,
Yöräklärgä därtle yaz ütä.
Kaynar koyaş belän süz berläşep,
Kışnıñ yalgışların tözätä.
Bähet taularına etärä ul,
Yoldız sala, uçlap, cannarga.
İrek birep tışaulangan hiskä,
Yazgı şatlık salıp kannarga.
Kabıza ul süngän yoldızlarnı,
Pıskıp yatkan ömet uyana.
Söyeneçtän eri irkä küñel ,
Gomer ofıkları nurlana.
Cılı sulışına törä yazlar,
Härber yöräk ayırım moñ saylıy.
Serle yalkın kaba cankaylarga,
Söyü läzzätendä därt kaynıy.

Sinsez yäşäü avır miña...

Sinsez yäşäü avır miña, irkäm.
Sinsez yanmıy tormış uçagım.
Yokısızlık huca tönnäremä,
Sine sagına kaynar koçagım.
Aşaganım azık bulıp barmıy,
Öylär buşap kaldı sin kitkäç.
Bu yalgızlık bigräk avır ikän,
Dönya nurlap yämle yaz citkäç.
Utlı taba kebek yatkan cirem,
Utırgan cir tora kadaktan.
Sagınudan canım moñga tula,
Tıyımsız yäş tama yañaktan.
Ällä sagışlardan, mart ayında
Küz açkısız buran kotıra.
Sineñ kitkän yullarıñnı tapap, ,
Açulanıp karlar tutıra.
Küzläreñneñ tösen kürer öçen,
Zäñgär küktän almıym küzlärem.
İsläremä töşep cannı kıya,
"Söyäm sine!"-digän süzläreñ.

Başkortostan...

Başkortostan - Tugan ilem,
Başkortostan - Torgan cirem!
Anam tele- Tatar tele,
Telem açtı - Ännä!süze!
Min küp gizdem başka ilne,
Sinnän güzäl belmim cirne!
Küp millätle gaziz ilem.
Sindä üstem, aldım belem.
Oya kordım - näsel ürdem,
Kiläçäkne sindä kürdem.
Tugan cirdän min köç aldım,
Siña härçak ğaşıyq kaldım.
Başkort ilen alıştırmam,
Tugan telne yalgıştırmam.
Soñgı könem sindä bulır,
Çit cirlärdä sagış tulır.
Başkortostan-mäñge balkı,
Bar yaklap ta gorur kalkı!
Üz halkıña kırıs bulma,
Tınıç tormış, mullık yulla!
Bar millät tä tigez bulsın,
Kükne koyaş nurlar torsın!
Rabbımnan yalınıp sorıym,
Üz ilemä bähet yurıym.

Yaz kilä bit... yaz kilä...

Cılı cil iste kinättän,
"Yaz kilä!"-digän sıman.
Koyaşnıñ kızulıgınnan,
Kışnıñ küñele tulgan...
Tübädän tama tamçılar,
Küprek kar izalana.
Ala-kola yatkan cirdän,
Görläveklär yul sala.
Yaz kilä bit... yaz kilä
Küñellär nazdan taşa
Yöräklärne yalkın ala,
Cannar söyüdän şaşa.

Yörägem sine teli...

Yörägem teli tik sine,
Canım- canıña yakın.
Nazga tulı küzläreñnän,
Sibelä sıman yalkın.
Tännärem dä - sine uylap,
Läzztlärgä törenä.
Uylarım tik sineñ belän,
İltä söyü ilenä.
Tatlı hislär , nazlı hislär
Yaga yöräktä uçak.
Sineñ belän bähet koşım,
Kavışu kötä koçak.

Kuşılıp yılıy tallar...

Urgılıp akkan yılganıñ,
Yarları yäşel çiräm.
Yangan yöräkne basalmıy,
Taşkın sularga keräm.
Yalgız cannıñ ärnülären,
Kemnär genä soñ añlar?
Hälläremä kergän kebek,
Yarında yılıy tallar.
Äyterseñ dä küz yäşläre,
Su östenä sibelä.
Canım tänemä sıyalmıy,
Sagışlardan özelä.

Toman...

Barır yullarımnı kaplap,
Sarılıp töşte toman.
Kirtä bulıp yullarımda ,
Yalgıştan saklıy sıman.
Ak tomannar araladı,
Köndezge tönnäremnän.
Kerfekläremä kundılar,
Koçtılar iñnäremnän.
Yörägemdä saflık arttı,
Tılsımınnan tomannıñ.
Sihri tamçıları aldı,
Bar açısın uzgannıñ.

Min köz kızı...

Agaçlarga kungan altın tösne,
Cil tuzgıta, ällä könläşep...
Şıbır-şıbır cirgä koyılalar,
Äyterseñ dä töşä söyläşep.

Häyran kalıp basıp karap toram,
Nindi matur, nindi hozurlık!
Şundıy matur, yämle köz ayında
Dönyaga bit kilü gorurlık.

Şayan cillär altın yafraklardan,
Tüşägändä cirgä kelämen.
Mul uñışlı közneñ kızı bulıp
Cir yözenä min bit kilgänmen.

Yalgan söyü...

Nigä kiräk miña şundıy söyü?
Tormışımnı nurga kümmägäç.
Yörägemne çiksez nazga törep,
Bähet diñgezende yözmägäç.
Nigä kiräk miña barı süzlär?
Kayda äytteñ-şunda kalganı.
Nigä kiräk yalgan väğdäläreñ?
Yörägemä yara salganı.
Nigä kiräk miña küz yäşläre?
Canım ärnüennän tügelgän.
Nigä kiräk miña şundıy tormış?
Ükeneçlär belän kümelgän.
Yalgan yamaulardan torgan söyü,
Can yafalar öçen yaralgan.
Işanıçsız söyü gazabınnan
Kunelemnen kuge karalgan
Äydä yäşä- üzeñ telägänçä
Zinhar öçen miña kagılma!
"Soñgı tapkır kiçer mine!"- diyep,
Kabat iñnäremä sarılma!

Büre tavışınnan köç aldım...

Cäyge tañnıñ tınıçlıgın bozıp,
Bik yakında ulıy bürelär.
Yöräklärdä şomnar tulıp taşa,
Dulkınlanıp kuya küñellär.

Üzem añlamagan ber his tua,
Kurku katış yöräk türennän.
Büre tavışınnan uyanganday,
Ofık nurlap koyaş kürengän.

Bürelärgä birep östenlekne,
Bar tirä-yak tınlık eçendä.
Üzäk özgeç büre tavışları,
İğtibarnı yaulau köçendä.

Bürelärneñ gorur tavışları,
Äyterseñ dä mine ürtäde.
Tik alarda gına bula torgan,
Canga köçle ber därt östälde.

Nahak süz...

Canım ärnegännän yazam duslar
Tüzärlegem tämam kalmagaç.
Niçä yıllar telen çarlagaç ta
Gaybätçeneñ tele talmagaç.
Keşese kem, kemnär söyli äle?
Avız açıp ber süz kuşmassıñ.
Şul äşäke ädäm belän bulıp,
Alar ıñgayına basmassıñ.
Kayan alıp söyli ul süzlärne
Tön yoklamıy uylap yatamı?
Üze kebek keşe çäynäüçedän,
Uram buylap cıyıp kaytamı?
Aptırıym min, nigä kiräk ikän,
Cannarına rähät bulamı?
Könläşüdän şulay keşe çäynäp,
Ällä tamakları tuyamı?
Üz alların nigä kürmi ikän,
Onıtkanmı uzgan tormışın?
Allanı da sanga sukmıylar bit
Kortlık belän kaplap bulmışın.
Cir kütärä şundıy hasislärne,
Elap tüzä şuşı hällärgä.
Balaların uylasınnar ide,
Kurıkmıylar yuknı söylärgä.
Bu dönyada tel çarlavı rähät,
Alla beler cavap alırga.
Nahak süzlär işetü ciñel tügel,
Tırışırmın tınıç kalırga.
Çıgırımnan mine çıgarırga,
Tırışalar zähär tel belän.
Barısı da arttan gına söyli,
Allarıma karşı yuk kilgän.
Barısına rähät tormış telim,
Minem kebek rähät yäşäsen!
Alla kürä bezneñ kılgan eşne,
Gaybätçelär äydä söyläsen.

