Min Sezneñ Hatınıgız

(hikäyä)
Canı-täne belän rähätlekkä birelep kom östendä yatıp torgan Räyhan bu çibärneñ kaydan kilep çıguın kürmäde. Tik nindider köç anı kuzgalırga, küzen açıp kararga mäcbür itte. Häm ul küzenä kız çalınganda nindi kıyafättä bulsa, şulay kattı da kaldı.

Bäy, kara nindi çibär kız! Töz ayaklar. Tukta äle, bu nindi trafaret süz, ayak nişläp töz bulsın – bilyard tayagı töz bula. Ä bu sınlı sänğat ürnäge, dönyada iñ näfis sızatlardan torgan siluet, güyä Hoday kulına lekalo totıp üze sızıp icat itkän. Sau-sälamät bulıp tugan, fizik avırlıklarga, eşkä künekkän, nık häm çıdam tatar kızı. Bile urtaça, kükräkläre näq kirägençä, beläkläre näfis, ämma taza. Karap toruga urtaça buylı, urtaça yuanlık, hätta tän tiresenä qadär ni ak, ni kara tügel, koyaşta urtaça kızıngan, barısı da urtaça. Tik şul uk vakıtta tel belän äytep betmäslek güzällek, kamillık. Räyhan küzlären yomıp caylap yattı, belä ul: “Çibär – kürsäñ gayräteñ çigär”. Menä digän buy-sınlı kızlar yanına kilsäñ, yözlärendä şul çibärlekneñ eze dä yuk, güyä yöz belän tän ikese ike närsä. Ällä inde Hodaynıñ maturlık zapası çamalı. Ä figurası balta belän yunılgan kızga iğtibar itsäñ, näfis, mölayım yöz, serle küzlär oçratırga mömkin. Läkin Räyhan ozak tüzä almadı, yänä küzlären açtı. Kız suga kerergä aşıkmıy ide, ikelängän keşe sıman basıp tora, başın artka çöyebräk çäçlären taratıp cibärgäç, tagı da çibärlänep kitkän. Ana şul çäçlär häm Räyhannıñ çak kına kürä karaulıgı kıznıñ yözen açık kürergä mömkinlek birmäde. Şuña yeget kız belän kızıksınırgamı, ällä borılıp yatargamı – hiç belä almadı. Ä bilgesezlek ul inde kapçıktagı pesi balası – mıraulamasa miyäulıy - barıber tik tormıy. Kıskası, Räyhan torıp utırdı.

Çınlap ta, kız tazalık belän näfislek, köç belän güzällek kuşımtası ide. Menä ul cay gına suga kerde häm kükräge belän idel suına yatıp yözep kitte. Äye, irlär şaptırdap kerä, äyterseñ botaklı agaç avamıni, ä bu çibärkäy delfin balasıday niçekter bik tä tabigıy räveştä kerde dä kitte, äyterseñ dä suda tuıp üskän. Menä siña ıspaylık dip soklandı yeget.

Tukta, kızlarnıñ su koyınganın, bigräk tä kiyengänen, yoklagan bulıp kerfek aşa karap yatuı yegetlekme? Yanına barıp ber-ike süz söyläşep algannan ni bulgan? Räyhan şulay itte dä. İnde kiyenep çäçen tarap torgan kız yanına baram dip soldat citezlege belän sikerep torıp üze dä kiyenergä kereşte. Ä yörägen şik kimerä. Plyacda tanışu tanışumıni? Monı kız ber cilkuarnıñ eçe poşkannan gına sırışuı dip añlasa? Mondıy uy Räyhannıñ başınnan uzdı uzuın, läkin ber kuzgalgan kızıksınuın akıl yögäne genä totamı soñ? Tutaşka taban ille-altmış adım atlagançı ul kırık halätkä kerde. Berçä bähet totarga talpınganday aşıksa, ikençeläy su buyında yal itep yörüçe vayımsız adäm rolenä kerergä tırıştı – kızga ni räveşle yakın kilergä, niçek süz başlarga belmäde. Şulay da ul añlıy ide, nindider ayırım süzlär tabarga kiräk, bu färeştä täüge mizgeldä aptırabrak kalırlık bulsın. İñ täüge sekundta “yuk” dip äytä almasa, bu inde yartı uñış bula.

- İsemegez kem? - dide Räyhan.

Kız moña gacäplänüle-soraulı karaş taşladı. Endäşmäde.

- Sez mine bu soravım öçen gafu itegez, tik sez – minem bulaçak hatınım. Ä üz hatınımnıñ isemen belmi yörü niçekter kileşmi. Döres tügel kebek, şikelle.

