Mäqallär Häm Äytemnär - Fanavis Davletbayıv

Berni dä ömet itmi yasa yahşılıknı.

Etep yıkkan tügel, yärdäm kulı suzgan keşe köçle.

Kütärenke käyef därtländerep yäşätüçe tormış elikserı.

Karga bulıp tugaç kargıldarga gına kala.

Tormış kapma-karşılıkları belän genä tügel, ohşaşlıkları belän dä gıybrätle.

Bitaraflık – üzeñ teläp tormışta köräştän çitläşü digän süz.

Mine çınlap añlıy torgan keşe – ul min üzem.

Üze totıp eşlämägän keşe ğadättä akıl satarga yarata.

Bez hämmäbez dönyada berdänber.

Eşendä tübä kıyıgındagı boz söñgese şikelle genä elenep tora.

Şapıldap kilep töşkäç kenä yıgılganın añladı.

Almanıñ avızıña özelep töşkänen kötmä, üzeñ urelep al.

Tau biyegräk bulgan sayın yırakkarak küz taşlap bula.

Üpkäläü – köçsezlek bilgese.

Mähäbbät davıl sıman – kötmägändä kilä.

Kön kürke – koyaş, küñel kürke – uylar.

Bähet bar keşegä dä yılmaymıy.

Batkanda yözgändäge bergälek tiz onıtıla.

Kemneñ kemlege avır çakta kürenä.

Börket kuyan barda tıçkan ezläp mataşmıy.

Rähät tormış bulsa bulır ocmahta gına.

Keşe öleşenä kerep yäşäü häramçı keşe eşe.

İkeyözle bändägä dindä urın yuk.

Hoday ihlastan üzenä tabıngannarnı gına yarata.

Teläsä närsä tutırırga küñel çüp savıtı tügel.

Yökne kertep batırgaç atnı tügel üzeñne sük.

Küzne açıp karamau artık eş tudıra.

Aşıkma, ämma vakıtka sıyış.

Annan monnan gına eşlägänçe eşlämäveñ häyerle.

Barsın da vakıt yuklıkka gına sıltap kaldırırga yaramıy.

Üzenä tiyeşne genä belä.

Şulay da alu birügä karaganda küñelleräk.

Tau tübäsennän kupkan taş töşep citmi tuktamıy.

Tau biyegräk bulgan sayın annan yıgılıp töşü kurkınıçı da arta.

Nindi yuldan barırga kiräkne härkem üze saylıy.

Sin naçar dip uylagan kemgäder yahşı bulıp toyılırga mömkin.

Saksız bulsañ barıp kaplanu ozak tügel.

Bezneñ tormış üze çın batırlık ürnäge.

Tormıştan gel alu turında gına uylap yapa-yalgızı kaldı.

Keşe uylarga sälätle berdänber can iyäse nindi genä ahmaklıklar kılmıy dönyada.

Keşe hayvanga karaganda küpkä mäkerleräk buluı belän kurkınıç.

Cide kat tügel yış kına ber kat ülçäp kisergä dä irenäbez.

Tavış kubarmıy gına añlatuga ni citä.

Närsägäder ireşü öçen teläk kenä citmi, mömkinlek tä kiräk.

Soñartkan eş – çüp östenä çümälä.

Kıstasalar da küñeleñ tartmagan eşkä alınmavıñ häyerleder.

Akıl belän uylap küñel sizgerlegeñä tayan.

Eşne çikerü – üzeñ teläp tartası yögeñne avıraytu.

Ütkännär bügengä, bügenge kiläçäkkä totaşıp gomer hasil itä.

Küräzäçelärneñ tormışı ber dä kızıkka ohşap tormıy.

Ütkännären genä tügel kiläçägen dä sızıp atkan keşelär bar.

Tormış kärt uyını kebek : otasıñ da, ottırasıñ da.

Yazmışka üzeñ närsälärder östäp yazsañ gına gomer mäğnäle bula.

Kul kuşırıp utıru avıru yäki kart keşegä genä kileşä.

