Şiğırlär - Ğalimcan Gıylmanov

ALDAKÇI TUKRAN

KER ELÄM

Bügen kön äybät. Kön buyı
Ker yuıp yörde äni.
Koyaşka elep ker, diyep,
Kulyaulık birde äni.

Alıp çıktım, elä almıym,
Koyaş ul yıraktarak.
Ayak oçlarına basam,
Barıber koyaş yırak.

Ürelep, sikerep karıym,
Koyaşka buyım citmi.
Niçek elergä dip toram,
Uylarga uyım citmi...

İh, inde eldem digändä,
Irgıp böten köçemä...
Balkıp yanıp torgan Koyaş
Kaçtı bolıt eçenä...

BEZNEÑ SVETOFOR

Kürşe-külänneñ
kön sayın
Yomışı töşep tora.
Yaşel kapkabız härkemne:
«Ker, ker!» — dip däşep tora.

Kön buyına kapkabızdan
Yöz keşe ütep yöri.
Kemnärder tuktap ta tormıy,
Kemder cay kötep yöri.

Kemneñder usal ätäçe,
Ata kazı, ete bar.
Çamalap kerergä kiräk,
Kerüneñ dä räte bar!

Bezdä — bozau. Sözep ata,
Az gına kıymıldasañ.
Sarbay isä bik teşlämi,
Üzenä kagılmasañ...

Äyterseñ, bezneñ här cirdä
Svetoforlar kuyılgan.
Bozau — kızıl, Sarbay — sarı,
Öy yäşelgä buyalgan!

AVIR HÄL

Min zur inde, ukıym-yazam,
Unga qadär sanıy beläm.
Kübräk tä sanar idem,
Tuktıym unber sanı belän.

Bu sanda hata bar kebek;
Un bereñ näq un bula bit.
Kabat sanıym, yazıp sanıym,
Yattan gına ontıla bit...

Un ike — yegerme bula,
Un öç — utız, un dürt — kırık...
İs-akıllarıñ kitärlek,
Ölkännärgä karap torıp...

Berkemnän dä oyalmıyça,
İlledän soñ yöz dilär bit.
İlle ike yöz bulgannı
Uylıylarmı sizmilär dip?..

Alarça, ike ille bar,
İke altmış, ike siksän...
Bu yalgan ber betär mikän,
Meñgä, millionnarga citsäñ?..

Yuri sanarga öyränmim,
Bu ölkännär — yalgançı.
Nadan bulu äybäträk
Yalgançı bulıp kalgançı...

MİNEM ETEM

Bezneñ öydä Akbay yäşi,
Minem belän uynıy ul.
Keşegä ohşamasa da,
Keşe kebek uylıy ul.

Tik... söyläşä genä almıy,
Küpme genä örsä dä.
Üze äybäträk çaba,
Dürt ayaklap yörsä dä.

İRTÄ BELÄN

Cıp-cılı, nurlı kön bügen.
Ber koş yuına tışta.
Gacäplänäm — üze näni,
Ä üze nindi çista!

Çirämdäge çık suında
Koyına da koyına.
Anıñ çäçkän tamçıları
Canlı sıman toyıla.

Kanatına ışkıp ala
Näni genä tomşıgın.
Şifalı, tılsımlı dilär
Yalandagı tañ çıgın...

Yuınırga onıtkanmın,
Tizräk kerim äle.
Uramdagı koşlar kebek,
Çip-çista yörim äle!

ALDAU KÖNE

«İkele», «öçle»lär alıp,
Bötenläy tuygan idem.
Aldau köne genä citsen! —
Dip uylap kuygan idem.

Telägemä ireştem bit:
Nık aldandılar öydä,
İke «bişle» alıp kayttım,
«Bişle» kötmägän köygä.

KANİKULGA ÇIGARDIM

Cäyge kanikul buyına
Tup uynap ütte vakıt.
Ällä küpme tirgeş aldım,
Öydä täräzä vatıp...

Tup suga töşkäç, alam dip,
Elgada bata yazdım.
Däü änigä tidergänmen, —
Küzlegen vata yazdım...

Häzer ukular başlandı,
Kışın niçek çıgarmın?! —
Cäy buyı tipkän tubımnı
Kanikulga çıgardım...

AYAKLARI ÖŞEMÄSEN

Östäleneñ ayakların
Kızgana Aydar.
Cäylären dä, kışların da
Yalangaç alar.

Ozak uylanıp tormıy ul,
«Öf-f!..» — örep kuya.
İñ yaratkan iteklären
Kiderep kuya.

ET ATALAR

Tön. Karañgı. Karşı yortta
Utlar sünä... Yatalar.
Bulat täräzägä kilgän, —
Uramda et atalar.

«Şart» ta «şort» mıltık tavışın
Etlär çinavı kümä.
Uramda cannar kıyıla,
Uramda — kanlı ömä.

Bulat äle añlıy almıy,
Sizä genä äle ul...
Ber karasañ — tere kebek,
Ber karasañ — üle ul...

Kıymşanmıy da karap tora,
Kıymşanırga kurka ul.
Kep-keçkenä küñelendä
Uynap yöri zur davıl.

Kay cireder avırtudan
Bulat yözlären çıttı.
Ul şulay balaçagınıñ
Çiklären atlap çıktı.

ET KOYAŞI

Äni äytä: «Bügen
Et koyaşı tışta.
Mondıy salkın könnär
Bulmagandır kış ta».

Küktä — nurlı koyaş,
Kanatları — altın!
Ä uramda — suık!
Ä uramda — salkın!

Täräzägä kilep,
Karap tordım yüri.
Ber keşe yuk tışta,
Etlär genä yöri...

ÄYLÄNÄBEZ

Minem ber şuklıgım öçen
Äni tirgämi.
Köne buyı äylänäm min
Koyaş tiräli.

Minem belän bergä oça
Enem Almaz da.
Ber tamçı da kurıkmıybız,
Hätta az-maz da...

Äniyem dä, ätiyem dä,
Öy dä äylänä.
Min dä äylänim äle dip,
Akbay bäylänä...

İnde künegep tä bettek
Gel äylänergä.
Galäm buylap äylänäbez,
Cir belän bergä!

ÖY CIEŞTIRDIM

Äni kuşkaç, ä digänçe
Öyne karap ölgerdem.
Uyınçıklarnı cıynadım,
İdännärne seberdem.

Eş betkäç, uynarga yarıy,
Tagın uynıy başladım, —
Böten bulgan uyınçıknı
Kabat çäçep taşladım.

KÄTÜK

Bu kätükkä närsä bulgan?
Yabıkkan — cebe betkän.
Şuña yılap utıra, di,
Bötenläy cebep betkän.