Kız kölep cibärde, yarım açulı kaşı karlıgaç kanatıday tibrälep aldı.

- Minem isemem Gölläriyä, sezneñ bulaçak hatınıgız Bädriyä şikelle. Şulay bulgaç, yulıgıznı dävam itegez, yegetkäy.

Şuşı süzlär belän kız başın gorur çaykap çäçlären artka taşladı da, atlap kitep tä bardı. Ah, sılu kızlarnıñ şuşı tılsımlı häräkäte! Ana şul çäçlär meñ çıbırkıga äylänep yegetlärneñ yöräklärenä sıdırıp uzalarmıni. Zifa muyınnarın ber uynatıp alularında “kit monnan” diyüdän başlap “yakın kil, bäğrem” digängä qadär mäğnä salıngan. Monı añlauçı bar, añlamauçı bar.

Räyhan kız artınnan iyärergä kıymadı. Ärsezläşep tagılıp yörep kenä uñışka ireşä torgan oçraҡ tügel. Bu kız – berdänber. Häm Räyhannıñ maksatı – üzeneñ dä berdänber buluın isbatlau. Zarar yuk. Dönyada kino bar, diskoteka, plyac. Keçkenä poselokta yañadan oçraşmau mömkin tügel.

Kino, diskoteka, plyac. Buldı alarda Räyhan, buldı. Döresräge, gel şunda buldı. Atna ütte, ä kız ğaip. Güyä suga töşte. Yeget tämam aptırauda kaldı. Ahırda, pasport bülegenä kerep, Gölläriyä digän tutaşnı ezlätep tä karadı. Andıy gracdanka bezdä terkälmägän didelär. Dimäk, Gölläriyä kunakka gına kaytuçı. Ezlä inde häzer cilne daladan. Käyef kitte, yal bette. Häyer, inde şähärgä kaytırga da vakıt citkän ide.

Räyhannıñ yöräk mayı sızdı, tege kıznı kabattan oçrata, irkenläp ber söyläşä almavına ükenep yörede, läkin vakıt, tıngısız eş, gel genä tapkırlık, ziräklek taläp itüçe biznesı başka närsä turında uylanıp yörergä irek kuymadı. Yeget baştanayak eşkä çumdı. Anıñ eşe şul: çit illärdän parfyumeriyä, bicuteriyä alıp kayta, şunı Mäskäüdäge ber-ike kibete aşa sata. Başta bik avır buldı. Tabışı çamalı çıktı, läkin katı krizistan soñ ilneñ iqtisadı kütärelä başlavı keşelärneñ satıp alu mömkinlegendä dä çagıldı – tovar äyläneşe küzgä kürenep arttı, akça zapası barlıkka kilde. Ä anı kaya kuyarga? Mäskäü tiräsendä konkurentsiyä köçle, yaña kibetlär açudan fayda bulmas, şikelle. Ä menä Ural, Seber yaklarında ni häl? Anda kibetlär açıp bulmasmı? Şundıy uylar belän yöregändä, enese Hälim şıltırattı: “İnstitutnı tämamladım. Abıy, fälän könne diplom alam. Bäyräm itärgä kil,”- di. Berdänber enekäşeñneñ şatlıgın urtaklaşırga kiräk, niçek barmıysıñ inde, dip uylap Räyhan yulga çıktı. Ber uñaydan Ufada kibet açu mömkinlegen dä kapşap karar. Taliplar, döresräge, ör-yaña iqtisadçılar, zurdan kupkan ikän, kalanıñ yahşı gına ber restoranın arendaga algannar, orkestr yallagannnar.

- İh sez, yäşel çebeşlär, yäş çagıgıznıñ qaderen belep kalıgız. Ber bizneska totınsagız kön belän tön alışınganın da sizmässez annan, - dide Räyhan, kuanıçınnan balkıgan eneseneñ kulın kısıp.

Kinät yegetneñ yöräge “ah” itte. Kızlar arasındagı ber sıluga küze töşte. Vät moğciza, bu bit “tege” kız, bıltır tugan yakta su koyınganda kürgän çibärkäy. Añlaşılmagan hislär taşkını Räyhannı kabalanırga mäcbür itte, ul şuşı mizgeldä ük, mine şul kız belän tanıştır äle, dip Hälimgä yabıştı. Kız yegetne şunduk tanıdı. Räyhan üzen tantsıga çakırgaç, baş tartmadı. Çönki bu inde plyacda oçragan şikle bändä tügel, ä ıspay häm kupşı kiyengän, itäğatle, iñ möhime, änkäse malayı tügel, ä üz könen üze kürüçe yäş biznesmen ide. Citmäsä, töskä-başka da kileşle kürenä. Söyläşep kittelär, ğadättäge süzlär, ğadättäge komplimentlar.

