Şifalı Su!

(Balalar häm alarnıñ äti-äniläre, tugannarı öçen şau - şulı äkiyäti tamaşa - pesa)
KATNAŞALAR:
KOLORADO KOÑGIZI.
BÄRÄÑGE SILU.
ÄÇE ÄREM.
TUZGANAK KART.
MÄTRÜŞKÄ ÄBİ.
ŞAYTAN TAYAGI.
GÜZÄL TÖNBOEK.
Äkiyät - ike pärdä, altı küreneştän tora.
BERENÇE PÄRDÄ
Berençe küreneş
(Muzıka. Pärdä açıla. Sähnädä ğadäti bakça küreneşe. Tirä-yakta almagaç, çiyä häm başka şundıy agaç - dekoratsiyälär üsep utıralar.Şulay uk çitän, koyma işe närsälärneñ dä buluı bik mömkin. Läkin, älege bakçada ülän-üsemleklärdän barı tik äçe ärem häm dä yavız kolorado koñgızı arkasında şır sabakka kalgan ber mesken bäräñge genä üsä. Älbättä inde, kolorado koñgızı üze dä şuşında yäşi. Läkin älegä sähnä - bakçada koloradodan kala beräüdä kürenmi. Muzıka akırınaya, kolorado koñgızı zalga möräcäğat itep:)
KOLORADO:- İsänmesez bezneñ bik yaratkan, sagınıp kötep algan näni duslarıbız! Häyerle kön möhtäräm äti - änilär häm tärbiyäçe abıy - apalar! Menä, nihayät, bez sezneñ belän kabat oçraştık. Älbättä bez moña çiksez şatbız. Ä inde bezneñ bügenge oçraşuıbıznıñ istälege ozak yıllarga, ğasırlarga hätle dävam itsen öçen, häzer bez sezgä ör - yaña ber äkiyät täqdim itäbez. Älege äkiyättä, inde töşengänsezder, min dä katnaşaçakmın.
Şulay itep.. borın - borın zamannarda tügel, ä bezneñ könnärdä, yäşägän di, bulgan di ber Kolorado koñgızı. Yäğni mäsälän - min!!!
- Cir şarında yäşäüçelär,
Mine küptän belälär.
Belü genä tügel, hattä,-
" Häşärät"- dip sügälär!

Kolorado, kolorado,
Koñgızlarnıñ - koñgızı.
"Häşärät" - disälär dä min,-
Koñgızlarnıñ - yoldızı!!!

Söymi mine adäm halkı,
Bäräñge aşaganga.
Ä bit min, ber süz dä äytmim,
Sez anı aşaganda!
- Äye duslar, sez çınnanda minem bäräñge aşavımnı yaratmıysız. Şulay bit? Mine bäräñgegä yakın kilmäsen dip, ällä nindi agular sibäsez. Läkin, et örä torır, büre yöri torır digändäy, min äle dä isän, min äle dä bäräñgene ülep yaratam! Soñ, tämle bulganga bäräñgene min genä tügel, ä sez üzegez dä bik yaratıp aşıysız! Äyeme?
Bäräñge digännän... ul äle tämle rizık kına tügel, ä bik faydalı da närsä! Çönki anarda S, V vitaminnarı, kaliy häm fosfor, limon häm alma organik kislotaları bik küp.Şuña da bäräñge aşkazanı avıruların; ä yaña peşkän bäräñgeneñ buı isä - sulış yulların dävalıy. Annan, bäräñge peşkän urınnıñ avırtuın basa, anı tizräk tözätä! Şulay bulgaç, niçek aşamıy tüzmäk kiräk şul faydalı bäräñgene!!!
Aşau dimäktän... aşıysı kilä başladı. Kayda gına yöri ikän inde bu Bäräñge sılu? (Muzıka. Sähnägä moñayıp, şır sabakka gına kalgan hälsez, bötereşkän Bäräñge sılu kerä)
BÄRÄÑGE:- Barça üsemleklär şau çäçäktä!
Ä min inde kipkän, sargaygan.
Nigä mine bähet çitläp ütkän;
Nigä soñ min irtä kartaygan?

Minem dä bit başka göllär kebek,
Kilä ide çäçäk atasım!
Bar da bette! İnde bernärsä dä,-
Tözätalmas yazmış hatasın!!!
(Üksep yılap cibärä)
KOLORADO:- Yä inde.. Bäräñge sılukay.. tınıçlan. Yukka - barga üzeñne betermä.
BÄRÄÑGE:- Üzeñne betermä? Betäse betkän inde. Beteräse kalmagan. Barısına da sin genä ğayeple. Sin genä mine şuşı hälgä citkezdeñ!
KOLORADO:- Yä inde.. tınıçlan.. Soñ, kem belgän bit inde şulay bulasın? Min bit tabiğat kuşuı buyınça sine aşar öçen yaratılgan koñgız. Min nişli ala idem? Zinhar kiçer mine.
BÄRÄÑGE:- Yarıy, bulası bulgan. Ükenep kenä ütkännärne kire kaytarıp bulmıy. Yazmıştan uzmış yuk!
KOLORADO:- İh-h, belgän bulsammı..Nigä genä min sine aşadım ikän, cülär? Betkän ideme inde cirdä bernigä dä yaramagan başka cıyın çüp - çar ülännär?!..
BÄRÄÑGE:- Alay dimä! Cir yözendä bernigä dä yaraksız bulgan üsemleklär gomumän yuk! Sin çüp üläne digän üsemlekneñ dä daru üläne ikänlegen iseñdä tot. Barı alarnı döres itep kullana gına belergä kiräk. Ä miña kilgändä.. min bu kıyafättä artık yäşi almam.
Şuña da sin mine kiçekmästän aşap beter!
KOLORADO:- Sin ni söyliseñ? Niçaklı gına aşıysım kilsä dä min monı başka buldıralmıym!
BÄRÄÑGE:- Ägär dä kılgan eşläreñä ükenep, az gına bulsa da miña yärdäm kulı suzasıñ kilsä - sin mine Hiç ikelänmiçä aşap beterergä tiyeşseñ!
KOLORADO:-Yuk! Min monı eşli almıym! Sorama da.
BÄRÄÑGE:- Ul çagında... (süzen äytep beterä almıy, añın cuyıp yıgıla)
KOLORADO:- Äy, siña ni buldı? Nişläveñ bu? Tor, siña äytäm! Ällä can täslim kıldı inde? (tikşerep) - Ä yuk, şöker, añın gına cuygan.Niçek tä tizräk üzen añga kiterergä kiräk! (Muzıka, añga kiterü. Şulçak bakçaga aşlama aşıy - aşıy, şat küñelle äçe
Ärem kaytıp kerä)
ÄREM:- Rähätlänep su buyında,
Köne buyı kızındım.
Essegä çıdıy almagaç -
Çupır, çupır koyındım.

Annan, öygä kaytkan çakta,
Aşlamaga yulıktım.
Ä aşlama şundıy tämle,
Çäynämi kabıp yottım.

Ärem kayta duslar, Ärem,
Karşılagız kul çabıp.
Kuşılıgız minem cırga,
Utırmagız su kabıp!
- Nihäl, bäräñge kortı?
KOLORADO:- Cıyın çüp - çar açu kiterep ayak astında butalmasın ide ul!
ÄREM:- Ä? Kem çüp - çar? Minme? Min, bik beläseñ kilsä, yäşäeş öçen, sälamätlek öçen bik tä kiräkle..bik tä faydalı bulgan ülän! Beldeñme!
KOLORADO:- Sinme? Däşmä içmasam, keşe köldererseñ tagı! Faydalı imeş! Canım, sin bit bernigä dä yaraksız ber çüp üläne genä. Sornyak, yağni mäsälän!
ÄREM:- Minme çüp üläne? Minme sornyak? (zalga) - Balalar, sez dä şulay uylıysızmı? Yahşı, ul çakta min häzer sezneñ barıgızga da üzemneñ şifalı daru üläne ikänlegemne isbat itäçäkmen! Kaya äle ul? (zur gına kitap alıp) - Menä, taptım! "Üsemleklär dönyası" dip atala bu kitap, belep kal. Şuşı akıllı kitapka minem turında menä nilär yazgannar: (ukıp) - "Äçe Ärem, yäğni min bulam inde, urısça - polın, bik tä kiñ taralgan daru ülännäreneñ berse. Üzennän härçak huş is kenä börkep torsa da, ul - äçe ülän. Äytik, äçe Äremneñ tönätmäsen 15 çiläk su belän kuşsañ da, anıñ äçelege barıber betmäyäçäk! Äçe Äremne meditsinada bik küptännän faydalanalar. Ul - appetitnı Häm aşkaynatu sistemasınıñ eşçänlegen yahşırta; bavır - biyerlärne, yaralarnı häm başka bik küp törle avırularnı da sıyfatlı dävalıy. Şuña da, Yäşäsen cir yözendä ÄREM!!!" Yä, inde ni äyterseñ?
KOLORADO:- Hi.i.. iseñ kitkän ikän. Kitapka ni yazmaslar anı! Döres, äçe digännäre belän kileşäm. Çıdap bulmaslık äçe sin. Änä şul äçelegeñ arkasında gına üzeñne aşıy almıym da inde min. Ä aşarga da yaramagaç, gafu it, sineñ miña kiräklegeñ sukır ber tiyen genä!
ÄREM:- Berençedän: sin aşamasañ, şöker, sıyırlar, sarıklar bik tä yaratıp aşıylar. Ber dä äçe dip tormıylar! İkençedän: kitapka härvakıtta da gel döresen genä yazalar! Çönki, kitap ul - belem Häm akıl çişmäse! Öçençedän: bez, yäğni ülännär, törle üsemlek - agaçlar, barıbız da tereklek öçen kiräk bulgan kislorod - sular hava citeşteräbez! Ägär dä bez bulmasak, cir şarında tereklek ällä kayçan betkän bulır ide inde. Ä menä kolorado koñgızlarına kilgändä.. sez çınnanda buşka aşap, bez citeştergän havanı äräm itep yatuçı ber häşärät, ärämtamak kort kisäkläre!
KOLORADO:- Äy, fälsäfi çıgışıñ betteme?
ÄREM:- Bette!
KOLORADO:- Alaysa, äydä, Bäräñge sılunı añga kitereşergä bulış. Yuksa, küp takıldıysıñ. İçmasam, ber yahşılıgıñ tiyär.
ÄREM:- Yuk, bulışmıym!
KOLORADO:- Nigä?
ÄREM:- Añın cuya belgän ikän - üze ük añına da kilä belsen. Şuarga yaratsañ - çañgıñnı da yarat dilär bit! Vät!
KOLORADO:- Añlamadım, kemgä akıl satasıñ sin?
ÄREM:- Kemgä bulsın, ahmak Bäräñgegä! Tukta, Bäräñge? Nindi Bäräñge? Kayda Bäräñge? (Bäräñgene kürep) - Ah, ul ülgän?
KOLORADO:- Yuk, ülmägän äle.
ÄREM:- Menä monısı äybät! Tik..anıñ barıber ülep kuyuı ihtimal. Ah, kabähät, barısına da sin genä ğayeple. İnde häzer miña nişlärgä ikän? Ähä, beldem! Siña sugış iğlan itärgä! Ah, häşärät, monıñ öçen häzer min sineñ üzeñne harap itep taşlıyaçakmın! Äydä, bas ärämtamak!
KOLORADO:- İhtiyärıñ! Min karşı tügel. (Muzıka, kızıklı sugış, Äçe Ärem ciñelä) - Küñeleñ buldımı?
ÄREM:- Buldı. Nu köç tä soñ üzeñdä. Çak kına muyınımnı sındırmıy kaldıñ. Yarıy äle, käkräyde genä! (tavışka Bäräñge sılu uyana)
BÄRÄÑGE:- Uf..İh..Ih - h..bu nindi şau - şu?..Kaysıgız ul anda?
ÄREM:- Min äle bu. Menä, muyınım kıyıgayganga söyenep utıram. (şatlanıp) - Ä? Ul.. ul añına kilde. Ura..ur..ra..a..ul ülmäde! Ura!
KOLORADO:- Uf..kotnı aldıñ bit,sılukay. Şulay yarıy di meni inde.
ÄREM:- Su..su..ıh..h..h...
KOLORADO:- Äçe Ärem, tizräk su kiter!
ÄREM:- Häzer! (çıgıp, daru şeşäse alıp kerä) -Mä!
KOLORADO:- Yäle aç avızıñnı. İnde eçep cibär.Şulay.
BÄRÄÑGE:- Uf..üläm..nindi äçe närsä soñ bu?
ÄREM:- Ärem tönätmäse. Üzem yasagan idem. Äçe bulsa da faydalı närsä! Siña ser itep kenä äytäm, min bit bik şäp daru üläne, äye!
BÄRÄÑGE:- Rähmät siña Äremkäyem. Sin.. sin çın..ışanıçlı dus!
ÄREM:- İşetteñme, işetteñme närsä dide?
KOLORADO:- İşettem. Karale, sılukay, sin älegä savıgıp citmägän. Şuña da söyläşmi genä yatsañ ide. Täk, Äçe Ärem, kil äle monda!
ÄREM:- Yä, kildem.
KOLORADO:- Menä närsä duskay! Min häzer, Bäräñge sılunı tämam savıktırıp, anı yañadan yafraklı, şau çäçäkle itär öçen, berär tılsımlı daru ezläp yulga çıgam! Ä sin üz çiratıñda anı äkren genä dävalıy, ayagına bastıra tor, yarıymı?
ÄREM:- Añladım. Bik şäp fiker bu! Ämmä, min äytäm, dönyada andıy tılsımlı närsä bar mikän soñ?
KOLORADO:- Anısın älegä üzem dä belmim, läkin miña häzer ük yulga çıgarga kiräk. Çönki, sılukaynı kabat bähetle itü - minem namusta!
ÄREM:- Añladım. Yarıy, yullarıñ uñ bulsın, dustım. Ä sin bezneñ öçen borçılma. Min bulganda anıñ yanına ber genä çeben dä, ber genä kort ta yakın kilä almayaçak! (bulmagan çebennärne kuarga kereşep) - Köşegez..köş..ş.. mur kırgırları!..
KOLORADO:- Min isña ışanam dustım. İnde miña vakıt. Älegä sau bulıp torıgız!!! (cır)
- Ğayeple min sineñ alda, duskay,
Yafrak, çäçägeñne aşadım.
Mährüm itep sine maturlıktan,
Ülem koçagına taşladım.

