Şiğırlär - İlşat Säyfullin

Batareykalı pesi

Tugan köngä äni miña
Büläk itte... ni disez?
Yuk la inde, külmäk tügel –
Belmisezme?
Belmisez!

Yä, alaysa, üzem äytäm –
Bik matur pesi birde:
"Saklap kına uyna, kızım,
Batareykalı!" – dide.

Caylap kına kolaktagı
Töymäsenä basuga,
Miyäulıy da çaba pesi,
Ällä kaya aşıga.

Kaymakta ul bigräk citez,
Mine dä kitä uzıp,
Könnär buyı uynasam da,
Tuyarlık tügel, Kızık!

Ä berkönne pesiyemä
Buldı kinät ällä ni:
İrtädän ük boyık tora,
Atlarga da telämi.

Ällä avırıy mikän, dip,
Aldım anı kulıma.
Yarıy äle, äytte äbi:
"Miyäubikäneñ betkän, – di –
Batareykası gına".

Miña küñelsez kalgannı
Beläm, öydä sizdelär,
Tiz genä tabıp kayandır
Yaña pesi birdelär!

Tagın da matur monısı,
Läkin tiz usallana,
Yukka da açuı kilep,
Barmaknı teşläp ala.

Bulmasa da kolagında
Basa torgan töymäse,
Uramga qadär çıga ul
Kilmi öygä keräse.

İñ yaratkan urınnarı –
Agaç başı, tübälär.
Batareykası küp bugay,
Yörmäs ide bu qadär.
Yarıy äle, enem bar!

Enekäşem üskän çakta
Söyläşä belmi yörde.
Telendä haman ike süz:
"Ännä"dä, "mäm-mäm" ide.

Ä miña bit bolay yalgız
Küñelsez dä, kıyın da.
Yä, kem belän söyläşergä
Äti–äni yugında?

Konfetlar birep, enemne
Yumalap ta karadım,
Faydası gına bulmadı,
Ber süz ala almadım.

Läkin yukka kaygırganmın –
Kiräk bulgan sabırlık,
Söyläşä häzer enekäş,
Tıñlasañ, tañ kalırlık.

Könnär buyı sorau artı
Sorau birep yödätä,
"Belmim" disäm, aptıramıy,
Üze mine öyrätä.

Ällä elek buldı mikän
Rähät çaklarım minem?
Yuk la inde, häzer rähät –
Söyläşergä bar enem!

Başım belän söyläşü

Kontrol eş bezdä bügen.
Matematika. Çiten.
Misallarnıñ äle menä
Tik bersen genä çiştem.

Başım eşlärgä telämi
Karışa, yalkaulana!
Äydä inde, öydä, dim bit,
Arıdım dim aldama.

Änä bit, küpme misallar,
Ä vakıt haman bara.
Ütenäm sinnän başkayım –
Az gına uylap kara.

İşetteñ bit, öydä bezgä
“2”le alma didelär,
Tırış, uyla, irenmä, dip,
Küpme üget birdelär.

Äy, başkayım, äydä inde,
Akıllı bit sin, beläm,
“5”le alsak, bıyıl siña
Yaña bürek kideräm.

Kepka alıp birer äni,
Berne tügel, ikene,
Küp kalmadı, zinhar, tırış,
Däres betä bit inde!

Click or select a word or words to search the definition