- Sez bügen ayıruça matur kürenäsez.

- ä kiçä yämsezräk idemme? - dip yılmaydı kız, ämma kölüendä hiç mıskıllau sizelmäde. Kiresençä, küñelleräk bulıp kitte.

Eget Gölläriyäne çınlap ta üz gomerendä ikençe genä kat kürüen uylap aldı da yalgış äytep taşlaganın añladı.

- Min sezne berençe kürgändä sez su anası kebek güzäl idegez, äle menä mähäbbät alihäse kebek matursız. Döresen äytkändä, kayçan maturırak buluıgıznı hiç añlarlık tügel. Häyer, miña bıltır oçragan kız mirac gına buldı sıman. Sezne yıl buyına ezläp tä taba almagaç, şundıy fikergä kilgän idem.

- Mine susılu dip uylagaç, sudan ezlägänsezder, ä minem baş ukuda buldı.

- Läkin bez oçraştık bit. Dimäk, yazmış.

- Kemgä yazmış, ä kemgä iren yalamış, - tip kölde tagı da Gölläriyä.

- Yuk inde, bu yulı iren yalap kalmam. Tege vakıtta min sezne bulaçak hatınım digän idem, menä şunısı döres, içmasam.

- Ay-hay, bu hakta irtäräk sayrıysız tügelme?

- Sez haklı. Bälki, irtäräkter. Bügen bez ikençe ber ähämiyätle närsä turında söyläşergä tiyeşbez.

- Gacäp, närsä soñ ul ? - dip citdilänä kaldı kız.

- Beläsezme, Gölläriyä, äydä berär kayda çıgıp torıyk äle, süzem ayagürä äytä torgan gına tügel, sez yahşılap uylarga tiyeşsez.

Bolar citäkläşep işekkä yünälde. Kursnıñ iñ çibär kızı artınnan küp küzlär karap kaldı. Foyedaғı eskämiyälärneñ bersenä barıp utırdılar.

- Min parfyumeriyä häm bicyuteriyä belän satu itäm. Alarnı çit ildän alıp kaytam. Mäskäüdä berniçä kibetem bar. Miña biznesımnı üsterergä, Rusiyäneñ başka zur kalalarında magazinnar açarga ide. Menä şundıy häl. Sez miña eşkä kilä almassızmı?

- Nindiyeräk eş täqdim itmäkçe bulasız soñ?

- İkäüläp uylıyk. Mäsälän, Kazanda magazin direktorı yäki kompaniyäneñ menedcerı bulırsız. Soñgısı kolaçlırak häm kızıklırak eş, törle şähärlärdäge kibetlärne tovar belän täemin itep torırsız.

Gölläriyä uylanıp aldı, şunduk “min riza” disä, keşeneñ bu kız töptän uylıy belmi ikän, digän fikergä kilüe bar.

- Belmim şul, - dide ul uñaysızlanıp. – Ber ahirätem belän maturlık salonı açmakçı bulgan idek. Ul – parikmaher, vizacist, ä min eşneñ matdi-finans yagın üz östemä almakçı idem.

- Bu bik yahşı fiker. Tik, minem firmaғa eşkä kilsägez, üzegez öçen otışlırak bulır, şikelle. Çönki sezneñ salon ber toçka gına bula, ä predpriyätiyelär çeltäre tügel.

- Uylarғa vakıt barmı?

- Bar. Min irtägä kiçke poyızd belän kitäm, - dip Räyhan üzeneñ telefon nomerın Gölläriyägä yazıp birde.

Kız menedcer bulıp eşli başlagaç, Räyhannıñ ideyası anı da biläp aldı, hätta kompaniyenı üsterü öçen hucadan da kübräk köç saldı. Monıñ öçen akça kiräk ide. Gölläriyä ozak uylamadı, ätisennän kalgan fatirın, maşinasın sattı. Tagı da beraz akça östägäç, yaña kibet açarga citte. Tabış yahşı gına kerä, yartı yıldan tagı da matur gına ber magazin eşlätep cibärde. Şulay itep, kompaniyä üsä, başka töbäklärgä cäyelä bardı. Bu protsess, bälki, tizräk tä barır ide, läkin Räyhan akçanı tabarga gına tügel, tuzdırırga da osta ide. Kızıl diñgez, Sitsiliyä yakların da urap kayttı, restoran, kazino kebek cirlärdä dä hucanıñ eze suınıp tormadı. Monı belgäç, Gölläriyä anıñ belän söyläşep tä karadı, läkin faydası bulmadı. Räyhan, älbättä, biznesınıñ uñışlı baruın üze dä bik teli, tik rähät tormış magnitı anıñ telägennän köçleräk ide şul. Ä Gölläriyä ni eşli alsın, ul bit barı tik menedcer häm keçkenä öleşe belän kompanon ide.