Ozak aptırap tormagan,
Ber şögıl uylap tapkan.
Mäçe balası artınnan
Uramga çıgıp çapkan.

KÖLÜ KAÇMASIN

Könnär buyı kölä Zilä,
Şundıy köläç ber kız ul.
Küp kölüdän yöze alsu,
Kolak oçı kıp-kızıl.

Kölgän çakta uçı belän
Avızın kaplap tora.
Oçıp çıgıp kitmäsen dip,
Kölüen saklap tora.

BARABAN

Kön dä baraban taptıra,
Nişlägänder bu Räsim?!
Änise yörägen totkan,
«Bar ikän, di, küräsem!..
Tavşınnan kolak tınar,
Belmim äle, uylarmın...»

Räsim äytä: «Ä min anı
Sin yoklagaç uynarmın...»

HÄLİM KUL KÜTÄRDE

Öy eşen häzerlämi, dip,
Hälimne orışalar.
Därestä kul kütärmi, dip,
Hurlarga tırışalar.

Hälimne min äybät beläm,
Söylämägez lä yuknı! —
Äle genä Nailägä
Kulın kütärep suktı!

MİN ÇIDAM

Bıyıl tagın Däü änigä
Kunakka kayttık.
Kaytkannan birle enemneñ
Çırayı çıtık.

Sagına ul öydä kalgan
Äti-änine.
Un märtäbä, yöz märtäbä
Elıy könenä.

Ä min...
Alay yılap yörmim.
Min şundıy çıdam!
Min bit...
Karañgı çolanga
Elarga çıgam.

ÇİŞMÄGÄ BARDIK

Çişmä suın maktıy äbi:
«Tängä bik şifalı, — di. —
Samavırga citmi inde,
Kiräkmi «Tifalı», — di.

Bügen dä äbiyebezgä
Çişmädän su kiterdek.
Kaytkan çakta çalbarlarga
Tügep-çäçep beterdek...

Oçragan böten keşegä
Äbidän sälam äyttek.
Ber çiläk su alıp kayttık,
Ber çiläk — sälamätlek!

TATLI TÖŞ

Soñgı vakıtta bik tämle,
Tatlı töşlär küräm min.
Başta yalkıtkan ide,
Häzer inde öyrändem.

Känfit öyelep tora,
Çäkçäge — küpme kiräk!
«Snikers», «Mars», «Baunti» —
Alardan da tämleräk.

Ä bit çınlap uylasañ...
Ber dä yukka şakkatam.
Min här könne şikärle
Äyberlär aşap yatam.

NURNIÑ YaÑA İSEME

Ber avılda Nur isemle
Kurkak malay yäşägän.
Ettän, mäçedän kurka, di,
Kurka, di, ul keşedän.

Uramga çıgudan kurka,
Yalgız öygä kerüdän...
Urmanga barudan kurka,
Çönki kurka büredän.

Ata kazdan da kurka, di,
Ätäçtän — bigräk tä.
Kürşesendäge Alsudan
Kurka, di, kübräk tä.

Hikmät şunda: bervakıtnı
Bu Nur kinät yugalgan.
İke atna ütkäç kenä
Ällä kayan tabılgan.

Yugalmagan da ikän ul.
Aña barı «kurkak» digän
Yaña isem tagılgan...

ENEM YÖRİ

Enem äle äybät itep
Yöri belmi.
Ällä çınlap, ällä inde
Yuri belmi.

Minemçä, ul küptän yöri,
Äytmi genä.
İkençe ay buyı bezne
Etli menä.

Kay arada tubın algan
Poçmaktagı...
Söyengänen kürsäñ ide
Şul çaktagı!

Östäldäge täm-tomnan da
Cillär iskän.
Yörider lä...
Änä bit ul
Niçek üskän!

Yöri ikän! Kılanuı
Yuri ikän.
Karap tordım:
Ul mükäläp
Yöri ikän!

KARAÑGI KÖN

Köne kön bulmadı bügen,
Kap-karañgı uram.
Uynıysı da kilmi hätta,
Ber urında toram.

Kaya bulgan bu Koyaş, dip
Uylıym kayçagında.
Böten dönya, böten avıl
Bolıt ışıgında.

Agaçlarnı yükä disäm,
Ä ul kayın ikän...
Yaktısız, nursız, koyaşsız
Yaşäü kıyın ikän...

Ällä Ay belän Koyaşnıñ
Urınnarı küçkän?
İrtä tañnan böten cirgä
K arañgılık töşkän.

Yalvarıp soragan bulam:
«Koyaşkayım, çık!» — dim.
...Bügen min tışka kap-kara
Küzlek kiyep çıktım!

KÜÇMÄGÄN....

Äti-änise Bulatka
Ör-yaña çañgı algan.
Çönki bıltırgı çañgısı
Äkämät kıska kalgan.

Eçe katıp kölep tora, —
Bulat ällä nişlägän:
«Uzgan yıl yörgän çañgım, — di, —
Klassınnan küçmägän...»

ATA-ANA

Tañ ata, Tañ ata, dilär.
Ofıkta ni yana mikän?
Kölep Koyaş çıgıp kilä,
Tañı ata... ata bulgaç,
Ä Koyaşı ana mikän?

TÖŞ HÄM FİL

Ber tönne usal büregä
Yulıktım min... töşemdä,
Yarıy äle uyanganmın
İñ kurkınıç töşendä.

Bervakıt minem töşemä
Häyläkär tölke kerde.
Üze şundıy kurkak ide!
Bigräk tä kölke kerde.

Ä kuyannar, kiresençä,
Gel batır bula töştä.
Ällä nindi mäzäk hällär
Kerä dä tora töşkä.

Töş ul böten hayvannarnı
Häylädä, köçtä sınıy.
Filneñ genä kergäne yuk,
Çönki fil... töşkä sıymıy.

KOYAŞTA YÖRİM

«Koyaşta ozak yörmä», — dip,
Kön sayın tirgi äni.
«Kızu kabar», — digän bulıp,
Uynarga birmi äbi.

Kön buyı koyaşta yörim.
Arımıym yöri-yöri.
Ällä nindi eşe dä yuk, —
Ayaklar yüri yöri...

Üzemne min bik gayrätle
İtep toyam yış kına.
Sikerenmim, yuksa koyaş
Küçärennän ıçkına.

Koyaş östendä yörsäm dä,
Nikter ber cirem peşmi...
Koyaş tügäräk bulsa da,
Ayagım tayıp töşmi...

Kayçakta su da koyınam,
Öygä dä kerep toram.
Şulay da, iñ küp vakıtnı
Koyaşta yörep toram.

