Şiğırlär - İldus Dindarov

Cäyge manzara 

Bıtbıldıklı arış arasınnan
Borgalangan basu yulları...
Akkayınnar belän kaymalangan
Al bolıtlı ofık buyları...

İlahi şul manzaranı mäñge
Küñelemdä yörtsäm gacäpme?!
Töşläremä kersä, ayıralmıym, imeş:
Tugan ciremme bu? Cännätme?

Yalgız yortta

Közge avıl. Şomlı karañgılık;
Tormış küçkän inde şaulı şähärlärgä.
Yalgız yortta yuanıçka tik ber şögıl:
Onıtılgannı kabat-kabat häterlätä.

Täräz aşa töşä karaş buş bakçaga;
Tabiğatneñ kışnı kötep oyıgan mäle.
Ak yaulıklı şäülä tora kebek anda –
Ä bu fäqat çalmabaşnıñ tirbälüe.

Nider toyıp kinät çänçi, sızlıy yöräk –
Kemder üksep yöri mällä öy tiräli?
...Çagıla da pıyalada çit-yat küzlär,
Karıydır kük siña räncep, ärni-ärni.

Ber yäşlektä, ber kartlıkta

Çañgı elep çaba malay.
Hiç kalışmıy bara babay:
Kigän bişmät ak yakalı,
Kömeşlängän, çal sakallı.

Malay kayda, babay şunda,
Çañgıları, eh, şäp şua!
Tigez kırda soñ ğadättä
Yörü ansat ul, älbättä.

Tekä tauga menep citkäç,
Tübän taban, örkäç-örkäç
Sikältädän hiç kurıkmıy,
Oçtı malay ak şarmıni?!

Anı kürep yäşe-kartı
Soklanudan tel şartlattı.
Üzänlekkä barıp töşkäç,
Bürken salıp, tiren sörtkäç,
Şärran yara şayan malay:
– Sin dä töş, di, äydä, ba-ba-a-ay!
Bala-çaga, olı-kara
İnde kartka tora karap.
Sınatırga yarıymı soñ?
Tirän sulış algannan soñ,
– Ber yäşlektä, ber kartlıkta,
Hayt! – dide dä beravıktan
Şudı kitte aska taban,
Kar tuzdırıp illä yaman.
Şürlämäde ber dä üze,
Kaltıramıy ikän teze;
Ükçägä dä hiç kitmäde
Kot digäne. İskitmäle!
Küpne kürgän soldat iç ul.
Ciñü därte kanda iç ul.
Taunı yaulap kuandı kart,
Babay öçen malay da şat.

***
Onık belän şulay bergä
Tänen yaza babay kön dä;
Sport, saulık yänäşädä,
Şuña da ul gel yäşärä!
Häräkätneñ bäräkäten,
Veteran şul belä räten.

Egetlär kük şul babaydan,
Kıyu, ärsez, şuk malaydan
Kartlık şürläp çitkä taya,
Kaçıp yöri ällä kaya?!

Elgır kalämçegä

"Rişvät öçen sukır tiyenne dä
Çıgarmıym", – dip söyläp tormaçı!
Näçälnigıñ maktap gel yazasıñ:
Busı da bit şunıñ forması.

Neft çıkkan yaklarda

Yartı, köläç, zäñgär sulı kül ide ul,
Päri cile tigän mällä yözlärenä? –
Karamaylı zur, bolgançık, çuar alka
Ohşap tora döm sukırnıñ küzlärenä.

***
İke ineş gel yänäşä akmıy, dilär,
Yä kuşıla berse, yä betä:
Koçagıña al da "yuk it" mine,
Hiç zarlanmıym, miña şul citä.

***

İreneñ – çiyä, yözeñ – alsu alma, dilär... 
Tik nigäder üzem genä ohşatalmıym;
"Cimeşlärneñ" çın asılın isbatlasañ –
Rähmät äytep "sıylanudan" baş tartalmıym.

Ber hatın süzläre

Kartaysa ni! Gaziz irem
(Torıgız şunı belep!):
Tuzgan sayın qadere artkan
Kıymmätle yözek kebek.

Ezlär

Bülmäm irtük nik yaktırgan? –
Tau şäüläse tügel lä.
Bügen bäyräm bulmıy lasa, –
Kaydan şatlık küñeldä?!
Ä uramda ap-paq cäymä
Küzlärne kamaştıra.
Yaña yaugan täüge karlar
Uyımnı sataştıra...
Färeştälär kanat cilpep
Mamık tuzdırgan sıman;
Küklär cirdä berençe kar
Tuyın uzdırgan sıman.
Şul aklıktan gınamıni
Bu tiklem aşkınuım.
Kiçä kürdem armiyädän
Kaytkan kürşe Haşimın.
Serdäş çiläklärem asıp
Çişmä buyın küzlädem –
Çü! Koş ta timägän cirlektä
Bu kemnärneñ ezläre?!
Dagalı soldat itege
Tamga kaldırgan käs-käs;
Yanäşä – ükçäle çitekneñ
Tabanı tiyär-timäs...
Kinät dönya yäme bette,
Güyä karlar karala.
Ällä karlar cepşi inde
Küz yäşlärem tamganga?

Click or select a word or words to search the definition