Oçraşular – kavışular...

Yul östendä torgan keçkenä barda öç ir-at oçraştı. Döresräge, iñ aldan bu barga yäş yeget kilep kerde. Barmennan ber krucka sıra aldı da poçmaktagı östäl yanına barıp utırdı.
Halık bu vakıtta barda bik az ide, nibarı öç keşe. Bar östäle artında barmen belän äñgämä korgan çal çäçle, yözen dä şundıy uk çal sakal baskan ille-ille biş yäşlär tiräsendäge abzıy-tämäke alırga kergän şofer häm barmen üze.
Eget çittän genä alarga küz salıp, üzeneñ salkın sırasın eçä birde. Menä şofer da tämäke alıp çıgıp kitte. Ozak ta ütmäde işektä yänä ikençe ir-at zatı kürende.
Egerme biş yäşlär tiräsendäge bu ir kürenep tora eşlekle keşe: kara kostyum, tup-turı sızıklı çalbar, yaltırap torgan botinkalar häm üzeneñ küzläre tösendäge zäñgär galstuk. Yözendä isä bernindi borçılu yuk, ä kiresençä bu dönyadan kanäğatlelek bilgeläre uynap tora.
Ul da, şulay uk, ber krucka sıra (tik haklıragın) aldı da, buş öställärgä iğtibar itmi, gomümän böten bar buş buluga karamastan, yäş yeget utırgan östäl yanına kilep bastı:
- Mömkinme?
Eget aña säyersenep kenä karap kuydı da:
- Pocaluysta, -dide dä sırasın eçä birde.
- Min monda utırganga açulanma inde, käyef äybät, şuña kürä yahşı keşelär belän aralaşası gına kilep tora. – İr dä sırasın yotıp kuydı.
Ul arada barmen fistaşkalar, çipsılar salıngan savıtlar da kiterep kuydı.
- Sıylanıgız. – ir keşe sıylarnı yegetkä taban etä birde.
- Rähmät! – Yeget kızdırılgan bäräñge “mumiyäsen” kabıp, tämle itep keterdi başladı.
Barmen tagın östälgä kıymmätle ike krucka sıra kiterep utırttı.
- Min Rifat bulam, ä sez? – dip ir keşe yäş yegetkä östäl arkılı kulın suzdı.
Eget, anıñ kulın kısıp, korı gına:
- Dinar! – dip, läzzät belän sıra eçüen dävam itte.
Süz ara süz çıgıp, alar tanışıp ta kittelär.
- Min üzem tözü firmasında eşlim – menedcer. Evroremont eşlären başkarabız, - dip Rifat üze belän tanıştırdı.
Eget tä, ällä sıra başına kitte, ällä başka närsä buldı – ul da küñele belän açıla başladı:
- Min äle ukıp yörim. Pedinstitutta. Menä ekzamennar bette. Kurstaşlar kaytışıp bettelär. Minem ber “koyrık” kalgan ide, şunı tapşırdım da, kotılunı “yuıp” utıram.
İnde bişençe krucka sıra eçä başlaganda Dinar, närsäder isenä töşergändäy, kinät kenä sorap kuydı:
- Ä sin mine “yahşı keşe” dideñ, ä kaydan tanıysıñ soñ sin alarnı. Mañgayga yazılmagan bugay inde? Şunı äyt äle – nigä miña sin “Yahşı keşe” dideñ?
Rifat, “hi, şulgınamı?”, digändäy canlanıp kitte.
- Beläseñme, Dinar, min küpne kürgän, küpne kiçergän keşe. Keşelärne genä ayırırga öyrändem inde. Yözlärenä ber karaudan uk min anıñ aralaşuçanmı, ällä bötenläy söyläşmäüçeme iknänen küñelem belän toya başladım inde min.Ä menä närsädän soñ keşelärne yahşılap sizä başladımmı – anısı ayırım hikäyä inde anıñ... Şul hatın - kızlar arkasında inde...
Dinar aynıp kitkändäy buldı, äñgämädäşeneñ bu süzläre añarda kızıksınu uyattı.
- Söylä äle, Rifat abıy, - dip zurlap endäşte. – Söylä inde, pocaluysta!
Rifat yäş cilkençäk yöräkne ozak köttermäde.
- Ä eş, tuganım, menä şulay buldı...
Min armiyädän kaytkan idem genä äle. Klubka çıktım, ul yäşlär. İke yıl eçendä üsep citkännäre dä bar, tanımaslık itep üzgärgän tanışları da...
Şunda ber kıznı şäyläp aldım. Tügäräktä tıynak kına biyep tora. Başkalar kebek artık ırgımıy da, sikermi dä, salmak kına, zur dinamiklardan çıkkan moñlı köygä tibrälep tora.
Şul uk kiçne tanıştım min bu kız belän. Üzenä uncide genä yäş ikän. İsem dä cisemenä turı kilep tora digändäy –Zifa ikän. Kürşe avılnıkı bulganga tanımaganmın. Yaña gına mäktäpne tämamlagan bu kız, min armiyäga kitkändä bala- çaga gına bulgan bit, yugıysä.
Dus yegetmneñ maşinasın alıp tordım da bu kiçne min Zifanı ozatıp ta kuydım. Şunnan soñ inde nıklap yöreşä başladık...
Tuyga ber atna kala minem käläşme änilärenä kunakka kitte. Min berüzem kaldım bit inde. Kiç dus yegetem dä kilep kerde. “Äydä, malçişnik yasıybız da, äydä, yasıybız”, di inde bu miña. Min rizalaştım inde.
Maşina belän kibetkä barıp kildek tä, biş yartı “akbaş” alıp, urman yagına yul tottık.
- Min beläm, - di dus yeget. – monda şundıy şäp ber urın bar. Böten yäşlär şunda cıyılalar, bäyräm itälär.
Alıp kerep kitte bu mine, berdänber maşina yulı belän, ällä nindi kuyı agaçlıklar eçenä. Üze gazga basa.
- Kayda şulkadär kuasıñ? –dim.
- Tañ atkançı güläyt itep kalıyk!- di.
Berzamannı, bezneñ maşina, karañgıda tuktap torgan “ciguli” östenä kilep menmäsenme. “Şap” itep kilep bäreldek tä tuktap kaldık.
Niçek işekne açkanmındır, belmim, tik tiz genä yögerep çıgıp, maşinanıñ ikençe yagınnan dustımnı tartıp çıgardım. Gäüdäse az gına rul belän kısılgan ide.
Çıgarıp ülängä yatkırganda huşına kilde: “Tege maşinanı kara, isännärme?”
Min tiz genä barıp tege “cigulinıñ” işegen açtım. Art utırgıçta ike şärä gäüdä yata ide. Ayakları işek belän kısılgan ikän. Avırtuga tüzä almıyça, ıñgıraşalar.
Min ikençe yaktan art işekne kayırıp açtım. Yegetne ülängä çıgarıp saldım. Ul huşsız yata. Kıznı da urman alanına çıgardım. Ul üz añında, avırtuga sulkıldıy.
Ay yaktısında nıklabırak karasam... Bu kız minem Zifam bulıp çıktı bit, äy.
Menä şulay, “malçişnik” yasıym, dip käläşsez dä kaldım min.
Şulvakıttan başlap, ällä avariyä miña täesir itte, ällä yaratkan kızımnıñ hıyanate, tik min yahşı keşelärne yıraktan uk ayıra başladım.