Klasstaşlarıma... 30 yıldan soñ... (2012)

İsänmesez minem klasstaşlarım,
Ukıtuçı apa , abıylar!
Kaynar sälamemne alıp kildem,
Sezgä büläk itep can-duslar!
Rähmätemne alıp kildem sezgä,
Mäktäbemne kildem häterläp.
Yörägemdä tugan hisläremne,
Ellar aşa saklap, qaderläp.
Ul vakıtlar mäñge onıtılmas,
İñ bähetle mäktäp yılları.
Tänäfeskä däşep kıñgıraunıñ,
Kolaklarda şaulıy çıñlavı.
Küp tapkırlar töşläremdä kürdem,
Däreslärgä soñga kalgannı.
Däres vakıtında şayarışıp,
Direktordan şeltä algannı.
Belem algan urta mäktäbebez,
Bulmasa da inde küptännän.
Sagındırıp haman iskä töşä,
Ellar aşa uzıp , ütkännän.
Kayçan gına bergä cıyılışıp,
Mäktäp busagasın bez çıktık.
Utız yılnı uzıp , bergäläşep,
Oçraşuga bez bügen kayttık.
Üzgärgänbez inde, üzgärgänbez
Törle yazmış bezne sınagan.
Balalar da üsep buy citkännär,
Mañgaylar da inde sırlangan.
Gäüdälär dä yäş çaktagı tügel,
Karaşlar da bik nık üzgärgän.
Läkin küñel haman uncidedä,
Yöräklärgä közlär kermägän.
Bezneñ duslık haman sürelmägän,
Bik küp gomer ayırım bulsak ta.
Cıyılışıp kayttık oçraşuga,
Eraklarda tormış korsak ta .
Ukıtuçım- minem öçen böyek,
Belem dönyasına öndäüçe.
Rähmät sezgä äytäm kabat-kabat,
Onıtalmasmın sezne ülgänçe.
Klasstaşlarım... Sezgä endäşämen,
Tik bähetlär sezgä yullıymın.
Sezne kürüemä şatlıgım zur,
Bergä bululardan tuymıymın.
Utız yılga suzmıyk oçraşunı,
Eşrak kaytıyk tugan yaklarga.
Aralaşıp yäşik klasstaşlarım,
Bergä bulıyk avır çaklarda.
Sau-sälamät bulıyk barıbızda,
Taza-isän bulsın balalar.
Şatlık belän tulı bulsın tormış,
Suınmasın bezneñ aralar.
Ber küreşü - üze ber gomer bit,
Kader-hörmät itik duslarnı!
Bergä bulgan şuşı minutlarnı,
Onıtmaska birik antlarnı!

Yalgız akkoş...

Öçençe yıl küräm kül östendä
Parsız akkoş yözä moñayıp,
Öçençe yıl haman ışanmıyça,
Parın kötä mikän sargayıp?

«Yalgız akkoş kabat kaytmıy»-dilär
Kayta ikän şul ul akkoşlar.
Açı yazmış cile ayırganmı,
Buldı mikän ällä yalgışlar?

Dulkınnarga karşı yözä akkoş,
Yalgız kalu bigräk şul avır.
Ciñä alsa tormış dulkınnarın
Söygän yarın bälki ul tabır.

ÄTİ-ÄNİYEMÄ BAGIŞLIYM...

(dürtençe bülek)

Ätiyemne yuksınam...

Küzläremne açkaç , tagın yomdım
Töşläremne kilde cıyasım.
Barısında cıyıp , onıtmıyça
Şiğır itep yazıp kuyasım.
Täräzädän karap ätiyemne
Yuksındım min bügen töşemdä.
Sagınudan tamgan küz yäşemneñ
Açılıgın toydım önemdä.
Töşläremdä avır ide miña,
Äyterseñ dä yaña yaralar.
Berniçek tä dävalarga bulmıy,
Kaytarırga yuk şul çaralar.
Yörägemdä kaynıy sagışlarım,
Hasrätemnän canım kıynala.
Yäşläremne yotkan yıllar aşa
Uzgannarga uylar yul ala.
Başım teräp cirgä, Hodayımnan
Sabırlıklar yılap soradım.
Bügen kürgän barlık töşläremne
"Tik şatlıkka ", -diyep yuradım.
Belgän dogalarnı kaldırmıyça
Ukıp çıktım irtän torgaçta.
Nasıyp itsä ide Gaziz Allam
Oçraşırga bezgä ocmahta.

Äti kilde sine alırga...

Tür başında yatkan äniyemne
Koçakladım tınım buılıp .
"Ätiyebez taşlap kitte"-diyep
Äytä aldım canım kuırılıp.
"Şulaydır şul. Tavışı da bette
Bik teläde inde , äy Allam.
Hoday nasıyp itsä min dä inde
Ozaklamam, añardan kalmam!
Tavışlama kızım, çü, yılama
Ätiyeñä salma avırlık.
Bügen tönlä mine ozatırsız,
Hoday sezgä birsen sabırlık!"
Ätiyeñne küräm allarımda
Däşä mine kulların suzıp.
Bergä kitsäk sezgä avır bulır,
Toram äle äz genä tüzep.
Nasıyp dönya azagına citte,
Balalarım bähil bulıgız!
Ozın gomer telim barıgızga,
Gel uñışlı bulsın yulıgız!
Tatu yäşäp gomer yulın üteñ
Gomerlär bik kıska, belegez.
Abıy, eneläreñ belän kızım
Tuganlıknı saklıy küregez!
İñnärennän alıp äniyemne
Koçagıma kıstım yaratıp.
Ülemnärgä karşı torıp bulmıy
Kaygı cilen bulmıy taratıp.
Avır çirne ciñü mömkin tügel
Tik äniyem , sin ser birmädeñ.
Tüzälmäslek avır bulganda da
"Hälem avır minem"-dimädeñ.
Saubullaşır minut kilep citte
Boyık küzlär salmak yomıldı.
Şul minutta ayak aslarımnan
Cir ubılgan kebek toyıldı.
Äti aldı sine üz yanına,
Häzer inde sez kabat bergä.
"Bähetlelär"-dide avıl halkı
İkäü bergä kerdelär gürgä.
Dürt yıl buldı sezne yugaltuga
Dürt yıl inde yöräk yaralı.
Canım özgälänä dürt yıl buyı
Küñelemneñ küge karalı.

Sagınam äti- sine yuksınam...

Avır miña bügen, yöräk sıkrıy
Can özelä, urın tabalmıy.
Dürt yıl elek kaygı kitergän kön
Äle bulsa mine cäzalıy
Tormışımnı bolıt kaplagan kön
Gaziz ätiyemne yugaltkan.
Açı kaygı bägıremä ütep,
Yörägemne telep kanatkan.
Kütäralmas häsrät saldı bu kön
Dürt yıl elek minem canıma.
Sine yugaltuım çın bulganı
Haman señä almıy añıma.
Şuşı könnän tıngı tapmıy küñel,
Ärnep uza bik küp könnärem.
"Töşläremä kerer bälki "-diyep
Ömetlänep uza tönnärem.
Onıtılıp kitep telefonnı
Kullarıma alam kayçakta.
Şıltıratıp häl sorıysım kilä,
Onıtılıp kalam çınlapta.
Yuksıñ äti, yuksıñ inde cirdä
Yort-kuralar biktä toralar.
Sin bulmagaç kıyık aslarına
Şuk çıpçıklar oya koralar.
Rähmät äti, meñ-meñ siña rähmät
Üsterdeñ sin bezne qaderläp.
Biş balaña ürnäk äti buldıñ,
Tormışka sin birdeñ äzerläp.
Rähmät siña, äti, ätikäyem
Bar eşne dä belep eşlädeñ
Ut uynadı sineñ kullarıñda
Kızgan timer kebek yäşädeñ.
Dürt yıl bügen, äye ätikäyem
Dürt yıl tuldı sinsez kalganga.
Bu dönyada bezne yätim itep
Sagışlarga bezne salganga.
"Kapkañnı aç , äti, kaytam!"- diyep
Telim şaltıratıp äytergä.
Aşıktıñ şul bezne kaldırırga
Mäñgelekkä cirdän kitärgä.
Kükkä karıym, anda yoldız tügel
Sine küräm äti-yuksınam.
Yörägemdä sine saklıym haman
Sinsez yäşäü miña yuk sıman.

Äniyem kötä...

Tugan nigezemdä äniyem kötä
Täräzädän almıy küzlären.
Yaulık oçı belän yäşen cıyıp,
Üz aldına söyli süzlären;
"Kızım, balam-ber kızçıgım minem,
Bigeräklär sine sagındım.
Küñelkäyeñ bälki sizener dip
Büläk yaulıgıñnı yabındım.
Sin yaratkan balan bäleşe dä
Miçtä inde, tizdän ölgerä.
Sin kaytuga mayaşımnı kiçä
Peşerdem min yögerä-yögerä.
Sagışlarga salma mine kızım,
Borçularga salma yöräkne.
Kaytıp küren inde küzläremä
Añla , zinhar , minem teläkne!"
Eh, äniyem kaytır idem dä bit
Atlap tügel, oçıp yanıña...
Töşläremdä genä kötäseñ şul,
Tınıçlıklar tapmıy canıña.
Eh, äniyem yannarıña sineñ
Özeleplär kilä kaytasım.
Sabıy çaklarımnı iskä alıp
Koçagıña sıyınıp yatasım.
Uyanasım kilmi kayçagında
Töşläremdä kilä kalasım.
Can cılımnı birep äniyem siña
Nazlarıma kilä salasım.
Töşläremdä äniyem kötä mine
Täräzäneñ sörtep tirlären.
Barıp hälen belep bulsa ikän,
Belsäñ ikän torgan cirlären...

Töşläremdä kilsäñ, kil yılmaep...

