Oçraşu

Äsirlär lagerenda ber iptäşem belän
facigale oçraşuga karata yazılgan
bu şiğırne küp äsirlär
üzläreneñ däftärlärenä küçerep algannar ide.

... Häterlädek yırak tugan ilne,
Semyalarnı, yakın duslarnı,
Häterlädek cırlap isänlekkä
Kütärelgän tulı tostlarnı.

Tugan ildä niçek sıylanular,
Koyaştay irken yörgän vakıtlar,
Barsı inde, barsı yırak kaldı,
İldä ütkän tatlı minutlar.

Ah, kayda sez bezne, tärbiyäläp
Üsterüçe izge analar,
Ah, kayda sez, sarılıp yılıy-elıy
Ozatıp kalgan sabıy balalar?

Ah, kayda sez, bezneñ neçkä billär,
Eştä çınıgıp üskän atalar,
Ah, kayda sez, enekäş, señelkäylär,
Ah, kayda sez, abıy-apalar?
Sezneñ yakın kürgän keşeläregez
Tilmereşep monda yatalar.

Hat-häbär yuk, ülde, ahrı, diyep,
Aşıkmagız doga kılarga,
Avır ülem belän köräşäbez,
İsäp äle tere kalırga.

Telägebez, sıyırçıklar kebek,
Tagın ilgä oçıp kaytırga,
Sezneñ belän yılap küreşep,
Tagın bergä rähät tatırga.

Click or select a word or words to search the definition