Eşläse vakıtta yokı simertäbez, yal itäse vakıtta eşlärgä totınabız.

Soñınnanga kalgan eşne vakıt kötep tormıy.

Könne döres faydalansañ gına vakıtka sıyışıp bula.

Vakıtka akça kebek ük sak kararga kiräk.

Ni kızganıç, buşka ütkän gomerlär dä bula.

Tiyeşen sorasañ ğadättä kimetep birälär.

Gayıpne çittän ezläü – buldıksızlar eşe.

Taza agaç törtkängä genä aumıy.

Çilägeñ töptän tişelsä, kibäneñ oçtan işelsä ber dä äybät tügel.

Töbe tişek çiläktä su tormıy.

Östeñnän taptap ütülären telämäsäñ – yıgılma.

Bar eçtägene tışka çıgarıp bulmıy.

Telägän keşegä üzen kürsätergä mömkinleklär citärlek.

Tormışta üzeñne genä tügel, eşeñne dä kürsätä belergä kiräk.

Kiläçäkne tiz genä taralmıy torgan bilgesezlek tomanı uratıp algan.

Kayda ikäneñne belmägäç adaşkansıñ bulıp çıga.

Yul tuzansız bulmas.

Yäş keşe cide yul çatında tora – kaysı yuldan kitüe üzennän tora.

Yaşäü mäğnäse – kön ütkärü genä tügel ikänen onıtma.

Cırınnan tıñlauçısın çamalap bula.

Ällä kem bulıp kürener öçen närsägäder ireşergä kiräk.

Küñel yatmagan eş yaratmagan käläş belän ber.

Bezdä köçlämilär, mäcbür genä itälär.

Yavızlık belän kılıngan batırlık danga layık tügel.

Çın ciñü ğadel köräştä genä bula ala.

Arıslannar tuyınganda şakallar da öleşsez kalmıy.

Yalgan sanlı otçetlar uydırma statistika tudıra.

Siña kiräk başkalarga da kiräk bulu ihtimalın onıtma.

Pesi sırtına töşüdän, keşe nahak süzdän kurka.

Könçelärgä hiç tä üpkälämim, alarnı kızganam gına.

Kurkak keşe üz hokukların yaklarga sälätle tügel.

Bähästän hakıykat kenä tügel, tukmaşu da tuarga mömkin.

Türä - kollektivta çiklänmägän hokukka iyä, cavaplılıknı başkalarga ciñel audaruçı östenlekle zat.

Uyda bulmagannı eşläp bulmıy.

Aldaşa belmäsäñ totılırsıñ, uynıy belmäsäñ otılırsıñ.

Solıga at kiräkmi, atka solı kiräk.

Üz başıñ eşlämäsä keşe kiñäşenä tayan.

Hikmät kayda yäşäveñdä tügel, niçek yäşäveñdä.

Atlı cäyäüle belän yarışmıy.

Yonçıgan atka yök östämilär.

Yuk artınnan kugançı barın bäpläp tot.

Urmanga adaşam dip kermilär.

İsäpsez genä dönyanı alıp barıp bulmıy.

Bähäsläşsäñ – otılma, urlaşsañ – totılma.

Ala belgäç birä dä bel.

Maktau artıkka kitsä çınlıgına şiklänä başlıysıñ.

Könläşü – tınıçlıknı yugalttıra torgan avır his.

Taşkın su yarnı cimerä, könçellek cannı kimerä.

Ädäpsez telläşer, buldıksız könläşer.

Kemneñ kemlege avır çakta belenä.

Kargıldagançı sayrau yahşırak.

Kapçıklap soraganda uçlap, uçlap soraganda börtekläp kenä birsä dä Hoday, aldım dip şöker itergä kiräk.

Şikçel keşegä tonık su da bolgançık bulıp kürenä.

Adaşkansıñ ikän çıgu yulın ezlä.

Tıkşınuçılar küp, yärdäm itüçelär az.