Ä mähäbbät? Yuk, Räyhannıñ yöräge sürelmäde, ul Gölläriyägä ğaşıyq ide. Şuña da berazdan anı başkarma direktor itep ürlätte. Häzer inde yışrak oçraşa başladılar, restoranga bardılar, şähär çitenä piknikka çıktılar häm bergä eşläülärenä ike yıl tulganda öyläneşep kuydılar. Gölläriyä Räyhan fatirına küçte, arendaga algan toragın kire tapşırgaç, akça mäsäläse dä irkenäyde. Läkin kız Räyhan kebek kılanmadı, hezmät hakınıñ küp öleşen cıyıp bardı häm, meñ häylä belän maya tuplap, yaña kibetlär açtı. Räyhan älege eşlärdän bötenläy çitläşte diyärgä mömkin, ul çit illärdän tovar taşıdı häm rähät urın, küñel açu, macara ezläde. Änä şundıy ber piknik vakıtında Räyhan Şults belän tanıştı. Şults Latin Amerikasınnan Evropaga kofe, kakao, banan-fälän taşu belän şögıllänä ikän. Ul da biznesın kiñäytmäkçe. Räsäy bazarı belän kızıksına, bik şäp ideyası da bar ikän. Mäskäüdä, Peterburgta it kıymmät, ä Braziliyä, Argentinada ul ifrat arzan. İdeya ömetle dä soñ, tik eş başlarga akça yuk. Abdiyev äfände biş-un million dollar tapsa, kompanonnar bulıp eş başlar idek, di ul.

Räyhanga täqdim oşanı. Ul üze dä “biten yumaғan” Räsäydän cayı çıgu belän tayırga äzer ide. Läkin kaydan akça alırga soñ?

Soñgı könnärdä Räyhannıñ ozaklap ofista buluına Gölläriyä beraz gacäplände, läkin artık ähämiyät birmäde. Ä anısınıñ üz uyı bar ide. Gölläriyä yuk vakıtta anıñ kabinetına kerep bik ozaklap kompyuterında bulıştı. äye, Räyhan kompaniyä hucası bulsa da, finans eşlären tulısınça hatınına ışanıp tapşırgan ide. Ä häzer menä ul kod kuygan faylnı açarga kiräk. İnde bula dip torganda monitorda kapçık askan karak kürende häm törle yaktan kinät kalkıp çıkkan politseyskiylar aña pistolet tözäde. “Trevoga” digän kızıl yazuga kuşılıp signal çıyıldarga totındı. Räyhan aşıga-kabalana klaviaturaga baskalap kompyuternı elekke hälenä kiterergä kereşte.

İkençe könne yänä şul uk häl kabatlandı, kodlarnı aldau yulın uylap çıgardı ul, läkin monitordagı däü seyfka yakınlaşkanda gına ällä kaydan zur ürmäküç kilep çıgıp, anıñ östenä pärävez ırgıttı häm seyfnı şuña çornap ta taşladı. Yänä şul “Trevoga. Popıtka vzloma” süzläre kürende. Kiçkä qadär utırdı Räyhan bu ürmäküçne yuk itü ämälen ezläp, şulay da taptı bit! Menä ul kodlarnı aldadı. Ürmäküçne dä ütte, üze uylap tapkan deşifrovka programmasın eşkä kuşıp kötä başladı. Ekranda meñnärçä sannar butaldı. Läkin akrınlap “çık” itep başta ber san, soñınnan ikençese töşte. Sigez sanlı kodnıñ här tsifrın tapkançı, säğat yarım buyına Räyhan enä oçında utırganday utırdı. Menä sigezençe tapkır “çık” itte, soñgı san kürende häm... kompyuter yänä çıyıldırga totındı, monitorda “Kod vzlamıvayıt çucoy” digän süz yanıp çıktı. Räyhan sügenep ber tökerde dä (yarıy äle kompyuternı bärep töşermäde), bufetҡa çıgıp kitte. Ofis bufetında yünle närsä bulamı. Konyagı tügel, sutı da yuk. Räyhan su koyıp aldı häm gotgıldatıp eçep cibärde. Şunnan tämäke köyrätep, ozak kına arlı-birle yörende, uylandı. Ni eşliseñ inde, bulmagaç bulmıy, kompyuternı sünderep kaytıp kitäse genä kaldı. Aptırauga töşkän Abdiyev yänä Gölläriyä kabinetına yünälde, urındıkka utırdı, telär-telämäs kenä ekranғa karadı häm... üz küzlärenä ışanmadı. Anda “Dostup zaverşen” dip yazılgan ide. Menä siña moğciza! Bayagı “trevogalar, çucoylar” çit keşene kurkıtu, yalgıştıru öçen aldagıç kına bulgan ikän, ä çınında isä Räyhan döres yuldan bargan bulıp çıktı.

