Şiğırlär - Gali Huci

Kazlar oça küllärennän...

Kazlar oça küllärennän,
Moñsu kala ul yaklar;
Almagaçlar alma koya,
Altınlana yafraklar.

Kazlar ütä bezneñ östän,
Kazlar kitä tezelep;
Alar küzdän kümelgänçe
Karap kalam özelep.

Kul suzam da yaulık bolgıym,
Tik telemne belmilär;
Alar miña kanat cilpi,
Ni äytergä telilär?

Cil kayırsa kaurıylarnı,
Sin tabarsıñ, dilärme,
Kiç utırıp, söygäneñä
Hat yazarsıñ, dilärme?

Kazlar kitä, min ozatam,
Talıp betä küzlärem;
Agaçtagı yafrak çaklı
Aña söylär süzlärem.

Küreşerbez. Ütälmiçä
Kalmas bezneñ teläklär;
Taular-taşlar ayırılsa da,
Ayırılmaslar yöräklär.

Dolores İbarruriga

Ut eçendä böten İspaniyä,
Servantesnı birgän cir yana;
Bakçalarda apelsinnar köyä,
Näm kan belän sular allana.

Yuk, kol bulmas batır ispan halkı!
Köç tabar ul kabat tuarga,
Hoze Dias kebek ulı belän
Sezneñ kebek kızı bulganda!

Beläm çäçeñ nigä agarganın,
Yörägemdä yörtäm süzläreñ:
«Ayagürä basıp ülü artık,
Yaşägänçe cirdä tezlänep!»

Şulay ülde batır Lafuente,
Egermegä yäşe tulgançı.
«Geroylarnıñ tolı bulu artık,
Kurkaklarga hatın bulgançı».

Yörägeñ bu sineñ, İbarruri,
Batırlıgıñ sineñ, yakın dus!
Ömete sin barlık analarnıñ,
Sin — tormış häm irek, Dolores!