Artık kızu bulmasın dip,
«Öf!» itep örep toram...

ALMA TÖŞSÄ BAŞIÑA...

Bulat isemle ber malay
Uramda uynap yörgän.
Nindiräk kızık tabıym dip,
Bik ozak uylap yörgän.
Yöri torgaç, ber bakçaga
Alma urlarga kergän.

Buyı citmägäç, agaçka
Täpäç belän bärä, di.
Alay da alma töşmägäç,
Taş alıp cibärä, di,
Annarı, başın totkalap,
Çitkäräk yögerä, di.

Taşı töşüen töşmägän,
Tik menä ber zur alma...
Agaç başınnan kıçkırgan:
«Başka naçarlık kılma!
Monnan soñ här adımıñnı
Küzätep toram, — digän, —
Tagın ber kizänep kara —
Başıñnı yaram!» — digän.

YaÑA KİTABIM

Äni birgän büläk kitap
Gel üzem belän.
Açıp utıram da anı,
Kıçkırıp köläm.

Nindi genä räsemnär yuk —
Etlär, mäçelär...
Koşlar, cänleklär bar anda,
Büre işelär...

Ber kız tup uynıy, ber malay
Tagan atına.
Kılıç bolgap tora berse,
Menep atına.

Däü äniyemä ohşagan
Äbi utıra.
Ä ber malay kesäsenä
Şörep tutıra...

Menä şundıy matur kitap
Öyebezdä bar.
Anda äle
«Nänilär öçen» digän
İke süze dä bar.

KIZIK İTTELÄR

Bügen yulda yüri genä
Yulärlekkä salındım.
Bilet aldım, üzem isä
Almaganday kılandım.

Tikşerüçe apalarnı
Kızık itärgä buldım.
Utırdım da
kergännären
Beraz kötärgä buldım.

Tramvayda baram şulay —
Kuyannıñ da kuyanı!
Kemder kilep törtkän ide,
Kittem, malay, uyanıp.

Tikşerüçe apa kergän,
Mine tirgägän bula.
Kesädä bilet yatsa da,
Yuri birmägän bulam...

Soñınnan tabuın taptım,
Kesälärne aktarıp.
Tik...töşerep kaldırdılar,
Biletımnı... tottırıp.

YaZ İSEME

Yaz — şundıy vakıt, härkemgä
Därtle köyen yoktıra.
İseme dä kızık anıñ:
«Yaz, yaz, cır yaz!» — dip tora.

KURAY

Kurayda kırlar dogası,
Çişmä tavışları bar.
Kurayda tugan yak game,
Keşe sagışları bar.

İñ elek kurayda tua
Här atkan tañnıñ köye.
Kuray ul tılsımlı äyber,
Kuray ul — moñlınıñ öye!

CÄY BELÄN HUŞLAŞU

Ber çäçäk selkenmi,
Ber kuak kıymşanmıy.
Ber serle tavış bar —
Kem anda, kem çıñlıy?..

Uynamıy, dulamıy
Tıngısız cäy-çaptar...
Elap cibärer kük —
Küzendä... çık bar.

ŞOMIRT SALKINNARI

Ap-ak bolıtmıni —
Şomırt şau çäçäktä.
«Şomırt salkınnarı»
Bulır kiläçäktä.

Şulay kışnıñ canı
Salkın bulıp töşä.
Ak kar kebek,
soñgı
Salkın bolıt töşä.

ATLAR

Avgust töne.
Avgustta
Bik küp bula yoldızlar.
Yalandagı kolınnıñ da
Mañgayında yoldız bar.

Kük yözendä küz kısışıp
Yoldızlar cemeldäşä.
Yoldızlı zäñgär kük bulıp
Miña da cäy endäşä:

Cihannıñ böten tılsımın
Birdem şuşı atlarga.
Canıgızga tılsım iñsen —
Çıgıgız at saklarga!

KAYTAVAZ

Kükkä karap kiñ yalanda yatam,
Ap-ak bolıt bulıp kön aga...
Ällä nidän genä, tik torgannan:
«Saumı!» — diyep däştem dönyaga.

«Saumı-ı-ı...» — diyep cavap birde kemder,
Kem ikänen şäyläp kalmadım.
Ällä inde cillär isep ütte,
Ällä cırı buldı kılgannıñ?

Tukta-tukta! Miña cavap birgän —
Sandugaçlı, tallı yar ikän.
Änkäy miña gel döresen äytkän —
Tabiğatneñ canı bar ikän!

ÇÜMEÇ YOLDIZ

Çümeç yoldız yäşi küktä, —
Tönlä çıgıp karagız.
Balkıp cemeldi başlasa,
Gel yahşıga yuragız!

Bu yoldıznıñ kük yözendä
Eşe caylı köylängän.
Ul här tañda sihri suın
Sibep çıga ülängä...

«Çık» dilär anı keşelär,
Çık — sunıñ iñ çistası.
Çümeç yoldız — yoldızlarnıñ
İñ şäbe, iñ ostası!

KIZIL KARLIGAN

Bik maktançık ber karlıgan
Bik irtä yafrak yargan.
Yaşel töymälären tagıp,
Bazarga kitep bargan.

Läkin anı bazar halkı
Ber dä satıp almagan.
Hi, keşelär katı, tämsez
Karlıganga kalmagan.

Tege maktançık karlıgan
Kire kaytkan bazardan.
Bik tä oyat bulgan aña,
Oyatınnan... kızargan!

PÄRÄVEZ

Kön dä malaylar belän
Ärämägä keräbez.
Ber urında, nişläpter,
Pärävez dä pärävez...

Çiklävek arasına
Keräm disä berebez,
«Yaramıy!» — digän kebek,
Totıp ala pärävez.

... Häzer bez bu urınnı
Gel çitlätep yöribez.
«Monda koş oyası bar», —
Di ikän bit pärävez.

BER BOLIT YaŞÄGÄN, Dİ...

Ber bolıt yäşägän, di,
Kış citügä bu bolıt
Bik katı öşegän, di.

Çitkä kitärgä bulgan,
Tugan yaknıñ maturlıgı
Bötenläy dä onıtılgan.

Yul totkan, di, könyakka,
Nurlı Koyaş ilenä
Mäñgelekkä kunakka.

Ämma bik tiz sagıngan,
Yañadan kaytır öçen
Cılı Yazga tagılgan.

İlen bik tiz tapkan ul,
Sagınuına tüzmiçä,
Elıy-elıy kaytkan ul.

Kaytkan, cirne yüeşläp.
Aptırıy, di, çit cirdä
Yörgänder ul ni eşläp?!

BOLIT

Küktän yözep barganda
Cirgä bolıt töşte.
Töşüen töşte, tik menä
Cirneñ başın tişte!