Yalkau kıymıldagançı eşçän eşläp kuya.

Döres tärbiyälämäsäñ bala çaga şul.

Kem köçsez, ğadättä şul zarlana tormıştan.

Süzdä bar da şoma köylängän, eşkä kilgäç kıtırşılıklar yış çıgıp tora.

Tırışıp eşlärgä çakırgannı, ni hikmät işetüçelär yuk.

Uy süz bulıp teldän ıçkıngaç ser buludan tuktıy.

Kaygıñnı sizdersäñ doşmanıñ söyener.

Üz-üzeñne tota belmäsäñ yış küñelsezleklärgä yulıgırsıñ.

Birgänne rähmät äytep alırga onıtma.

Elnıñ tügel könneñ dä niçek uzasın belep bulmıy.

Çäynämi yotsañ tamagıña tıgıluı bar.

Başkalarnı ahmakka sanauçınıñ äväl üzenä citep betmi.

Elanga şuışırga, börketkä oçarga yazgan.

Dustıñ üz işeñ bulsın.

Ärsez artık ala, birmäsäñ tartıp ala.

Üzeñ tudırgan butalçıknı başkalardan çiştermä.

Alda ni bulasın belmägäç hıyallanırga gına kala.

Ücät bulsañ gına tormışta üz telägeñä ireşerseñ.

Taunı buysındırmakçı ide dä ürgä dä menep citä almadı.

Taşbaka adımı belän genä bulsa da alga baruıñ häyerle.

Östän kuşkannı tıñla, üzeñçä başkar.

Äytkänne tıñlamagannı mäcbür itep eşlätergä kala.

Siña ışanalar ikän ömetlären aklarga tırış.

Işanıç ike yaklap ta bulganda gına uñışka isäp totıp bula.

Üzeñ buldıra almagannı başkalardan taläp itmä.

Küñel buşlıgın arakı belän tutırıp särhüşkä äverelde.

Käyefeñne bozasıñ kilmäsä süz köräştermä.

Beräülär ni telilär şunı eşlilär, ikençelär isä bar yaklap ta çiklängännär.

Gadelsezlek tigezsezlekkä, tigezsezlek rizasızlıkka kiterä.

İrekkä künekkän atnı cigergä öyrätüe avır.

Birsälär alırsıñ, birmäsälär buş kalırsıñ.

Däşmäveñ altın – kayda ikäneñne sizderäseñ kilmägändä.

Berni añlamasa da şäp takıldıy.

Keşe arbasına utırgançı cäyäüläp täpilä.

Belmägäneñne öyrän, belgäneñne kullan.

Vakıt alga baruga gına köylängän.

Yukka ımsıngançı barın kuldan ıçkındırma.

Hoday üzenä tabındırıp üzeneñ tiñsez zat ikänen härçak iskärtep tora.

İrek telänep tügel, köräşep yaulana.

Meñ häyerçegä citkän ber komsız bayga citmi.

Yalgan çın tormışnı küzallarga komaçaulıy.

Närsägäder ireşü öçen närsäder eşlärgä kiräk.

Gadi genä mäsäläne katlaulandırıp çişüe belän üzeneñ kompetentsızlıgın kürsätä.

Tormış - ärtisläre alışınıp toruçı zur sähnä.

Köçkä ostalık ta kuşılsa uñışka ireşü ciñelräk bula.

Härkem tormışta üz urının belergä tiyeş.

At urınına sıyır cigep yırak kitep bulmıy.

Klon bulmagayı ällä närsä bulsın, minem tormışnı başka berkem dä kabatlamayaçak.

Tümgäk östendä basıp toruın tauga mengän itep kürsätergä mataşa.

Statistikaga ışansañ bezdä küptän bar da citkelekle.

Tormışne niçek bar şulay kabul itergä öyrän.

At bulsañ cigergä teläüçelär tiz tabıla.

Vlastka östenlekkä ireşü öçen kilälär.

Urlagannar bayga, namuslılar häyerçegä äverelde.