Töşläremä yış keräseñ äniyem,
Dogalar da inde ukıymın.
Sädakalar birep toram härçak,
Uylarımnan sine kuymıymın.
Sagınamın äni, sagınamın...
Canım yılıy sinsez tormışta.
Küñelemdä çiksez ärnü yäşi,
Yöräk kısa härber sulışta.
Bügen tagın sine kürep äniyem,
Yäşläremä buılıp uyandım.
Koçagıma sine kısıp koçtım,
Tän cılıñnı sineñ toyaldım.
Mölderämä yäşlär belän tulı
Karaşıñnı miña töbädeñ.
"Bik sagındım sine kızım"-diyep
Moñsu gına ber cır köylädeñ.
Änikäyem, nigä kerdeñ töşkä...
Nilär siña birmi tınıçlık?
Minem öçen köyep- yanasıñmı?
İtä almaganga bulışlık.
Äni bäğrem , ütenep sorıym sinnän
Mine uylap telmä canıñnı.
Min bolay da härçak toyıp yäşim,
Yaşänämdä sineñ barıñnı.
Gazaplama cankayıñnı äniyem,
Sabırlıklar mindä citärlek.
Yazmış cillärenä karşı torıp,
Tormış yullarımnı ütärlek.
Töşläremdä kilsäñ , kil yılmaep
Koyaş nurı bulsın küzeñdä.
Alsu tañday balkıp torsın yözeñ
Turgay cırı bulsın kügeñdä.
Sine yugaltudan, yörägemdä
Huca bulıp algan buşlıkka.
Şatlık nurı kerer az bulsada
Yaşäü därten salıp tormışka.

Kaderle äniyem Fatıhova Kamäriyä
Gimadrislam kızı istälegenä...

Kötmägändä başka suktı häbär:
"Balakayım, äniyeñ tüşäktä...
Kayta kalçı, zinhar , soñga kalmıy
Kulsız kaldım, bulmıy nişläptä!"
Ätiyemneñ şuşı süzlärennän
Añım yugalganday toyıldı.
Telefonga ozak karap tordım,
Küz yäşläre sansız koyıldı.
Yörägemne yarıp uzgan häbär,
Huca bula yazdı üzemä.
Can ärnede, tozga mangan sıman
Kara pärdä yattı küzemä.
"Nişläp äniyem, äni-canıkayım,
Nindi çirlär siña kagıldı?
Bezne uylap- köyuläreñ ällä
Çirlär bulıp siña tagıldı?"
Küz aldımnan uzdı balaçagım,
Äniyemneñ yomşak kulları.
Bähet belän tulı karaşları,
Cırlaganda bişek cırları.
Biş balañnı tigez kürdeñ äni,
Barısın da birdeñ tigezläp.
Yanıgızdan inde taralıştık,
Härkaysıbız bäheten ezläp.
Şundıy matur dönyalarnı taşlap,
Uylama sin Äniyem kitärgä.
"Kaytam, kaytam äniyem yannarıña,
Bireşmibez zähär çirlärgä!"
Tezländerde karşısına Allam.
Tınnarıma buılıp yıladım.
"Mömkin bulsa, tagın beraz gomer
Birçe Änigä!"- dip soradım.
Rähmät Allam , mine işetteñme?
Gomer birdeñ söygän keşemä.
Ayagına bastı äni-bäğrem,
Tagın öç yıl östäp yäşenä.
"Häleñ niçek ?"-diyep soraganda,
Gel dä:"Äybät."-buldı cavabı.
Üze belep, çıdam karşı aldı
İşek kakkan gomer azagın.
Belägemä yatıp canın birde,
Yomıldılar şomırt küzläre.
Äle bulsa kolagımda çıñlıy:
"Bähetle bul!"-digän süzläre.


ÇIN YÖRÄKTÄN
(şiğırlär)

Änile çak...

Änile çak iskä töşä härçak,
Ozın çäçläremne ürgäne.
Yomşak kulı belän baştan sıypap
Üget-näsıyhätlar birgäne.
Änile çak bähet belän tulgan,
İñ tınıç cir- äni kuyını.
Äni barda böten dönya nurlı,
Yaşäüneñ yuk hiçber kıyını.
İñ tämle aş -äni peşergäne,
Cılı ikmäk aşap tuygısız.
Tür başında äni mendärendä
Ber yoklarga ide kaygısız.
Äni nazı - iñ nazlısı bulgan,
Tönnär yaktı äni yanında,
Mähäbbätkä törep, bez tugannı kötep,
Yöretkän ul bezne karınında.
Yoklamıyça bakkan tönnär buyı,
Bişek tibrätkän ul cır cırlap.
Bäylägän ul cılı oyıkbaşlar,
Törle ceplär belän sır sırlap.
Änile çak kaldı ütkännärdä,
Tik äniyem mäñge yöräktä.
Bergä bulgan ul bähetle çaknı,
Kaytarırga bulmıy teläptä.

Äniyemne kürdem töşemdä...

Töşkä tagın äni kerde bügen,
Dönya mäşäqate belän mäş kilä.
Kıyarların cıyıp alıp kuygan,
İnde çäçkälärgä su sibä.

Billärenä al yapkıçın bugan,
Eltır yaulık anıñ başında.
Söylänep tä ala üz aldına,
Min torgannı kürmi karşında..

Göllär belän tulgan bar tirä-yak,
Soklanudan küzlär kamaşa.
Çäçkälärdän çäçkälärgä kunıp
Kübäläklär kuya tamaşa.

Koçaklıysım kilep karap toram,
Tik nigäder ayak atlamıy.
Kinät kenä äniyem yukka çıktı,
Katıp kaldım berni añlamıy.

Küzlär tulı yäştän uyandım min,
Töş ikänen töştä añladım.
Yannarıña barıp nigä äniyem
Koçagıma sine almadım?

«Yaralarnı vakıt dävalıy»- dip
Äytüläre genä bik ciñel.
Ellar uzgan sayın avırırak,
Sagınudan özelä küñel.

Onıtmıyk änilärne...

Änilärneñ isän çakta
Kaderlären belmibez.
Sagınudan yäşlär tulı
Küz karaşın kürmibez.
Dönya artınnan kuabız,
Vakıt citkerep bulmıy.
Änilär kötälär bezne
Yuldan küzlären almıy.
Soñgı yullarga ozatkaç
Küñellär tıngı tapmas.
Küz yäşläre tügep kenä
Kiregä alar kaytmas.
Bu dönyaga bezne birgän,
Yaratıp nazlap söygän.
Gomeren bezgä bagışlap,
Gel bezneñ öçen köygän.
"Äni"- digän izge süzne,
Änilärne onıtmıyk.
Kader-hörmätlärgä törep
Buldırgança olılıyk!
Yaktı yözlärebez belän
Küñellären yuatıyk.
Cılı süzlärebez belän
Sagışların taratıyk.
Teläk bulsa- vakıt citä,
Änisez kalu avır.
Änilärne räncetmägez,
Ükenersez soñ bulır!

Tugan yagım...

Tugan yakka bulgan toygılarnı
Nindi süzlär belän añlatıym?
Küñellärne telep özgälägän
Sagışlarnı niçek taratıym?
Tugan yaknıñ suları da şifa,
Koyaşı da nurlı,cılırak.
Urmannarı tulı tatlı ciläk,
Basularda kakı,kuzgalak.
Can tınıçlık taba tugan yakta,
Kütärelä moñsu küñelem.
Kayçan kaytsam cılı karaş belän,
Karşı ala enem,kilenem.
Äti-äni genä karşı çıkmıy,
Kaytu yäme - karşu aludan.
Küzne kaplıy açı küz yäşläre,
Yöräk ärni özelep sagınudan.

Yakınnarım bulsın bähetle...

Ber könem dä tınıç kına uzmıy,
Törle yaklap cillär isälär.
Törle yaktan häbär alıp kilep,
Telemnärgä cannı kisälär.

Yahşı häbär kilsä - kurkıp kuyam
Şatlanırga citmi kıyulık.
Härber tınıç kına uzgan köngä
Riza bulıp kına torırlık.

Barısın da uylap özeläm şul,
Balalarım uynıñ türendä.
Taza-isän genä yäşäsennär,
Koyaş bulsın tormış kügendä!

Tugannarım çıkmıy uylarımnan,
Dürtese dä yakın canıma.
Enelärem öçen köyulärem,
Balaçaktan señgän kanıma.

Üz-üzemne onıtamın kayçak,
Barısı öçen yanıp-köygändä.
Buldıralsam barın eşlär idem,
Alar yärdäm sorap kilgändä.

Yakınnarım rähät yäşi ikän,
Tınıç ütä minem könnärem.
Yörägem dä şatlık belän tula,
Tämle yokı kürä tönnärem.

Kızık häl...bulgan häl...

