Şiğırlär - Bikä Rähimova

Tigezlek bilgese

Halık dibez, millät dibez,
İkese ike süz şul.
Millät disäk, bezneñ kolak,
Bezneñ his, bezneñ küz ul.

Uram tulı halık bara,
Millätne sin arala.
Kıyın eşme? Äye, kardäş,
Eçtä ärnü, är kala.

Bezneñ kolakka yat süzlär,
Küzläre yat, üzläre.
Gomer buyı räncü küñlem
Millättäşne ezläde.

Gomer buyı millät tözim,
Beläm dä kük ölgesen.
Halık – tigez – millät diyep,
Eh, kuyarga bilgesen!

“Demokratik” revanşizm

“Demokratiyä” görläp “çäçäk” ata,
Çolgap aldı uttay cihannı.
Äfganstan, Gıyrak “sabak” aldı,
“Öyrätergä” kiräk İrannı.

Çäçäkläre, sabakları – ülem,
Açı kıçkıruı sabıynıñ.
Mögallime kayda?
Ukıtırga
Revanşistnıñ, eh, art sabagın?

Kazan üzebezneke

Küñelemdä yörtäm bakçam itep,
Cännät itep, itep talisman;
Yaktı nurıñ ömet tacı miña,
Kiläçäkkä tugan tañ sıman.

Tiränlekne ülçim sineñ belän,
Biyeklegeñ ofık kiñäytä.
Böyeklegeñ – arka terägem dip,
Täsbih tartkan kebek, meñ äytäm.

Kazan kiräk, barsına da kiräk,
Tezelgännär tabın tiräli.
Kazanımnıñ kazannarı kaynıy,
Täğamnärgä kümep tirmäne.

Kemder sine gomer almak bula,
Utka peşep, telen teşlätä,
Kunak bulıp hörmät kürülärne
Añlamasañ änä nişlätä.

Tatar avılları

Cir yözendä küpme avıl bardır,
Öslärendä tormış davılları.
Adämidän tufan kiçerdegez,
İ mökatdäs tatar avılları.

Sezneñ kardäş – dönya avılları.
Bardır bälki kanlı yaraları.
Tatar aulı öçen tabu kilä –
Tugrı süzne äytü yaramadı.

Han zamanı inde ütkän-kitkän,
Äzergä bäzer kilgän här zamanda.
Ak patşalar kara doşman ikän,
Kaynatkannar betü tuzanında.

Humay koşı agaç başlarında,
Köygän kanat oçıp kilä almıy.
Tatar canı avılında ikän,
Yaşäü ceben oçın-oçka bäyli.

Kilde zaman – sovet digäne dä,
Yabırıldı tatar avılına.
Çit-yat häref salıp bukçasına,
Mädräsäne saldı yangın uçagına.

Bügengese tagın teş sızlata,
Tatar aulı erep-sızıp yata.
Öre mayın cıyıp aluçıdan
Kaldık bulıp kara sızık yata.

Kazan, 2007.