İleñ bay bulu belänmeni, üzeñ häyerçe bulgaç.

Hıyallar tulısı belän äkiyättä genä çınga aşa.

Savıtı bar, närsä salası gına bilgele tügel.

Tıñlamagan taynı häldän taydırıp, tukmap cigärgä öyrätälär.

Ettän tugançı, attan tugan buluıñ häyerleräk.

Kötüdä çitne tiz tanıylar.

Hıyal keşene küklärgä oçırta, çınbarlık lap itep küteñä utırta.

Keşe takıldagannı tıñlap gazaplangançı üzeñ söyläügä ni citä.

Sandugaç sayrap, keşe söyläp küñelen buşata.

Bulganı citep aşsa da kanäğat bula belmi.

Bähet – çişeleşe tabılmagan küp bilgesezle tigezlämä.

Holıksız keşeneñ köyenä toru, pesineñ yonın uñayga sıpıru yahşı.

İke yaktan da tigez yaratu bulsa gına mähäbbät çın bula.

İcatta min ireşkännär kemgäder çüp kenä, ä kemgäder moğciza bulıp kına kürenergä mömkin.

Yalkau tüzemle – tübäse işelep töşkänne kötä.

Alıştırgısız keşelär yuk. Ämma almaşka kemnär kiler – şunsı sagayta.

Östenlek köç kürsätep, abruy eş kürsätep yaulana.

Tıyılgan cimeş tatlırak toyıla.

Bulgannı äräm-şäräm itüçelärgä kıtlık kürenmi.

Eşelonlap tügel, kapçıklap urlagan sud yulında yöri.

Eş kabatlana torgan “sin tiyeş” süzennän sulış kısılıp kitä.

İl häle möşkel sırhaunı häterlätä.

Bezdä tärtipkä çakıruçılar küp, ütäüçelär genä kürenmi.

Yözä togaç köymä komga terälde.

Barsı da tärtiptä dip halıknı küpmegä qadär tınıçlandırırga bula.

Halık barsın kürep tora – teşen kısıp tüzep tora.

Şar nıgrak kabargan sayın şartlau ihtimalı arta.

Bezneñ iñ yakın keşelärebez ul – tugannarıbız.

Urtak kannarıbız – şuña gaziz tugannarıbız.

Eş kına tuganıñ – soñgı tayanıçıñ.

Çitne üz itkänçe üz tuganıña sıyın.

Küñel yumartın yumart ta – tik öläşerlek äyber kürenmi.

Yuha tellelär, ozın kullılar, aç küzlelär bergäläp ilne savalar.

Halık – bitaraf, aktivlıgı buyınça impotentka äverelep bara.

Hamanda halık kemnärder kilep ildä tärtip yasagannı kötä.

Hökümät kesäläre tişek bulganga akçalar türälärneñ kesälärenä küçä.

İldä urlaşıp yäşäü öçen bar yaklap ta uñay mohit tudırılgan.

Tatıp kına karıym digäne mılkıngançı tuyınu belän tämamlandı.

Keşene hörmät itmägänneñ üzen dä hörmät itmilär.

Batırnıñ yäşäve genä tügel üleme dä danlı.

Rähätlänep yal itergä mömkinlek tudırganı öçen eşen ülep yarata.

At cigelep, keşe bögelep eşli.

Tärtä arasındagı atnı tıñlatuı ciñel.

Et kebek tüzem, at kebek eşçän bulsañ ide.

Tatarga at täüge mähäbbäte kebek qaderle.

Tatarga häykälne kanatlı atka atlandırıp kuyarga kiräk.

Dönya atlı tatarnı gına tanıy.

Ütkännär belän genä gorurlanıp yäşäp bulmıy.

Egılsañ imgänü dä yırak yörmi.

Här tamaşanıñ azagı bula.

Tayak tayanır öçen dä, tukmar öçen dä yaraklı.

Kübräk belgän sayın dönyaga soraular arta gına bara.

Belgännär süzgä saran, belmägännär takıldıy.