Ber kızık häl söylim äle,
Kiçä genä bulgan häl.
Essedän kaya kerergä
Aptırap yöregän mäl.
"Usolka"-digän yılgaga
Töştek su koyınırga.
Taşlar belän bua buıp
Suınıp yuınırga.
Astan kuptara başlasak,
Stakan kilep çıktı.
Ul da bulmıy su astınnan
Yaltırap şeşä kalktı.
Anı-monı uylap tormıy
Tabışnı yarga bärdek.
Buabız da äzer buldı,
Rähätlänep yözärlek.
Matur gına yal itäbez,
Tirä-yagıbız tınıç.
Buabız da cille genä,
Essedä ber yuanıç.
Suık sudan läzzät tabıp,
Yatkanda rähätlänep.
İke hatın yakınlaştı
Kilgändäy gayrätlänep.
Kızıp nider söyläşälär,
Bezneñ yakka karıylar.
Baştan törle uylar ütte
Ällä , - dimen, tanıylar?
Berse kilde bezgä yakın,
Tirä-yakka küz attı,
Annarı kıyar-kıymastan
Äkren genä süz kattı.
"Zanaçkanı bezneñ taptıgızmı?
Stakan da bulırga tiyeş.
Şunda gına kaçırıp kuygan idek,
Eçärbez dip suıngan kileş.
Bulsa äydä, tizräk biregez dä,
İrlärebez kilep citkänçe.
Tiz-tiz genä kabıp kuyıyk äle,
Gradusı oçıp betkänçe!"
Hucasın taptı şeşäbez,
Yarıy da tükmägänbez.
Çüplär belän bärerbez dip,
Alıp ta kitmägänbez.
Caylap utırıp buada,
Ukıp bezgä rähmätne,
İrlärennän kaça-posa
Buşatılar şeşäne.

Miläşlärem...

Miläşlär alga mançılgan ,
Közlär mikän yakınnan?
Yörägemdä uçak dörli
Mähäbbät yalkınnan.
Miläşlärem täräzämä
Kagıp nilär söylisez?
Canımnıñ söyü utında
Yanganın sez belmisez.
Közge miläş tatlı bula,
Ballangan çagın kötäm.
Söyü koşım şul miläşkä.
Kunar dip ömet itäm.

Teläk...

Küktä yoldız atılganda
Telädem min teläklär.
Yäş vakıtlar iskä töşep
Özelä şul üzäklär.
Äyterseñ dä teläk teli ,
Özderä ber sandugaç.
Yörägem sulkıldap kuya
Sagışlar belän tulgaç.
Yäşlegemä yul soramıym
Sagınıp sargaysamda.
Allarımda al-göl bulsın,
Tik üzem kartaysamda.

Sakla Allam...

Saklıy kürçe Allam balalarnı,
Ber gönahsız sabıy cannarın.
Gomer birep cirgä cibärgänseñ .
Avırlıktan çistart yulların.

Gomerlären kismä yalgış öçen,
Egılsalar köç bir torırga.
Nasıyp itmä Allam analarga
Tapkan balalarsız kalırga.

Dustıma...

Äy duskayım,niçek teleñ bara?
Küzläremä karap aldıysıñ.
Üz küzlärem belän kürgän hälne,
Yalgan süzeñ belän talkıysıñ.
Sin bit minem yakın dustım ideñ,
Här süzeñä sineñ tabındım.
Şuşı berkatlıgım arkasında
Äle bulsa kilep abındım.
Işanıçım ülde, şuşı könnän
Duslıkka da urın kalmadı.
Açularım siña haräm kebek,
Yörägemne buşlık çornadı.
Häzer inde yäşä yalganıñda ,
Gönahası sineñ üzeñä.
Teläsäm dä ışanalmam kebek
Hätta inde döres süzeñä.

Olıgayta ällä...

Yukka gına küñel tulıp kitä,
Ul da bulmıy küzlär yäşlänä.
Olıgayu şulmı ikän ällä?
Urınsızga küñel ğarlänä.
İğtibarsız bula algan cirdä
Häter kalıp kayçak yafalıy.
Soñgı vakıt "kartlık çire" bik yış
Ükçälärgä basıp algalıy.
Pärävezgä tiñläşerlek bulıp,
Neçkärgännän küñel neçkärä.
Citep kala kırın karaşlar da,
Minut sayın uylar üzgärä.
Törle soraularga cavap ezläp
Cannıñ tınıçlıgı cuyıla.
Şul çagında inde uzgan gomer
Cırlangan cır sıman toyıla.

Hodayım gazaplama...

Cide yulnıñ çatlarında
Basıp torganday bulam.
Küñelemä tıngı tapmıy
Sagış-moñnarga tulam.
Sulkıldıy - yana yörägem,
Özgälänä bägırlär.
Nigä ikän yazmışıma
Yazılmagan qaderlär?
Kaysı yulnı saylasam da,
Añlıym nindi bulasın.
Yalgızlıkta uzgan gomer
Ärnülärgä tulasın.
Yä, Hodayım citär inde,
Ütenäm-cäzalama!
Gönahlarımnı gafu it,
Başkaça gazaplama!

Diñgez buylarına yul alam...

Yulga çıgam,erak yulga çıgam
Yul alamın diñgez buyına.
Tugan yagım, açulana kürmä
Vakıtlıça,tik yalga gına.
Belmim nigä tarta diñgez mine?
Yarlarında yatkan kom-taşı.
İskän cilgä karşı kilgän kebek
Dulkınnarın bärep şaulavı.
Cäylär citsä küñel kanatlana
Oçar koştay därtle talpına.
Tänem sorıy tozlı diñgez suın,
Yarlarında canım yal ala.
Tängä sihät ,canga rizık alam
Yarlarında Kara diñgezneñ.
Azga gına baram-yalga gına,
Tugan yakka citmi üzemneñ.

Korban bäyräme belän!

Rabbıbıznıñ rizalıgı öçen.
Cirdä bügen korban çalabız.
Tugannarnı,kürşe-külännärne
Tabınnarga cıyıp alabız.
Yatim ,fäkıyrlärne aşatabız
Mohtaclarga öleş salabız.
Rabbıbızga kuşkannarın ütäp
Yakınırak bula alabız.
Korban bäyrämebez kotlı bulsın ,
Görläp uzsın korban sıyları.
İman belän tulsın barça yöräk ,
İzgelektä bulsın uyları.

Apam bulsa...

Tik ber genä apam bulsa ikän,
Hiç bulmasa inde señelem.
Eç seremne açar ber keşem yuk
Ärnep özelgändä küñelem.

Urtak bulsa ägär şatlıgıbız,
Kaygı kilsä bergä köyenep.
Bulsa ikän tik ber genä apam
Yaşär idem çiksez söyenep.

Söygänemnän işettem...

Ber kürüdä ğaşıyq buldım irkäm
Üz gomeremä citärlek itep.
Billäreñne koçkan tolımıñnı kürep,
Häyran kalıp,islärem kitep.
Yalkın çäçkän nurlı karaşıñnan
Yörägemdä utlar kabındı.
Läzzät katış sihri ber his tuıp
Canım -tänem buylap sarıldı.
Şuşı könnän sin söykemle cannı
Yaşäp bulmıy ide kürmiçä.
Şiklänmiçä kilep kerde söyü,
Ğaşıyq buldım üzem sizmiçä.
Yörägemneñ iñ türenä uzıp
Saf mähäbbät cäyde tamırın.
Şul minuttan min añlagan idem
Gomerlekkä anda kalırın.
Säbäpläre buldı sünderergä
Tik canımnıñ köçe citmäde.
Ber kürüdä huca bulgan söyü
Yörägemne taşlap kitmäde.
Ul vakıttan çiksez sular aktı
Bik küp yıllar artta kaldılar.
Söyüemnän tugan ömet belän
Minem yullar siña bardılar.
Yäşlegemdä ğaşıyq buldım siña
Äle bulsa özelep yaratam.
Sinsez uzgan könem yıllarga tiñ
Yullarımnan sagınıp kaytam.

Üzgärde bit bar dönm...

Oçraklı ber oçraşudan
Üzgärde bit bar dönyam.
Karañgı tönnär yaktırdı,
Närsä buldı,äy Allam?
Yäş- cilkençäk çaklar meni,
Küñel cırlıy garmunsız.
Tik torgannan biyep kitäm,
Elmayam ber urınsız.
Uyandılar hıyallarım ,
Yokılar taşlap kitte,
Ällä inde yörägemä
Mähäbbät täräz çirtte?
Kanatlangan kebek yörim
Menä äle bügendä.
Şul gına citmägän ide
Miña irekle köndä.
Hisläremne yögänlärmen ,
Toygılarnı tıyarmın,
Yörägemä yulnı yabıp
Kelä salıp kuyarmın.

Yörägemne inde şakıma!

Şakısañ sin -şakı işegemne,
Yörägemne başka şakıma.
Tormış tärtäsennän çitkä çıgıp,
Kolın kebek inde tagılma.

Kiräk tügel sinnän bernärsädä,
Hakı kıybat kılgan eşeñneñ.
Canım şaşa kürep kılanışın,
İke yözle bulgan keşeneñ.

Başka arba ezlä inde canım,
Taba alsañ - tap sin bişekne.
Açulanmas idem hiç tä inde,
Şakımasañ hätta işekne.

Min küräsen-kem kürä...

