Minem Äbi - Mirovoy!

(hikäyä)
Kızganam min teşalı tatar kiyäülären. Adım sayın zarlanıp, yılap yörilär. Öylängändä äzräk uylarga kiräk. İke rähät bergä kilmi inde ul, cämäğat: marca da koçaklap yat, teşañ da äybät bulsın! Menä bezneñ tatar äbiläre nigä şulay yahşı disezme? Kızımnı kire kaytarıp kuymasa yarar ide dip, kiyäüläreneñ ber aldına, ber artına töşälär alar. Min üzem, mäsälän, hatınga karaganda äbidän nıgrak uñdım. Kunakka kilügä mätrüşkäle kayın seberkese belän munçası äzer, miçtä bäleşe peşkän, argan tänne beraz yazarga östäl astında şeşäse kannı kıtıklap, yılmaep utıra. Niçek şundıy äbigä süz äytäseñ inde! Äbi belän ber-berebezne küz karaşınnan da añlıybız. Hatın mırkıldıy başlasa, äbi cät kenä tegeneñ botın çemetep kuya. Kügärmägän cire kalmagan inde, meskenneñ. Üpkäläp, änilärdä kunarga kalam di başlasa, iñ başta äbi çäçräp çıga, yänäse, nindi irdän başka kunıp yörü di ul! Ä teşa bulsa? Kunarga kaytmagan kızın da bezdä kundı dip yaklar ide äle. Şulay kileşep yäşibez inde äbi belän.

Teşası kunakka kiläm disä, bezneñ eştäge ber yegetebez çirgä sabışa. Ä min äbineñ kilüen bäyräm kebek kötep alam: nihayät, tokmaçlı aş aşıybız, hatın miña urınlı-urınsız bäylänüennän tuktıy, balalarga küz-kolak digändäy... Het tönge unikedä kayt, süz äytüçe yuk. İñ qaderle kunak kebek öf-öfiläp kenä karşı alıp, yoklarga yatkıralar. Hätta aşarga da cılıtıp birälär äle. Äbi bulmaganda hatınnıñ açulı süzläre belän genä tuyınıp yatarga turı kilä.

Gel tik utıra belmi minem äbi. Äle menä tişek yon oyıkbaşnı kürep, yañasın bäylärgä kereşte. Käçtüm-çalbar kesälärenä yamau saldı, rähmät töşkere. Karap toram-toram da, uylap kuyam: "Kem öyrätte ikän anı bu qadär eşkä?" Min hatınnıñ äbi kızı ikänlegenä şiklänä dä başladım inde. Ällä hatın-kıznıñ bulganlıgı äbi bulgaç kına açılamı ikän? Bezneñ dä kız buy citkerep kilä. Teşa hälendä kalmasa yarıy inde hatın.


Click or select a word or words to search the definition