...Änä — ofık artında
«Şart-şort» itä bar dönya!

TILSIMLI KİÇ

Kiç. Tınlık. Yılga. Yar buyı.
Su östendä — yarım ay.
Ürelep kenä alır idem,
Tılsım betä — yaramay!

Kulnı alsam — can ürelä...
Çak tıyıp toram: «Timä!..»
Minem alda — sabıy çakta
Suga cibärgän köymä...

SALAVAT KÜPERE

Kızıl tösne söyü töse, dilär,
Koyaş tösle, dilär, bala çaknı.
Sarı közgä qadär ozın cäy bar,
Yaşel keläm yata aña çaklı.
Zäñgär räşä — cäyneñ canı uynıy,
Kük kük bulıp cäyneñ yöze baktı.
Şämähä tös — sörgän basu töse...

...Tugan yaknıñ böten töse yaktı!

TAÑ, KOYAŞ HAKINDAM MİFOLOGİK ŞİGIR

Töne buyı äbkäy
Bäz erläde.
Ber altın yomgak
Äzerläde.

Töşep kitte yomgak
Yalgış kına.
Kük yözendä kaldı
Balkış kına.

UMIRZAYA — GOMER ZAYA

Yaznıñ berençe çäçäge,
Yaznıñ iñ matur göle.
Äbiyem äytä: ul äle
Yaznıñ iñ batır göle!

Şuşı çäçäktän köç ala
Cılı koyaşlı yazlar.
Yaktı kiläçäk yurıylar
Şuşı göl belän kızlar.

Özärgä genä yaramıy!
Gomereñ zaya uzar!..

CİR SIYDIRGAN

Bezneñ avıl urtasında
Ärem kırı bar.
Şul kırnıñ tap üzägendä
Kura cırı bar.

Äçe, dilär, äremnärne,
Kuranı — tatlı.
Ärem, kura — ber-bersenä
Şulkadär yatmı?

Dönya bu. Ul kura kebek,
Häm ärem tösle.
Açı-tatlını sıydırgan
Cirem hay köçle!

UYANIP KİTSÄM...

Bügen ber koş tavışına
Uyanıp kittem.
Ozak yoklap yatuıma
Oyalıp kittem.

«Uramda çık, üländä çık
Çık inde, çık.
Buldıralsañ — oçıp çık sin,
Yaramasa — koçıp çık!..
İşekläreñ bikle bulsa,
Täräzäñne açıp çık.
Çık inde, çık, çık!» —
Çakıra çıpçık.

KIŞKI KİÇ. TINLIK

Kışkı kiç. Tınlık. Tıp-tın!..
Davıl da yuk, buran da...
Avır sulap: «Arıdım!..» — dip,
Tınlık yöri uramda.

Havadagı yoldızlarnıñ
Çäçkän yaktı nurında
Cem-cem kilä kar börtege...
Tınlık yöri uramda.

Yalgız kayın
uyga kalıp
Tora yılga yarında.
Şul kayınnıñ bäsen koyıp,
Tınlık yöri uramda...

Kayçandır tau şugan idem
Menä şuşı uramda...
Balaçagım kerep kitkän,
Tınlık kına uramda.

CÄY. İRTÄ...

Cäy. İrtä. Koyaşlı yañgır.
Almaz uyanıp yata.
Äti-änisen küzätep,
Eçtän kuanıp yata.

Änise tabın köylägän,
Ätise bik aşıga.
Aşıkkanın şunnan belä —
Şık-şık kilä kaşıgı.

Almaz da bik torır ide, —
Yuınırga irenä.
Küz-kolakların tomalap,
Yurganına törenä.

Üze uylıy: «Torıym, änä,
Uram uyangan inde.
Uyanıp kına kalmagan,
Şäpläp yuıngan inde...»

DULKIN

Beläsezme, dulkın bit ul,
Dulkın bit ul...
Dulkın —
Yup-yueş ut-yalkın bit ul,
Äye-äye, yalkın!
Üze yalkın, üze salkın! —
Änä niçek kalkına,
Kükkä taba talpına,
Güyä uçak yalkını!

Oçıp kitäm di bugay,
Ay karap tora aña,
Könläşep tora ay,
Ber häylä kora bu ay...

Änä inde, änä ul
Kilep töşkän dulkınga,
Şuşı därtle yalkınga...
Sünmi dä ul, batmıy da ul,
Su östendä kalkına,
Kurıkmıy da, ul belä:
Dulkın — şul uk ut-yalkın!
Ayırma tik şunda gına —
Ul... Ul — yüeş häm salkın.

ALMA KOELA

Közge tön.
Tıp ta tıp...
Almalar koyıla.
Mondıy tön
Tılsımlı
Tön kebek toyıla.

Min çıgam,
Sak kına
Açam da işekne;
Tıp ta tıp...
Kızganıç,
Äniyem işetmi...

Öydä ul,
Yoklasın —
Argandır eşendä.
Nıklap ber yal itsen
Üzeneñ töşendä.

Tıp ta tıp...
Tuktausız
Almalar biyeşä.
Bakçaga almalı
Bulu bik kileşä.

Tämleder...
Tuygançı
Aşıysı ide dä!
Kalganın
Öygä dä
Taşıysı ide dä!..

Çü! Kemder
Däşä kük:
Yuk, yaramıy, timä!
Tıp ta tıp...
Bu — Cirneñ
Can-yöräge tibä...

UYATUÇI KİRÄK

Niçek kenä toradır —
Koyaşnıñ säğate yuk.
Nigäder mindä genä
Uyanu sälate yuk.

Tora almıy integäm,
Säğatlärem bulsa da.
Gel yokı kilep tora,
Sigez... tugız tulsa da.

Üze uyata torgan
Şäp säğatlär siräk şul...
«Säğateñä kara!» — dip
Uyatuçı kiräk şul.

ÖNDÄGE TÖŞEM

Bügen äniyem hay matur! —
Elmayıp-kölep tora.
Ätiyem dä minem öçen
Özelep-ülep tora.

Äbiyem koymak peşerä,
Babay namazga baskan.
Bügen bezneñ öyebezgä
Bähet kapkasın açkan.

...Tüşägemdä,
rähätlektän,
İzräp, erep yatam...
Beläsezme, çınında min
Öndä... töş kürep yatam!

TÖŞ

Min, imeş, «bişle» aldım,
Algan yuk ide küptän.
Ällä şuña — borınım
Yugarı menep kitkän.

Ul şulay menä-menä,
Küzemne uzıp kitkän,
Kaşımnı uzıp kitkän,
Mañgayga menep citkän...