Üzem turıda onıtıp,
Gel bit sine uyladım.
Sineñ yaratkan aşlarnı,
Peşerüdän tuymadım.
Eşkä kitkändä ozattım,
Karşıladım kaytkanda.
İrkäläp ,nazlap uyattım
Alsu tañnar atkanda.
Sineñ öçen gomeremne
Äzer idem birergä.
Könnär buyı üz yanımda,
Teli idem kürergä.
Yalgışlarıñ äz bulmadı,
Barısın gafu ittem.
Küzem yomıp küp närsägä,
Üzgärüeñne köttem.
Sinekeçä buldı barda,
Çıkmadım ber süzeñnän.
Küñeleñdä ni barlıgın
Kürdem sineñ küzeñnän.
Avırsınmıy bar eşne dä
Eşlädem üzem teläp.
Tormış barır kebek ide
Yaşäsäk caylap-köyläp.
Tırışlıgım cilgä oçtı,
Ciñälmädem yazmışnı.
Aptırap ta kuyam kayçak
Yazmışmı bu,kargışmı?
Sınau östenä sınaunı,
Kızganmıy,Hoday birä.
Şulay tiyeşter küräseñ,
Min küräsen kem kürä?
Sineñ belän uzgan gomer
Bulgan bit kara sızık.
Aldagısın - Alla birsä
Yaşärmen aktan sızıp.
"Uzgannarnı kızganma!"- dip ,
Äytüe genä ciñel.
İskä töşsä uzgan gomer,
Tınıçsızlana küñel.

Ğaşıyqlar köne...

Tugan köne bügen Mähäbbätneñ,
Ğaşıyq yöräklärneñ bäyräme.
Ber-beresen söygän ike cannıñ,
Küñelendä hislär bäyläme.
Bähetlelär köne belän duslar
İhlas kotlap telim teläklär.
Parlı bulsın cirdä barça keşe,
Mähäbbättän şaşsın yöräklär.
Küzläregez çäçsen söyü nurın,
Yanıgızda bulsın tiñ yarlar.
İrennärdä bulsın gel yılmayu,
Çittä torsın sezdän moñ - zarlar.
Söyegez häm sölegez duslar,
Can koyınsın sihri saflıkka.
Därtle söyü nazlarında yözep
Gomer uzsın bähet,şatlıkta.

Buşap kaldı...

Buşap kaldı canım,äyterseñdä
Äyländerep töben kaktılar.
Bar bulganın kısıp cıydılar da
Yolkıp alıp çitkä attılar.
Buşap kaldı yöräk,tındı kanım
Ärnülärem ,sagış-moñnarım.
Taşlap kitte bulgan barlık hislär,
Hıyallarga tulı uylarım.
Küñelemneñ kümerläre yanıp,
Kölläre dä oçtı cillärgä.
Taşlap kitte sıman bar da mine
Kire kaytmas yırak cirlärgä.

Söyüneñ cebe neçkä...

"Yaratam ,söyäm!"-di̇yüçe
Kübäyep kitte äle.
Çittä gıyşık uynar öçen,
Yörägemneñ yuk häle.
Üz yarımnı telägänçä,
Söyep bulsa da yarıy.
İr zatı bit naz citmäsä
Şunda uk çitkä karıy.
Uñga -sulga karanırga
Vakıt kalmıy bik az da.
Kolak salsañ çitkä-mitkä,
Batıp kalırsıñ sazda.
Çit -yatlarnıñ "Söyäm"näre
"Yaratam"ı ber kiçkä.
Kaderläp saklıyk bulgannı,
Söyü cebe bik neçkä.

Mähäbbät...

Mähäbbät ul-izge his,
Hodaydan bezgä büläk.
Büläkne yöräk türenä,
Salıp saklarga kiräk.

Mähäbbät ul-gomerlekkä,
Yugaltsañ canga yara.
Kansız ärnegän yaranı
Dävalarga yuk çara.

Üzeñ telägänçä yäşiseñ...

Üzeñ korgan,üzeñ teläp algan
Tormış belän bügen yäşiseñ.
Rähät bulsa siña- häbäreñ yuk,
Oçraganda hätta däşmiseñ.
Çönki telägänçä yäşiseñ.

Tormışnıñ da törle çagı bula,
Şulay bulganın da añlıysıñ.
Yardäm sorap yannarıma kilep
Yalagaylap mine aldıysıñ.
Telägänne almıy kalmıysıñ.

Miña bulsa üz eşeñne taşlap,
Berkayçan da yögerep barmıysıñ.
Üz aldıñnı başka keşelärdän,
Kıybatlırak diyep sanıysıñ.
Keşe öçen köyep- yanmıysıñ.

Köttem sine...

Gomerem buyı hıyalımda buldıñ
Köttem sine alsu tañnarda.
Köttem sine yarsu yazlar sayın,
Taşkınnarga ğaşıyq yarlarda.
Köttem sine kışnıñ burannarı
Täräzämne kagıp uzganda.
Cäyläremdä moñlı sandugaçlar
Sagış tulı cırın suzgannda.
Köttem sine uylı tönnäremdä,
Ay nurınnan nazlar alganda.
Çulpan yoldızınıñ çatkıları
Yörägemä ömet salganda.
Köttem sine,äle haman kötäm
Közläremdä bälki kilerseñ.
Mine teläp tipkän yörägeñne
Soñ bulsada miña birerseñ.

Räsäy-ilem siña endäşäm...

Närsä genä kürsätmädeñ bezgä Räsäy,
Tözeleşlär,üzgäreşlär ,sütep koru.
Elegese bargan tormış üz halkıñnı,
Tere kileş tabalarga salıp kuıru.
Halkıñ yana çıdıy almıy izelügä,
Eçkeçelek bastı avıl-kalalarnı.
Äz sınaular kütärdeme bezneñ cilkä?
İnde kemnär yasıysıñ sin balalarnı?
Miherbansız,oyatsızlar ilenä sin,
Äyländeñ bit,şul hällärne sizäseñme?
Tirä -yakka baylıgıñnı taratkanda,
Üz halkıñnıñ aç ikänen beläseñme?
Mihnät kürmi yäşi barı deputatlar,
Häyerçegä çıgıp bara gadi halık.
Alda nilär kötä ikän bezneñ başnı?
Baş yagınnan bozıla şul üle balık.
Räsäy yılıy,tik yäşlären kürüçe yuk,
Belüçe yuk nigä anıñ ärnegänen.
Kürü avır halkın tämug çokırına.
Sası isle balık başı söyrägänen.
Tere mäyet bulıp bara yartı halkıñ,
Tämug utı sıman yana sineñ biteñ.
Kan yılatıp ber hisapsız sava-sava,
Küpmegä soñ citär ikän sineñ söteñ?
Närsä öçen bez analar bala taptık.
Üzebezne kızganmadık,söydek,baktık.
Alda nilär kötä bezneñ gazizlärne,
Tulı kiştä sıra,hamer Häm narkotik?
Soçidagı uyınnarıñ bezneñ öçen,
Şatlık hisen tudıralmıy teläsäktä.
Vatıp bulmıy katlı täräz pıyalasın,
Töplärendä küpme genä göcläsäktä.

Dönya...

Bäydäge et bäysez etne
Äzer çäynäp özärgä.
İrekle ettän könläşmi
Avır aña tüzärgä.
Uzgan-barganga abalap
Ütä anıñ könnäre.
Rähätlänep üza kebek
Bäysez etneñ tönnäre.
Kirtä yarıgınnan karap
Bäydäge et ıcgıra.
Uram tormışına kızıp
Sıkrap gomer uzdıra.
Tormışta da şulay inde,
Yalgıznı parlı söyli.
"Rähätlänep yäşi bu"-dip
Yalgız tormıştan könli.
Gailäsen "Bogau"larga
Az tügel tiñlägännär.
Üz küñelennän çıgarıp
Başkanı söylägännär.

Keşe süze- keşe üterä...

"Keşe süze-keşe üterä",-dip
Yukka gına halık äytmägän.
Küpme keşe nahak räncetelep,
Açı küz yäşşläre tükmägän.
Borın astındagın kürmibez şul,
Urman artlarınnan ezlibez.
Üzebezneñ kem ikänne belmi
Ber ğayepsez keşe çäynibez.
Keşe tormışına keräbez bez,
Keşe kaygısınnan köläbez.
Şatlıkları bulsa könläşäbez,
Doşmanıbız kebek küräbez.
Barıbız da bala üsteräbez,
Beznekelär yahşı başkadan.
Rähätlänep telne çarlıybız bez,
Cıyabız bar tuzga yazmagan.
Şuşı zähär tellärebez belän
Eşlibez bez küpme yavızlık.
Urman artlarına küz atkanda
Borın astı sıgıp borırlık.
Närsä citmi bezgä bu tormışta
Tınıç ,tatu gomer ütärgä?
Keçelärne keçe kürä belep,
Olılarnı hörmät itärgä.
Härber keşe telägänçä yäşi,
Bälki yazmış şulay yazılgan.
Tikşermikçe keşe tormışların,
Nigä kiräk çokır kazırga?
Keşe söyläü gönah,onıtmıykçı
Gönahnıñ da iñ-iñ zurısı.
Tege dönyalarda cavap birü
Avır bulır duslar,uylıykçı!


YaZGI SULIŞ
(şiğırlär)

Yazgı koyaş- canga läzzät...

İñnäremä salıp kaynar kulın
Yazgı koyaş nazlap irkäli.
Utlı karaşları çagıldırıp
Küzläremne minem ürtäli.