Gafu itçe mine, zinhar kiçer,
Min ükenäm kılgan eşemä.
Kiler ber kön: atkaç şau göl-çäçkä,
Kuanıçıñ sıymas eçeñä!
(üsemleklär turındagı kitapnı kultık astına kıstırıp çıgıp kitä. Ärem ozatıp kala)
ÄREM:- Huş, berük isän - sau gına yöri kür inde. Kara anı, tege tılsımlı närsäsez kaytası bulma! Añlamassıñ bu ärämtamaknı! Ber karasañ - şundıy äşäke; ä ikençe tapkır karasañ - annan da şäfkatle, annan da kiñ küñelle can iyäse dönyada başka yuktır kebek toyıla başlıy!
BÄRÄÑGE:- Uf..kaya kitte ul?..
ÄREM:- Eh sıluım, borçılma! Bez sine barıber bähetle itäçäkbez äle! Monı min äytäm siña! (muzıka. Äçe Ärem Bäräñgene kütärep ala da, äylänä - äylänä sähnädän kitälär)
İkençe küreneş
(Kır küreneşe. Kır - sähnädä kart kına ber Tuzganak cirdän üzeneñ çäçlären cıyıp yöri)
TUZGANAK:- Kartlık - şatlık tügel ikän, duslar;
Gäüdä sızlıy, çäçlär koyıla.
Çäç koyılıp, başıñ peläşlängäç -
Yöz dä yämsez bulıp toyıla.

Tiz kartaymas öçen här kön şulay,
Tuzgan çäçem cıyam basudan.
Tik ni fayda! Tagın cil isügä,
Bar da oçıp betä başımnan.
- Oho..ho.. Kartaygaç tämam yämsezlänep kalasıñ ikän şul ul. Şuña da yäşlegegezneñ qaderen belep kenä yäşägez. Anı buşka uzdıra kürmägez. Yuksa, kartaygaçtın soñ bulır. (cıygan çäçlären kire başına berketep) - Menä, babagız kabat çäçle buldı. Yä, niçek? Äybät toramı? (kolorado koñgızı kerä)
KOLORADO:- Nihäl, babakay?
TUZGANAK:- Abau! (başındagı çäçläre tagın koyılıp töşälär) - Hay, igeleksez bändä .. Kabat peläş kaldırdıñ. Nu äşäke can, tämam açuımnı çıgardıñ. İnde üzeñä üpkälä.
KOLORADO:- Äy, babakay, sin nişlämäkçe bulasıñ?
TUZGANAK:- Art sabagıñnı ukıtam häzer!
KOLORADO:- Äy..äy.. kiräkmi.. (muzıka. Kızıklı kuış - sugış. Kart yegetne "kıynap" taşlıy)
TUZGANAK:- Menä şulay.. İkençe vakıt kurkıtıp, peläş kaldırıp yörmässeñ.
KOLORADO:- Äy babakay, min bit sine kurkıtırga hiç kenä dä telämägän idem.
TUZGANAK:- Zarar yuk. Kaya, katı eläkteme?
KOLORADO:- Yarıysı, tüzärlek.
TUZGANAK:- Sin ni... buldıralsañ kiçer inde min kart cülärne. Kızıbrak kitelde. Min üzem bolay tabigatem buyınça tınıç üsemlek. (kulın suzıp) - Tuzganak.
KOLORADO:- Beläm.
TUZGANAK:- Añlamadım, niçek inde beläseñ?
KOLORADO:- Kitaptan ukıp.
TUZGANAK:- Kitaptan? Nindi kitaptan?
KOLORADO:- Menä şuşı üsemleklär turında yazılganınnan.
TUZGANAK:- Bik kızık. Mine kitapka yazgannar digen, ä?
KOLORADO:- Äye. Teläsägez üzegezgä ukıp kürsätäm?
TUZGANAK:- Yäle, Yäle, tıñlıp karıyk.
KOLORADO:- (ukıy) - "Tuzganak. Urısça - Oduvançik. Yäşäü öçen aktiv köräşüçe çüp üläne. Läkin, ul, çüp üläne buluga karaganda, daru üläne bularak kiñ tanılgan. Anıñ yäş, susıl yafrakları törle vitaminnarga gına tügel, ä fosfor häm timer tozlarına da bik bay. Şuña da älege ülänneñ yafraklarınnan törle salatlar yasıylar. Tuzganak yokısızlıktan häm kan basımın töşerergä dä yärdäm itä. Tamırlarınnan yasalgan tönätmälär isä gastrit, bavır häm başka avırulardan dävalanu öçen faydalı. Şulay uk anardan kofe da häzerläp bula!"
TUZGANAK:- Äkämät! Menä siña kiräk bulsa. Karale, çäçlärem turında da berär närsä yukmı anda? Beläse ide, nigä şulay bik tiz peläşlänäm ikän min?
KOLORADO:- Bu bit babakay, sineñ çäç kenä tügel, şul uk vakıttı orlıklırıñda. Alar, ölgerep citkäç, yaña tuzganaklar bulıp üsär öçen, paraşyut sıman başıgızdan oçıp kitälär. Moña bit borçılırga tügel, kiresençä, şatlanırga gına kiräk!
TUZGANAK:- Enem, peläş kalsañ - bik şatlanasıñ kilmäs! Peläş bulgaç başka üsemleklär dä, änä, balalar da kölälär.
KOLORADO:- Kuy äle,babakay. Nindi kölü di ul! Kart bulsañ da üzeñ şundıy köçle, matur, kiräkle häm bik tä faydalı daru üläne! Balalarnıñ da sinnän bervakıtta da kölgännäre yuk! Şulay bit, duslar? Ä çäçkä kilgändä... başka bit parik ta kiyep yörep bula.
TUZGANAK:- Parik? Anısı närsä inde tagın?
KOLORADO:- Yasalma çäç inde, babakay.
TUZGANAK:- Ä? Ä anı kaydan alırga bula?
KOLORADO:- Anısın häzer duslık hörmätenä, sezgä üzem yasap biräm! (muzıka, munçaladan parik yaçau) - Menä, buldı da. Yäle, kiyep kara.
TUZGANAK:- (kiyä häm kölkele kıyafätkä kerä) - Niçek?
KOLORADO:- (kölep) - Şäp! Işanmasañ, änä, balalardan sora.
TUZGANAK:- Duslar, minem yaña çäçlärem niçegräk? Äybätmeni? Häzer süzegezneñ döreslegen tikşerep karıybız. Yägez äle, barıgız da köçle itep miña öregez.(örü) - Çınnan da şäp ikän şul. Urınnarınnan da selkenmädelär. Rähmät siña, yeget. Sin mine şatlandırdıñ. İnde häzer üzeñ belän tanıştırıp ütsäñ dä naçar bulmas. Kem sin? Nindi cillär sine biregä taşladı?
KOLORADO:- Kem dip inde... mine belmägän can iyäse dä bar ikän äle dönyada. Kolorado koñgızı bulam min babakay.
TUZGANAK:- Kolorado koñgızı? Tege.. bäräñgelärne aşap yörüçe yavız koñgızmı?
KOLORADO:- Äye, näq üze! Ä yomışka kilgändä.. änä şul yavızlıgım arkasında zıyan kürep, şır sabakka gına kalgan ber Bäräñge sılunı kabat şau çäçäkle itär öçen, berär tılsımlı daru ezläp yörüem. Babakay, siña şundıy berär närsäneñ oçraganı yukmı?
TUZGANAK:- Yuk şul. Ber genä dä işetkän, kürgän närsäm tügel şul. Andıy daru, gomumän, bar mikän soñ cir yözendä?
KOLORADO:- Barmı ul, yukmı - ämma min anı barıber tabarga tiyeş!
TUZGANAK:- Niyäteñ izge yeget. Kızganıç, min siña berniçek tä yärdäm itä almıym. Bulmasa, sin menä şuşı sukmak belän barıp kara äle. Anda, urman buyında ber imçe karçık - Mätrüşkä äbiyeñ yäşi. Bälki, siña ul yärdäm itä alır.
KOLORADO:- Kiñäşeñ öçen rähmät babakay. Alaysa, kiçekmästän min şunda kitim. (kitä başlıy)
TUZGANAK:- Yeget, alay - bolay tege kire elgärege halätkä kaytara torgan darunı tapsañ, mine onıtmassıñ inde, yarıymı?
KOLORADO:- Älbättä babakay. Ä häzergä sau bulıa tor.
Kittem ezläp Mätrüşkä äbine,
Tizräk kiräk anı tabarga.
Ä sez, duslar, berük onıtmagız,
Şau - görlätep kullar çabarga.
(kitabın kıstırıp çıgıp yögerä)
TUZGANAK:- Täk, şulay itep pariklı da buldım. İnde bu çäçlärneñ miña kiräge yuk. Ä yuk, tukta, şulay da cıyıp kuyım äle üzlären. Kem belä, bälki kiräkläre çıgar. (muzıka. Kart çäçlären cıya - cıya sähnädän çıgıp kitä. İkençe yaktan Ärem kilep kerä)
ÄREM:- - Min dä çıktım äle yulga,
Ezläp tılsımlı närsäne.
Koñgızdan aldarak tabıp,
Kütärergä däräcäne.

Uf, arıdım. Hälem bette.
Kan basımım kütärelde.
Äytmi - nitmi çıgıp kittem,
Äti - äni sügär inde.
_ Uf.. İsänmesez, näni duslarım! Matur gına äkiyät karap utırasızmı? Menä min dä, sezneñ belän bergä, rähätlänep äkiyät kenä karap utırır idem dä bit, tik, tege tılsımlı darunı ezlise bar. Kaydan gına tabarga ikän soñ inde üzen? Duslar, sezneñ ul tılsımlı darunı kürgänegez yukmı? Yuk meni? Kızganıç. Tä..ä..k.. tegennän ezlädem.. annan karadım.. inde menä şuşınnan ezläp kararga kiräk. Kem belä, bälki ul menä şuşında, ayak astında gına aunap yatadır?! (mükäläp ezlärgä kereşä. Şulçak ul, çäçlären cıyıp yörgän Tuzganak kart belän bäreleşä) - Ay.. başım..
TUZGANAK:- Äl.. lä.. lä.. lä... Äy, sin kem? Sin nişläp miña bärelep yöriseñ?
ÄREM:- Sez babay, bigräk inde.. Mine dä belmäskä!.. Daru üläne min, Äçe Ärem! Ä menä sin üzeñ nindi karaçkı?
TUZGANAK:- Ahmak! Cülär! Nitkän karaçkı bulıym di min siña?! Tuzganak min, Tuz.. ga.. nak!!!
ÄREM:- Aldaşma! Sez Tuzganaklarga az gına da ohşamagansız.
TUZGANAK:- Niçek inde, ohşamagan?
ÄREM:- Menä şulay. Tuzganaknıñ çäçe anıñ başka törle.. matur bula! Ä sineñ başıñda närsä inde ul?!
TUZGANAK:- Närsä bulsın, parik.
ÄREM:- (üçekläp) - Parik! Parik tügel, munçala ul!
TUZGANAK:- Sin üzeñ munçala. Ä bu - parik!!!
ÄREM:- Yuk, munçala digäç - munçala! (bähäs)
TUZGANAK:- Tukta, iñ yahşısı bez bolay itik: häzer menä şuşında köräşik. Kaysıbız ciñä - şunı süze döres bulır!
ÄREM:- Min riza. Çönki, minem süzem döres. Dimäk, min ciñäçäkmen!
TUZGANAK:- Anısın karap kararbız äle. (muzıka,kızıklı köräş - sugış. Berazdan ikese dä hälläre betep yıgılalar) - Uf, ber - berebezne ciñälmädek. Dimäk, ikebezneñ dä süzebez döres!
ÄREM:- Äye şul. Bolay bulgaç, sineñ başıñda - munçalalı parik bulıp çıga inde. Tuktale, sin çınnan da Tuzganak kartmı soñ?
TUZGANAK:- Närsä, az gına da Tuzganakka ohşamaganmeni ?
ÄREM:- Yuk!
TUZGANAK:- (parigın salıp) - Ä bolay?
ÄREM:- Bolay ohşagan. Tuktale, nigä sin çäçläreñne yolkıp attañ soñ?
TUZGANAK:- Yolkımadım. Üzläre koyılıp bettelär.
ÄREM:- Hi.. mesken... çäçeñ bulmagaç, siña bit inde kızlar da karamıy!
TUZGANAK:- Karamıy şul. Şuña da häzer, änä, parik kiyäm.
ÄREM:- Ä teliseñme, çäçläreñne kire üz urınına utırtam?
TUZGANAK:- Yuk, bu mömkin eş tügel! Min kuyıp karadım inde.
ÄREM:- Borçılma, üzem kuysam - mäñge töşmäslek itäm min alarnı.
TUZGANAK:- İtteñ di, kötep tor.
ÄREM:- Işanmıysıñmı?
TUZGANAK:- Yuk!
ÄREM:- Äydä bähäsläşäbez?
TUZGANAK:- Ä närsädän?
ÄREM:- Çirteştän!
TUZGANAK:- Min riza!
ÄREM:- Alaysa, kiter çäçläreñne! (Çıgıp "Moment" kläye alıp kerä)
TUZGANAK:- Mä! Tik belep tor: barıber minem süzem döres bulaçak!
ÄREM:- Yuk, mineke! Çönki, min siña karaganda meñ öleş akıllırak! (muzıka, çäç yabıştıru) - Buldı! İnde häzer, cil - davıl gına tügel, bar köçeñä üzeñ tartsañ da, çäçläreñ urınnarınnan da kupmayaçak!
TUZGANAK:- Aşıkma! İñ elek sınap karıyk. (muzıka, törleçä sınau. Läkin, çäçlär kupmıy) - Kupmıy!?!
ÄREM:- Äyttem bit min siña. İnde min,şart buyınça, sineñ başıña çirtergä tiyeşme soñ äle?!
TUZGANAK:- Tik, kara anı, bik katı çirtä kürmä.
ÄREM:- Kurıkma, katı çirtmäm. Barı avırtudan ike küzeñ genä atılıp çıgar. (katı itep çirtä)
TUZGANAK:- Ay.. yay.. başım.. beterde!.. Katı çirtmä didem bit min siña!?
ÄREM:- Ä min katı itep çirtmädem dä. Başıñnıñ şundıy katı avırta torgan bulganga min ğayeple tügel iç inde.
TUZGANAK:- Yarıy, monıñ üçen ber almıy kalmam! Niçek tä bu çäçne yolkıp atıp, şundıy itep çirtermen, başıñnıñ yarılıp kitkänen sizmi dä kalırsıñ! Menä, äytkän ide diyärseñ! (çäçen yolkırga kereşä, läkin, çäç haman da bireşmi)
ÄREM:- Äydä, Äydä.. hıyallan! Hıyal - zıyanlı tügel ul! Ä minem, sineñ niçek itep hıyallanganıñnı küzätep torırga vakıtım yuk. Minem tılsımlı daru ezläp tabasım bar. Bolay da sineñ belän mataşıp, küpme vakıtımnı suga saldım. Karale babakay, sin alay - bolay...
TUZGANAK:- Yuk, kürgänem dä, işetkänem dä yuk! Änä şuşı sukmak belän barıp kara, bälki, ezlägäneñne tabarsıñ.
ÄREM:- Ä ul sukmak kaya iltä soñ?
TUZGANAK:- Kaya bulsın, Mätrüşkä äbiyeñ yanına. Ul dönyada küp yäşägän, küp kürgän. Sin ezlägän närsä anarda bulmıy kalmas. Ägär dä inde Kolorado yegete almagan bulsa.
ÄREM:- Kolorado koñgızı?
TUZGANAK:- Äye. Ul küptän anda kitkän ide inde.
ÄREM:- Küptän? Nigä sin monı miña başta uk äytmädeñ?
TUZGANAK:- Soramadıñ bit. Ä yılamagan balaga - imezlek birmilär!
ÄREM:- Yä yarıy, sau bul. Sineñ belän akıl satıp torırga minem vakıtım yuk. Tizräk tılsımlı darunı, koloradoga hätle, kulga töşerergä kiräk. Yuksa, Bäräñge sılukay mine, bervakıtta da yaratmayaçak! Ä min aña inde küptän ğaşıyq!!! (çıgıp yögerä)
TUZGANAK:- Ğaşıyq? Ni söyli ul? Ällä inde häzer Äremnär dä bäräñge aşıy başlaganmı? Bulır, bulır, ışan sin häzerge yäşlärgä. Änä bit, başka çirtä belde, ä gafu ütenmäde! Yarıy, zıyan yuk. Bügen ul çirtsä,- irtägä min aña çirttäçäkmen! Tik niçek tä, tizräk şuşı çäçtän genä kotılası ide.
Duslar! sez şulay matur gına äkiyätebezneñ dävamın karıy torıgız, ä min şuşı kahär sukkan çäçne yolkırga kittem.
(Muzıka, Tuzganak sähnädän çıgıp kitä)
Öçençe küreneş
(Urman buyı. Mätrüşkä äbi cırlıy - cırlıy kärcinenä daru ülännäre cıyıp yöri)
MÄTRÜŞKÄ:-
- Matur könnär citte isä,
Urman buylarına çıgam.
Koş sayravın tıñlıy - tıñlıy,
Daru ülännäre cıyam.