Anda da tuktalmagan,
Öskä mengän — kür äle.
Yamsez tırpayıp tora,
Äyterseñ min — Şüräle!

«Bişle» aluın aldım,
Mögezle bulıp kaldım...

MİN... KOYAŞTAN?

Härkemgä mäğlüm: koyaşta
Karañgı taplar bula.
Min dä koyaş kük, minem dä
Sipkelle çaklar bula.

Köndez koyaş kebek yörim,
Töngä keräm yoklarga.
Elmayıp toram.
Tırışam
Nurlı yözne aklarga...

Koyaşlı yañgır bik kızık:
Ber köçäyä, ber tına.
Elıysım kilsä, üzem dä
Kaçam äni artına.

Äye, mine koyaş belän
Küp närsä berläşterä.
«Koyaş kebek äylänmä», — dip
Äni dä tirgäşterä.

MAŞİNAM PIÇRANMADI

Şulkadär dä pıçrak tışta, —
Ayakka balçık kata.
Yuldagı böten maşina
Pıçraktan alcıp yata...

Törle yakka törtelgännär,
Berse: «Uh!» — di, berse: «Görs!»
Ällä küpme «GAZ»lar, «VAZ»lar,
«Mitsubisi», «Mersedes»...

Minem maşinaga gına
Ber närsä bulmadı.
Faraları çista kaldı,
Eçenä su tulmadı.

Ör-yaña kileş yöri ul,
Çıkkan bulsam da irtän.
Min bit anı köne buyı
Kesämdä genä yörtäm!
Vät!..

YuLDAN SUMKA BARA

Änä — uram buylap
Olı sumka bara.
Äle sulga kitä,
Äle uñga bara.
Bik küp äyberläre:
Orçık, enä, kadak,
Çäneçke häm kalak,
İkmäk, şikär, yarma,
Köräk, sänäk, tırma,
İke olı şalkan
Östä yata çalkan.
Töşkän sädäp tä bar,
İske säğat tä bar...

Niçek baradır ul,
Bik nık aradır ul?

Başın törtkän kabak,
Şık-şık kilä tabak.
Akvariumda balık
Bara häyran kalıp...
Näni köçek bara...
Şuıp töşep bara...
Agaç mıltık ta bar,
Tişelgän tup ta bar.

Sumka şıplap tulgan, —
Çak-çak kilä yuldan.
Bolar gına närsä —
Närsä çitek, lägän?!
Ul bit äle mine,
Mine citäklägän!

TOMAU TÖŞKÄN

Bezneñ samavır borını
Küpme borsañ da tama.
Näq mineke kebek inde —
Aña eläkkän tomau...

ÇÜKEÇ

İh, ber çükeç bulsañ ikän! —
Anı belä böten keşe.
Tavışlanu — bar şögıle,
Bärü, sugu — böten eşe...

KÄCÄ — NAÇALNİK

Yalan tulıp kötü kilä,
Käcä kilä iñ aldan.
Ber keşe kürenmi, ällä
Kötüçese yugalgan?

Böten avılnıñ kötüen
Yalanga alıp çıkkan —
Zur naçalnik bulgan käcä —
Galstuk tagıp çıkkan.

KÖNGERÄ

İ köngerä, köngerä,
Häbär sala: «Kön kerä!»
Yaña tañnı karşılap,
Üze aldan yögerä.
Ä digänçe köngerä
Ofıkka citä ala,
Härkön koyaş yözendä
Şäüläse torıp kala...

İ köngerä, köngerä,
Niçek kenä ölgerä?!

BALA BELÄN SANDUGAÇ

Bala: İ Sandugaç, nindi soñ sin? —
Koyaş belän uyanasıñ, —
Al tañdır sin!
Matur cırıñ canga yakın —
Altındır sin!

Sandugaç: İ Sabıy, şundıy ber koş min:
Tugan cirem — gadi tallık.
İlem — al tañ.
Töskä balkıp tormasam da,
Telem — altın!

TRAMVAYDA KEM BARA?

Tramvayda mäçe bara,
Bilet-mazar almıy bara.
Tikşerüçe apadan da
Kurkıp töşep kalmıy bara.

Kayan gına kilgänder ul,
Kilgänder ul ällä kayan.
Kem dip äytergä dä belmim:
Ällä mäçe, ällä kuyan?!

ÄTÄÇ

Ätäçne kayçandır
küktän töşkän, dilär.
Hätta koyaştan uk
Cirgä küçkän, dilär.

«Kikri kük!» digäne
Şunı añlata, di.
Ul bit: «Uyanıgız,
Kükräp tañ ata!» — di.

ALDAKÇI TUKRAN

Kön buyı tukran
«Tuk»ta «tuk, tuk» di.
Tukıldavınnan
Bik siräk tuktıy.

«Tamagım tuk», dip
Äytäder tukran.
Ä min, ışanıp,
Tıñlap utıram.

Tuk bulgaç, nigä
Tukıldıy ikän?
Äybät tügel bit —
Nik aldıy ikän?

KERPE

Bügen kürşe malayları
Kerpe totıp kayttılar.
Aña karap: «Täpiyeñne
Çıgar davay, hayt!» — dilär.

Kabarındı şunda kerpe,
Böten tänen uk aldı.
Täpilären çıgardı da
Ällä kaya yugaldı...

İ şaulaşalar malaylar,
Ezlilär, törteşälär...
...Öy eçendä, çäp-çep kilep,
Kemnärder söt eçälär.

BEZNEÑ TAU

Kış cittisä, ber tau belän
Maktala bezneñ uram.
Öşemäs öçen, kön buyı
Şul taudan şuıp toram.

Karale — uram yortları
Mine kürep kilgännär.
Öşegännär... Barısı da
Ap-ak bürek kigännär.

Öç tapkır sanap karadım:
Ber, ike...öç... näq altau!
Bik şuarlar ide dä, tik
Kütäralmas şul ul tau...

BULAT, ALMALAR HÄM... KÖZGE

Bezneñ Bulat bigräk kızık
Malay buldı arada.
Kızıklıgı şunda anıñ —
Ülep alma yarata.

Östäldäge almalarnıñ
Yartısın aşıy ala.
Alma kimergän çagında
Maymılga ohşıy ala.

Beteräm dip tä kurıkmıy,
Kızık itterep kuya —
Almalar kübäysen öçen,
Közge kiterep kuya!

ELAKLIK YOGAMI?

Äniyemne yaratam min,
«Äni, äni!» — dip toram.
Änine yaratuımnı
Señlemä dä yoktıram.

Señlem beraz yılak minem, —
Tiyep kitsäñ dä yılıy.
Kurçagına yalgış kına
Tibep kitsäñ dä yılıy.