Rifat hikäyäsen tämamladı da bokalınnan sıra tämläp kuydı.
- Kızık, bik tä kızık, - dip Dinar, äñgämädäşe söylägän hällärne, sıra belän tomanlana başlagan başınnan ütkärde. – İkençe yaktan karasañ, bu äybät bulgan bit: şundıy hatınıñ bulgançı...
- Äye, monısın döres äytäseñ...
Alar bermälgä tınıp kaldılar.
Härberse üzeneñ uylarına çumıp, hislärne yañartıp aldılar.
Tınlıknı Dinar bozdı:
- Ä min üzemneñ mähäbbätemne küptän tügel genä taptım äle. Şundıy şäp kız, belsäñ. Sineñ Zifañ kebek tügelder, yuk. Äle oçraşabız, bälki, öylänep tä kuyarmın. Eh, Läysänem...
Buş kruckalarnı alırga kilgän barmen yeget süzgä kuşıldı:
- Ä min, inde öylänäm, yegetlär. Kotlasagız da bula. Şundıy çibär, güzäl käläş taptım üzemä. İseme dä matur, näq üzenä turı kilep tora...
Barmen söygäneneñ isemen äytä almıy kaldı, barga çibär, küzneñ yavın alırday, färeştä kilep kerde.
İr-atlarnıñ, barısınıñ başları işek yagına borıldı, avızları açıldı.
Barmen kire yegetlärgä borılıp:
- Änä üze dä ul!... Gölçäçäk!
Dinar belän Rifat ta aynıp kittelär, eçkän sıraları da şunduk çıgıp bette.
Dinar:
- Läysän?
Rifat:
- Zifa?

Click or select a word or words to search the definition