Daru ülännäre cıyam,
Kärcinnärem tulgançı.
Yörim äle urmanımda,
Küñellärem bulgançı.
(Äbi üze dä sizmästän, ciñel genä biyep kitä. Kinät ayagına şırpı kadalıp, cirgä yıgıla) - Uy..yu..yu.. üläm.. ay.. avırta..a..a.. (Taşışka Kolorado kerä)
KOLORADO:- Balalar, kem kıçkıra ul?
MÄTRÜŞKÄ:- Min. Zinhar, yärdäm itçe yeget.
KOLORADO:- Ni buldı, äbekäy?
MÄTRÜŞKÄ:- Ayak tabanıma nider kadaldı bugay.. avırta..
KOLORADO:- Tüz äbekäy, çak kına tüz. Häzer barısın da rätlärbez. (Karap) - Hi.. şırpı gına kadalgan iç. Häzer alabız anı. (Ala) - Menä, buldı da.
MÄTRÜŞKÄ:- Hay, rähmät uğlan, ayak - kulıñ sızlausın bulsın. İnde yarasın da, änä tege ügi ana yafragı belän bäyläp kuysañ - tizräk tözäler ide.
KOLORADO:- Küz açıp yomgançı bäylibez anı. (Özä başlıy)
MÄTRÜŞKÄ:- Uğlan, berük saklanıp kına özä kür inde. Tamırlarına zıyan kilä kürmäsen. Yuksa korır, bütän üsälmas!
KOLORADO:- Añladım. (Yaranı bäyli) - Buldımı Äbekäy?
MÄTRÜŞKÄ:- Hay, rähmät töşkere.. Mätrüşkä äbiyeñä itkän izgelegeñ meñe belän üzeñä kaytsın ide! Amin!!!
KOLORADO:- Äbekäy, sez meni inde ul Mätrüşkä? Min bit inde bik küptännän sezne ezläp yörim. Äle üzegez äytmäsägez, bötenläy tanımas ta idem. Çönki, menä şuşı ülännär turındagı kitapnıñ, näq sezneñ turıda yazılgan bitlären, kaysıdır ber yünseze yırtıp algan! unıñ arkasında min dä, änä bezne karap utıruçı balalar da, sezneñ hakta ber ni dä belmi kaldık.
MÄTRÜŞKÄ:- Ä sezneñ minem turıda beläsegez kilä meni?
KOLORADO:- Kilä, bik kilä! Balalar, sezneñ menä şuşı yagımlı, huş isle Mätrüşkä turında beläsegez kiläme? (Balalardan cavaplar)
MÄTRÜŞKÄ:- Hay, rähmät töşkereläre..Bolay bulgaç, üzem belän beraz tanıştırıp kitmi bulmas inde. Minem isemem, inde belüegezçä,- Mätrüşkä bula. Urısçası - Duşitsa! Üzem, aş tämletkeç bularak ta, törle avırularnı, äytik: üzäk nerv sistemasın, sulış yulların, eç avırtuların, salkın tigänne dävalauçı bularak ta hezmät itäm. Şulay uk mine çäy, sabın, duhi häm odekolon işe äyberlär yasaganda da bik teläp kullanalar. Kıskaça gına üzem turında menä şular. Ägär dä sez, bezneñ, yäğni daru ülännäre belän kızıksınsagız , kübräk - kitaplar ukıgız! Ul çagın da, üzegezne kızıksındırgan soraularga tulı cavaplarnı, sez, änä şul bezneñ turıda yazılgan kitaplardan taba alasız!
İnde uğlan, sineñ bire dä nişläp yöreşeñ? Ällä miña berär yomışıñ töşkän ideme?
KOLORADO:- Yomış dip .. miña äbekäy, kire elgärege halätkä kaytara torgan tılsımlı daru kiräk. Şunı ezläp yöreşem ide. İnde menä, Tuzganak babaynıñ kiñäşen istä totıp, sezneñ yanga kilergä buldım. Bälki, sez miña yärdäm itärsez, ä?
MÄTRÜŞKÄ:- Siña ni eşkä soñ ul tılsımlı daru?
KOLORADO:- Nigä dip... üzemä tügel inde. Beläsezme, minem arkada ber Bäräñge sılu zur zıyan kürgän ide. Şuña yärdäm itärgä ide isäp.
MÄTRÜŞKÄ:- Añlaşıldı uğlan. Kaygırma, ezlägän närsäñne tabarsıñ. Min süzneñ ni turında barganlıgın añladım. Siña tılsımlı daru tügel, ä "Ş i f a l ı s u" kiräk ikän!
KOLORADO:- Şifalı su?
Mätrüşkä:- Äye. Dönyada ber şundıy gacäyep su bar: ägär anı eçsäñ, akılsız - akıllıga, ayaksız - ayaklıga, ä avırular isä sau - salämätkä äverelälär! Tik, älege su mindä tügel, ä monnan bik yırakta, Tirän küldä kön kürüçe - Güzäl Tönboyık kulında!
KOLORADO:- Äbekäy, zinhar miña Güzäl Tönboyık yäşägän külgä yulnı kürsätçe.
MÄTRÜŞKÄ:- Min bik şatlanıp üzem dä sineñ belän barır idem dä.. tik, yul bik yırak şul. Üzeñ beläseñ, min inde bik kart. Citmäsä ayagım da avırtıp tora. Kem belä, bälki, yärdämem dä tiyep kuygan bulır ide äle.
KOLORADO:- Äbekäy, ägär sez karşı kilmäsägez, min sezne arkama atlandırıp alıp baralam.
MÄTRÜŞKÄ:- Avır bulmasmı soñ?
KOLORADO:- Hi.. sezme? (kölep) - Minem muskullar nık, arka kiñ äbekäy, ber dä borçılma!
MÄTRÜŞKÄ:- Ul çagında nigä dip soñ äle bez haman da biredä torabız?! Äydä, tizräk Tirän kül buyına, şifalı su alırga! Çönki, timerne kızuında sugarga kiräk! Äydä, Mihahay... (Muzıka. Äbi belän yeget atlı caydak sımak çaptırıp sähnädän çıgıp kitälär. Berazdan şulay uk kerep) - Ä sez duslar, bez Tirän kül buyına bargan arada aşap - eçep, yal itep alıgız! Tirän kül buyında küreşkänçegä qadär sau bulıgız!!
KOLORADO:- Aşlarıgız tämle bulsın, duslar!!! (Muzıka, pärdä yabıla)
PÄRDÄ
İKENÇE PÄRDÄ
Dürtençe küreneş
(Şulay uk kır küreneşe. Tik monısı - Şaytan tayagı bilämäse bulır. Muzıka, sähnägä älserägän Ärem kerä)
ÄREM:-
- Kiräk ikän, keräm min utka.
Kiräk ikän, kermim min utka.
Kiräk ikän, keräm min suga.
Kiräk ikän, kermim min suga.
Kiräk ikän, baram min uñga.
Kiräk ikän, baram min sulga!
- Uf, tämam hälem bette. (Cirgä avıp) - Alcıdım. İçmasam, üterep aşıysı gına da kilä. Eçtäge bürelärneñ ulavına hiç çıdar ämäl kalmadı. Ällä kire öygä genä kaytıp kitim mikän? Çänçelep kitsen Bäräñgese! Kadalıp kitsen tılsımlı daruı! Ni öçen anı min ezläp yörergä tiyeş di soñ äle? Äyterseñ, Bäräñge sılunı min aşagan. Kem aşagan - şul ezläsen! Monda minem ni gayıbem bar? Täk, häl itelde. Beraz häl cıyıp alam da, kire öygä sıpırtam. (Suzılıp yatıp köyli başlıy)
- Mätrüşkälär, kipkän mätrüşkälär,
Eraklardan änkäm cibärgän!..
- Mätrüşkä digännän.. tuktale.. tege Tuzganak kart äytkän Mätrüşkä äbi şuşında yäşärgä tiyeş bit. (İsnänep) - Äye, mätrüşkälär ise kilä. Tik, kaya soñ äle ul üze?! (kıçkırıp) - Äy, Mätrüşkä äbi, kunak kilde.. karşı al! İşetmi, çukrak ahrısı. Menä siña mä! Min anı, yırak aranı yakın itep ezläp kildem. Ä ul mine ipi - toz belän karşı alası urınga, kaydadır yugalıp yöri. Yuk, bu kileşä torgan eş tügel! (Tagın sörän salıp) - Äy, çukrak äbi, min kildem! (Muzıka, döp - döp itkän ayak tavışları işetelä) - Ähä, işette bugay! Kilä. Nu, soñga kalgan öçen ber kızık itim äle üzen! Tss! (Kaça. Sähnägä aksak şaytan tayagı kerä)
ŞAYTAN TAYAGI:- Kaysı ahmagı akırıp - bakırıp mine tämle yokımnan uyattı? (Balalarga) - Sezme?
ÄREM:- (Köçle itep) - İsänmesez!!!
ŞAYTAN TAYAGI:- (Borılıp karamıy gına) - Kem ul? (Cavaplar) - Minem yokımnı bülüçe dä şulmı? (Äremneñ borınınnan eläkterep) - Ähä, eläkteñme? Sinme inde ul minem borçıp yörüçe?
ÄREM:- İsänmesez.
ŞAYTAN TAYAGI:- Äle genä biredä sin akırıp - bakırıp yördeñme? Cavap bir!
ÄREM:- Häyerle kön.
ŞAYTAN TAYAGI:- Soñgı tapkır sorıym: biredä tavışlanuçı sinme?
ÄREM:- Sau bulıgız.
ŞAYTAN TAYAGI: - Ah, äle sin, soraularıma cavap birmiçä, mine üçekläp mataşasıñmı? Monıñ öçen häzer min sine botarlap, özgäläp, üzemneñ hätär çäneçkelärem belän tişkäläp beteräçäkmen! Min sineme.. Min sine... (Muzıka. Kızıklı kuış - sugış. Ärem ciñelä) - Yä, kem kulına kilep eläkkäneñne çamaladıñmı inde!
ÄREM:- İsänmesez!
ŞAYTAN TAYAGI:- Oh - h! (Görseldäp cirgä ava)
ÄREM:- Hi.. mesken äbi tüzmäde, yıgıldı. Nu köç tä soñ üzendä! Muyınımnı "Eh!"- digänçe, ikençe yakka käkräytte dä kuydı. Şulay bula inde ul, küp şayargalap yörsäñ! Äy, äbekäy, açulanma inde.. min bit şayardım gına. Tor äydä!
ŞAYTAN TAYAGI:- Yuk, tormıym!
ÄREM:- Soñ, tor inde, Bolay kileşmi bit.
ŞAYTAN TAYAGI:- Kileşmäsä ni? Barıber tormıym!
ÄREM:- Alaysa, yat inde şunda, baka kebek cäyelep.
ŞAYTAN TAYAGI:- Yatmıym äle, yäme! (Sikerep tora)
ÄREM:- Añlamadım, ällä kirebetkän äbi buldı inde bu?
ŞAYTAN TAYAGI:- Karale, sin gel äbi dä äbi diseñ. Ä kayda soñ ul sineñ äbiyeñ? Min bit anı kürmim.
ÄREM:- Niçek inde.. ällä inde üzeñneñ Mätrüşkä äbi ikänlegeñne dä onıttıñmıni?!
ŞAYTAN TAYAGI:- Ä? (Tagın cirgä ava)
ÄREM:- Äy, äbi, siña tagın ni buldı inde? Äbekäy, siña äytäm!
ŞAYTAN TAYAGI:- Tintäk! Ahmak! Nişläp min siña Mätrüşkä äbi bulıym di? Sataştıñmı ällä?
ÄREM:- Mätrüşkä äbi tügel? Alaysa, kem soñ sin?
ŞAYTAN TAYAGI:- Närsä, sin minem kem ikänlegemne belmiseñmeni?
ÄREM:- Yuk!
ŞAYTAN TAYAGI:- Ä? Balalar, sez dä belmisezme? (Cavaplar) - Ay - yay - yay.. Yarıy, zıyan yuk. Äle bu hatanı tözätergä soñ tügel! Şulay itep minem belän tanış bulıgız:
- Üze usal, üze yavız!
Üze matur häm ütken!
Kıyafäte bik kurkınıç,
Äytegez miña, ul - kem?