Eget kompaniyä isäbendä bulgan bar akçanı Şults kürsätkän sçetka küçerde häm aşıga-kabalana programmadan çıgıp, kompyuternı sünderep kuydı. Kesäsennän kulyaulıgın alıp anıñ klaviaturasın, işek totkasın sörtte, yänäse, akçanı ul urlaganı bilgele bulmasın. Bu, älbättä, yülärlek ide. Şul yülärlegen dävam itep ul çıgıp kitär aldınnan karavılçı belän söyläşep tordı. Şul kompyuterda uynap cenlänäm inde, ber utırsam tön citkänen dä sizmi kalam, dip yalganladı. Güyä sabıy balanı aldıy. Ä üze uramga çıgu belän kesä telefonınnan Şultsnıñ nomerın cıydı. Söyläşelgän plan buyınça, anısı akçanı alırga häm şunda uk banktagı bu sçetnı yabarga häm ez yugaltırga tiyeş ide.

Gölläriyä irtän eşkä kilsä, aptırap kitte – ofis yabık, aldanraҡ kilgän berniçä keşe öyereleşep tora, ä işekne kibän gäüdäle ispolnitellär saklıy. Hanım tavışlana başlauga advokat aña kupçiy käğaze çıgarıp kürsätte, häzer “Afrodita” kompaniyäseneñ hucası ikençe, anıñ röhsätennän başka berkem dä kerä almıy, - dide. Menä şulay Gölläriyä kötmägändä eşsez kaldı. Räyhan astırtın gına “Afrodita” kompaniyäsen satu turında kileşü tözegän bulıp çıktı. Ä predpriyätiye milkeneñ unbiş protsentı Gölläriyäneke buluı turında süz dä yuk.

Cirgä yatıp yılıysı kilde. Eşsez genä tügel, fatirsız da kaldı bit ul. Niçä yıl köç tükte, eşläp tapkan akçasın kompaniyänı üsterügä sarıf itte, ä Räyhan anı hıyanätçel räveştä talap kuydımı? Menä siña ädäple, ählaklı keşe. Astırtın bädbähet.

Bu häldän soñ Räyhan berniçä kön öyenä kaytmıy yörede. Läkin kaytmıyça, äybersez, dokumentsız niçek yäşiseñ? ä kaytkaç, öydä olı gauga kuptı. Gölläriyä kabähätneñ yözenä bärep äytte, eçe buşagançı ärläşte dä divanga avıp yılarga totındı, Räyhan närsä disen, aklanırlık hiç mömkinlege yuk. Şults belän ikäü Evropada biznes açabız, şuña akça kiräk ide diyüe Gölläriyäne yarsıttı gına.

- Ahmak! - dide ul. – Bu biznes tügel, bu – katastrofa!

Monnan soñ Gölläriyä ni eşlärgä tiyeş ide? Añlaşıla ki, äyberlären töynäde dä, küze kürgän yakkka çıgıp kitte. Şul bändäne irem dip tora almıy bit inde ul. Ägär anıñ Gölläriyä belän yäşärgä isäbe bulsa, köpä-köndez akırtıp talar idemeni? Köne bulsa, yüne bulır, dilär. Gölläriyä nikadär genä tirän tetränü kiçermäsen, ul yıgılmadı, ülmäde, üzen üze harap itmäde. Tugrı dusları buluı da yañadan ayakka basarga bulışkandır, mögayın. Ber tanışı aña eş tabarga yärdäm itte, urtak kompaniyäneñ çit il ofisında vakansiyä bar ikän. İkençe ber ahiräte halıkara pasport alırga bulıştı, beraz akça birep tordı. Gölläriyägä test ütüe avır bulmadı. İngliz, nemets, urıs tellären belä, bank häm biznes eşe belän tanış, eş täcribäse bar. Östävenä, çın primadonna, prezentatsiyä, partnerlar belän oçraşular vakıtında teläsä nindi kiçäneñ bizäge, kompaniyäneñ vizit kartoçkası bulırlık bit bu dip uyladılar hucalar. Gölläriyä ışanıçnı akladı, eşne cirenä citkerep başkardı, karera baskıçı buyınça kütärelä başladı. Läkin ozak eşlärgä turı kilmäde. Häyer, barısın da täfsilläp söylik.

