Satkan, İmeş...

(yumoreska)
İrtän irtük Galävetdinne yokıdan uyatıp, telefon çıltıradı.

- Allo, tıñlıym!

- Yomşak mebel satasızmı?

- Yuk!

- Ä-ä, inde sattıgızdamıni?

- Yuk, bernindi yomşak mebel satmıybız. Üzebez dä yaña gına aldık äle.

- Gafu itegez, sezneñ telefon nomerı kırık ike - ille cide -siksän bişme?

- Äye, näq şulay!

- Dimäk, satasız.

- Yuk, didem bit. Satlık mebelebez yuk bezneñ.

- Ä menä monda, gäcittä, yomşak mebel satıla, digän belderü urnaştırılgan.

- Anıñ närsäsenä gacäpländegez. Häzer härkem närsäsen bulsa da sata. Anda minem ni katnaşım bar?

- Ä bit anda sezneñ telefon nomerı kuyılgan. Dimäk, satasız?..

- Yuk, didem bit inde min sezgä. Gäcitkä telefon nomerların butaştırıp urnaştırgannardır. Bigaybä, enekäş, huş sau bul!

Galävetdin telefon trubkasın kuyıp, inde kuzgalıp kitäm digändä, telefon yänä çıltırıy başladı.

- Alle!

- Mäkkiy mibel satasız ikän, ulım.

- Yuk, äbi, satmıybız.

- Telefon nomerı şuldır bit?

- Şul!

- Soñ, alaysa, satasız ikän bit.

- Yuk, äbi, gäcittä telefon nomerın butagannar. Kemder bütän keşe sata. Ä bezneñ nomernı kuygannar. Añladıñmı?

- Ä-ä.

- Añlasañ, huş!

Galävetdin açudan trubkanı şartlatıp kuydı da, kuhnya yagına yünälde. Tik ike-öç adım atladımı ikän, häyersez telefon kabat çıltırıy başladı.

- Alyu, myagkiy mebel sat...

- Yuk-yuk, apakayım, satmıybız.

- Ä gäcittä, satasız, diyelgän.

- Soñ anda närsä yazmaslar. Yuk bezneñ satıla torgan mebel. Añ-lıy-sıñ-mı?..

Trubkanı telefonga kuygan tavıştan täräzälär zıñlap aldı. Tik äle monıñ belän genä betmägän ikän. İke-öç minut uzdı mikän, telefon tagın da çäreldi başladı. «Uh»,- dip ükerde Galävi. Açu belän trubkaga yabıştı.

- Mebel diseñme? Sattık inde! Äye, bik yahşı bäyägä kitte. Huş!

Minut sayın çıltıratıp, tämam teñkäsenä tiyep bettelär Galävetdinneñ. Bu kön buyı şulay dävam itte. İnde ul härbersenä, gäcittä birgändä telefon nomerın butaştırganlıkların centekläp añlatıp tormıyça, «sattık», dip kenä cavap birä başladı...

Kiç citte. Çirattagı çıltırauga telefon trubkasın alıp:

- Ale, mebelne sattık,- dip tiz genä trubkanı kuymakçı ide, tik çıbıknıñ tege başında kayıneşe Färdetdin bulıp çıktı.

- Närsä, cizni, sin dä yomşak mebel satasıñmıni? Äle küptän tügel genä algan ideñ tügelme soñ?

- Ä-ä, kayıneş, sin ikänseñ, yuk satmıym.

- Üzeñ äytteñ bit, sattım, dip.

- Bolay gına äyttem min anı. Närsä siña da mebel kiräk idemeni?

- Yuk la, menä üzemneken satarga cıyıngan idem dä, barıp çıkmadı, ahrısı. Kiçäge gäcitkä belderü birep, bügen köne buyı telefon töbendä kötep utırdım. Nik ber çıltıratuçı bulsın.

Galävetdin eşneñ närsädä ikänen şunda uk çamalap aldı. Ul mañgayına bärep çıkkan tiren sörtte dä, açu belän telefon trubkasına ısıldadı:

- Menä närsä, kayıneş, belderü birgändä telefon nomerların butaştırma bütän çakta, üzeñneken birä torgan bul!

Click or select a word or words to search the definition