Üze gorur, kirebetkän,
Aksak anıñ ber ayagı!
Ägär anı kem disägez,-
Ul min! Şaytan tayagı!!
- Şulay itep, sezneñ aldıgızda: älege dä bayagı, yavız Şaytan tayagı!!! İnde minem kem ikänlegemne beldegezme?
ÄREM:- (Küñelsezlänep) - Belüen beldek,.. tik, ni fayda!
ŞAYTAN TAYAGI:- Niçek inde, ni fayda? Beläseñ kilsä, min şulay berençe karaşka gına çüp üläne kebek toyılam! Ä çınlıkta isä, minem faydalı yaklarım sanap betergesez. Döres, hätär enälärem arkasında hayvani zatlar miña äylänep tä karamıylar. Kurkalar. Läkin, anıñ karavı keşelär, kuzgalak häm sır belän yasalgan salatımnı, bal kuşıp häzerlängän eçemlegemne yaratıp, maktıy - maktıy sıpıralar! Ä meditsina isä, mine - malyariyä avıruın dävalau öçen faydalana! Şulay bulgaç, min nişläp çüp üläne genä bulıym di inde?!
ÄREM:- Äye şul. Min dä näq sin digänçä uylıym. Yarıy, min öygä kaytıp kitim äle. Sau bul, salat! (Kitä başlıy)
ŞAYTAN TAYAGI:- Äy.. äy, tukta. Ni.. kitkänçe belep kalıym äle, sin biredä, minem bilämädä nişläp yöri ideñ soñ, ä?
ÄREM:- Mätrüşkä äbine ezläp kilgän idem.
ŞAYTAN TAYAGI:- Nigä?
ÄREM:- Äy, Kolorado koñgızı aşap harap itkän ber Bäräñge sılunı kire sau - salämät itär öçen, tılsımlı darunı kaydan tabıp bulasın beleşer öçen. İnde häzer äbi dä, daru da, Sılu da, sin dä kiräk tügel! Arıdım, öygä kaytam.
ŞAYTAN TAYAGI:- Ä min sin ezlägän närsäneñ kaydalıgın beläm.
ÄREM:- Belsäñ soñ.
ŞAYTAN TAYAGI:- Ä min isña anı äytmim!
ÄREM:- Dimäk, belmiseñ. Belsäñ - tüzep toralmas ideñ äle. Äytkän bulır ideñ. Yarıy, min kittem.
ŞAYTAN TAYAGI:- Äy, kitmä. Äytäm, äytäm!..
ÄREM:- Äytsäñ äyt inde. Küpme suzarga bula!
ŞAYTAN TAYAGI:- Sin ezlägän närsä,ul - "Şifalı su!". Älege sunıñ iyäse - monnan yırak bulmagan Tirän küldä kön kürüçe - Güzäl Tönboyık. Tik,ul, älege sunı berkemgä dä birmi.
ÄREM:- Miña dimägäye.. Min bolayda öygä kaytıp baram iç inde.
ŞAYTAN TAYAGI:- Alay dimä. Şuşında hätle kilep, oyalmıyça niçek inde buş kul belän kaytmak kiräk?! Yeget bulsañ - yeget bul! Täk, inde mine tıñla: häzer bez sineñ belän şul Güzäl Tönboyık yanına kitäbez. Çönki, şifalı su minem aksak ayaknı dävalau öçen dä kiräk. Kaygırma, bergä - bergä tırışsak, şifalı su barıber bezneke bulaçak!
ÄREM:- Anısına şiklänmim. Min äle barırgamı, yukmı dip baş vatam. (Balalarga) - Duslar, sez niçek uylıysız? Barırga? Äy, min sez äytmäsägez dä bara idem inde. Min barı sezne sınadım gına. Şulay da kiñäşläregez öçen bik zur rähmät sezgä, duslar. Ä häzer sez bezneköçle alkışlar belän ozatıp kalıgız. Bezne Tirän kül buyındagı şifalı su kötä!!!
Cırlıy - cırlıy alga barırbız,
Tirän külne bik tiz tabırbız.
Niçek bulsa, - şulay itärbez,
Tönboyıktan "şifalı su" alıp,
Tiz arada kaytıp citärbez!!! (Çıgıp kitälär)
Bişençe küreneş
(Tirän kül buyı. "Sähnä - küldä" Güzäl Tönboyık "yözep" yöri. Cır. Cır barışında sähnägä Mätrüşkä belän Kolorado kilep kerälär. Alar,tavış - tınsız gına, Güzäl Tönboyıknıñ cırlavın tıñlıylar)

TÖNBOEK:- - Tirän külem! Suıñ çista, salkın.
Saf suıñda yözäm, koyınam.
Cil issä dä, koyıp boz yausa da,
Sin Tirän külemä sıyınam!

Tirän külem minem, söygän külem,
Sindä yäşi yalgız Tönboyık.
Ällä inde Tönboyık bulganga,
Nikter haman küñelem boyık.
(Cır betügä Tönboyık cıyılıp yabıla)
KOLORADO:- Äbekäy, ä nigä ul şulay bik sagışlı?
MÄTRÜŞKÄ:- Çönki, uğlım, ul şuşı Tirän küldä ber yalgızı gına kaldı. Anıñ tuganı da, dustı da, söygän yarı da yuk! Ä yalgızlık belän sagış gel bergä yöri inde ul.
KOLORADO:- Ä anıñ tugannarı, dusları kaya kitkän?
MÄTRÜŞKÄ:- Alaysa tıñla. Tönboyık - çüp üläne dä, daru üläne dä tügel. Ul - maturlık, güzällek üläne! Şuña da adäm balaları, anıñ matur çäçkälärenä kızıgıp, üzlären küpläp özälär. Ber karaganda keşelärne dä ğayepläp bulmıy. Maturlıkka, güzällekkä tartılu, anı üzeñdä buldırırga teläü ber dä ğayep eş tügel. Läkin, Tönboyık göle, üze tuıp - üskän bua - külennän başka, bütän bernindi suda da yäşi almıy. Anı bernindi altın vazalar da, kömeş sulı akvariumnar da kızıksındırmıy. Aña barı üzeneñ yaratkan, tuıp - üskän küle kiräk! Ä adäm balaları şunı añlamıylar. Alar, änä, Güzäl Tönboyıknıñ da äti - änilären, tugannarın özep alıp kitep, anı yalgız, yätim kaldırgannar! Menä şuña da ul gel sagışlı inde bäbkäm!
(Şul çak biregä Ärem belän Şaytan tayagı kilep kerälär)
ŞAYTAN TAYAGI:- Menä, Tirän kül şuşı bula inde. Änä tegese Güzäl Tönboyık. (Äbi belän koñgıznı kürep) - Ä boların belmim.
ÄREM:- Kolorado koñgızı?
KOLORADO:- Sin? Sin nişläp yöriseñ monda? Nigä sin, Bäräñge sılunı ber yalgızın gına kaldırdıñ?! Ällä...
ÄREM:- Yuk,aña berni dä bulmadı. Ä miña kilgändä.. min dä näq sineñ şikelle ük "şifalı su" alırga dip kildem!
KOLORADO:- Soñ, ul sunı üzem ezläp tabıp alıp kaytam didem iç inde min siña!
ÄREM:- Disäñni? Sin alıp kaytkan bit ul, - sin alıp kaytkan bula. Ä minem, Bäräñge sılunı üzem dävalıysım kilä!
KOLORADO:- Yuk, anı min dävalarga tiyeş!
ÄREM:- Akılıñ altın ikän! Yuk, bette - kitte, üzem dävalıym!
KOLORADO:- Ärem duskay, añla inde. Miña bit, anıñ aldında gafu ütenep, üzemneñ hatamnı tözätergä kiräk.
ÄREM:- Yuk, tıñlamıym da!
ŞAYTAN TAYAGI:- Sez bil alışıgız. Kaysıgız ciñä - şul dävalar!
ÄREM:- Min riza! Çönki, barıber min ciñäçäkmen!
KOLORADO:- Başkaça tıñlamagaç, min dä riza inde.
ŞAYTAN TAYAGI:- Ul çagında başlıybız. Ber, ike, öç - sezneñ kulda köç! (Muzıka. Kızıklı, şau - şulı bil alışu. Tavışka Güzäl Tönboyık açıla)
TÖNBOEK:- Çü, bu ni? Kemnär anda Tirän külneñ gacäyep tınlıgın bozarga batırçılık itälär? Äy, sez kemnär? Sezgä biredä ni kiräk?
BARISI BERGÄ:- Ş i f a l ı s u!
TÖNBOEK:- Şifalı su?
BARISI BERGÄ:- Ä y yı!
TÖNBOEK:- Ä ni eşkä ul sezgä şifalı su?
BARISI BERGÄ:- Ul bezgä bik tä, bik tä, bik tä kiräk!
TÖNBOEK:- Añlaşıldı. Läkin, min sezgä berniçek tä yärdäm itä almıym şul. Çönki mindä, bernindi dä şifalı su yuk! Huşıgız!
MÄTRÜŞKÄ:- Güzäl Tönboyık kızım, aldaşu berdä matur närsä tügel inde. Bar ul su sindä, bar! Bez bit beläbez. Bir sin bezgä anı. Ül bit bezgä, vakıtsız sargaygan Bäräñge sıluga kabat tormış büläk itär öçen kiräk! Zinhar, üteneçebezne kire kakma.
TÖNBOEK:- Yahşı. Min anı sezgä birermen. Tik, ber şart belän. Häzer min sezgä tabışmaklar äytäm. Ägär dä sez, minem tabışmaklarıma cavap birä alsagız, - şifalı su sezneke! Ä inde cavap taba almasagız, - ul çagında inde sezgä biredän buş kul belän kitärgä turı kiler! Kileştekme?
BARISI BERGÄ:- Bez riza!
ÄREM:- Min dä! Çönki, monda iñ akıllı ülän, ul - min! Dimäk, şifalı su da mineke bulaçak.
KOLORADO:- Anısın karap kararbız. İrtä kıçkırgan kükeneñ - başı taz bula dilär!
TÖNBOEK:- İnde berençe tabışmaknı tıñlagız: "- Cäyen dä, kışın da yäm - yäşel!". Närsä ul?
ÄREM:- Üzem äytäm. Üzem äytäm. Ul - baka! Ura, min beldem.
TÖNBOEK:- Ä başkalar niçek uylıy?
KOLORADO:- Hi..i.. şul da buldımı tabışmak! Soñ, monıñ cavabın, änä, balalar da belälär. (Balalarga) - Yä, äytegez äle duslar, närsä ul? (Cavaplar) - Äye, döres. Çırşı! Äfärin, duslar! Güzäl Tönboyık tutaş! Minem sezgä ber eşlekle täqdimem bar.
TÖNBOEK:- Tıñlap karıyk, nindiyeräk täqdim ikän.
KOLORADO:- Tabışmaklar belän yukka vakıt uzdırgançı, äydägez, bergäläşep menä şuşı Tirän külne, anıñ tirä - yagın çistartıyk! Menä bu içmasam, ber faydalı eş bulır ide. Sez ni diyärsez?
MÄTRÜŞKÄ:- Bu bik tä äybät, maktauga layık fiker!
ŞAYTAN TAYAGI:- Min dä şulay uylıym.
ÄREM:- Minemçä dä şulay. Çönki, ekologik çistalık, tabışmakka karaganda möhimeräk!
KOLORADO:- Ul çagında - eşkä! (Muzıka. Çistartu)
Eş eşläsäñ - küñel kütärelä,
Baş yal itä; nıgıy beläklär.
İ duslarım! Yaratıgız eşke!
Bezdän sezgä şundıy teläklär!
(Çistartu tämamlana) - Yä, inde ni äytersez?
TÖNBOEK:- Yuk, Tirän külme soñ bu? Ul bit bötenläy yañargan, saflangan. Ä kül buyları tagın da yaktırıp, tagın da yämlänep, havası çistarıp kitkän! Rähmät sezgä duslarım, bik zur rähmät! Min häzer sezne, hiç ikelänüsez, üzemneñ iñ yakın duslarım dip sanıym. Ä duslarga, alarga, berni dä kızganıç tügel! (Plastmas savıtlı şifalı su alıp) - Menä ul sez ezlägän şifalı su! Rähim itep alıgız. Min anı sezgä büläk itäm! (Ärem tiz genä Şifalı sunı eläkterep ala)
ÄREM:- Şifalı su barı mineke genä bulırga tiyeş!
KOLORADO:- Kiter monda sunı!
ÄREM:- Kitergän di, kötep tor!
MÄTRÜŞKÄ:- Tınıçlanıgız äle balalar. Tavışlanıp kına berni dä häl itep bulmıy. Bez bolay itik: berebezneñ dä käyefe kırılmasın, küñele töşmäsen öçen, Bäräñge sılunı yaña dustıbız - Güzäl Tönboyık dävalasın! Şul çagında bezneñ duslıgıbız tagın da nıgır, kiräkmägän bähäsebezgä çik kuyılır häm älbättä inde Bäräñge sılukayıbız da tizräk sälämätläner!
KOLORADO:- Menä bu içmasam, akıllı kiñäş. Rähmät äbekäy. İnde eş sezdä, Tönboyık tutaş!
TÖNBOEK:- Min.. min üzemneñ yayıın duslarıma yärdäm itärgä härvakıt äzer!
BARISI BERGÄ:- Ul çagında - yulga!
- Yäşäü öçen cirdä, duslar kiräk!
Duslar bulsa - yäşäü küñelle!
Ägär, yalgız bulsañ - kaygı, sagış;
Töşenkelek bili küñelne!