Korporativ kiçälärneñ bersendä kunakka kilgän partnerlarnıñ berse Gölläriyädän küzen almadı. Tantsıga çakırdı, isemen soradı. Tagı da şul tantsıda tanışu, dip Gölläriyä ärnep Räyhannı isenä töşerde. Häyerlegä bulsın. Häyerlegä buldı. Hätta artıgı belän. Siräk-miräk oçraşıp öç ay yöremädelär, öyläneşep tä kuydılar. Yarıy hanım Räyhan belän ZAGSka kermägän ide, totkarlık bulmadı. Ni öçen Gölläriyä aşıktı, yarata ideme soñ ul Voldemarnı? Avır sorau. Gölläriyä inde küptän avıl balası tügel, ä eşlekle hanım, biznes keşehe ide, şuña da aña, bälki, yañadan ayakka basu, kabattan kütärelü teläge täesir itkänder. Ä yaratuga kilgändä isä , yarata ide şikelle. Räyhannan soñ irlärgä karata näfrät toygısı sünep betkän bulsa, nıgrak ta yaratır ide.

Voldemar tözeleş kompaniyäsı hucası ide. Gölläriyäne ul örmägän urındıkka utırtmadı. Hatını ni teläsä şunı eşläde, ni sorasa ul şunı aldı. Şunıñ bärabärenä hatın ireneñ barı ber telägen ütäde – eşennän çıktı häm öy mäşäqatläre belän genä bulaşuçı hucabikä bulıp kitte. Başta bu küñelsez toyıldı, eşsezlekkä iyäläşep bulmadı, läkin bändä kıyınga çıdagannı rähätkä çıdamıy diseñmeni. Üze kebek hanım-baybiçälär belän ävälänep, häyriyä çaralarında, kruizlarda katnaşıp vakıtın uzdırdı.

Voldemar Kızıl diñgezdä yal itkän cirennän kaytmadı. Akvalang köpşäse kaydadır eläkkänme şunda, batıp ülde ire. Yañadan dönya yämenä şatlanıp kına yäşi başlagan mäldä tagın da yalgız kaldı Gölläriyä. Läkin, bähetsezlek yalgız yöremi ikän, üze harap bula yazdı. Bervakıt yuldan kaytıp kilä ide. Kön tomanlı. Alda torbı töyägän maşina ifrat akrın söyrälä, Gölläriyä anı uzmakçı buldı. İkençe polosaga çıgıp tizlekne arttırgan ide, kinät alda karşıga maşina kilep çıktı. Hanım cähät kenä rulne kiregä bordı häm yañadan gruzovik artına çıktı. Läkin anıñ voditele kötmägändä tormozga bastı bulsa kiräk, ä tizlekne kimetep ölgermägän Gölläriyä kotılgısız häldä kaldı. Soñgı mizgeldä tormozlar şıgırdadı, läkin soñ ide.

Andıy cärähätlär belän keşelär bezneñ ildä kimendä yartı yıl yatar ide, häm barıber dävahanädän invalid bulıp çıgar ide. Ä monda anı nibarı ber ay dävaladılar. Gölläriyä ayagında yöri başlagaç, közge karşısında basıp uyga kaldı.

Yöze adäm kurkırlık, yaña tire ürgän bite kıp-kızıl, cöy ezläre kürenep tora. Östävenä borın söyäkläre cimerelgän. Hirurg anı yuattı. Menä kürerseñ, maturlık bäygesendä Miss-Evropa iseme alırsıñ äle dide. Tik anıñ näq elekkeçä bulırsıñ digän süze Gölläriyäne uylandırdı bit äle. Ni öçen elekkeçä? Elekeçä bulu hacätme aña? Uyladı, uyladı da plastika hirurgına üzen bötenläy ikençe törle “ämällärgä” kuştı.

