Praktik Strategiyä

Hikäyä

Küñelne uy kümä, uynı — küñel. Şuşı upkınnan çıga almıyça zar bulsañ, Hodaydan sabırlık sora. Dönya yözendä sabırlıktan da ışanıçlırak halät yuk.

Hämit monı belä ide. Ämma anıñ añlamaganı ber närsä buldı: ni öçen keşelär añardan beraz yatsınalar? Kurkaklarmı şunda?

Menä tagın çeterekle mäsälä eçendä kaldı. Hezmättäşlärenä karata tänkıyt süze belän yazılgan ber mäqalä basıldı, ä aradan Hämitne uñay bäyälägännär sıman toygı kala ikän bit anı ukıganda. Ay-hay, belmim! Döres, Hämit anı üze älegä ukımadı, aña söylädelär genä häm, üçläşep, kisätkäläp tä kuydılar:

— Monda, yugarılar, ul mäqaläne üzegez, yä bulmasa zakazıgız belän yazılgan dip äytälär!

Mäsälä vak tügel ide. Hämit üzen bolay da kollektivta «ala karga» itep toya, häzer bötenläy dä «agarındı» da kaldı. Gariza yazıp bügen ük eşennän kitä almadı anısı. Kaya barsın, sine kayda kötälär? Kara sakalıñ üzeñnän kalmıy dilär bit. Ul kayda da şul «ak karga» bulaçak inde.

Anıñ başka ämäle kalmadı. Sabır itärgä, tormış kiterep öygän mäğnäsezleklärgä tüzärgä buldı. İnde taktikası äzer, strategik plannı da tözü mäğkul ide.

Mömkin qadär süzgä katnaşmaska, bähäslärdän çittä yörergä! Ämma boları uk ciñel bulmayaçak ide. Häm menä üzen zur armiyä generallarıday toyarga ölgermäde, strategiyäse dä, taktikası da cimerelep töşte.

Vakıyga kötelmägänçä kilep çıktı. Ul:

— Kollektivnı añlamıy başladım,— dip äytergä ölgermäde, citäkçeneñ kuştan urınbasarı:

— Barıgız, tagın gäcitkä yögeregez! Alar hälegezgä kererlär!— dide, hämmä kolaklılarnı kuandırıp.

Hämitkä şul da citä kaldı. Buası yırıldı. «Minme?.. Minme...»— dip başlap kitep, barlık üpkälären tezep äytte dä saldı. Çistartıp-cimerep ütkän davıldan soñ gına bula ala torgan tınlık urnaştı.

İnde Hämitkä küzen açıp tormaska, uylap plannar kormaska da mömkin ide.