Tınnarımnı törep sulışına
Küñelemä bähet tarata.
Yörägemne sihri moñga törep
Tatlı hisläremne yañarta.

Äyterseñdä canda nider şıta,
Börelänä koyaş nurınnan.
Tänem buylap läzzät yulga çıga
Şatlık taşıp çıga yarınnan.

Mähäbbätle yöräk yäşärä...

"Bu yäşeñdä siña nindi söyü,
Nindi Mähäbbät ul?"-diyärsez.
Bälki mine añlap citä almıy,
Tänkıytlärsez inde, söylärsez.
Mähäbbätneñ yäşe yuk bit anıñ,
Ul yäşägän yöräk - yäşärä.
Söyulärgä türdän urın birep,
Yaşärgä dä bezgä yäşärgä.
Yalgışudan, yanulardan kurkıp
Söyulärne kire kakmagız.
Mähäbbätle yöräk därtle bula
Söyulärne nazlap saklagız.
Dönya yämle, tormışıbız nurlı
Mähäbbättän yöräk dörläsä.
Yaşebezdä onıtıla hätta,
Canıbızga bähet ürläsä.

İsemeñne yazam karga...

Yamle yazlar yulda-diyep
häbär kilde.
Serle koyaş nurlarınnan
moñ sibelde.
Yazgı hava sulışınnan
tın nazlana.
Yöräk yana sagışlardan
can sızlana.
Yazam sineñ isemeñne
yazgı karga.
Kar suları alıp kitsä
tınar barda.
Yörägemneñ ärnüläre
bälki sünär.
Täqdiremä yazılganga
canım künär.
Küñelemdä siña bulgan
söyü ülär.
Yöräk türen börelängän
ömet bilär.

Min tüzermen...

Yaktı könnär küñelemne hiç yuatmıy,
Sinsez tormış -här minutı karañgı tön.
Koşlar sıman kitteñ minnän yıraklarga,
Toygılarnı tıyuları bigräk çiten.

Yatsam-torsam uylarımda sineñ belän,
Yalkınnarda yana yöräk, dörlim üzem.
Yoldızlarga karap sinnän kötäm häbär,
Yörägemne talkıp tora sagınu süzem.

Kışkı cillär, kar-burannar ürtägändäy
Dulap-yarsıp karlar tüşi yullarıña.
Mömkin bulsa kaynar koyaş nurlarıday
Tañnarıñda basar idem allarıña.

Hisläremne sagışlarga mançıp irkäm,
Saf söyüneñ kullarında min kol buldım.
Sular citmi kipkän nazlı göllär kebek
Sine kötep söyulärsez min dä suldım.

Kırıs tormış buysındıra almasada
Yäşläremneñ çişmäsenä sulış örde.
Yörägemne ärnülärgä minem salıp
Yalgızlıknı koçagıma tüşäp birde.

Kıyın miña irkäm sinsez uzgan tormış
Yalgız itmä -kayta kürçe yannarıma.
Kiler yazlar belän bergä kaytıp kerep
Şäm bulsada kabız äle cannarıma.

Hisläremneñ tiränlege çiksez minem
Çıdarga da, kötärgä dä min äzermen.
Sineñ nurlı küzläreñne kürer öçen
Koçagıñda erer öçen min tüzermen.

Bulganına şöker...

Citä bezgä Hoday birgän dönya,
Sınauları, birgän şatlıgı
Tazalıknı gına kızganmasın,
Kiräk tügel dönya baylıgı.
Katlı yortlar, zatlı maşinalar
Kiräk tügel taza bulmasañ.
Sıy-hörmättän östäl bögelüe
Nigä kiräk aşıy almasañ.
Bezgä äydä birsen Hoday vaklap
Barısın da äz-mäz çamalap.
Yardämennän bezne kaldırmıyça
Bäla-kazalardan aralap.
Baylık birep sınamasın Hoday
Barı citkän-şöker, kiräkmi.
Başkaylardan akıllarnı alma
Kaygı salıp kismä yöräkne!

Nahak işetü kıyın...

İğtibar itmim disäñdä
Süz işetsäñ bik kıyın.
Gaybätçelär osta bula
Söylilzr belep cayın.
Beräülär uynap söylänä.
Uylap söyläüçelär bar.
Äyterseñ dä alar öçen
Bu dönyada urın tar.
Üz tormışı astı öskä
Kilsä dä kürüçe yuk.
Başkalarnı tikşerüdän
Äyterseñ tamagı tuk.
Keşeneken bigräk tämläp
Söyli şul kayber ädäm.
Nigäder eçe poşamı,
Yanamı könläşüdän?
İşetkän süzlärne yullap
Yöregänem yuk-yugın.
Arttan nahak söyläsälär
Barıber nikter kıyın.

Rähmät...

Rähmät äti-äniyemä
Dürt tuganım bulganga.
Dürt yanında tagın da dürt
Kilen, ciñgi bulganga.
Eşkä osta barısıda,
Uñgan äti ulları.
Nindi genä eş bulmasın
Ut uynata kulları.
Yardäm kiräk bula kalsa
Çakırgannı kötmilär.
Vakıtların kızganmıylar
Eş betmiçä kitmilär.
Şatlıklarga şatlanışıp
Köyeneçkä köyenep.
Yäşibez tugannar belän
Bar bulganga söyenep.
Kilennärgä ber süzem yuk
Bersennän berse uñgan.
Bersen berse hörmät itä,
Äyterseñdä bertugan.
Tugannar tatu bulsalar,
Tormış barsa berläşep,
Yamle uza gomerebez
Yaşägändä görläşep.

Yalgız ana-sigez bala...

Kart könendä yalgız ana-sigez bala,
Ul häm kızga gomer birgän gaziz ana.
Uzgannarnı iskä alıp ber tuktausız
Küzlärennän mölderämä yäşlär aga.
Niçä yıllar yalgız ana-yöräk yana...
Kükräk söten imgänsez bit sigez bala.
Nilär uylap kaytmıysız soñ bägırırlärem?
Täräzädän sezne kötep küzlär tala.
Sigez bala - küñelegez gel dalada,
Ällä inde taştan sezneñ yörägegez?
Tapkan ana-bakkan ana özelep kötä,
Kiler ul kön özeler dä üzägegez.
Utlar yotıp bala kötä yalgız ana
Sez kaylarda, isänsezme sigez bala?
Ärnü tulgan yalgız ana yörägendä
Ömetlärdän bik keçkenä oçkın kala.
Yörägennän yäşlär tügel kannar tama
Yoklamıyça sezne bakkan yalsız ana.
Avırlıkka bireşmiçä sezneñ hakka,
Üz azıgın sezgä birgän ul zamana.
Cir äylänä-gomer mizgel, uylanıgız
Mäñgelekkä cir yözenä kilmi berkem
İñ qaderle keşegezne onıtsagız
Sezgä dä bit şundıy könnär kiler berkön.
Aşıgıgız analarga!, Yöräklären yandırmagız!
Räncetmägez - yalgızların kaldırmagız!
Bar gomeren sezgä birgän - sigez bala,
Sagış tulı yörägenä yaña yara yardırmagız!

Bişençe yaz kilde sezdän başka...

Zirat kapkasın açkanda
Dulkınlandı yöräk dereldäp.
Ärvahlarga sälam birep uzdım,
Küzlärgä yäş tuldı mölderäp.
Äkren genä ukıp dogalarnı
Ziratnıñ min uzdım türenä.
Alda mine kötep algan kebek
Äti-äni kabere kürenä.
Sälam sezgä minem gazizlärem,
Yatkan urınıgız tınıçmı?
Hälegezne belim diyep kildem,
Taratırga belmi sagışnı.
Bişençe yaz kilde cir yözenä,
Sezdän başka dönya uyana.
Bar tereklek irken sulış ala
İsännärneñ canı kuana.
Cir yözendä tormış dävam itä,
Yaña cannar tua almaşka.
Dönya şulay yaratılgan inde
Süz äytergä bulmıy tormışka.
Sezneñ yanda canga rähät minem.
Cavap tabam bik küp sorauga.
Kaberegez yannarına basıp
Nigez koram bik küp uylarga.
Sezdä bälki toyıp yatasızdır
Sezneñ kiñäş miña kirägen.
Ber kızıgız sezne sagınudan
Tıya almıy borçıy yörägen.
Karlar erep kaber öslärendä
Çäçmä ülännär dä kürener.
Kaberegez kirtälären koçıp
Ürmä göllär öskä üreler.
Sin yaratkan iñ maturın gına
Bıyıl äniyem tagın çäçärmen.
Sulışımnıñ soñgısına hätle
Onıtmıyça sezne yäşärmen.
Küñelemneñ türendä sez härçak
Minem öçen isän, qaderle!
Min bulmasam - balalarım karar,
Taşlamaslar sezneñ kaberne.

Tugan köne kızım Güzälemneñ...