Hatın klinikadan ikençe keşe bulıp çıktı. Moñaça ul isemen üzgärtep Gölläriyädän Gloriyä Şandorғa äylänsä, häzer inde tışkı kıyafäte dä hiç tanırlık tügel ide.

Ul häzer bay biçä. Baylıkka-mullıkka, bigräk tä isän kaluıña şatlanıp yäşä dä yäşä inde. Läkin Evropa hatını bulıp “yañadan tugan” Gölläriyä-Gloriyäneñ küñele Räsäygä tartıldı. Häyer, belmässeñ, ällä Räsäy, ällä Räyhan tarta ide anı. Kit äle, nişläp şul karak Räyhannı kürergä teläsen di. Mömkin bulsa, üz kulları belän buıp üterer ide äle. Gloriyä üzen şulay nıgıttı, ä menä küñelne nindider kort kimerä kebek, akılga sıymagan ber teläk kalka da çıga. “Tege” niçek ikän, närsä eşläp yöri ikän? Allanıñ kahäre sukmaganmı? Bähetleme ikän? Kızık şul keşe küñele: niçek inde beryulı kahärläp häm bähet teläp bula. Küräseñ, mähäbbät häm näfrät ber yöräkkä sıya torgandır. Ä bit, döresen uylaganda, bähet keşene çitläbräk uzsa da, kahär digäneñ bik tiz başka töşä. Räyhan belän dä şulay buldı. Şults kompaniyäsına kuşılgaç, ul Latin Amerikasınnan çimal taşıdı. Läkin täcribäsezlege arkasında bälagä tarıdı – tikşerü kilep zur ber partiyä tovarın standartҡa turı kilmi dip taptı. Gadi tel belän äytkändä, satarga yaraksız, çüplekkä çıgar da tük inde. Äle yaña gına Räsäydän Evropaga küçärgä öndägän, partner häm dus Şults üzgärde lä kuydı. Ul sud aşa Räyhannı ğayeple kaldırıp, zıyannı tulısınça anıñ isäbenä kaplatuga ireşte, Abdiyevnıñ kompaniyäda bulgan milek öleşe änä şul zıyannı kaplauga kitte dä bette. Ä akçasız keşeneñ Evropada kiräge yuk. Şulay qadersezlänep ul Mäskäügä kayttı häm zur avırlık belän ber kibet açıp cibärde.

Gloriyä bolarnı belmi ide, älbättä. Mäskäügä kilep töşkäç, ul elekke tanışları aşa Räyhannı ezläde häm, nihayät, ezenä töşte. Yaña mikrorayonnarnıñ bersendä, yarım podvalda urnaşkan bäläkäy genä kibet hucası ikän. Dokumentların alıp, Gloriyä ikençe könne ük şunda yünälde. Räyhanga satuçı-fälän käräkmi ikän. Läkin hanım üze aña nık oşadı. Evropada zur gına kompaniyädä eşlägän ikän, biznes ölkäsendä täcribäse bar, çit il tellären belä. Kıskası, yuk vazıyfanı bar itep digändäy, Räyhan Gloriyänı eşkä alırga buldı.

İrneñ soñgı vakıtta küñele köräyde, Gloriyä yegerme meñ evro akçasın predpriyätiyene üsterügä birde. Bu bik taman buldı, kıymmätle, presticlı parfyumeriyä alındı, reklama yasaldı, näticädä kliyentlar bermä-ber arttı. Kibet yakşı gına tabış birä başladı. Läkin, iñ möhime ul tügel. Räyhan ğaşıyq buldı. Ul baştanayaҡ ğaşıyq! Gloriyänı üzeneke itär öçen älläni birer ide. Hanımga karap tuya almıy. Läkin küñelendägen tele belän äytä almıy. Ällä niçek kauşıy da kuya. Ä Gölläriyä belän niçek kıyu tanışkan ide ul. Ällä inde anı avıl kızı dip näzäqatlänep torılmaganmı? İh, Gölläriyä, häzer sin kaylarda ikänseñ. Äle menä namus uyanıp ükenderä dä soñ, tik tersäkne teşnäp bulmıy. Räyhannıñ yaña satuçıga bulgan mähäbbäte könnän-kön köçäyde. Gloriyänı ul törle yaklap sınap kararga tırıştı. Läkin kimçelegen tapmadı. Hanım eştä uñgan, belemle. Zävıklı, tärbiyäle, töskä-başka çibär, keşe belän söyläşä belä.