Sagışlarga, duslar, bireşmägez!
Menä bezdän ürnäk alıgız!
Koyaş kebek balkıp yäşäü öçen,-
Bik küp yakın duslar tabıgız!!! (Kitälär)
Altınçı küreneş
(Kabat bakça küreneşe. Bakçada, inde törnäklängän Bäräñge sılu moñayıp utıra)
BÄRÄÑGE:- Duslar! Äçe Äremneñ aşlamaları, tönätmäläre faydalı buldı bit äle. Menä, kürgänegezçä, terelep tä cittem. Tik.. üzläre genä haman da kürenmilär. Ällä inde miña dip tılsımlı daru ezlägän dä, berär bäla - kazaga tarıdılar mikän? İh, nigä genä cibärdem ikän min alarnı. İh, nigä genä totkarlamadım ikän üzlären! Yuk, monıñ öçen min üzemne gomerdä dä kiçermäyäçäkmen. (Elıy başlıy, läkin, şul çak äkiyät kaharmannarınıñ barısı da (Tuzganaktan kalgannarı) äkren genä kaytıp kerälär. Äçe Ärem isä kulları belän Bäräñge sılunıñ küzlären kaplıy) - Abau, kem bu? Ärem? Sez? Sez isän? Ur..r..ra.. alar isän - sau kayttılar! Min nindi bähetle!
KOLORADO:- Allaga Şöker, nihayät kaytıp ta cittek. Tanış bulıgız: bezneñ söyekle Bäräñge sıluıbız şuşı bula inde.
ÄREM:- Ä boları bezneñ yakın duslarıbız. Ägär alar bulmasa, bez şifalı sunı taba da, ala da almas idek.
KOLORADO:- Bäräñge sılukay, sineñ başka göllär, üsemleklär kebek şau göl - çäçkägä kümeläseñ kiläme?
BÄRÄÑGE:- Kilä, bik kilä!
ÄREM:- Ul çagında, rähim it. Yäle, Güzäl Tönboyık tutaş, sıluıbızga uy - hıyalların tormışka aşırırga yärdäm itçe.
TÖNBOEK:- Bik rähätlänep. (Muzıka, dävalau. Bäräñge "çäçäk atıp, yäşellekkä törenä") - Ah, häzer sin şundıy da matur, güzällegeñnän küzlär kamaşa.
BÄRÄÑGE:- Rähmät, barıgızga da bik zur rähmät duslarım! Bügen minnändä bähetle can iyäse cir yözendä dä yuktır. Şatlıgım hättä eçemä sıymıy. Bik zur rähmät sezgä duslarım!
ŞAYTAN TAYAGI:- Minem dä aksak ayaknı dävalasagız ide. Minem dä sau - sälämät bulasım kilä! (Dävalau) - Bette! Başka aksamıy! Minem häzer biisem genä kilep tora! (Biyep kitä. Sähnägä, başın bint belän uragan Tuzganak kart kerä) - Busı kem tagı?
TUZGANAK:- İsännärmesez härbarçagız. Kayda ul minem belän bähäsläşkän Ärem yegete?
ÄREM:- Min monda.
TUZGANAK:- İnde yeget, başıñnı çirtterergä häzerlä. Bähästä min ciñdem! Menä ul çäçlär. Tırışa torgaç, başnıñ tirese - niye belän kuptarılıp çıktı.
ÄREM:- (Başın iyep) - Ciñgäç - çirtäseñ inde babakay!
TUZGANAK:- Nu saklan yeget, berük ülä kürmä! (Çirtä) - Avırttımı?
ÄREM:- Ällä tagı, sizmädem.
KOLORADO:- Babakay, sineñ kabat çäçle bulasıñ kiläme soñ?
TUZGANAK:- Kiluyın kilä dä bit..tik, başıñda ber börtek çäçeñ dä kalmagaç.. belmim şul, çäçle bulıp bulır mikän?
TÖNBOEK:- Anısı öçen borçılma babakay. Yäle, yom küzläreñne! (Dävalau) - İnde açsañ da bula.
TUZGANAK:- (Közgedän karap) - Minme soñ bu?
BARISI BERGÄ:- Sin inde, sin!
TUZGANAK:- Menä siña äkämät! Menä siña äkiyät! Min kabat çäçle buldım! Hay, rähmät inde sezgä olannar.
TÖNBOEK:- Sez älbättä mine gafu itegez, tik, miña inde yañadan üzemneñ Tirän külemä kaytırga vakıt.
BÄRÄÑGE:- Duslarım! Äydägez, barıbız da bergäläşep menä şuşı matur bakçada dus, tatu bulıp bergä - bergä yäşik! Bezneñ şulay matur itep görläşep yäşävebezne kürep, bezdän ürnäk alıp, başkalar da şulay dus - tatu yäşäsennär!
TÖNBOEK:- Min bik teläp riza da.. ämma, min Tirän külsez yäşi almıym şul.
ŞAYTAN TAYAGI:- Anısı öçen berdä borçılma güzälkäy. Bez, sineñ ul Tiräk küleñne küz açıp yomgançı, menä şuşı bakçanıñ näq urtasına küçerep tä kuyarbız! Ä annarı isä min sine törle äşäkelärdän, yavızlardan üzem saklıyaçakmın. Işan, monnan soñ sin berkayçan da yalgız bulmayaçaksıñ!
TÖNBOEK:- Bolay bulgaç, süz dä yuk. Min riza!
ÄREM:- (Bäräñge sıluga) - Sıluım! Bügennän başlap sineñ sakçıñ min bulırmın. Min sine berkemnän dä räncettermäm!
TUZGANAK:- (Mätrüşkägä) - Yäşlärdän kalışıp bulmas. Mätrüşkä bikä, sineñ kavalerıñ min bulırmın! Karşı kilmäsäñ älbättä!
KOLORADO:- Menä şulay duslar! Bezneñ äkiyätebez dä, başka äkiyätlär şikelle ük, äybät tämamlandı. Bez häzer barıbızda ber ğailä bulıp, tatu gına yäşäp yatabız! Sezgä dä şulay, bähet - şatlık belän, isän - imin genä yäşärgä yazsın ide. Amin!!!
BARISI BERGÄ:- Tabiğat ul - urtak baylıgıgız!
Yäşik anı saklap, qaderläp!
Añ bulıgız duslar, berük yörmik,
Tabigatebezne cäberläp!

Huş is börkep üskän ülännärne,
Çäçkälärne yukka özmägez!
Ber özelgän çäçäk kire üsmi!
Sez şunı onıta kürmägez!!!
(Muzıka dävam itä, äkren genä pärdä yabıla)
TÄMAM
Kazan, 1997 yıl.

ALA KARGA HÄYLÄSE!
(Yaña yıl äkiyäte)
U y n a u ç ı l a r:
Ala karga.
Kış babay.
Kar çäçäk.
Super Ala karga - 001.
Yul-yul barıs.
Ozın kolak.
Karkıldık.
Makakku.

Vakıyga yaña yıl aldınnan bara.

Berençe küreneş
(Urman alanındagı Ala karganıñ ofis - laborotoriyäse. İdän tulıp törle shema - plannar, käğazlär, kitaplar aunap yata. Östäl östendä kompyuter tora. Öy - ofiska salkınnan tuñgan, der kaltıragan Ala karga kerä)
ALA KARGA:- (Açulı) - Uh..h.. tagın kar yava. Buranlap - buranlap kotıra, kahär sukkırı. Äyterseñ lä kükneñ gömbäze yırtılgan! Barısına da kara kargalar gına ğayeple. Şul yavızlar "-Kar..r! Kar..r!"- dip telägängä genä yava bit inde bu kahär sukkan kar! Ä üzläre, könnär suıta başlau belän, cılı yaklarga kaçalar. Kurkak cannar! Söyäkläre ber dä salkın kütärmi üzläreneñ. Ä sin monda yat, salkınnan tuñıp, kaltırap! (Täräzädän karap) - Haman yava bit, ä! Hiç kenä dä tuktarga isäbe yuk! Uh..h, bar yıllarga da üzem genä huca bulıp alıym.. kürsätäm äle min sezgä "-Kar..r..kar..r"larıgıznı! (tagın tışka karap) - İşelep - işelep yava bit, kahärlär. Bıyıl kış bulmasın öçen ni tırıştım, ni çaptım! Barıber cir östen ap - pak kar sarıp aldı. Soñ, karı bulgaç - kışı bula inde anıñ. Ä kış bulgan cirgä, hiçşiksez, - Yaña yıl kilep citäçäk! (Säğatkä karap) - Ä? Betäm!.. Yaña yıl kilep citä ikän iç inde! Bar yıllarga da huca bulasıñ kilsä - aşıgırga kiräk Ala karga äfände, aşıgırga! Yuksa, bıyıl da eşläreñ peşmäyäçäk. Uyla tizräk!..Tap berär häylä!.. Eşlät başıñnı! Bolay da şul yavız kara kargalar arkasında küpme vakıtıñnı suga saldıñ. (Ärle - birle yörenä) - Täk.. täk.. ägär, tegeläy itsäm? .. Yuk, bulmıy! Ni hätle tırışıp uylap ta, başıma ber rätle fiker kilmi! Uf..f.. üläm.. üterep başım avırta başladı! Çatnıy! Tizräk daru eçärgä kiräk. Kayda soñ äle minem daru? Ä menä, taptım. (Eçä) - Uh..h.. şulay itep bıyıl da eşlär barıp çıkmas mikänni inde, ä?! Hurlık! Hurlık!.. Soñ.. cir yözendä ber - niçä ğasırlar yäşäp tä üz yılıñ bulmasın di inde! Oyat billähi! Änä, barlı - yuklı 7-8 yıl gına yäşäüçe hayvannarnıñ da üz yılları bar! Ala karga başıñ belän bu hurlıkka niçek tüzep tormak kiräk. Yuk inde, citär, başka tüzep torırlıgım kalmadı! Kiçekmästän, bar yıllarnı da üz kulıma alam! Monıñ öçen barı Yaña yılnı gına buldırmaska kiräk! Ä niçek itep Yaña yılnı buldırmaska ikän? Uyla.. uyla.. (Kinät) - Ur..r..ra.. u..r..ra.. Taptım.. taptım!. Nu, başta soñ inde üzemdä! Bolay bulgaç, Yaña yılga - k a p u t!!! (Muzıka, Ala karga şatlıgınnan kotırıp biyergä kereşä)

İkençe küreneş
(Kış babay ofisı. Kütärenke temptagı köy yañgırıy. Kar çäçäk bülmä urtasındagı çırşını bizäü belän mäşkül. Üze cırlıy)
KAR ÇÄÇÄK:- - Nindi sılu, güzäl yäşel çırşı!
Buy - sınıña küzlär timäsen!
Maturlıgıñ, zifalıgıñ belän,
Bar cihanga nurlar sibäseñ!
Yaşel çırşı, yämle çırşı,
Sin bäyrämneñ bizäge.
Güzäl çırşı, sılu çırşı,
Sin Yaña yıl yöräge!
Balkıp yangan törle uyınçıklar,
Huş iseñnän başlar äylänä.
Äy çırşıkay, barı sin bulganga,
Yaña yıl bäyräme yämlänä!
- İnde menä Yaña yıl kilep citärgä dä sanaulı vakıtlar gına kalıp bara. Tizdän, bik tizdän, yözläre şatlıktan balkıgan barça can iyäläre dä, sineñ tiräñdä uynap - kölep, cırlap - biyep Yaña yılnı karşı alırlar! Sineñ alda ber - bersenä väğdälär birerlär. İzge, matur teläklär telärlär. Kıskası, şau - gör kilep bäyräm itärlär! Alar belän bergä sin dä şatlanırsıñ. Çönki Yaña yıl - barıbıznıñ da urtak bäyräme! (Şul çak Kış babay kerä)
KIŞ BABAY:- Bez teläsäk - cirgä karlar yava,
Bez teläsäk, uynıy cil - buran.
Kürçe kızım, bügen barça cihan,-
Ap - pak yomşak yurgan yabıngan.

