Mena Siña...

(yumoreska)
Zahir irtän başı çatnap avırtuga tüzä almıyça uyanıp kitte dä, yänäşäsendä adäm disäñ, adäm tügel, tuzgak başlı ber zat kürep, bermäl aptırap kaldı. Nucäli küp eçep, «belogoryaçka» başlangan inde, dip uyladı ul. Andıy çakta küz aldına «çertik»lar kürenä ikän, digänne şeşädäşlärennän işetkälägäne bar ide anıñ. Şulçak, älege «çertik» telgä kilde dä:

- Närsä, cankisäk, başıñ bik avırtamı?- dide.

Zahir şunda gına monıñ tübänoç Yappar hatınınıñ uynaştan tugan töpçek kızı Häbirä ikänlegen añlap aldı. Käkre ayaklı, kılıy küzle bu kız kiyäü kürmiçä utıznı tutırıp kilä ide inde.

Zahir başı avırtuın da onıtıp sikerep tordı:

- Sin närsä, - dip bakırdı ul kızga.- Nindi cankisäk bulıym min siña?

Läkin Häbiräneñ bu süzlärgä kılı da selkenmäde.

- Onıttıñdamıni? İrtägä ük öylänäm, dip minem yanda kunıp kalgan ideñ...

- Kit annan, iblis, öylängän di änä. Gäüdäñ gäüdä bulsa ide...

- Kiçä bik figurnıy idem bit. Selägäyeñne agızıp, sinnän dä figurnıyrak kız dönya yözendä yuk, dip, kiç buyı minem tirädä bötereldeñ...

Zahir «br-r-r», dip başın selekkäläp kiçäge tönne - Yaña yıl tönen iskä töşerergä tırıştı. Tik Kürkä Häsännärneñ morca başında çıclap utırgan äçe balın avız itkännän soñ, Käbirlärgä barıp, yänä 200 gramm samogon kaplaganın gına häterli aldı. Şunnan soñgıları tomanda.

Küñele belän şularnı uylasa da, tele belän:

- Cülär idem min, sine - atañ balta belän yunıp ämällägän närsäne figurnıy dip torırga,- dip äytep saldı.

Bu minutlarda dönyada anıñ öçen Yapparnıñ şuşı kızınnan da söykemsezräk zat yuk ide.

- Närsä, bu näzek billäreñ belän siña sportsmenka gına bulası bar, dip äytüçe dä sin tügelme?

Zahir tagın uyga battı. Ozak kına şulay utırgaç, Käbirlärdän soñ kaladan kaytkan klasstaşı Sälähi belän ikesenä, tışındagı isemen dä ukıp bulmaslık itep çit telçä yazılgan «zagraniçnıy» yartı böklägännären isenä töşerä aldı ul. Äye, äye, annan soñ? Annan soñ Kätük Häyri, munçasına alıp kerep, uzgan cäydä peçän öyeşkäneñ öçen bulır dip, ber çümeç samogon salıp birgäniye bugay?..

Zahirnıñ küze Häbiräneñ halatı aşa bültäyep torgan yuan korsagına töşte. Monı da neçkä bille itep kürgäç, az eçelmägän, küräseñ...

- Kükräkläreñ dä ölgergän äflisunnar kebek, dip kul ozaytuçı da sin tügelme?- dip şıñşıdı Häbirä.

Da-a, öşep mälceräygän kavın belän äflisunnı butagaç, bakçaçı çıkmayaçak minnän, dip uyladı Zahir çırayın sıtıp. Arakı citärlek bulsa, irlär küzenä maymıl da färeştä bulıp kürenä, digännäre haktır. Küp eçelgänder, mögayın. Tukta, tukta, Sälähidän Kätük Häyriyeneñ munçasına kergänçe, Maratlarnıñ lapas artında ille gramm tehnik spirt ta ciffärgän ide bit äle. Annan soñ Säyfi belän ikesenä ber flakon adikalun çömerdelär...

- Küzläremä Kar kızı bulıp kürenäseñ, dip kullarımnı da üpteñ hätta,- dip mışkıldadı Häbirä.

- Närsä şulay küp eçtem mikänni?

- Alay küp tä eçmägän ideñ şikelle. Bezgä kergäç, bik yalınıp soragaç, ber şeşä kızıl gına birgän idem,- dip yılıy uk başladı Häbirä.

Kür inde, malay, ä, Häbirä bulıp Häbirä küzemä Kar kızı bulıp kürenä başlagaç, az eçelmägän inde. Nu, şul soñgı ber şeşä «kızıl» mälcerätkän bit. Menä siña mä, bolay bulsa, öyländerep tä kuyuları bar...