Koşlar küp bulsa da sayragannarı siräk.

Ülem – tuuçılarga urın buşatu.

Matäm köye urınına tuu marşın işetäse kilä.

Bar da bette dip ömetsezlekkä birelgänçe närsä dä bulsa eşläp bulmıymı dip uylan.

Eş vakıtın saklıym dip tik utırıp kön ütkärä.

Ni eşläveñnän bigräk eş urınıñda buluıñ möhim.

Yaşävebez kebek ük ülemebez dä törle.

Bez – Hodaynıñ vakıtlıça irekkä cibärelgän kolları.

Çigensäñ kısırıklanaçagıñnı onıtma.

Uzsañ köyenälär, kalışsañ söyenälär.

Az – bötenläy yuk tügel, bar digän süz.

Yuk çagında az da yarap kuya.

Bezgä tiz kiräk, küp kiräk. Ansı da buşka bulsın.

Yukka ömetlängänçe bulganın tartıp-suzıp bulsa da citkerü mäslihät.

Din totu Hoday täğalägä tügel keşeneñ üzenä kiräk.

Korän – balaçaktan uk küñelebezgä señderergä tiyeşle tormış älifbası.

Baylık tügel savap cıyarga aşıgıyk.

İmanlı keşegä Hoday yulnı üze kürsätä.

Yalgışlarıbızga küp çagında üzebez ğayeple.

Dönya törledän törle – çuar buluı belän küñelle.

Cisem töşenä ütep kersäk tä cannı tännän ayırıp alu kulıbızdan kilmi häm kilmäs tä!

Önendä kuyan da tınıç.

Zuraytkıç közge aldında kärlä dä däü kürenä.

Akıl gına citmi sizgerlek tä kiräk.

Küñel karışsa da soñgı sulış kotılgısız.

Gomer ızanınıñ çikläre ber Hodayga gına bilgele.

İrtäräk äle barabannarnı döberdätergä.

Bügen türdä, irtägä gürdä.

Yalgışnı tanu gına az, anı tözätergä dä kiräk.

Hodaynıñ iñ yaratkan kolı – din totuçı bändä.

Ätäç bırgısız da yañgıratıp kıçkıra.

Essedä salkın, salkında cılı tansık.

Abınsañ yıgılırga da ozak tügel.

Goref-gadäten, dinen, telen saklagan halıkka betü yanamıy.

Üzen kiräksez itep toygan keşe bähetsezgä äverelä.

Yarar, bulır diyep tor, türäñ aldında biyep tor.

Mäsäläne çişü öçen iñ elek anıñ asılına töşü kiräk.

Yavız keşedän teläsä nindi kabähatlekne kötergä bula.

Satuga kuyılgan mal tügel – maktama mine.

Namusnı äkiyät itep kenä kabul itüçelär kübäyep kitte.

İşäk añgıra häm kündäm bulganga äzmäverdäy adämnärne üz sırtına atlandırıp yörtä.

Et belän mäçene üzara kileşteräm dip azaplanu – çalbarnı baş aşa kiyergä mataşuga tiñ yülär ğamäl.

Küñeldäge bar rizasızlıknı da tışka çıgarıp bulmıy.

Akıllı uylanıp torganda akılsız eşläp taşlıy.

Gomer satılıp alına torgan bulsa iñ ütemle tovar bulır ide.

Tormıştagı vak-töyäklär cıynalıp zur problema tudırırga mömkin.

Problemalar küp, alarnı çişärgä teläüçelär genä kürenmi.

Problemanı tudırgançı anı buldırmau östendä eşläü zarur.

Totıp eşläügä karaganda akıl satu küpkä ciñelräk.

Belgäneñne eştä kürsät.

Eşen pesi etne yaratkan tösle yarata.

Töşemle eş bulgaç eşenä pensiyägä çıkkaç ta yabışıp yata.

İrekne kıskan sayın üzeñneñ kol ikäneñne nıgrak toyasıñ.