Sayrar koşlar cılı yakka oçtı,
Yäşi almıy alar salkında.
Nişliseñ bit, cılı gına tügel,-
Cir yözendä kiräk salkında!
- Şulay kızım, dönyada här närsäneñ üz urını, üz vakıtı bulırga tiyeş. Menä inde üzeneñ salkın kar - burannarı, gacäyep tabigate belän tagın yämle Yaña yıl yakınlaşa!
KAR ÇÄÇÄK:- Äytmä dä inde babakay, ber yıl sizelmiçä ütte dä kitte.
KIŞ BABAY:- Äye.. vakıt su kebek.. aga da kitä! ..İh-h şul gomerlärne... tuñdırıp kuyıp bulsa ikän!..
KAR ÇÄÇÄK:- Abau, nigä alay diseñ babakay?
KIŞ BABAY:- Soñ... kartayıla bit.
KAR ÇÄÇÄK:- (Kölep cibärä) - İ..i..i, kuysana babakay! Siñamı äle kartayu! Üzebez yaratkan häm bezneñ üzebezne dä bik nık yaratuçı, yıl buyı sagınıp kötep aluçı yakın duslarıbız belän bik küp Yaña yıl kiçälärendä oçraşırbız äle, boyırgan bulsa!
KIŞ BABAY:- Amin! Avızıña bal da may kızım. Döres äytäseñ, kartlık närsä ul? İñ möhime - isänlek-saulık bulsın! Saulık - iñ zur baylık dilär bit. (kinät nider isenä töşerep) - Karale kızım, bäyräm kiçälärendä oçraşırbız digännän... siña şunı äytermen digän idem äle.. Üzeñ beläseñ, tizdän Yaña yıl. Ä älege bäyrämne bozar, anı buldırmas öçen nilär genä eşlämilär äşäke cannar. Ul çırşılarnı yandıru, uyınçıklarnı vatu, büläk tulı kapçıklarnı urlau, sakal - mıyıklar, çäç tolımnarın kisep taşlaular diseñme... kıskası, nilär genä kılanmıylar ul yavız cannar! Döres, älegä tarihta Yaña yılnıñ kilmi kaluı hakında bernindi dä faktlar yuk yugın! Monısı inde barıbıznıñ da urtak tırışlıgı digän süz. Läkin, şulayda sak bulırga kiräk. Hoday saklangannı saklarmın digän! Berük añ bula kür kızım!
KAR ÇÄÇÄK:- Borçılma babakay, bıyılgı bäyräm bernindi karşılıklarsız gına ütär. Çönki bıltır, yavız Ala karga äfände "-Başka berkayçan da Yaña yıl bäyrämenä ayak çalmayaçakmın!"-dip, süz birde bit inde!
KIŞ BABAY:- Anısı şulay, tik, betkän meni cir yözendä Ala karga kebek yavızlar! Şuña da, saklanu ber dä zıyan bulmas dim.
KAR ÇÄÇÄK:- Añladım babakay. Bar da sin telägänçä bulır. İh-h, Yaña yıl tizräk kilep citsäçe! Yakın duslarıbıznı sagındım. Tizräk küräsem kilä üzlären!
KIŞ BABAY:- Kürerseñ kızım, kürerseñ. İnde küreşergä küp kalmadı. Yarıy kızım, miña kuzgalırga vakıt. Äle büläklär belän dä eşne tögällise bar. Çanalarnı da tagan ber kat karap çıgarga kiräk. Kittem. (Kitä)
KAR ÇÄÇÄK:- Ozak yörmä babakay, berazdan elemtä bülekçäsenä barıp, duslarıbızga telegrammalar da cibäräsebez bar. Menä şulay çırşı dus, Yaña yıl yakınlaşkannan yakınlaşa bara. Tizdän ul üzeneñ yaña borçuları, yaña söyeneç - şatlıkları belän işeklärebezne şakır! Çönki, Yaña yılda - bar da yaña!
- Yaña yılda - bar da yaña!
Küktä yangan yoldız yaña!
Yaña koyaş, ay da yaña!
Yaña yılda - bar da yaña!

Yaña yılda - bar da yaña!
Borçu - mäşäqatlär yaña!
Yaña hislär, şatlık yaña!
Yaña yılda - bar da yaña!
Öçençe küreneş
(Kış babaynıñ büläklär saklıy torgan sarayı. Anda tirän uyga çumgan Yul-yul barıs yata. Muzıka yañgırıy, Ozın kolak kerä)
OZIN KOLAK:-Kuyan kilä! Yul biregez, yul biregez!
Kolaklarım ozın minem, sez belegez!
Täpilärem utlar çäçä, sez belegez!
Cirgä yaña huca kilä! Yul biregez!!!
- Pip - pip.. Sak bulıgız.. Kuyan kilä! Siña äytäm, taptala kürmä. Kürmiseñmeni, min kiläm bit!
YuL-YuL BARIS:- (Küzen açmıy gına) - Tavışlanma!
OZIN KOLAK:- Tavışlanmıym min, uynıym. Karale, äydä bergä uynıybız!
YuL-YuL BARIS:- Komaçaulama! Minem vakıtım yuk.
OZIN KOLAK:- Sin haman vakıtım yuk diseñ. Ä üzeñneñ ber eşlägän eşeñ kürenmi! Könnär buyı yoklap tik yatasıñ.
YuL-YuL BARIS:- Yoklamıym min, uylıym!
OZIN KOLAK:- Uylıysıñ?
YuL-YuL BARIS:- Äye. Üz yılımda eşlägän eşläremä yomgak yasıym! Ä sin miña komaçaulıysıñ.
OZIN KOLAK:- Komaçaulamıym, kiresençä, bulışam. Minem belän uynap, beraz başın yal ittersen dip tırışam. Yuksa, küp uylaudan başıñ avırtırga mömkin. Tor äydä, beraz kolak şapıldatış uynıyk.
YuL-YuL BARIS:- Rähmät. Tik, minem kolaklarım sineke şikelle ozın tügel şul.
OZIN KOLAK:- Alaysa, äydä, mätälçek atış uynıyk.
YuL-YuL BARIS:- Bäylänmä.
OZIN KOLAK:- Äydä inde, äydä, bik kızık uyın ul.
YuL-YuL BARIS:- Bäylänmä dim.
OZIN KOLAK:- Ä min tor dim! Yuksa, tırnıym bit! (Tırnap ala)
YuL-YuL BARIS:- (Irıldap) - Ägär tagın ber miña kagılsañ - imgätep taşlıym! İşetteñme?
OZIN KOLAK:- Sinme? Köldermä içmasam. Sin bit yalkau. Höräsän! Ayagıña basarga da irenäseñ. Şulay bulgaç, nindi imgätü di inde ul. (Tagın tırnap ala)
YuL-YuL BARIS:- Yahşılık belän äytkänne añlamadıñ, inde üzeñä üpkälä! Käcä mayıñnı çıgaram häzer! (Muzıka, kızıklı sugış. Tavışka Kar çäçäk kerä)
KAR ÇÄÇÄK:- Çü, nişlävegez bu? Sezgä äytäm, nigä sugışasız? Citte sezgä! Häzer ük tınıçlanıgız! Yuksa, Kış babayga äytep, kolaklarıgıznı bordırtaçakmın!
OZIN KOLAK:- Yuk, kiräkmi. Bez bit şayardık kına.
KAR ÇÄÇÄK:- Büläklärne saklıysı urınga, dönyagıznı onıtıp şayarıp yatuıgız sezneñçä äybät eş meni?
YuL-YuL BARIS:- Gafu it Kar çäçäk, ğayep bezdä.
OZIN KOLAK:- Tuktagız äle, büläklärne saklarga disezme? Añlamadım, ä nigä saklarga di alarnı?!
YuL-YuL BARIS:- Ahmak! Soñ, ägär dä büläklärne urlasalar - Yaña yıl bulmıy digän süz.
OZIN KOLAK:- Ä..ä..ä, añlaşıldı. Ä kemnän saklarga alarnı?
KAR ÇÄÇÄK:- Doşmannardan! Karale, Yul-yul barıs, min siña şunı äytermen digän idem äle, bezgä mäğlüm bulgança, iske yıl hucalarınıñ tähettän bik tiz genä kitäseläre kilmi. Şuña da alar, Yaña yıl kilmäsen öçen, nilär genä kılanmıylar. Yul-yul barıs, min sine aldan uk kisätep kuyam: ägär berär etlek eşläsäñ,- bezdän rähim - şäfkat kötmä! Añladıñmı?
YuL-YuL BARIS:- Añlamıyça! Bu turıda süz dä bulırga tiyeş tügel. Här eştä vakıtında kilä häm vakıtında kitä dä belergä kiräk! Min monı bik yahşı añlıym. Tik, şulay da minem sezgä ber üteneçem bar ide.
KAR ÇÄÇÄK:- Tıñlıybız.
YuL-YuL BARIS:- Mine tagın ber yılga gına bulsa da üz vazıyfalarımnı ütärgä kaldırsagız ide.
OZIN KOLAK:- Ä? Kara sin anı yuha yılan! Minem yılga da huca bulmakçı!
KAR ÇÄÇÄK:- Yuk Yul-yul barıs duskay, kızganıçka karşı sineñ bu telägeñne berniçek tä üti almıybız. Üzeñ beläseñ: här yılnıñ da zakonlı üz hucası bar! Ä menä unike yıldan soñ, yañadan üz yılıña üzeñ huca bulıp kilerseñ. Kileştekme?
YuL-YuL BARIS:- Kileştek. Rähmät sezgä. Borçılmagız, minem taraftan Yaña yılga karşı berni dä eşlänmäs! Min süz biräm!
KAR ÇÄÇÄK:- Bez siña ışanabız. Yä, yarıy, inde miña kuzgalırga vakıt. Kış babay belän elemtä bülekçäsenä barıp, duslarıbızga bäyräm telegrammaları cibäräsebez bar. Ä sez bez yukta saraynı, Yaña yıl büläklären äybät kenä, tatu gına saklagız. Yarıymı?
YuL-YuL BARIS:- Añladık. Bar da sez digänçä bulır.
KAR ÇÄÇÄK:- Min sezgä ışanıp kalam. (Kitä)
OZIN KOLAK:- Häyerle yul sezgä! Uh, doşmannar yakın gına kilep karasınnar! Min alarnımı .. Min alarnı ütken tırnaklarım belän eläkterep, ozın kolaklarım belän kıynap beteräçäkmen!
YuL-YuL BARIS:- Şapırınma. Aldan kıçkırgan kükeneñ başı taz bula di.
OZIN KOLAK:- Minme maktançık? Minme küke? Bu süzläreñ öçen häzer min sine teşläşergä çakıram! (Teşen teşkä bärep) - Şık.. şık.. äydä, rähim it! Şık.. şık..
YuL-YuL BARIS:- Yuk! Teşläşü - yegetlek tügel!
OZIN KOLAK:- Alaysa, äydä, uynıyk?!
YuL-YuL BARIS:- Sin tik kenä toralasıñmı, yukmı!
OZIN KOLAK:- Äy, sineñ belän küñelsez. Küñel aça belmiseñ sin. Yarıy, sin büläklärne sakla, ä min ayak aslarınnan yomşak karlar çäçrätep, ber rähätlänep täpiläremne yazıp kaytıym äle! Ähä- hä-häy! Yul biregez.. Kuyan kilä! Pip... pip... taptala kürmägez!... (Çıgıp yögerä)
YuL-YuL BARIS:- Bar, bar. Yuksa, tämam tuydırıp beterdeñ. Üzen totıp özgäläp kenä taşlar ideñ, yaramıy! Ni äytsäñ dä Yaña yıl hucası! Yarıy, ul bulmagan arada irkenläp ber uylanıp alıym äle. Tavış! Komaçaulamagız miña! Min uylıym! (Küzlären yomıp tirän uyga çuma)