Kön koyaşlı bügen-dönya matur,
Nurlarınnan tama mögciza.
Tugan köne bügen Güzälemneñ,
Yörägemne nazlı moñ sıza.
Egerme yäş minem kızçıgıma,
Canım cırlıy tatlı uylardan.
Yörägemneñ här tibeşe sayın
Bähet, şatlık sorıym Hodaydan.
Börelängän çagı gomereneñ,
Tik cıyına çäçäk atarga.
Yardämennän taşlamasın Hoday
Tormış yullarınnan atlarga.
Tulı bähet telim maturıma,
Bar yaklap ta anı çornasın.
Söygän yarıñ gomer buyı siña
Tik Mähäbbät cırın cırlasın.
Tazalıktan ayırmasın Hoday,
Sau-sälamät bul sin Güzälem.
Şatlık, saflık tulı karaşıñnı
Kürep şatlansınnar küzlärem.
Tugan köneñ kotlı bulsın bäbkäm.
Biktä sine özelep yaratam .
Tatlı cimeşe sin gomeremneñ
Sineñ yanda min çäçkä atam.
Sorap aldım sine Hodayımnan,
Güzälkäyem -minem küz nurım.
Tugan köneñ belän kotlau bulıp,
Büläk bulıp barsın bu cırım.

Gomer mizgel-tamçı gomereder...

Tamçı kızı tıpırdatıp bii
Koyaş nurlarında nazlanıp.
Yazgı sulış kuyınında erep
Tübälärdän töşä yullanıp.
Yaz köyenä bii tamçı kızı
Könnär buyı bii talmıyça.
Tuktamıyça söygän görlävege
Kuyınına anı almıyça.
Mizgel genä yäşi tamçı kızı
Kıska anıñ çäçkä gomere.
Ä şulay da salıp ölgerä ul
Küñellärgä yäşäü qaderen.
Bar täbiğat yaña sulış ala
Tatlı toygı yalmıy yöräkne.
Yaña ömet böreläre canda
Cilkenderep özä üzäkne.
Äy oçınıp bii tamçı kızı
Çagıldırıp şatlık yäşlären.
Öläşäse kilep bar dönyaga
Bähet belän tulı hislären.

Küñelem taş...

"Citte!"-diyep, cikerenep bügen
Üz-üzemä äyttem min süzem.
Küñelemne taştan koyıp kuyam,
Bulsın - diyep, çıdam häm tüzem.

Yalgışlardan kitelmäslek yasap,
Utta yanmas, akmas sularda.
Taşka äyländeräm küñelemne
Tapalmas - dim, kalsa yullarda.

Suıklarda kalsa tuñmas- didem,
Katırdım min teläp küñelne.
Belä torıp bu halättä yäşäü
Dönyalıkta ciñel tügelne.

Yazmış cile dulap kötmägändä
Ütälmasın öçen üzäkkä.
Taştan bulsın - didem, küñelemne
Yulnı yapsın - diyep, yöräkkä.

Hislär taşkınında kalıp kabat
Taralmasın öçen yalgışıp,
Bulsın äle taştan minem küñel
Borçıy almas berni yabışıp.

«Küñele taş, kansız ädäm »- diyep,
«Taştan ikän canı»- dimägez!
Yomşak ikänemne sizep kalıp,
Nahak söyläp - canga timägez!

Üz köne-üz yazmışı...

Här keşeneñ üz yazmışı
Uzganı, kiläçäge.
Hatalarga, yalgışlarga
Çornalgan küräçäge.

Kiçägese, bügengese
Aldagı kön tuışı.
Ellar, säğat, minutlarga
Salıngan can sulışı.

Üz karaşı, toygıları,
Şatlıgı - sagışları.
Üze genä belä algan
Tormışka karaşları.

Härber keşe-ul zur dönya,
Tik üzenä bilgele.
Başkalarga kara urman,
Yatka yabık küñele.

Aygöl Häm Azatka nikahları belän kotlau

Aygöl, Azat-kotlap bügen sezne
Çın küñeldän telim teläklär.
Sezneñ öçen qaderle kön bügen
Kuşıldılar sezneñ yöräklär.

Nikah köne sezgä yulnı açsın
Zur tormışka-bähet ilenä!
İñne iñgä teräp atlagız sez
Bireşmiçä tormış cilenä!

Mähäbbätneñ küllärendä yözep
Ömetlärdän cilkän üregez!
Tugannar häm duslar belän härçak
Tulı bulsın sezneñ türegez!

İkäü yakkan tormış uçagıgız
Mäñge sünmi, mäñge dörläsen!
Öyegezne nurlap, yämländerep
Sabıy tavışları görläsen.

Keşe süze, yatlar salgan yalgan
Aragızga ütep kermäsen.
Balkıp torgan nurlı küzläregez
Küz yäşlären berdä kürmäsen!

Gomer buyı şatlık, kuanıçta
Sündermiçä saklap söyüne,
Görläşegez kügärçennär kebek,
Belmägez sez yanıp-köyüne!

Aygöl, Azat-soklanırlık parlar!
Küz ti̇yüdän Allah saklasın!
Kaygılardan, bäla-kazalalardan
Avırlıktan sezne yaklasın!

Nikah köne...

Nikah köne - gomer mizgeleneñ
İñ qaderle - nazlı, nurlısı.
Yöräklärne şatlık çornap alıp,
Söyü nazlarına tulısı.

Karaşlardan küzlär irkälänä,
İrennärdä ballı yılmayu.
Ber Mähäbbät ike cannı törep
Tatlı toygılardan uylanu.

Därtle hislär canga läzzät salıp,
Bähet diñgezendä yözderä.
Ğaşıyq yöräklärne söyü utı
Yalkınına yalmap söyderä.

Serle dönya aça işeklären,
Mähäbbätkä nikah könendä.
Hıyallarga tulı ömetlärne
Çagıldırıp yäşlär yözendä.

Eh, añıma kilep ölgerdem...

Söyuläogä tulı küzläreñne
Mölderätep miña karadıñ.
Nazlarınnan şaşkan sulış belän
Kaynar irenemne barladıñ.

Köçle kullar kıstı kükägeñä
Nazlar kötkän minem sınımnı.
Baş äylände bähet yañgırınnan,
Tatlı hislär sardı canımnı.

Min sineke, tik sineke idem
Şul minutta, minem qaderlem.
Yöräk çumdı läzzät diñgezenä
Tik añıma kilep ölgerdem.

Tugan avılım – İştirägem...

Tugan avılım-minem İştirägem
Härçak sindä minem uylarım.
Balaçagım ütte koçagıñda
Çişmälärneñ eçtem suların.
Basularıñ tulıp kükräp üskän
İgennärdän ikmäk aşadım.
Yazın şaulap akkan görlävektän
Uramnarda bua yasadım.
Kazlar belän bergä sular kerdem
Şaulap akkan Karış yılgañda.
Keçebüläk kayınnarın koçtım
Küñelemä sagış tulganda.
Peçän çaptım hätfä bolınnarda,
Çikertkälär cırın tıñladım.
Takıyalar ürdem çäçkälärdän,
Käküklärdän gomer soradım.
Kötü cıygan cille çıbırkınıñ
Kolagımda çıñlıy tavışı.
Şiğır yullarımda İştirägem
Sindä üskän kızıñ sagışı
İñ qaderle –gaziz keşelärne
Ziratıña aldıñ İştiräk.
Bik küp yıllar cıygan sagışımnı
Taratırga miña sin kiräk.
Hiç onıtmam sine gaziz cirem
Tugan avıl- tugan töyägem.
Yörägemdä yäşi gomrem buyı
Tugan cirgä kaytu telägem.
"İştirägem-Anam!"- diyep däşäm,
Sinnän çittä oya korsamda
Sagınudan yöräk telgälänä
Yat cirlärdä rähät torsamda.

Yörägemnän çıkkan teläklär...

Koyaş nurlarınnan irkälänep
Yazlar cirgä ayak baskanda,
Bar dönyaga şatlık öläşüçe
Moñlı sıyırçıklar kaytkanda,
Därtle görläveklär şayarışıp
Nazlap uyatkanda cihannı,
Yäş ğailägä büläk yasap Hoday
Nasıyp itkän sineñ tugannı.
Kiler yazlar şuşı könnän alıp
Gacäyep ber nurga kümelgän.
Sin tugaçtın kuanıçka tulıp
Bar täbiğat nazga törengän.
Soklanırlık keşe bit sin dustım
Yardämçel dä, tugrı häm tüzem.
Nindi genä teläk teläsäm dä
Yörägemnän çıga här süzem.
Küñeleñ kiñ, yörägeñdä koyaş,
Tik izgelek sineñ canıñda.
Can koyına bähet däryasında
Ahirätem sineñ yanıñda.
Gomer bäyrämeñneñ iñ güzäle,
Şatlıklısı bügen - kürkäme.
Tormış tämen tatıy başlagan çak,
Canga nazlap bähet sipkäne.
Akıl belän yöräk duslaşkan çak,
İñ asılı –baldan tatlı çak.
Tämen belep yäşi belsäñ dustım
Közgä yullar yırak bulaçak.
Sineñ matur gomer bäyrämeñdä
Hislär taşıy yöräk türennän.
Teläklärneñ iñ izgesen genä
Telim bügen çın küñelemnän.
Yaktı koyaş siña yuldaş bulsın,
Aylı kiçlär törsen nazlarga.
Yoldızlı kük, sandugaçlı tañnar
Közläreñne mansın yazlarga.
Mäñge yäş bul minem ahirätem,
Tazalıkta uzsın gomereñ.
Telägäneñ kabul bula barsın,
Şatlık belän tulsın här köneñ.
Balalarıñ taza-isän bulsın,
Sineñ öçen özelep torsınnar.
Onıklarıñ sineñ kuandırıp
Bähetläre belän tusınnar.
Torgan cireñ tınıç, yaktı bulsın
Uzgannarda kalsın avırlık.
Can atırlık dus-işläreñ bulsın
Härçak yärdäm kulı suzırlık.
Ällä inde sin tuganga bügen
Canga rähät, şundıy küñelle.
Bähetle bul dustım, Birsen Hoday
Härçak koyaş tulı küñelne.
Mullık belän uzsın härber köneñ
Tulıp aksın tormış yılgası.
Çitläp uzsın sagış-borçılular
Siña äle gomer uzası.
Färeştälär kunsın iñnäreñä
Bähet bulsın härçak yanıñda.
Barır yulıñ sikältäsez bulsın
Ömet nurı bulsın canıñda.
Östäl tulı sıy hörmäteñ öçen,
Rähmät dustım cılı süzeñä.
Kılgan yahşılıgın küpkä artıp
Kire kaytısın sineñ üzeñä.
Rähmät siña dustım çın yöräktän
Zurlap cıydıñ bezne tabınga.
Yörägemnän çıkkan teläklärne
Büläk itep al sin canıña.