Kiräkle keşe yanında böterelüçelär küp.

Kirägeñ genä betsen – uramdagı taşlandık et sin!

Kem bulsañ da gorurlıgıñnı yugaltma.

Gorurlıktan batırlıkka ber genä adım.

Köç barda teläk yuk ide. Teläk bulgaç köç kalmagan bulıp çıktı.

Koyaş yaktısı ütälmägän urınnar da bar.

Yögerep citeşälmägänne atlap kına citeşälmässeñ.

Hoday kiräkne üzeñä turı birsen.

Yulärlär yortı şır tilelärne genä tügel artık akıllılarnı da yäşerep totu urını da.

Maktaunı da, tänkıytne dä tınıç ütkärep cibärergä öyrän.

Ciñergä teläüçelär küp. Ciñüçe ber genä.

Akıllı bulıp kıylanmakçı da kilep kenä çıkmıy.

Hıyaldagı printsın kötep täki äbigä äverelde.

Bal tügelsä çeben tiz cıyıla.

Çebengä bal ni dä tizäk ni – talımlap tormıy.

İrek birsäñ baş tübäñnän yöriyäçäk.

Eşlärgä yalkaulıgınnan başka berni dä komaçaulamıy.

Eştän kurıkkan akçadan kolak kakkan.

Tışkı maturlıkka küñel maturlıgı östälsä genä keşe çın matur bula.

Yözeñne akşarlap kına kartlıktan kotıla almassıñ.

Üz-üzen yaratuı şundıy köçle, şuña başkalarnı onıtıp torırga mäcbür.

Dan-şöhrät diñgezendä yözep tonçıgıp ülüçelär dä bar.

Eşendä yış yal itep rähät taba.

Ürelep buyı citmägänne yatkan kileş kenä almakçı.

Buy citmägängä uy citä.

Börket batırlık hakına tügel tamak hakına korban ezli.

Bähet koyaşıñnı kaygı bolıtı kaplamasın.

Üzeñ belmägänne keşegä öyrätep mataşma.

Küñele bozıkka şaytan süzläre färeştäneke bulıp toyıla.


Maksatsız keşe – kanatsız koş.


Elganı buıp bula, ämma tuktatıp bulmıy.

Kıçıtkan saylap çakmıy.

Alga dip kıçkıra, ä üze artka bara.

Yalgan törle, hakıykat ber genä bula.

Miçne korım, keşene gaybät karalta.

Çırkıldap kına moñlı bulıp bulmıy.

Büre bar cirdä kuyan posıp kına yäşärgä mäcbür bula.

Här yılmayu eçkersez bula almıy.

Sandugaç alkışlamasañ da sayrıy.

Ügez täkä belän sözeşep mataşmıy.

Elan bulıp tugaç çakmıy çarañ yuk.

Kıçkırası kilgän ätäç vakıtka karap tormıy.

Upkın töbennän tau tübäsen küzätüdän ni fayda.

Cırga häykäl kiräkmi, çäçäklär dä citä.

Keşeneñ süzenä karama, eşenä kara.

Gäüdäñ nindi – şäüläñ şundıy.

Kayçagında tägärmäçkä sılıngan balçık ta arbanı tuktata ala.

Bürelär öyere karşında kuyan bulıp kılanmıylar.

Kurkak posıp kalganda ahmak utka kerer.

Häldän taygançı sugışmasa ätäç bulamıni.

Çama hise här närsädä bulırga tiyeş.

Fani dönyada eşlämägäneñne ahirättä tabarmın dimä.

Vakıt agışında gomer tamçı gına.

Ber yoldız atılgannan gına kük maturlıgın cuymıy.

Tañ atkaç koyaş bayımıy kalmıy.

Belmägän eş tiz ardıra.

Mähäbbätneñ ugı – hıyanät, töbäü noktası – yöräk.

Buş kul belän ayu östenä barmıylar.

Darı miçkäse yanında ut kabızmıylar.

Äkäm-tökäm bulıp tugaç biklänep yäşärgä turı kilä.

