Premiyä

(yumoreska)
– Hörmätle äfändelär häm hanımnar! – Runis bülmädä utıruçılarga küz yögertep çıktı, poçmakta utırgan Galävi abzıynı kürep, östäp kuydı. – Hörmätle iptäşlär! Min bik dulkınlanam... Dulkınlanamaslık meni?! Şundıy zur ciñü yauladım... yauladık bit! Ägär berüzem genä bulsam, sez yärdäm itmäsägez mondıy ciñüne yaulıy almagan bulır idem. Bu ciñü ber mineke genä tügel, ä totaş kollektivnıkı. Äye, ägär kollektiv... ägär direktorıbız Muzyukin iptäş... äfände miña timer kıruçılarnıñ respublika konkursına barırga röhsät birmäsä, ägär baş buhgalterıbız İvan İvanıç başkalaga barırga komandirovıçnıyga kul kuymasa, ägär sklad mödirebez Möbäşir Şäyşäripoviç yaña eş kiyemnäre birmäsä, ägär masterıbız San Sanıç maşinasına utırtıp alıp barmasa, brigadirıbız Fialit Firinatoviç eştän soñ kalıp timer kıru ostalıgın kamilläştereregä röhsät itmäsä, min respublika yarışında öçençe urınnı alalamagan bulır idem!..

Runis poçmakta utıruçı Galävi abzıyga tagın ber karaş taşladı da, anıñ konkurska kitkändä äcätkä akça birep toruın iskä töşerep, östäp kuydı:

– Ayıruça Galävi... äfän... iptäşkä zur rähmätlemen. Ul miña timer kırunıñ barlık neçkäleklären öyrätte. Äfändelär häm hanımnar, iptäşlär! Bu ciñü – bezneñ urtak ciñü. Monda isemläp ütkän barlık iptäş... äfändelärneñ dä öleşe zur. Respublika konkursında öçençe urın öçen premiyä dä urtak... – Runis monısın yalgış ıçkındırdım ahırı dip tuktap kaldı.

Direktornıñ kiñ bülmäsen yañgıratıp kul çaptılar. Simez, ilämsez korsaklı direktor Muzyukin äkren genä yomşak känäfiyennän tordı. Gadi timer kıruçınıñ Oskar premiyäse algannan soñ Amerika akterlarınıkı kebek şuşındıy yalkınlı çıgışınnan soñ ul artık süz söyläp tormadı. Yeget eşli dä, söyli dä belä, süz yuk – gomer büläk itkän öçen äti-änisenä, tärbiyälägän öçen nänäse belän kart ätisenä, balalar bakçası mödirenä häm tärbiyäçelärgä, belem birgän öçen mäktäp, uçilişe direktorına häm uktıyuçılarına, eşkä alıp kilüçe vahta avtobusınıñ voditele Gäräygä, tsehnı cıyıştıruçı Nina tütäy belän vahter Semenga gına rähmät äytmäde bit. Direktor mamık mendär kebek barmakları belän Runisnıñ söyälle kulın kıstı: «Kotlıym, menä poçet gramotası! Premiyäsen öştän soñ buhgalteriyädän kerep alırsıñ. Ciñüne yuabızdır bit?», dip yözenä yılmayu ğalämäte çıgarıp, yaltıravık käğaz kisäge tottırdı.

– Tagın ber märtäbä zur rähmät, – dide Runis. – Yuabız anısı... Barıgıznı da kiç, eş azagında, furşetka çakıram.

Egetneñ bu könne töşkä qadär ayagı cirgä timäde, koş kebek oçıp kına yörde. Tik töştän soñ buhgalter anı cirgä töşerde: ciñgän öçen premiyä direktorga, baş buhgalterga, sklad mödirenä, masterga, brigadirga häm Runiska bülengän ide. Yeget vedomostkä kul kuyıp akça aldı da sanap karadı – monda ike şeşägä dä citmi bit. Ä ul citäkçelärne furşetka çakırdı. Runis yänä äcätkä akça sorap torırga Galävi abzıy yanına yögerde, anıñ hatınınnan yäşerep kuygan zapası bardır äle.

Click or select a word or words to search the definition