Sına yazmışkayım...

Äy, sınasañ - sına yazmışkayım,
Sınıy kürçe alay telägäç.
Borçımıyça mine äzgenädä,
Tınıçlanıp yäşi belmägäç.
Sınmasıma ışanmıyça haman,
Törtkäliseñ mine, talkıysıñ.
Tırışıp ta añlıy almıym sine
Närsä öçen açu saklıysıñ?
Bu gazaplar mañgayıma minem
Yazılgandır-nihäl itäseñ.
Küräçäkne kürmi bulmas inde,
Sine taşlap kaya kitäseñ?
Sınasañ da yazmışkayım minem,
Kaygı-häsrät birep sınama!
Märhämätle bulçı äz bulsada,
Ärsezlänä - diyep uylama!
Hoday birgän tazalıknı alma,
Balalarım bulsın bähetle!
Tugannarım tatu yäşäsennär,
Soramıym min sinnän tähetne.
Sabırlıklar birçe, ya Hodayım!
Tüzemleklär birçe, ya Allam!
Dönyalıkta bulgan sınaulardan
Ber min genä çittä kalalmam.

Bikle nigez...

Bikle äti nigezeneñ
yozakların açuga,
Sulış ala başlıy öylär
äyterseñdä aşıga.
Miña karap yılmayganday
toyıla täräzälär.
Min kaytkanga barısı da
şatlanıp söyenälär.
Bikle yortka kaytıp kerü
hällär tügel ciñeldän.
Kaytıp kürenep kitsäm dä
taş töşkändäy küñeldän.

Dönya...

Akça citmi, akça citmi
Akça citmi berkemgä.
Ber meñ birep algan azık
Citmi hätta ber köngä.
Haklar arta, haklar arta
Kütärelä küperep.
Bezneñ zarnı añlauçı yuk,
Elasak ta ükerep.
Gazlar arta, benzin arta
Bezneñ kesäne tarta.
Bezneñ kesälärne kagıp
Räsäy çitkä tarata.
Kurıkmıybız avırlıktan
Bar eşne dä eşlibez
Kreditlar tüli almıy
Elau tügel - keşnibez.
İgen ikkän basularnı
Şaytan tayagı baskan.
Kolhozlarnıñ ındırında
Tıçkan balasın askan.
Näfesebez bigräk tıynak
"Şöker!" -di bezneñ işe.
Ä şulay da küñel mıcıy:
"Bez dä bit tere keşe!"

Söyep-söyeler çak...

İlle yäşkä citkän çakta
bezneñ äti-änilär.
"Äbi-babay!" -dip endäşä
ide barça nänilär.
Üzebez häzer illeneñ
işek töben taptıybız.
Üzebezne äbilärgä
tiñlär säbäp tapmıybız.
Dönya şulay üzgärdeme,
ällä inde üzebez?
İkençe küzlektän kürä
barısın da küzebez.
Tormışnıñ iñ köçle çagı-
illedä kebek äle,
Tännär dä nazsız toralmıy,
yöräkeñ dä şäp mäle.
"Olıgayam!"- dip äytäse
kilmi äle hiçkenä.
Tatıybız tämen gomerneñ –
illegä citkäç kenä.
Yaz kilgänen kötep ala
äle bezneñ yöräklär,
Bezneñ belän yarışırday
hätta yäşlär siräklär.
Sandugaç cırın tıñlarga,
küktän yoldız sanarga
Buldırabız Mähäbbätneñ
utlarında yanarga.
Aylı kiçtä yoldızlarga
soklanıp tuyalmıybız
«İllegä cittek inde»- dip
hiç nokta kuyalmıybız.
Tormış üzeneken itä
niçek kenä bulmasın.
«Kartlık kilde»-dip küñellär
Sagış - moñga tulmasın!

Kayt yanıma bähet koşım...

Mendärem dä katı bügen nikter,
Yurganım da suık şikelle...
Barısı da sin kitkängä ällä
Üç alalar minnän tügelme?
Bergä çaknıñ tatlı yokıları
Mine taşlap kaçtı kaylarga?
Açulanıp min dä kayçagında
Menär hälgä citäm aylarga.
Säğat kenä serdäş kalıp miña
Tönnär buyı söyli hällären.
Sin yanımda bulgan vakıtlarda
Söyli almıy cıygan serlären.
Änä täräzädän ay da karıy,
Sinsez ul da moñsu kürenä.
Sagış tulı nurlarına kümep
Ürmäläde öyneñ türenä.
Sinsez tormış bulsın vakıtlıça
Sinsez tormış miña kiräkmi.
Yannarıma kaytçı bähet koşım
Nazıña tör minem yöräkne.

Uylarım säyähäte...

Tönnär buyı yoklıy almıy
Butalam uylarımda.
Tallarnıñ küz yäşe tamgan
Karışım buylarında.
Yäşlegemneñ ezlärennän
Kat-kat äylänep kaytam.
Can ärnüen basalmıyça
Sıkrap-sızlanıp yatam.
Uzgannarnı barlıy baram
Kay cirendä abınam.
Öy aldında serdäş bulgan
Tupıllarnı sagınam.
Sandugaçlı, aylı tönnär
Dörli söyü uçagı.
İskä töşep sagındıra
Söygän yarnıñ koçagı.
Büläk yoldızlar bäyläme
Küklärne bizi haman.
Biyep torgan därtle çagım
Tik kiçä bulgan sıman.
Şomırt çäçäge isläre
Açık aktan tösläre.
Gomerlekkä ez kaldırdı
Saf söyüneñ hisläre.
Gomeremne cırga tiñlim
Yazılmagan köy genä.
Kaysı yagın karasañ da
Bar yaklap ta cöy genä.
Sagındıra susaganda
Salkın çişmä suları.
Küpme genä tırışsam da
Basıp bulmıy uylarnı.
Yögänläp alıp gomerne
Cigep bulmıy tärtägä.
Yazmıştan kotılam dimä
Menep kenä kirtägä.
Sular urgıp aga alga
Bez ganä artka taban.
Şul çigengän vakıtlarda
Yalgızlık canga yaman.
Törle uylar dulkınlanıp
Başlarıma kagalar.
Säyähättä bulıp kaytkaç
Tınıçlanıp kalalar.

Ömetemne özäseñ...

Härnärsädän säbäp tabıp
Üpkälärgä torasıñ.
Uynap äytkän süzemne dä
Tiskäregä borasıñ.
Alay itsäm dä yaramıy,
Bolay da döres tügel.
Sineñ bu kılanışıñnan
Ärnep özelä küñel.
Yaratam-digän bulasıñ
Işanasım bik kilä.
Kırın karaşıñnı kürep
Ömetem tiz özelä.

Peçän çabam bolınnarda...

Peçän çabam bolınnarda
Kulda tugızlı çalgı.
Yäş çaklarnı iskä alıp
Belmiçä alnı-yalnı.
Huş isle bolın göllären
Çalgım tasmalap sala.
Yörägem cırlap torsada
Nikter belägem tala.
Sandugaçnı därtländerep
Şaulıy urman yänäşä.
Yaşel peçän öslärendä
Kübäläklär serläşä.
Bolınnarda peçän çabam,
Ütker çalgımnıñ yöze.
Bireşäsem kilmi hiçtä
Çittä tor gomer köze.

Uftanmıym...

"Uf"-dip äytäselär kilä,
Telemne teşläp kalam.
Yörägemneñ ärnülären
Kaçırıp töpkä salam.
"Eh "-dimiçä buldıralmıym
Üzäklär özelgändä.
Küz kırıyında mölderäp
Yäşlärem tezelgändä.
Uftanmıyça yäşäp kiläm
Zarlangan çagım siräk.
Bähet tulı kiläçäkne
Kürergä ide teläk.