Çäçäk belän sıylangan sıyırda soklanu hise tua almıy.

Çorı nindi cırı şundıy.

“İrkäli cannı yagımlı köylär”, - dip cırlap cibärgän di pesi, tıçkannıñ kıştırdavın tıñlap.

Doşmannarnı arttıruı ciñel, duslarnı tabuı kıyın.

Gel üz fikeren genä alga sörgän keşe irtäme soñmı barıber uñışsızlıkka yulıga.

Işanıç ike yaktan da bulganda gına uñışka isäp totıp bula.

Kurkaklık keşene kolga, yalagaylık satlık canga äverelderä.

Koyaş tigez cılıtkanday keşelärgä tigez kararga öyrän.

İñ yaman keşe – sineñ belän yahşı mögälämädä kıylanıp artıñda pıçak kayrap toruçı keşe.

Dönya kamil: anda berni dä artık yäki kim tügel.

Büre çeben aulap mataşmıy

Maturlık soklanu da, tabınu da, näfrät tä, könläşü dä tudıra ala.

Yaşäü törle bulgan kebek ülem dä törle.

Vakıt sizdermi genä bar närsäne üzenä yotıp bara.

Faydasız ğamällär gomerne çirdän dä bitär kıskarta.

Vakıt akça tügel – anı saklauga kuyıp ta, yugaltsañ kire tabıp ta bulmıy.

Tau karşına kalança kormıylar.

Şaytannar oyasında färeştä bula almassıñ.

Yözdäge cıyırçıklar gomerneñ yaktı buraznaları.

Kük – yırak yäşerengän serle sandık.

Et mäçene, eşçän yalkaunı söymäs.

Kük hıyal öçen, cir yäşäü öçen kiräk.

Kayçagında üzeñne kiräksez itep toygan çaklar da bula.

Cirdä tudım, cirdä yäşädem, cirgä kitäm.

Elap üz telägenä ireşü sabıyga gına kileşä.

Härkem üz cayın gına kaygırtkanga eş barmıy.

Eçemdäge tışımda dip yäşi torgan çak tügel.

Ber yavız keşe dä üzen häşärät dip sanamıy.

Kulınnan eş kilmägän zarlanuga küçä.

Sine yaratmaganga gına ul keşene doşmanga sanama.

Karşı barmıy gına tauga yakınayıp bulmıy.

Bar keşegä dä taunıñ biyegenä kütärelü tätemi.

Yulıñ tauga kilep törtelgäç menmi bulmıy.

Taudan kürgän belän üzännän kürgän ber tügel.

Cilne toyıp, tavışın işetep kenä bula, kürep bulmıy.

Härkem üzen genä haklı sanaganga tatulık yuk.

Hayvannar dönyasındagı tärtipkä iseñ kitärlek. Bezgä alardan öyränäse dä öyränäse.

Tabiğattän çitläşep yırtkıçlarga ävereldek.

Vakıtta şäm tösle balkıp yanabız da äkerenläp erep yukka çıgabız.

Bez tügel, vakıt ciñüçe.

Soñgı sulışta vakıt bezgä mat kuyıp ölgerä.

Tormış töpkelendägelärneñ çutı-sanı yuk. Alarnıñ häle minekennän küpkä ayanıçrak dip kaygılı çagımda üzemne yuatam.

Teläk bar çakta mömkinlek bulmıy. Mömkinlek bulgaç teläk süngän bula.

Kızganuçı da, yuatuçı da kiräkmi, yärdäm itüçe kiräk.

Añlarga tügel, tıñlarga teläüçe dä kürenmi.

Tönge tınlık tartıp kiyerelgän kıl kebek teläsä kayçan özelergä mömkin.

Telen tıymavı arkasında başı tukmaludan çıkmıy.

Takıldagançı sagız çäynä - faydalırak bulır.

Ütkänne üzgärtep bulmıy.

Küpne kürmäsäñ, işetmäsäñ tınıç yäşärseñ.

