Sanktsiyä

(yumoristik hikäyä)
-- Ker äle! – dip Gali Galiyeviç urınbasarın çakırdı. Tegese kilep kergäç, citäkçe açuınnan kızarıp-bürtenep sorau birde. -- Sin gäzit-fälän ukıysıñmı ul? Ällä kompyuterıñda uynap kına utırasıñmı?..

-- Añlamadım sezne? – dip, ğayeple malay kebek başın ide Väli Väliyeviç.

-- Añlamadıñ?! İldä nilär bulganın, yañalıklarnı beläseñme?

-- Beläm! Belarus prezidentı Lukaşenko Cerar Depardenı peçän çabarga öyrätkän. Frantsiyä bezneñ ilgä “Mistarl”ne birmäyäçäk, di. Cırçı Dima Bilan yaña “Gardemarinnar” filmında töşäçäk ikän. Dollar belän evro arta... – dip tezep kitte urınbasar.

-- Sin närsä, sataştıñmı ällä? Kaydan cıydıñ bu gaybätne? Alla Pugaçeva belän Maksim Galkinnıñ balaları turında söylä tagın! – dip Gali Galiyeviç yomşak känäfiyennän sikerep tordı.

-- Üzegez yañalıklar disez bit...

-- Yañalıklar şul, ä gaybät dimädem bit! Rusiyädä sanktsiyägä eläkkän çit ildän kertelgän azık-tölekne yuk itä başlagannar. Bu hakta barlık gäzitlärdä yazalar, radio häm televideniyedä şaulaşalar. Şunı da belmiseñme ällä?! Vedomstvo buyınça färman kilde, tikşerüçe organ bularak, bezgä dä rayonda tıyılgan tovarlarnı açıklarga häm yuk itärgä kiräk. Nindi täqdimnäreñ bar?

-- Aña tiz genä baş ta eşlämi bit äle...

-- Utır, mineke dä bik eşläp betmi şul, äydä bergäläp uylıyk, -- dide Gali Galiyeviç.

-- Bälki tikşerüne “Öç tiyen” kibetennän başlargadır? – dide Väli Väliyeviç berazdan.

-- Sin närsä, ul bit “glava”nıñ hatınınıñ kibete, -- dip karşı töşte citäkçe.

-- Ä “Ciñelçä mahmır”nı tikşersäk?

-- Anısı “glava”nıñ bacasınıkı!

-- “Buşlay diyärlek” kibete...

-- Ul prokuror ulınıkı!

-- “Simez kalca”ga sugılsak?

-- Kibet “glava”nıñ urınbasarınıkı!

-- “Çep-çep çebilärem”ne tikşersäk?

-- Ul baş tabibnıkı...

-- “Tatlı tormış”ka barıp karasık?

-- Anısı hakında uylama da, ul minem kıznıkı! – dide Gali Galiyeviç urınbasarınıñ şunı da belmävenä açuı kilep. – Uyla, nıklap uyla!

Äytüe genä ciñel, uyla imeş. Citäkçe belän urınbasar ozak baş vattılar. Eş köne tämamlanır aldınnan Gali Galiyeviç belän Väli Väliyeviç ber fikergä kildelär. Citäkçeneñ voditele “Öç tiyen”nän -- frantsuz sırı häm konyagı, “Ciñelçä mahmır”dan -- ispan şärabı, “Buşlay diyärlek”tän -- şprot konservaları, “Simez kalca”dan -- Vengriyä kazları, “Çep-çep çebilärem”nän “buş botları” töyäp alıp kilde. Aşhanädä mul tabın äzerlädelär. Märtäbäle kunaklar çakırıldı, tabınnıñ türendä kibet hucaları utıra ide.

İkençe könne rayon gäzitendä: “Rusiyä Prezidentı ukazın ütäü yözennän, rayonda 5 kaz, 6 şeşä konyak, 8 şeşä şärab, 10 konserva şprot, 3 kilogramm sır, 15 kilogramm “buş botı” N. rayonınıñ säüdä äyläneşennän alındı häm yuk itelde”, digän häbär basıldı, Gali Galiyeviç yugarı instantsiyägä dä şundıy eçtälekle raport yulladı.

2015 yıl, avgust.