Dürtençe küreneş
(Ala karga ofisı. Ul kompter belän mäşkül)
ALA KARGA:- .. Ozaklamıy Yaña yıl digännäreneñ köle kükkä oçaçak! Täk..täk.. inde törle siher - tılsımnar belüçe dä bulsın. Anısın da programmaga kertik. Menä şulay! Täk.. nihayät, buldı bugay. Yäle, karap karıyk, ni kilep çıktı ikän! (Kompyuternıñ ber töymäsenä basa, bülmä eçendä ber säyer zat päydä bula. Ul - super Ala karga - 001 bulır)
SUPER 001:- Hörmätle äfändelär, hanımnar, tutaşlar! Dönyadagı berdän-ber super Ala karga - 001 sezneñ karamakta! Yaña yıl çırşıların yandırırga, karlarnı eretergä, çırşı uyınçıkların çelpärämä kiterergä, Kış babay häm Kar çäçäkne kurkıtıp Yaña yıl bäyrämen buldırmaska teläsägez - miña möräcäğat itegez! Hezmät kürsätü tiz häm yugarı sıyfatlı bulaçagına garantiyä biräm! Çönki, min, dönyadagı berdän-ber super Ala karga - 001!
- Törle - törle äşäkelek kılu,
Tügel lä ul miña avırlık!
Yahşılıklar minnän sez kötmägez!
Bar uylarım minem - yavızlık!
- Şulay itep.. Ni boyırasız, hucam?
ALA KARGA:- (Soklanıp) - İskitkeç! (Üz - üzen maktap) - Äfarin, böyek Ala karga äfände! Sez - Geniy! Sez - Talant! Sez, moñarçı fändä kürelmägän zur açış yasap, dönyaga üzeñneñ berençe cimeşeñne tudırdıñ! Äfarin! Min sezneñ aldıgızda baş iyäm! Bolay bulgaç, Yaña yıl inde minem kulda! Menä.. menä ul minem ciñelmäs koralım! Täk, täk.. iptäş super Ala karga - 001! Siña berençe boyırıgım şul: tiz arada Kış babay häm Kar çäçäk, ayak - kulları bäylängän häldä, minem aldımda bulırga tiyeş! Añladıñmı?
SUPER 001:- Añladım. Bu minem öçen çüp kenä. Kitärgä röhsätme?
ALA KARGA:- Bar, eşeñdä bul! Tik, kara anı, tiz yör!
SUPER 001:- Baş öste, böyek hucam! (Yukka çıga)
ALA KARGA:- Menä şulay, hörmätle Kış babakay, monnan soñ, sez berkayçan da balalar belän çırşı tiräli uynap - kölep, cırlap - biyep yöri almayaçaksız! Gomumän tizdän, cir yözendä Yaña yıl digän bäyräm bulmayaçak! Monı min äytäm sezgä! Ha..ha..hi..hi..i..i.. (Şulvakıt kapçık kütärep super Ala karga - 001 kaytıp kerä)
SUPER 001:- Ämeregez ütälde, böyek hucam! Rähim itegez!
ALA KARGA:- Niçek alay bik tiz?
SUPER 001:- Kış babaynıñ näq urman urtasında adaşıp yörgän çagı turı kilde.
ALA KARGA:- Kış babay adaşıp? Yäle, çiş kapçıgıñnı!? (Super Ala karga - 001 kapçıknıñ bavın çişä, ä anıñ eçennän avızına çüpräk tutırılgan, ayak - kulı bäylängän Ozın kolak kilep çıga)
SUPER 001:- Kış babay sezneñ karamakta, hucam. İnde, sez röhsät itsägez, Kar çäçägen ezläp kitäm.
ALA KARGA:- Tintäk! Ahmak! Cülär! Bu bit.. bu bit Kış babay tügel!
SUPER 001:- Niçek inde ul tügel? Soñ bit ul üze "- Sin Kış babaymı?"- dip soragaç, "- Äye!"- dip cavap birde.
ALA KARGA:- Tintäk, tagın ber kat kabatlıym: bu - Kış babay tügel! Ozın kolak bu, bik beläseñ kilsä. Yaña yılnıñ hucası!
SUPER 001:- Ä? Dimäk, ul mine aldagan? Ah, aldakçı.. häzer şunıñ öçen min sine özgäläp atam! (Kütärep ayagına bastıra, kinät Ozın kolak anı başı belän köçle itep sözep cibärä. Super Ala karga - 001 añın cuyıp yıgıla)
ALA KARGA:- Beterdeñ! Harap itteñ! Minem super Ala karga - 001emne saftan çıgardıñ! (Tikşerep) - Yuk, tözä terlege kalmagan. İnde häzer miña nişlärgä? Nişlärgä? Şaşam bit .. akıldan şaşam! Yaña yıl inde borın töbendä genä.. uf .. üläm.. yä inde.. eşlät başıñnı.. tukta .. tukta .. Yaña yılnıñ hucası minem kulda bit! Şulay bulgaç, dimäk - Yaña yıl bulmayaçak!? Yuk, barıp çıkmayaçak. Betkän meni cirdä kuyannar. Monısı bulmasa başkasın kuyarlar. Kuyannarın da äyter idem inde.. şul hätle ürçemäsälär..Alarnıñ bit kolakları gına ozın, akılları kıska! (Kinät) - Taptım! Taptım! Yaña yılnı buldırmas öçen, miña - Ozın kolak üze bulışaçak! (Yuhalanıp) - Ä..ä, Ozın kolak! Kemne küräm min. Nihäl? (Çişä başlıy) - Häzer.. häzer azat itäm min sine. Tege tintäk sine yalgış räncetkän şul. Yarıy äle üzen imgätep taşladıñ. (Çişä)
OZIN KOLAK:- Kabahät! Sin äle bıltır süz birgän östenä, tagın bıyıl da Yaña yılga ayak çalmakçı bulasıñmı? Monıñ öçen häzer min sine teşlim.. çäynim.. (Kuış)
ALA KARGA:- Çü.. çü Ozın kolak tintäk.. tınıçlan..
OZIN KOLAK:- Min sineñ bu eşeñne Kış babayga citkeräçäkmen. Monıñ öçen ul sineñ başıñnan sıypamas. Kiresençä, ber zur boz kisägenä äyländeräçäk! (Kitä başlıy, Ala karga anıñ yulına arkılı töşep)
ALA KARGA:- Äy ni.. tukta.. Ni bit.. Ozın kolak tintäk.. äy, gafu.. äfände.. min bit üzem öçen tügel.. sineñ öçen tırışam!..
OZIN KOLAK:- Närsä?
ALA KARGA:- Äye,äye, sineñ öçen.
OZIN KOLAK:- Añlamadım, niçek inde minem öçen?
ALA KARGA:- Soñ, hoda bändäse, sin bit barı ber genä yılga huca bulıp kiläseñ! Annan, siña almaşka, başka hayvan kiläçäk. Ber närsä inde ul? Aç karınga ber çemetem ipi kebek kenä. Kilgän - kilgän, Ozın kolak dustım, bar yıllarga da huca bulıp, gomerlekkä kilergä kiräk!
OZIN KOLAK:- Nigä, alayda kilep bula meni?
ALA KARGA:- Älbättä. Bu avır eş tügel. Monıñ öçen barı bıyılgı Yaña yılnı gına buldırmaska kiräk!
OZIN KOLAK:- Sin ni söyliseñ? Yuk, anısı inde ülgändä dä bulmas! Kit yuldan! Yuksa, häzer tibep, böten kabırgalarıñnı sındırıp beteräçäkmen!
ALA KARGA:- Tintäk! Cülär! Ahmak! Tagın ber kat kabatlıym: min bit barı sineñ öçen tırışam. Çönki,sin talantlı.. sälätle.. köçle.. akıllı.. töple huca! Min sine ber kürüdä ük üz ittem. Şuña da, bar yıllarnıñ hucası itep, barı sine genä küräse kilä! Sin bit moña tulısınça layık! Sin tähettä rähätlänep yäşel susıl ülännär genä aşap, televizordan multfilmnar, hayvannar dönyası tapşıruları karap, köne - töne kişer, käbestälär genä kimerep yäşärgä tiyeşseñ! Ä başka hayvannarnıñ barısı da kol bulıp, barı siña gına hezmät itärgä tiyeşlär! Barıp citteme inde?
OZIN KOLAK:- O..o, alay bulsa şäp bulır ide ul! Tik, belmim şul, Kış babay kolaklarnı bormas mikän soñ?
ALA KARGA:- Ahmak, ägär bar yıllarga da huca bulıp sin kilsäñ - ul çagında inde Kış babay min bulaçakmın! Ä min inde, här könne: "-Vät, nindi zur üskän malay!"- dip, sineñ başıñnan gına sıypap toraçakmın!
OZIN KOLAK:- (Söyenep) - Şulay diseñme? Äy, betkän baş betkän, min riza!
ALA KARGA:- Ul çagında, ciñ sızganıp eşkä kereşik! Yuksa, vakıt bik az kaldı! Täk, eşne närsädän başlıybız?
OZIN KOLAK:- Minemçä iñ elek, cir yözendäge barlık çırşılarnı da cıyıp yandırırga kiräk!
ALA KARGA:- Ahmak. Monıñ öçen bezgä beläseñme niçä yıllap vakıt kiräk bulaçak?!
OZIN KOLAK:- Äye şul. Ä, beldem. Bezgä, Kış babaynıñ balalarga dip häzerläp kuyılgan büläklären urlarga kiräk!
ALA KARGA:- Yuk, monısı da batmıy. Yılda büläk urlamıylar inde. Bıyıl bezgä niçek bulsa da yaña ısul uylap tabarga kiräk! Äytik.. äytik.. taptım! Nu başta soñ inde üzemdä. Vät monısı şäp bulaçak!
OZIN KOLAK:- Yä, äyt tizräk?
ALA KARGA:- Bezdä mäñgelek cäy, Ä Afrika, Avstraliyä yaklarında mäñgelek kış yasarga!
OZIN KOLAK:- Menä bu çınnan da şäp! Karale,sin bit geniy ikänseñ!
ALA KARGA:- Yarıy, yarıy, anısın gına üzem dä beläm!
OZIN KOLAK:- Tuktale, sin bezdä mäñgelek cäy yasarga diseñ dä bit, ä niçek yasarga? Monıñ öçen bit bezgä bik zur siher - tılsımnar belüçe kiräk bulaçak!
ALA KARGA:- Çınnan da, şulay ikän şul. İh-h, super Ala karga - 001 yemne harap itep taşlamagan bulsañ!.. Bu eşne ul bik tiz başkarıp çıkkan bulır ide.
OZIN KOLAK:- Karale, ägär dä min anıñ kolakların borıp karasam? Bälki, añına kiler, ä?
ALA KARGA:- Belmim şul. Ällä çınnan da borıp karıykmı?
OZIN KOLAK:- Äydä! (İkäüläşep kolakların boralar, super Ala karga - 001 häräkätkä kilä)
SUPER 001:- Dönyadagı berdän - ber super Ala karga - 001 sezneñ karamakta! Yugalgan mäçeläregez, etläregez, uyınçıklarıgıznı tabarga, yäki, başka şuşındıyırak eşläregez bulsa - miña möräcäğat itegez!..
ALA KARGA:- Buldı, buldı.. kolakların bor tizräk! Yuksa, ällä nilär lıgırdıy başladı. (Tagın kolakların boralar)
SUPER 001:- Äfändelär! Sezneñ aldıgızda dönyanıñ iñ aldıngı tılsımçısı - super Ala karga - 001. Ni boyırasız?
OZIN KOLAK:- Ällä terelde inde?
ALA KARGA:- Äfarin, Ozın kolak duskay, äfarin! Buldırdıñ. Bolay bulgaç Yaña yılnıñ da, "- Kar!, Kar-r!"- dip kar yaudırıp, cılı yakka kaçkan kara kargalarnıñ da eşläre hörti bulaçak! Yäle tılsımçı äfände, tiz arada bezdä cäy, ä Afrika, Avstraliyä yaklarında mäñgelek kış yasa!
SUPER 001:- Bula ul. Äfändelär, cäyne karşı alırga häzerlänegez! (Siherläp) - "Kirmäle eremäle - kat!" (Ozın kolak belän Ala karga ikese dä katıp kalalar) - Buldı bugay, disäm.. bulmagan ikän äle. Dimäk, yalgış siherlägänmen. Yarıy, borçılmagız, häzer min sezne kire üz halätegezgä kaytaram! "Şıgır - mıgır, şomor buh!" Täk, busı da barıp çıkmadı. Äy, torsınnar şulay. Matur toralar bit. (Cilkälärennän kagıp ala, tegelär häräkätkä kilälär)
ALA KARGA:- Tintäk. Cülär. Bez siña üzebezne katırıp kuyarga kuştık meni? (Başına sugıp ala)
SUPER 001:- Menä, menä.. iskä töşte!.. Ällä kayçan başka sukkan bulsagız.. küptän inde ciläkle alanda suzılıp yatıp yal itkän bulır idegez. Yarıy, anısı äle häzer dä soñ tügel. Karagız: küz açıp yomgançı, cäy belän kışnı alıştıram! "- Zämhärriro salkınnaro cılı suık bormali!". Buldı!
ALA KARGA:- (Täräzägä kaplanıp) - İşteñ işäk çumarın! Tışta anda bernindi dä üzgäreş yuk!
SUPER 001:- Bulmas!?
OZIN KOLAK:- Haman da şul uk ber kış! Tuktagız äle, ä tegeläre nindi säyer canvarlar tagın?
ALA KARGA:- Kaya?
OZIN KOLAK:- Änä, urman alanında!...

Bişençe küreneş
(Urman alanı. Anda isä, super Ala karga - 001neñ yalgış sihere arkasında biregä kilep çıkkan maymıl belän kara karga aptıraşıp toralar)
MAKAKKU:- Karale, Karkıldık, sin berär närsä añlıysıñmı ul?
KARKILDIK:- Yuk. Bez kayda soñ?
MAKAKKU:- Belmim şul.
KARKILDIK:- Tukta.. tukta.. bu bit.. bu bit minem tugan yaklarım tügelme soñ? Äye, äye, näq üze. Änä, tege agaç.. änä tegese dä.. busı da .. barısı da miña tanış! Min bit inde menä şuşı urmanda tuıp - üstem. Balaçagım şuşında ütte.
MAKAKKU:- (Kar alıp) - Ä monısı närsä? Üze yomşak, ä üze şundıy salkın.
KARKILDIK:- Kaya? Minemçä bu - kar bulırga tiyeş. Çönki, äti - äniyem miña: "- Könnär suıta başladı. Dimäk, ozaklamıy cirgä ap - pak karları, salkın kar - burannarı belän kış kilep citäçäk. Şuña da, kış ütep kitkänçe bez cılı yaklarga küçep kitärgä mäcbürbez!"-digännär ide. Çınnan da, kış digännäre bik salkın ikän, äyeme? Uf..f.. tuñdım..
MAKAKKU:- Bolay bulsa, tuñıp üläbez bez monda. Tuñıp ülmägän oçrakta da.. açtan üläçäkbez. Monda bit sezneñ ni banan, ni äflisun, ni ananaslarıgız yuk. Kaya karama gel şäp - şärä agaçlarıgız gına kukrayıp utıralar.
KARKILDIK:- Ä cäyge könne kürsäñ sin monda.. nilär genä yuk: ul törle - törle cimeşlär diseñme.. güzällek - maturlık diseñme.. huş isle çäçkälär diseñme.. kıskası, canıñ ni teli - şular barısı da bula!
MAKAKKU:- Tuktale.. änä, tegendä nindider ber öy kürenä..
KARKILDIK:- Kayda?
MAKAKKU:- Änä iç inde!
KARKILDIK:- Kızık, cäy köne yuk ide bit äle ul monda. Kızık, kemneke ikän bu öy?
MAKAKKU:- Kemneke bulsa da barıber, äydä, kitik şunda. Yuksa, monda torıp, tuñıp ülüebez ihtimal! (Kitälär)