Kayçagında üzemneñ dä
Küzläremnän yäş aga...
Min bit... az gına bulsa da
Señlemä dä ohşagan.

Şulay da, min siräk yılıym:
Atnaga ber, ayga ber.
Anda da señlemneñ genä
Elaklıgı yogadır...

BERNİ BULMADI

Bügen min yäşäp aldım
Cänleklär arasında.
Atap ta çıgıp bulmas.
Berämläp barısın da.

Bürene ürtäp aldım,
Ayuga tel kürsättem.
Ber tölke teşli yazdı
İñ oçınnan tersäkneñ.

Arıslanga: «Ir-r!» — didem,
Yulbarıska: «Miyäu!» — didem.
Bik usal bulsalar da,
Min bügen uyau idem.

Cänleklär belän yörep,
Köne buyı, uf, ardım!..
...Bügen bit min küp räsemle
Kitap karap utırdım.

BALIK BULASI KALGAN

Kızıktırdı ul: bu balıklar
Mäktäpkä dä barmıylar.
Barsalar da, däreslärdä
Cavap birep armıylar,
Söyläşmägäç... belmägändä
Kıyın hälgä tarmıylar...
Şuña kürä, şuña kürä
«İkele» dä almıylar,
Naçar ukıp, sıynıfınnan
Küçmiçä dä kalmıylar...

Söyläşmägäç rähätter ul,
Berkem sine tirgämi.
Suda ös tä pıçranmıy,
Ber cireñ dä tirlämi...

Kızganıç, kem buluıñnı
Belä almıysıñ aldan.
Menä miña da başta uk
Balık bulası kalgan...

SIERÇIK KİLDE

Därtle kagınıp
Sıyırçık sayrıy.
Üzenä şulay
Ul oya saylıy.
Bersen tirän, di,
Bersen bik say, di...
Häm... Kilep minem
Oyanı saylıy...

Äytä kebek ul
(Min şulay toyam):
Yaktı häm cılı
Yasagan oyañ...
Nigä ul şulay
Yaktı, cılı soñ?
Min aña saldım
Küñel cılısın.

«MÄÇEBEN»

Enem kaläm totkan san
Zur bähäs kuba öydä.
Küp mäşäqat tudıra ul
Şul bäp-bäläkäy köygä.

Närsä yasagan bu, diyep
Bügen dä aptırıybız.
Tegeläy dä, bolay da
bez
Nıklap uylap karıybız.

Mäçe dä ul, çeben dä ul,
Güyä şaytan boyırıgı:
Mäçe disäñ — kanatı bar,
Çeben disäñ — koyrıgı...

Enebez öy eçendä
Tavıştan tämam tuydı.
«Mäçeben ul...» — dip gaugalı
Bähäsne yabıp kuydı.

BATIR BULIR İDEM

Äkiyättä tugan bulsam,
Ber batır bulır idem.
Şürälelär oçrasa...
Bıltır da bulır idem!

Kamır batır, Tura batır
Bulsañ da yarar ide.
Äkiyättäge güzäl kızlar
Gel miña karar ide.

Alıp bulıp tumasam da
(Min maktançık tügel lä...)
Un batırga torırlık köç
Yäşi minem küñeldä!

Kürersez: at bäygesendä
İñ aldan çabaçakmın.
İlgä doşman yavı kersä,
Alışka çıgaçakmın!

ŞÄHÄR URTASINDAGI SAZLIK-KÜLNEÑ KÜMELÜEN
KÜREP, APTIRAP KALGAN ÜRDÄK SÜZE

Bak-bak,
Bak-bak!
Kayda bulgan
Batkak?
Ütkän közdä
Maktap
Yörgän idek
Taptap...

Kalmagannar
Saklap...

Anda lap-lap,
Monda lap-lap,
Arı atlap,
Bire atlap,
Asfalt östen
Taptap,
Taptap-
Taptap
Yörsäk tä,
Tabılmadı
Batkak...

İnde häzer
Niçek yäşik
Cannı saklap?
Menä şundıy
Bik küñelsez,
Bik küñelsez
Takmak.

Bu göl

yarattıra

Romaşka yöze belän

mine dä Koyaşka

belän ul Karap tora.

Şuşı karaşı

İGEZÄK SÜZLÄR

ALMA

Alma agaçında
Kürsäñ ber alma,
Anı iyäsennän
Soramıy alma.
Alma alam dip,
Namussız kalma!

TÖŞ

Bügen tönlä min
Kürgänmen ber töş.
Änkäy peşergän
Şundıy tämle töş!
Avız it, — di ul,
Tüşägeñnän töş!

BAGANA

Änä —
Uramda ber bagana,
Karap urman yagına,
Koş—
lar
Ke—
bek
Ka-
gı-
na.
Ul
Ur-
ma-
nın
Sa-
gı-
na.
Kay-
tır
İ-
de
Äy-
lä-
nep,
Ku-
el-
gan
şul
Bäy-
lä-
nep...

GÖL ÜSTERÄM

Min
bik matur
häm huş isle
göllär üsteräm öydä.
Göllär üsterüneñ seren
beläm bäläkäy köygä.
Bik nık yaratırga kiräk,
su sibärgä annarı.
Beläseñ kilsä,
göllärneñ,
göllärneñ bar cannarı.
yafragın gına özsäñ dä
ärni anıñ yarası.
Minem süzgä kem ışanmıy,
göl üsterep karasın!

TABIŞMAKLAR

***

Ansız berni eşli almıy
Mäktäptäge balalar.
Anıñ belän yaza-yaza,
Törle bilge alalar.

Ukıtuçı «berle» kuya —
Pıçırak yazıp kara!
Tik añarda bik mäzäk ul
Üze kızıl, üze ... kara.
(Yazu karası)

***

Sözäm diyep kilä bugay,
Mögezläre ike... Vät!
Ä üze keçteki genä
Äkämät häm tökemät.
(Äkäm-tökäm)

LİLİYÄ...

1

Liliyä tasmalar saylıy:
«Al kiräk!» - digän bula.
Uynıy-uynıy da: «Arıdım,
Yal kiräk!» - digän bula.

Annarı, utnı sünderep,
Yoklarga yatkan bula.
Berazdan utnı yandıra,
Şulay «tañ atkan» bula...

2

Liliyä sunı yaratmıy,
Suga kermi yalgış ta.
Ürdäk kebek, peçter-peçter
Yuına ul yalgışta.

Su koyınır ide, öste
Pıçırar dip kurka ul.
Äytsäm äytim: Su anası
Oçırar dip kurka ul...

TUN KİRÄK

Kuyannar, tölkelär,
Ayular, bürelär,
Çellägä karamıy,
Tun belän yörilär.

