Saylau Avırlıgı

Hikäyä

Räsäy prezidentın saylau köne ide. Däülät Sovetına Tatarstan deputatların da barlayaçakbız. Kaysı üz isemennän, küpläre, partiyäläreneñ koyırıgına tagılıp, berdäm uzaçaklar. Härkem üz döreslegenä häm barı tik üzeneñ genä deputat bulırga layıklı ikänlegenä ışana. Kürşe urıs mucigı Paşa da saylau punktı urnaşkan mäktäp tiräsen öç äylänep kilde inde, miña da qaderle tavışımnı birergä kiräk. Tatar balasına säyäsi añsızlık kileşä torgan ğamäl tügel!
Yahşıdan kiyenep, şuşındıy vakıtlarda gına toyılırga mömkin bulgan kemlegemne saklap uramga çıktım. Yulıma älege dä bayagı kürşem urıs Paşa turı kilde.
— Kaya barasıñ?— di.
— Saylauga!— min äytäm.— Sin inde öç kat barıp kildeñ, ä min yaña gına citeşäm.
Paşa nigäder ğadätençä ni köläse, ni şayartası itmäde. Anıñ kälcemädäy işelep töşkän yözenä iğtibar itmi kala almadım:
— Ni buldı?— dip soradım. Mahmırdan integä bulırga kiräk!
— Äy şunda!— dide Paşa, küzlären kıyınsınu belän çitkä taba alıp. Anıñ yözendä çarasızlık ğalämäte bolamık izä ide.
— Alay ikän,— didem, küñelemneñ aña karata märhämäten sünderep, kıyafät atında yulımnı dävam itärgä teläp.
— Tukta äle!— dide Paşa, gomerendä bulmagan yalvaru tavışına iğtibar itterep.— Minem saylaularga barganım yuk ide. Kayda, niçek saylıylar soñ anı?
— Kemne saylarga?— didem, şayartkanday itep. İmeş, barsı da ällä kayçan saylangan inde, bezneñ tavış kına biräsebez kalgan!
— Putinnı inde, prezident itmäkçem! Tagın kemne bulsın?— dide ul, şunda gına yözenä gorurlık kıyafäte çıgarıp.
— Alay ikän!— dip suzdım. Ämma artıgın töpçenep mataşmadım.
Paşa isä, tugırı et balasıday şıñşıp, üz tuksanın tukıy-tukıy artımnan iyärde. Ni öçen moña qadär saylaularnı inkar itüen, tavışın birmi kaldırsa, inde dönyalıknıñ harap bulaçagın miña televideniye häm gäcit curnalistlarınnan da ostarak añlata başladı. Mondıy yuldaş belän bargangadır, saylau uçastogı belän yortıbıznıñ işek töbe arasın niçek uzganımnı sizmi dä kaldım. Yaz başında adaşıp bezeldägän çeben tösle Paşa haman da üzeneken söyläde, aklandı da aklandı.
Kerdek. Yuldaşım çınnan da aptıraşta kaldı. Güyäki bügen genä küktän kilep töşkän. Kırık yäşennän uzgan mucik saylau byulletenen niçek alırga, kemne niçek saylarga belmi aptırap bette. Bezneñ kullarga yäşel, kızıl, sarı, ak käğazlärgä bastırılgan isemleklär tottırdılar. Paşa tirläp ük çıktı. Saylau byulletennären totkan hälendä yanımda meñ äylände. Ämma min:
— Bezdä saylaular üz telägeñ belän häm yäşeren tavış birü yulı belän!— dip äytüdän uza almadım.
Kaytıp kitkänemdä dä Paşa käğaz botkasına çumgan hälendä kala birde. Demokratik saylaular ber dä ciñel genä tügel ikän şul!

Mart, 2004.