Altınçı küreneş
(Ala karga ofisı)
ALA KARGA:- Menä äkämät. Bolarnıñ berse karga balası - Karkıldık tügelme soñ? Äye şul, üze. Nişläp yöri ul monda?
OZIN KOLAK:- Änä, biregä taba kilälär. Mögayın bezneñ yangadır.
ALA KARGA:- Kızık.. bik kızık.. (Makakku belän Karkıldık kerälär)
MAKAKKU:- O..o.. monda şundıy cılı, rähät. İsänmesez.
BARISI BERGÄ:- İsänmesez.
MAKAKKU:- Tanış bulıyk: min - Makakku. Ä monısı minem yakın dustım - Karkıldık!
KARKILDIK:- Gafu itegez, bez sezneñ öydä beraz gına cılınıp alsak... Ala karga abzıy? İsänmesez?!..
ALA KARGA:- İsän, bik isän! Ä sin üzeñ monda, bu suıkta nişläp yöriseñ? Yalgışmasam,sez barıgızda salkınnan kurkıp, cılı yaklarga kaçkan idegez bit! Şulay bulgaç, niçek kilep çıktıgız äle biregä?
KARKILDIK:- Anısın üzebezdä añlamıybız.
MAKAKKU:- Äye. Bez rähätlänep kokos çiklävege aşap tora idek, kinät, bar dönya karañgılanıp kitte.
KARKILDIK:- Ä dönya yaktırganda bez inde biredä, salkın kar östendä basıp tora idek.
OZIN KOLAK:- Dimäk, alar, super Ala karga - 001neñ tılsımı arkasında päydä bulgannar?
SUPER 001:- Minem arkada? Anıñ şulay bulasın kem belgän bit. Kire ozatıymmı soñ inde üzlären?
ALA KARGA:- Kiräkmi! Yä böten ilneñ canvarların şuşı urmanga cıyarsıñ. Annan, üzläre kar-kar dip yaudırgan karlarınıñ qaderlären belsennär äle! Ha..hi..hi..
OZIN KOLAK:- Alaysa nişlätik inde bolarnı?
ALA KARGA:- Başta Yaña yıl belän eşne tögällik äle. Annan küz kürer.
KARKILDIK:- Yaña yıl? Onıtıp ta cibärgänbez, çınlap ta tizdän Yaña yıl bäyräme bit. Ur..ra.. Berençe tapkır karlı Yaña yıl bäyrämendä küñel açaçakbız ikän!
SUPER 001:- Yukka şatlanasız. Bez ul bäyrämne barıber buldırmayaçakbız. Bozaçakbız!
MAKAKKU:- Ä? Niçek inde şundıy küñelle, yämle bäyrämne bozarga cıyınasız? Anı bit bozarga tügel, kiresençä, bergäläşep küñelle genä bäyräm itärgä kiräk!
ALA KARGA:- Citte! Akıl satmagız! Sezneñ üget - näsihätläregezne tıñlap torırga bezneñ vakıtıbız yuk!
KARKILDIK:- Bu nindi äşäkelek? Bu nindi yavızlık?
MAKAKKU:- Olug Yaña yıl bäyrämenä kul suzu? Bu bit başka sıymaslık häl! Akılıgızga kilegez, äfändelär!
OZIN KOLAK:- Ällä çınnan da Yaña yılga kagılmıykmı, ä, Ala karga äfände? Ni disäñ dä bäyräm bit.
SUPER 001:- Min dä şulay uylıym.
ALA KARGA:- Närsä? Citär, tıñlamagız şularnı! Bernindi dä bäyräm bulmayaçak! Çönki, bez.. çönki, bez.. Kış babaynıñ tavışın urlayaçakbız!
KARKILDIK:- Kış babaynıñ tavışın?
MAKAKKU:- Bolar bit bötenläy akıldan şaşkannar. Kotırgannar! Tizräk kitik monnan! Soñga kalgançı Kış babaynı ezläp tabıp, bu turıda kisätik üzen.
KARKILDIK:- Äye şul, yuksa, eşlär harap! (Yögerep çıgıp kitälär)
OZIN KOLAK:- Kua çıgıymmı?
ALA KARGA:- Kiräkmi! Alar bolay da yırak kitälmäyäçäklär. Tuñıp üläçäklär! Ha..ha..hi.. Super Ala karga - 001 äfände, bez kiçekmästän Kış babaynıñ tavışın urlarga tiyeşbez! Şıldımı?
SUPER 001:- Şıldı. Dimäk, bolay:....... (Muzıka)
Cidençe küreneş
(Elemtä bülegennän cırlıy - cırlıy Kış babay belän Kar çäçäk kaytıp kilälär)
- Cir östenä köläç yözle,
Yaña yıl yakınlaşa!
Şatlık - söyeneçtän, şuña-
Küñellärebez taşa!

Huş kiläseñ, Yaña yıl!
Tökle ayagıñ belän!
Äylän - bäylän uynarbız,-
Bäyrämdä duslar belän!
KIŞ BABAY:- Kürçe kızım, kışkı tabiğatneñ hozurlıgın! Bu bit yılnıñ iñ gacäyep, iskitkeç çagı!
KAR ÇÄÇÄK:- Äye, tirä - yakta şundıy güzällek! Karagan sayın karıysı gına kilep tora!
KIŞ BABAY:- Äytmä dä kızım. Şöker, inde duslarıbızga telegrammalarıbıznı da cibärdek. Tizdän üzläre belän oçraşıp, törle uyınnar uynarbız. Yämle çırşı yanında cırlarbız, biyerbez. Rähätlänep bäyräm itär... (Kinät Kış babaynıñ tavışı yukka çıga)
KAR ÇÄÇÄK:- Ni buldı siña, babakay? Nigä kinät süzsez kaldıñ? (Kış babay kulları belän nider añlatmakçı bula) - Berni dä añlamıym, ni genä buldı soñ siña, babakay? (Şul çak Makakku belän Karkıldık kerälär)
KARKILDIK:- Kotkarıgız! Yärdäm itegez!
KAR ÇÄÇÄK:- Abau, sez kemnär?
MAKAKKU:- Sez aptırap kalmagız, soñınnan barısın da añlatırbız! Ä häzergä bezgä sezneñ yärdäm kiräk!
KARKILDIK:- Bez, urman alanında yäşäüçe yavız Ala karga häm anıñ äşnälärenä tap buldık. Alar bik tä mäkerle eşlär maytarırga cıyınalar!
MAKAKKU:- Alarnıñ niyäte, nindider ber super Ala karga - 001 isemle tılsımçı yärdämendä, Kış babaynıñ tavışın urlap, kürkäm Yaña yıl bäyrämenä ayak salmakçılar!
KAR ÇÄÇÄK:- Menä häzer barısı da añlaşıldı. Dimäk, bu äle yavız Ala karga eşe! Sez alarnıñ kayda ikänleklären beläsezme?
MAKAKKU,KARKILDIK:- Beläbez! Beläbez!
KAR ÇÄÇÄK:- Alaysa, äydägez, tizräk bezgä yul kürsätegez! (Barısı da aşıgıp çıgıp kitälär)

Sigezençe küreneş
(Ala karga ofisı. Ul, şatlana - şatlana, çülmäk eçendäge Kış babaynıñ tavışın tıñlap läzzätlänä)
ALA KARGA:- Kış babaynıñ tavışı - şuşı çülmäk eçendä! Äfarin, super Ala karga - 001 äfände. Sin, dönyadagı iñ böyek tılsımçı ikänseñ! Häzer Yaña yıl minem kulda! Bu uyında - min ciñdem! Tizdän, bar yıllarga da üzem huca bulaçakmın!!!
OZIN KOLAK:- Ä min? Sin bit mine huca yasıym dideñ?!
ALA KARGA:- Sin tintäkkä yıllar ışanıp tapşırırga, minem başıma tay tipmägän, läbasa!
OZIN KOLAK:- Dimäk, sin mine aldadıñ? Ä min, cülär, sineñ tatlı süzläreñä ışanıp, üzemneñ yakın duslarıma, Yaña yılga hıyanät ittem! Min häzer monıñ öçen sine taptıym..teşlim häşärät!..
ALA KARGA:- Urınıñnan kuzgalası bulma! Yuksa, çülmäkne bärep vatıp, Kış babañnı mäñge tavışsız kaldıram!
OZIN KOLAK:- Monıñ öçen ükenäçäkseñ äle sin! (Kinät super Ala karga - 001neñ başına suga) - Monısı siña şul äşäkegä yärdäm itkäneñ öçen! Sineñ arkañda menä häzer Yaña yıl bulmayaçak!
SUPER 001:- (Üzgärep) - Tukta, närsä buldı miña? Kılgan eşläremä ükenä başladım! Çınnan da bik zur yalgışlık eşlägänmen ikän bit min! Ägär dä häzer bez Yaña yılnı kotkarmasak - balalar bezne berkayçan da gafu itmäyäçäklär! Äy, yavız can, kiter monda çülmäkne!
ALA KARGA:- Kiterde di, kötep tor!
SUPER 001:- Ah, äle sin şulay meni?! "- Kirmäle eremäle - kat!" (Ala karga katıp kala. Şulvakıt öygä Kış babay, Kar çäçäk, Makakku, Karkıldık häm Yul-yul barıs kilep kerälär)
KAR ÇÄÇÄK:- Äy, yavızlar, urınnarıgızdan da kuzgalası bulmagız! İh sin Ozın kolak, Ozın kolak!.. Sin satlık can, hıyanätçe ikänseñ! Ä bez siña tagın yıl hätle yılnı ışanıp tapşırmakçı buldık! Yä, tiz bulıgız, Kış babaynıñ tavışın kire kaytarıgız!
SUPER 001:- (Çülmäkne birep) - Menä, rähim itegez! (Kış babaynıñ tavışı kire kayta)
KIŞ BABAY:- Hay igeleksez, yavız bändälär! Yaña yıl doşmannarı! Häzer min sezneñ barıgıznı da bozga äyländeräm!
SUPER 001:- Bozga?
KAR ÇÄÇÄK:- Babakay, yukka vakıt äräm itkänçe, kotılıyk üzlärennän.
OZIN KOLAK:- Kiräkmi! Min häzer sezgä barısında añlatam. Sez bezne gafu itegez inde. Barısı öçen dä, änä, Ala karga ğayeple! Bezne ul kotırttı. Bar yıllarga da huca itäm dide. Ä bez ahmaklar, anıñ tämle telenä aldanıp... Kış babay, zinhar kiçer bezne! Bez, bütän bervakıtta da, bervakıtta da yalgışmaska ant itäbez! Minem üz yılıma huca bulıp kiläsem kilä! (Elap cibärä)
YuL-YuL BARIS:- Eh sin, Yaña yıl hucası! "- Min! Min!"- dip yörep, Yaña yılnı harap itä yazdıñ! Äle dä bähetebezgä - yaña duslarıbız buldı! Şuña da bez alarnı çırşı yanına, Yaña yıl bäyrämenä çakırabız! Äyeme, babakay?
KARKILDIK:- Bäyrämgä? Bu bit bezneñ küptänge hıyalıbız!
MAKAKKU:- Bez bik teläp baraçakbız! Rähmät sezgä!
SUPER 001:- Ä bez? Bezne dä üzegez belän alıgız inde?! Bez bit üz yalgışıbıznı vakıtında añlap, üz hatabıznı vakıtında tözättek! Yaña yıl bäyrämenä kul suzganı öçen, yavız Ala karganı mäñgegä dip katırıp kuydık! Kiçeregez bezne! Bezneñ dä bäyräm itäsebez kilä!
KAR ÇÄÇÄK:- Yä, ni diseñ babakay?
KIŞ BABAY:- Üzeñneñ gayıbeñne tanu häm anı vakıtında tözätü - äybät sıyfat anısı. Yarıy inde, ber yulga kiçerik üzlären! Ä menä Ala karganı isä...
KAR ÇÄÇÄK:- Babakay, iñ elek üzen elgärege halätenä kaytarıyk. Annan soñ hökem itärbez.
SUPER 001:- Bula ul! "- Äfsen - töfsen, yörep kitsen!".
ALA KARGA:- Uh-h, min sezne.. Kış babay? Kar çäçäk?.. Ä sez biredä nişläp yörisez?
KAR ÇÄÇÄK:- Sin yavıznı bozga äyländerergä dip kildek! Yuksa, sinnän şunsız kotılıp bulmas!
ALA KARGA:- Yuk, kiräkmi! Min üz gayıbemne tanıym! Tik, zinhar öçen berük bozga gına äyländerä kürmägez! Min bit salkınnan, bozdan bik kurkam! Cülär min. Min - kara kargalar telägängä genä cir östenä kış kilä, kar yava dip uyladım! Şuña da alardan uç alu öçen, Yaña yılnı kulga töşerep, bar yıllarga da huca bulırga telädem! Läkin,min bik yalgışkanmın! Çönki, cir yözendä iñ bähetsez koşlar - alar - kara kargalar ikän. Çönki, alar, güzäl Yaña yıl bäyrämen kürüdän mäñge mährüm! Kiçeregez inde mine! Min başka üz gomeremdä ber genä dä äşäkeleklär eşlämäyäçäkmen! Kara kargalar belän dä dus bulaçakmın! Gafu itegez mine!
KIŞ BABAY:- Bez sineñ tämle teleñä, yalgan süzeñä ber tapkır aldandık inde! Bezneñ siña bütän ışanıçıbız yuk!
ALA KARGA:- Ütenep sorıym, soñgı tapkır kiçeregez! Min, bügennän başlap, başım - ayagım belän fän diñgezenä çumaçakmın! Minem bit fängä sälätem, talantım bar ikän! "- Başka hayvannarnıñ üz yılı bar, ä mineke - yuk!"- dip, yukka baş vatkançı, fän öçen baş vataçakmın! Tik, zinhar kiçeregez genä!?!
KIŞ BABAY:- Yarıy, bäyräm hörmätenä genä tagın ber kat ışanıp karıyk inde süzeñä. Ämma, belep tor: tagın aldasañ - bezdän rähim - şäfkat kötmä! Añladıñmı?
ALA KARGA:- Işanıçıgıznı ayak astına salıp taptamam! Menä kürersez äle: Ala karga dönyadagı iñ böyek ğalim bulaçak!!! Sez minem belän gorurlanaçaksız äle!
KIŞ BABAY:- Anısın vakıt kürsäter. Ä häzer inde bezgä, duslarıbız yanına aşıgırga kiräk! Çönki, ber - ike minuttan, tormışıbızga ör - yaña yıl atlap keräçäk!
KAR ÇÄÇÄK:- Çınnan da, Yaña yıl kilep citä ikän bit inde! Duslar,bez sezneñ barıgıznı da Yaña yıl belän kotlıybız!!!
OZIN KOLAK:- Minem yıl belän!
YuL-YuL BARIS:- Ä bez sezneñ belän, Allahı boyırsa, näq unike yıldan soñ küreşerbez! Ä häzergä sau bulıgız! Bäyräm belän!
BARISI BERGÄ:- Yaña yıl belän sezne, duslar!!!
- Yaña yılda sezgä duslar,
Bähet - şatlık yuldaş bulsın!
İmin bulsın tormışıgız,
Yözläregez balkıp torsın!

Küktä härçak koyaş kölsen!
Ay da cirgä nurın sipsen!
Duslar, Här beregezneñ dä,
Bäyräme küñelle ütsen!!!
KIŞ BABAY:- Äydägez duslar, yämle çırşı yanına aşıgıyk! Yaña yıl belän! Oho..ho..ho..ho..ho..o..o..o......
TÄMAM
Kazan, 1998 yıl.

Click or select a word or words to search the definition