Bik turı kiläder
Essegä çıdarga...
Tun kiräk bulaçak
Kışlarnı çıgarga!

KAR BAZI KAZIDIK

Bügen bezdä zur ömä —
Kar bazı kazıdılar.
Äbi-babay karıy da:
Äybät kar bazı», — dilär.

Töşep-menep yörergä
Caylı tişek uydılar.
Cäyne suıtmasın, dip,
Östen kaplap kuydılar...

KÜÑELE BULSIN

Bulat enem, yılıy-elıy,
Yanga kilep utırdı.
Äle genä Däü ätiyem
Çıbık belän suktırdı-ı-ı...

Nindi usal, — digän bulam, —
Tik torgannan tukmıy ul.
Bulat nikter karşı töşä:
Avırtırırlık sukmıy ul...

Alay bulgaç, nik yılıysıñ,
Bozılgan böten töseñ...
Min bit yılıym...
Däü ätineñ...
Küñele bulsın öçen...

* * *

Homay digän Dönya Koşı bar, di,*
Kük Täñrese — Hoday aña yar di...
Şul Homaynıñ kanat şäüläsendä
Bähetlelär öçen bähet bar, di...

KIŞ KİLÄ

Kış kilä, kı ş kilä
Çanalarga töyälep.
Köz kala, köz kala
Kayınnarga söyälep.

KERLÄR TAGAN ATINA

Bar uram akka kümelgän,
Kış disäñ, kış ta tügel.
Kanatlar cilkenämeni, —
Koş disäñ koş ta tügel!

İke agaç arasına
Bäylängän bauga kunıp,
Ak kerlär tagan atına, —
Böten uramga tulıp!

Min güyä, tılsım iyäse —
Dönyanı aklap toram.
Oçmasın dip, şul aklıknı
Kön buyı saklap toram!

«EKSKURSİYÄ»

Äni irtän tordı da:
«Ber äyber kiräk, — dide. —
Başkaları küp, monısı —
Defitsit bigräk!» — dide.

Köne buyı änigä
Şul äyberne tabıştım.
Häm... sizdermiçä genä
Kazan belän tanıştım.

KÖZGE

Bıyıl miña tugan köndä
Közge büläk ittelär.
«Matur bulıp üssen», — diyep,
Kölä-kölä üptelär.

«Karagız közgemä», — diyep
Barısın yalıktıram.
Berär kaya bargan çakta
Yanımda alıp baram.

Äniyem mine kütärä,
Ä közge kulda kilä.
Min yılasam — ul da yılıy,
Min kölsäm — ul da kölä.

Kılansam — kılangan bula,
Gel artımnan kabatlıy.
Telne kürsätkänne genä
Közge ber dä yaratmıy!

SANARGA ÖYRÄNÄBEZ

Bez sanarga öyränäbez,
Nurnı alga bastırıp,
Näsimä kürsätep bara,
Ä min toram kıçkırıp:

Ber avızı, ber borını...
Ber tele... ber başı bar...
İkeşär kulı, kolagı...
İke küze, kaşı bar...

Öç miñe bar cilkäsendä,
Külmägendä — öç töymä...
Sanıy kitsäñ...
Dürt kesäle
Kostyum kigän östenä.

Kullarında — bişär barmak,
Yakasında — altı tap...
Cidegä qadär sanadım,
«Altı» didem aldadım.

Kesäsendä cide börtek
Sagızı bar bu Nurnıñ.
Sigez tiyen akça çıktı,
Häm... alkası Gölnurnıñ...

Şunı beldek — avızında
Tugız börtek teşe bar.
Nık çutladık — tiräsendä
Töp-tögäl un keşe bar!

Bez bügen köne buyına
Sannarnı öyränäbez.
Sannarnı öyrängän bulıp,
Soñ!..Nurnı öyränäbez.

BULATNIÑ TÖŞE

İrtän torgaç, Bulat enem
Töşen söyli başladı.
Tik... şunda uk tuktap kaldı,
Töş serlären açmadı.

Söylätkän bulasañ, — di ul, —
Üzeñ dä kürep tordıñ.
Min batırlık kürsätkändä
Yanımda yörep tordıñ.

OEK KAYDA BULGAN?

İrtän irtük Samat
Elap utıra.
İdän töyä-töyä,
Ulıy, akıra.

Kaya bulgan minem
Ber oyıgım, di.
Häzer öşer inde
Ber ayagım, di.

Böten keşe ezli
Sıñar oyıknı.
Tabılmıy bit, güyä
Ezlibez yuknı.

Ätiyebez tigi,
Samat başın igän, —
İke oyıgın da
Ber ayakka kigän!

TEL DÄRESE

Tatar tele däresendä
Bezneñ Väli ällä nişli
Ozın telen çıgara da
Ällä ürti, ällä keşni...

Apa tirgi...
«Ällä, — di ul, —
Äniyeñä belderäse?..»
Väli äytä: «Tirgämägez,
Bezdä bügen tel därese!»

KAZAN

İke yakta — alkası,
Eçendä — balık şulpası!
Menä şundıy savıt,
İsemen kara tabıp!

KAPKA

Bezdä şundıy kapka —
Böten cire takta.
Go- Go-
mer mer
buyı buyı
eş- sak
tä, ta.

TUP

Tup härvakıt tügäräk,
Yörer öçen tägäräp...

ZONTİK

Kayçan eşe tabıla? —
Açıla da yabıla.
Koş şikelle kagına, —
Ul yañgırnı sagına.

ÄNİ SÜZEN TIÑLIYM

Bügen unda uk tordım,
Ay-hay yoklap ardırgan...
«Öyne karap tor», diyep,
Äni yazu kaldırgan.

Tışta yämle.
Yaratıp
Çakırıp tora alan.
Uynau rähät...
Onıtmıym:
Öyne dä karap alam.

Tabın, tüşäk cıyılmagan,
Seberelmägän idän.
Tik nişlim...
Äniyem miña:
«Öyne karap tor!» — digän.

Avır eş: köne buyına
Öy karap utır inde.
Şulay da tüzäm. Äniyem
Rähmätlär ukır inde...

ÖYEBEZ YıLIY

Närsä bu? Nindi tavış?
Kemder yıgılgan yalgış?
Akıra da bakıra,
Ällä kemne çakıra.

Karıym — berkem kürenmi,
Kem bolay ulap yata?
Baksañ, baksañ — öyebez
Akırıp yılap yata!

Kaltırana täräzälär,
Kaltırana işeklär.
Avızın açkan hätta
Tübädäge tişeklär.

Kolak tondırgıç tavış,
Ä üze şundıy tanış...
Kemneñ tavışı soñ bu?
Yä, sin dä ezläp tabış!

