Şifonerda Oçraşu

(yumoreska)
Ul könne Barıy eştän et bulıp arıp kaytkan ide. İnde karavatka tägärärgä dip torganda, telefon şaltıradı.

- Al-le!

Beraz kötterep, telefon trubkasında nindider hatın-kıznıñ çıtlık tavışı işetelde.

- Al-le! Borya, qaderlem, sinme?

Barıy şunda uk tanıp aldı. Bu kürşeläre Säkinä hanım ide. Tögälräge, Barıy eşli torgan et oyasınnan da keçeräk ber keçe predpriyätiyeneñ general direktorı Salih Säyfiyeçneñ hatını inde ul Säkinä. Töskä-bitkä älläni bulmasa da, delovoy hatın üze. Ut uynata. Biznes belän şögıllänä. İñ möhime, Barıyga küze töşkän bit iblis tokımınıñ. Ütkändä-sütkändä gıyşık-mıyşık uynap algalıylar. Salih Säyfiyeç öydä bulmaganda kunakka da çakırgalıy üze.

Öç kön elek Säkinäne komandirovkaga kitkän dip işetkän ide Barıy. Kaytıp ta citkän ikän.

- Barıy, canım, şuşı öç kön eçendä sine niçek sagınganımnı belsäñ ikän. Üläm dip toram. Menä komandirovkadan aşıgıp kaytuım da sineñ öçen. Tizräk kil, bäğrem.

- Salih Säyfiyeç öydä tügelmeni? Kaytıp kersä?!

- Min anı maşinanı garacga kuyarga cibärdem. Pivo eçep kaytırsıñ dip, kesäsenä ber-ike kipkän balık ta saldım. Tak çto, ber-ike säğatsez duhı da bulmayaçak äle ul bozaunıñ. Ker davay, bäğır kisä-ge-em!

Säkinä pesi balasıday mıraulagan, miyäulagan avazlar çıgardı, irennären çäpeldätep, telefon trubkasın «çüp» itep übep alganday itte...

Kürşelär genä bulgaç, ara yırak tügel. Barıy, kem äytmeşli, ike sikerde, ber atladı, biş minuttan kilep tä kerde. Ul kergändä Säkinä ütä kürenmäle materialdan tegelgän halatın kiyep, karavatta çalkan yata ide. Anıñ şaktıy kiñ itep açılgan izülärennän kalkıp torgan kükräge, dulkınlanudan bulsa kiräk, ber töşep, ber kütärelep, ımsındırıp, yegetne üzenä çakırıp tora. Berniçä minuttan Barıy belän Säkinä, ikese bergä beregep üskändäy, kulları, bot-çatları belän ber-bersenä uralıp, karavatta äümäkläşälär ide inde.

Gönah şomlıgına karşı digändäy, şulçak işek şakıdılar. Barıy da, Säkinä dä monı kötmägän ide. Başta tınıç kına uzdırmakçılar ide, tik şaku tagın da katgıyrak kabatlangaç, Säkinä: «Kem bar anda?», - dip soramıyça buldıra almadı.

İşek artında Salih Säyfiyeçneñ, «min idem», digän tavışın işetügä, ni çaya Säkinä dä kurkuınnan nişlärgä belmiçä, böten kiyem-salımın cıyıp, Barıynı şifonerga ozattı. Ä üze, çäçlären tözätkäläp, işekne açtı.

- Närsägä garacga barıp yörergä. Maşinanı irtägä irtän tagın barıp alası bit. Yartı yuldan borıldım da, işek aldında gına kaldırdım. Ä pivo?.. Holodilnikta kiçä algan dürt şeşä bar äle.

Salih Säyfiyeçneñ çıgıp kitärgä isäbe yuk ide. Şuña kürä, Säkinä, sagınıp kötkän häläl cefet rolenä kerep, tiz genä çişenergä bulıştı da, iren urınına yatkırdı...

Şifoner eçe kap-karañgı ide. Küzgä törtsäñ, berni kürenmi. Barıy başta tın alırga da kurkıp utırdı. Biş minut ütteme-yukmı, yänäşädä genä nindider häräkät sizelde. Kullar ireksezdän şul yakka ürelde.

- A-a-ah!

Kinät kıçkırıp kuygan hatın-kız tavışınnan Barıy siskänep kitte. Ä tege yakta karavattan ahıldagan tavışnı basıp, Salih Säyfiyeçneñ tamak kırgalaganı, köçänep yötkergäne işetelde. Barıy şifonerda annan başka nindider hatın-kız da bar ikänlegen täğaen töşengän ide inde. Ul kabat kulın şul tarafka yünältte. Tirläp dımsulangan tängä orınuga, karşı yaktagı hatın-kıznıñ:

- Kagılmagız, min şärä!- digän süzläre işetelde.

Tik Barıynıñ kulları, ireksezdän, yomşak tän buylap şuışuın dävam itte. Şunda tege şaytan azdırgıç, Barıynıñ korsagınnan borıp çemetep almasınmı!

- Kulıgız belän uynamagız, didem bit inde min sezgä!

Eget, avırtuga tüzä almıyça, ahıldap kuydı. Ul da şärä ide şul. Kürşe bülmädä Säkinäneñ böten bülmäne yañgıratıp, tiktomaldan kıtkıldap kölgäne işetelde. Bu Barıynıñ tavışın kaplau öçen şulay itüe inde.

- Kem sin?- dip pışıldadı Barıy, avırtudan aynır-aynımas.

Hatın-kız borının mışkıldata başladı.

- Mädinä-ä-ä,- dip suzdı ul yarımpışıldap.

- Salih Säyfiyeçneñ sekretaremı?- dide Barıy kızga yakınrak iyelep. Anıñ irennäre kıznıñ kolak yafraklarına kagılıp kitte.

- Äye, ä sez kem bulasız?

- Min Barıy abıyıñ bulırmın, señlem,- dide, bermäl üzeneñ kayda ikänlegen onıtkan Barıy. - Niçek monda kilep eläkteñ soñ äle sin, asılkoş?

Kız berara endäşmiçä tordı.

- Salih Säyfiyeç bit, hatınım komandirovkaga kitte, öydä üzem genä, dip, öyenä çakırdı. Kilmäsäñ, eştän kuarga säbäp tabarmın, dip, şantacirovat itep tä mataştı äle. Yarıy äle, Säkinä apa vakıtında kaytıp kerde. Yugıysä... Kalganın üzeñ beläseñ inde,- dide Mädinä kinät singä küçep.

Barıy kıznıñ çäçlärennän sıypap, yuatkanday itte. Añlaştılar.

Barıy yeget keşe bit:

- Äydä, irtägä ük ZAGSka barabız, - dip äytep salmasınmı. Kız däşmäde. Endäşmäü - rizalık bilgese. Yeget Mädinäne koçaklap aldı. Karañgı bulsa da, irennär-irennärne ezläp taptılar...

Bu vakıtta, yokı bülmäsendäge karavat şıgırdau­dan tuktap, Salih Säyfiyeç tä, Säkinä dä tirän yokıga talgannar ide inde. Barıy belän Mädinä, kiyemnären cıyıştırıp, şıpırt kına işekkä yünäldelär.

Kız belän yeget änä şulay tanışkannar ide. Ğailä korıp yäşi başlaularına da inde ber yıl uzdı. Äybät kenä yäşäp yatalar.

Click or select a word or words to search the definition