Şiğırlär - Dilä Yosıpova

SAGIŞ ÇÜLEN KİÇTE KÜÑEL

Sagış çülen kiçte küñel,
Äle tuñıp, äle köyep.
Küzläremä ber karaçı,
Bäğırkäyem, nazlap-söyep.
İrennärem kipte susap,
Ber yotım naz birsäñ ide.
Min adaştım sine ezläp –
Üzeñ karşı kilsäñ ide.
Yalkınnarda yalgız yandım,
Bäğırkäyem, sine kötep.
Mähäbbätsez yäşäü çiten,
Bähetemneñ çite kitek.
Çüllärdä dä göllär üsä,
Kaderläsäñ, sular sipsäñ.
Kibär çişmä, sulır gölem,
Bäğırkäyem, kürmi ütsäñ.
Sagış çülen kiçte küñel,
Sabırlıklar alıp küktän.
Kiläçäkkä bergä atlıyk,
Sin üzeñ dä ğaşıyq küptän.
Sin üzeñ dä...

“Yaña Vakıt” 22-1998 yıl.


* * *
Bähetlemen: näsel tamırlarım
Borıngıdan – tirän katlamnan.
Üz halkımnıñ şäcäräsen saklıym
Küz tidermi cide yatlardan.
Törki babam kanı aga mindä -
Näsel başım – tatar-bolgardan,
Sabırlıgım – İdel buylarınnan,
Cır-moñnarım – gorur Uraldan.
Buınnardan buınnarga küçä
Altınnardan kıymmät ber miras:
Yäşägändä İlem – tel yugalmas,
Tel barında halkım yugalmas.
Tarih uçagında küpme baylık
Äylänsä dä kara kümergä,
Bez bar äle cirdä! Bez yäşibez,
Aşıkmagız bezne kümärgä!
Cuyılmadık äle, kön küräbez
İdeldä dä, Seber, Uralda...
Çal tarihlı millät yukka çıkmas,
Sin dä, tugan, ezsez yugalma!

“Yaña Vakıt”, 16-2003 yıl.


ÜZ ÜZEMÄ

Sabır töbe – sarı altın , diseñ,
Sabırlıkka mine öndiseñ.
Sabır savıtlarım mölderämä,
Ärnülärgä niçek tüzim soñ?
Kiçer, diseñ, ägär räncetsälär,
Yörägeñdä açu saklama.
Uñ yañakka sukkaç, sulın kuyıp,
Meñ kisäkkä bäğır vaklana.
Dürt ayaklı at ta abına, dip,
Onıt, diseñ, yatlar yalgışın.
Yalgışlardan yara kalgangadır,
Sagışlı bit gomer agışım.
Kemnär belä, gomer bakçasınıñ
Cimeşläre niçek peşäsen,
Sagındırıp, yäki ükenderep
Kaysı ğamäl iskä töşäsen?!
Sınıy yazmış bezne här kön sayın.
İ Hodayım, birçe sabırlık,
Adaşmıyça tormış yullarında
Keşe bulıp cirdä kalırlık!

“Yaña Vakıt”, 16-2003 yıl.


* * *
Sandugaçlar oya korsın diyep,
Su buyında üste tal-tiräk.
Çişmälärdän sular algan çakta
Parın taptı küpme yäş yöräk!
...Tamırları tirän ide dä bit,
Tiräklär dä audı davıldan.
Kanat kakkan koş balası kebek,
Kitä tordı yäşlär avıldan.
Karlıgaçlar kaya oya korır?!
Taşularda yarlar işelde.
Çormalarda tuzan cıyıp yata
Onıtılgan bala bişege.
Özelde köy, tuktap kaldı vakıt,
Sagış sardı ineş üzänen.
Sıgıldılar tallar kaygıdan:
Tagın ber yort yomdı küzlären.
Sandugaçlar cırın kemnär tıñlar,
Çişmälärdän kemnär su alır?!
Kitkän çakta yullar takır ide,
Kaytuları bulır, ah avır.
Yañgır yuar, karlar kümep kitär
Balaçaknıñ täpi ezlären.
...Göllär orlık koygaç, nigez ezläp
Üksep yılar beräü közlären.

“Yaña Vakıt”, 16-2003 yıl.

EZLÄMÄ

Ezlämä sin mine, ezlämä,
Adaştım buranlı kışlarda.
Ber korgan oyası taralsa,
Bähetsez bula bit koşlar da.
Ezlämä sin mine, ezlämä,
Riza bul yazlarnıñ barına.
Taşıgan, yarsıgan ineş tä
Kayta bit barıber yarına.
Ezlämä sin mine, ezlämä,
Çualgan sukmaklar közlärdä.
Berkemneñ bäheten urlamam,
Tik sünmäs söyüem küzlärdä.
Ezlämä sin mine, räncemä…

OYALÇAN YıGETKÄ

Tulışkan böredäy küñelneñ
Yazlarnı kötüen toymadıñ.
Yaratam disä dä küzläreñ,
Kal diyep äytergä kıymadıñ.
Koyaşka açılgan göl kebek
Serlärem açmadım, ükenäm.
Färeştä tügel min, Cir kızı,
Kütärmä küklärgä, ütenäm.
Küz yäşem yäşerep yılmaydım,
Huş diyep kulyaulık bolgadım.
Min kittem, sin yalgız yullarda,
Uralıp tomanga yugaldıñ.
Adaşsañ, tapmasañ sin mine,
Ükeneç telgälär üzägeñ.
Çit yarnı üz itmäm, kötärmen,
Mähäbbät hakına tüzärmen.
Hisläreñ tıyma, sin, oyalıp,
Yörägeñ sagıştan sızlatma.
Kıyurak bul, yeget, sınatma,
Bäheteñ min bit ul, yugaltma.

ÄNİYEM ŞÄLE

Mamık şälen alam kullarıma,
Änkäyemne ägär sagınsam.
Yuatadır kebek: «Tüzemle bul,
Räncetsälär ägär, kagılsañ».
Gel şatlıktan gına tormıy
tormış,
Bula anıñ avır mälläre.
Salkınnardan, burannardan saklıy
Änkäyemneñ mamık şälläre.
İñnäremä salam änkäy şälen,
Küñel tulsa, kilsä yılıysı.
Mamık şälgä küçkän mikän ällä
Änkäyemneñ yöräk cılısı?
Mamık şälneñ härber bizägenä
Küz nurlarıñ kuşıp bäylängän,
Ap –ak şäleñ, änkäy, iñ zur büläk,
Kaderleräk ence-säylännän