Kem şulkadär kıçkıra,
Cällämi bit köçen dä...
Hi! Enem yılıy ikän
Öyebezneñ eçendä.

MİN OÇAM

Kön dä töştä oçıp yörim,
Koş kebek oçam, imeş.
Belmim, niçek oçamdır min
Kanatsız-nisez kileş...

İrtän toruga uk toyam:
Sızlıy böten iñnärem.
Oçam inde oçam, çönki
Kaz yonınnan mendärem.

BALIK TORMIŞI

Elgadagı balık halkı
Niçek yäşider.
Tın aluları kıyındır,
Kışın öşider...

Balıklarnıñ ni atası,
Ni anası yuk...
Ber genä uñay yagı bar —
Yuınası yuk...

NURNIÑ CİLLE KAMÇISI

Nur bügen kamçı yasadı,
Böterep kuydı oçın.
Şartlatıp karagan ide,
Çemetep aldı uçın.

«Şart» ta «şort»! —
Selkengän sayın
Hätär sızgırıp tora.
Kön buyı kolak töbendä
Cillär ıcgırıp tora!

Şartlatkanın sanap bardım:
Biş... utız.. ille... buldı.
Nurnıñ bu yaña kamçısı
Şäp buldı, «cille» buldı.

KİYEM AGAÇI

Almagaçnıñ iñ oçında
Yalgız öşi ber alma.
Sizep toram — tämle alma,
Kürep toram — ere alma.

Salam da atam şarfnı,
Kayışnı atam öskä.
İkese dä barıp kuna
Alma utırgan töşkä.

Biyäläy, iteklärne dä
Almagaç eläkterä.
«Ih!» ta itmi tege alma,
Ul hätta kölep tora!

Kızıp kitkän — berzaman
Almaga oçtı bürek.
Akbay örä, östä kalgan
Tiyen bürekne kürep...

Kara-kara! Bu agaç bit
Häzer tiyen agaçı!
Tiyen agaçı da tügel, —
Çıp-çın kiyem agaçı!

ÇİSTALIK HAKINDA

Minem enem şundıy çista,
Şundıy da pöhtä yeget!
Ber tamçı da pıçranmıy,
Mäsälän, minem kebek...

Külmägen dä karaltmıy ul,
Çalbarın yüeşlämi.
Köne buyı çista yöri,
Çönki ul... eş eşlämi.

KIZIK ŞİGIRLÄR

ŞİĞRİ TABIŞMAKLAR

* * *

Kolagı bar, işetmi ul,
Avızı bar— çakırmıy.
Tigez cirgä utıralmıy,
«Kiteregez çokır!» — di.
(Kazan)

* * *

Kolagı bar — işetmi,
Ayagı bar — yörmi.
Baş oçında — bolıt,
Eçendä ut dörli.
(Samavır)

* * *

Berni dä aşamıy,
Berni dä eçmi.
Köne-töne eşli,
Şuña türdän töşmi...
(Säğat)

* * *

Ul şundıy tınıç, ul şundıy gorur,
Patşanıñ üzen kürsä dä.
Tılsımlı, hikmätle närsä ul:
Ayaksız yöri, kulsız kürsätä.
(Säğat)

* * *

Keçkenä genä cil kapka
Açıla da yabıla.
Aña kergän härber närsä
Ak taşlarga abına...
(Avız)

* * *

Kolagı bar, işetmi ul,
Avızı bar— çakırmıy.
Tigez cirgä utıralmıy,
«Kiteregez çokır!» — di.
(Kazan)

RİFMALI TABIŞMAKLAR

* * *

Teşe küp bulsa da, aşamıy ul,
Şapşak keşelärgä oşamıy ul.
(Tarak)

* * *

Tabınga utıra miçtän töşep,
Sırlı tübätäyeneñ tübäse tişek.
(Bäleş)

* * *

Yañgır kilsä — tabaktay,
Koyaş çıksa — tayaktay.
(Zontik)

* * *

Närsä ul — aska taba üsä,
Yaz citsä — cirgä küçä?
(Boz sönge)

* * *

Koyaş kebek yaltırıy,
Eçendä su kaltırıy.
(Samavır yäki çäynek)

* * *

Simez genä ak tana
Mögezem bar dip maktana.
(Çäynek)

* * *

Belägemä yılan yabışkan,
Atımnıñ arkasın çagışkan...
(Kamçı)

* * *

Üze kilä — eze yuk,
Borını bar — yöze yuk...
(Köymä)

* * *

Üze yöri — atlamıy,
Simerüdän tuktamıy.
(Orçık belän cep erläü)

* * *

Canı bar, kanı yuk,
Unikedän artık sanı yuk.
(Säğat)

ÖÇ KIZIM BULDI

Bügen kızım, tını betep,
Yögerep kergän öygä.
Kıçkırıp yılap cibärde
Yögerep kergän köygä:

«Bar kıznıñ da ätise yuk,
Min berüzem ätile...
Uramga çıgıp, şularga
«Kızım» diyep äyt äle...»

Yögerep çıgıp ta kitte,
Artınnan çak ölgerdem.
Bügen beryulı öç kıznıñ
Ätise bulıp yördem.

MİNEM ÄTİ

Yä, äytegez, mondıy hälgä
Niçek kenä tüzärgä? —
Turı kilä, turı kilä
Äti kürmi üsärgä.

Kayçagında, kayçagında
Äti bik kiräk bula.
Kiräk bulu belän meni —
Öydä ul siräk bula.

Böten keşe belä anı, —
Uram tulı räseme.
Televizor — öye kebek,
Radioda — iseme...

Äle türälär yanında,
Äle halık aldında.
Cäyen yanıp-peşep kayta,
Tuñıp kayta salkında.

Cannı ürtäp: ul ber mäşhür
Cırçıdır, dip äytmägez...
Beler idegez
Kandidat
Bulıp yörsä ätkägez...

HÄLİM KIZIK SÖYLÄŞÄ

Soñgı vakıtlarda Hälim
Bötenläy dä üzgärde.
Kayan tabıp beteräder
Kızık-kızık süzlärne.

«Almadan cillär iskän», — di,
Yağni, kemder aşagan.
Kemder nider añlamasa:
«Şörepläre buşagan...»

«Tegermän yahşı tarta», — di,
Almaz bik küp aşasa.
«Berär etlek köt tä tor, — di, —
İldar cilkä kaşısı».

Kemder isängeräp yörsä —
«Hi... ayak öste yoklıy!»
...Hälim şundıy kızık malay —
«Telläre telgä yokmıy...»
Ay!..

Click or select a word or words to search the definition