Şulay vakıt uza tordı, ä Gloriyä Räyhannan üç alırga cay ezläde. Ozak kötärgä turı kilmäde aña, ber könne Räyhannıñ kabinetın biklärgä onıtıp, kaydadır kitärgä cıyınuın şäyläp kaldı. Baş avırta dip yalganlap urınına iptäş kızın kaldırdı da keşe kürmägän arada kabinetka ütte. Menä kompyuter, Räyhan Gölläriyäne niçek talasa, Gloriyä häzer anı näq üzençä töp başına utırtaçak.

Kompyuter güli, hanımnıñ citez barmakları klaviatura östendä bii, üze belgän ısul belän ul kodnı açıp, finans operatsiyäları yazılgan faylga kerergä tiyeş. Başta eş häybät kenä bardı. Gölläriyä yukka gına yıllar buyına kompyuter tehnologiyäsın öyränmägän ikän, läkin kod belenä tip kenä torganda monitorda kinät kapçık askan karak kürende, ä törle yaklap kalkıp çıkkan politseyskiylar aña pistolet töbäde. Trevoga signalına het kolagıñnı tık. Läkin Gloriyä kurıkmadı, yakında berkem dä yuk bit, ul nigä yalgışuın belergä tırıştı, başka variantlarnı tikşerep karadı. Utıra torgaç, Gölläriyä ürmäküçne dä aldarga öyrände häm şunda anıñ isenä töşte, bu bit Gölläriyä üze uylap tapkan sistema! Menä şunnan kompyuter hikmätläre çişelde dä kuydı.

Hanım Räyhannıñ nindi bankta küpme akça saklavın karadı. Monda talap torası da yuk ikän. Häleñ möşkel, yeget, dip uyladı ul sannarga karap. Yarıy, bik häybät, sin mine ber tiyensez kaldırsañ, häzer min sine uram sukbayı itäm. Belerseñ şunnan urlaşunıñ närsä ikänen! Minut eçendä Abdiyev dip atalgan häsrät biznesmennıñ barlık akçası Gloriyä Şandor isäbenä küçte dä kuydı. Hanım ciñel sulap cibärde. Tantana, çiksez kanäğatlänü kiçerde ul. Komyuternı yabası da, koyrıknı sırtka salıp Räyhan öçen yukka çıgası gına kaldı. Läkin, ni gacäp, Gölläriyä kuzgalmadı. Şaktıy vakıt utırdı ul. Kitäse kilmi. Närsäder döres eşlänmäde şikelle. Ällä kaydan barlıkka kilgän bu his, bu şik utırgan sayın köçäyä genä bardı. Ciñü läzzäte, kangan üç toygısı niçekter sürelep kaldı, ä uñaysızlık toygısı nıgıdı gına. Häm kötmägändä Gölläriyä yänä klaviaturaga totındı. Citez barmakların töymälärgä bastı. Sanaulı sekundlar eçendä Gloriyä Şandornıñ millionlagan evro akçası Räyhan sçetına küçte dä kuydı.

Abdiyevka ikençe könne finans operatsiyäse başkarırga kiräk buldı häm ul tiyeşle programmanı açtı. Açtı da katıp kaldı. Küzläre zur bulıp akaygan, irennäre dereldi, üze avız açıp süz äytä almıy, näq kotırgan adäm. Bändäne instinkt yöretä, ahrısı, kibet hucası ni öçender turıga Gloriyäga yünälde. Hanım da köttermäde, bu bahır çınlap ta “ıçkınıp” kuyar, dip, üze dä aña karşı atladı häm Räyhan isenä kilep berär süz äytä alganın kötmästän, yarıp saldı:

- Tanış bulıyk, min sezneñ hatınıgız.

Räyhannıñ küzläre tagı da zurrak açıldı. Ä Gölläriyä saf tatar telendä dävam itte:

- Äye, min – Gölläriyä. Sin mine talagaç, min Evropaga kittem häm ber biznesmenga kiyäügä çıktım. Ul ülde, mölkäte miña kaldı. Menä şul. Minem akçalar sineke häzer. Yuk, sin minem yözemä karama, tanımassıñ, min plastik operatsiyä yasattım.

Räyhan haman da önsez basıp tora ide. Gölläriyä tüzmäde, yörägendäge hislären äytte dä saldı.

- İh, Räyhan, min sineñ yaratuıñnı belep, sizep yöriyem bit, min dä sine yaratam. Kil äle yanımarak...

Menä şulay tämamlandı Räyhan belän Gölläriyä hikäyäte. Döresräge, mihnätläre tämamlandı, ä mähäbbätläre başlanıp kına yata äle.

Click or select a word or words to search the definition