Şayara Belmäsäñ...

(yumoreska)
İşbulat irtän eşkä kilgän hezmättäşe Kamilne avızın yırıp karşı aldı:

- Ya, hällär niçek?- dide ul, häyläkär yılmaep, kurtkasın şkafka elep torgan Kamilgä.

Tegeseneñ borını salıngan ide. Ul käğazlär şıplap tutırılgan «diplomat»ın açtı da, annan Petr Ineñ gipstan yasalgan sının tartıp çıgardı. Tuzanlanıp, sargayıp betkän, inde küptännän idarä östälendä torgan bu sınnı kiçä İşbulat, şayartırga teläp, yüri genä Kamilneñ «diplomat»ına salıp cibärgän ide. Menä bügen üzeneñ şuklıgınnan «täm tabıp», rähätlänep kölep tora.

- Berär ciñelräk, ya kiräkleräk äyber salgan bulsañ, içmasa,- dide Kamil, üpkäsen yäşermiçä.- Beläseñ bit minem radikulit ikänen...

Belmime soñ, belä İşbulat: kemdä radikulit, kemdä başkası - härkemneñ berär yomşak ciren taba gına belergä kiräk. Anıñ böten kızıgı da şunda bit.

- Niçava, fizzärätkä belän şögıllänüneñ berkemgä dä zıyan kitergäne yuk äle,- dip hihıldadı İşbulat.

Anıñ mondıy şuklıkların hezmättäşläre küptän belälär ide inde. Şuña kürä, kuşılıp kölüçe bulmadı. Tapkansıñ kızık, digändäy, kul gına seltädelär...

Kiçen eştän öyenä kaytışlıy İşbulat irtägäse könne uyladı. Tagın şuklık eşläde bit: kassir Saniyäneñ sumkasına Häyretdinneñ eştä kiyep yöri torgan «tapoçka»sınıñ sıñarın, ä ekonomist Sufiyännıñ «barsetka»sına Saniyäneñ pomadasın tıktı. Vät irtägä tamaşalar bulaçak, dip faraz itte ul, üzeneñ şundıy ziräk akılına üze soklanıp. Yuk, yuk, tamaşalar bügen ük başlanaçak. Sufiyännıñ hatını pomadanı kürep alsamı?!.

Änä şundıy uylar belän öyenä kaytıp kergän İşbulat «diplomat»ın açıp cibärde. Çü, närsä bu? Anda nindider çüpräk kisäge kürenep tora ide. Nıklabrak karasa, bötenläy çüpräk tä tügel, ä hatın-kız kiyä torgan kapron kolgotki ikän. Häm ul anı tartıp ta çıgardı. Tik, nik alganına ükende. Gönah şomlıgına karşı, hatını Fäyrüzä yänäşädä genä tora ikän bit. Kolgotkinı ul da kürep algan.

- Kaya, kaya, närsä ul?

İşbulat «ık-mık» itte. Kolgotkinı kire «diplomat»ka salırga mataştı. Tik soñ ide inde, Fäyrüzä anı kulınnan yolkıp ta aldı.

- Ah, sin, oyatsız!..

Fäyrüzäneñ kuş yodrıgı ike kaş arasına kilep töşkändä, İşbulat: «Kamil eşe genä bu. Hatınınıñ tuzgan kolgotkiyen salgan, zarazı»,- dip uylarga gına ölgerde.

Click or select a word or words to search the definition