Matur küñel gölbakça sıman – hozurlandıra.

Närsägäder ireşkänmen ikän, dimäk min monı ihlastan telägänmen.

Köç – ul vakıtlı gına östenlek. Faydalanıp kalırga onıtma.

Bähet bar keşegä dä tigez yılmaymıy.

Hokuk daulıy başlasañ şunduk burıçlarıñnı iseñä töşerälär.

Küp zarlanabız, ämma faydası gına yuk.

Tormıştan kanäğat bulu öçen tuktausız närsägäder ireşep torırga kiräk.

Zar härkemdä dä bar.

Artınnan etkäç menüen mende. Kararbız niçek töşär.

Bezdä keşe sälätkä karap tügel, blatka karap kütärelä.

Türägä karşı däşü – üz kulıñ belän üzeñä hökem kararı yazuga tiñ.

Gadel ciñü genä danlauga haklı.

Köçle miherbanlı da, yavız da bula ala.

Äybät keşene bolay da yakın itälär.

Keşeneñ nindilege anıñ başkalarga bulgan mönäsäbätendä kürenä.

Cmrdäge säfär tämamlanıp kilgän sıman toyıla.

Min cirdän kitkängä beräü dä üksep yılamastır.

Üzebez dä sizmästän tiñe bulmagan söyüne näfrät davılına äverelderdek.

Gailädä ızgış çıgarmaunıñ şäp ısulı – ber-bereñ belän söyläşmäü.

Tıçkan kıştırdap üz-üzen sata.

Minminlekle keşe üzennän uzdırgannarnı doşman itep kürä.

Könläşüdän doşmanlaşuga yırak kalmıy.

Üzeñne biyeklektä toyarga yaratasıñ ikän, kanatlı bulıp tuarga kiräk.

Keşe serleräk bulgan sayın üzenä nıgrak cälep itä.

Cirdä ezläp tabılmagan küktän töşär dip ömetlänmä.

İreşelgännär çik tügel dip yäşäsäñ genä yaña ürlär yaulap bula.

Küñel öçen biyeklek kenä citmi, kiñlek tä kiräk.

Ählaksızlar belän niçek dingä kaytasıñ.

Här fasılnıñ üz yämnäre, üz mäşäqatläre.

Bügenge rähätlek irtägäge mihnätkä äverelergä mömkin ikänen iseñnän çıgarma.

Yoldızlar küktä, hislär küñeldä kabına.

Ez kaldırgannı tabuı ciñel.

Yarlarsız yılga, şatlık-borçularsız keşe bulmıy.

Küktä tügel cirneñ astında nilär barın täğaen genä belgän yuk äle.

Cirdä ütkän etlekläreñ Hoday Täğalä karşında ütär dip uylama.

Bernigä dä ışanmıysıñ, ömetlänmiseñ ikän nigä yäşäp torırga.

Keşe tikşergänçe başta üzeñneñ kemlegeñne açıkla.

Gömanlap kına hakıykatkä ireşep bulmıy.

Teläk bulu belänmeni, anı tormışka aşırırga şartlar bulmagaç.

Ülä-betä tırışasıñ, tırmaşasıñ – dönyaga kiräkne haman citkerep bulmıy.

Eşne suzgan sayın vakıt kısıla bara.

Izgışlı yorttan tatulık kaça.

Halık mänfäğaten kaygırtırga tiyeşlelär nişläpter üz mänfäğatlärennän yırak kitä almıylar.

Maktangançı eşläp kürsätsä küpkä yahşırak bulır ide.

Dönyada nilär barganın añlamaska ber bügen genä tumagan.

Sakalıñnı sıpır da yäşäveñä şöker it.

Başkalarga kiräkmägän miña gına kiräk mikän.

Küpme yäşäügä karaganda niçek yäşäü möhimräk.

Vlast keşene bozıp kına kalmıy, anı baylıkka da kümä.

Üz burıçların halıkka hezmät itüdä genä khrsälär türälär ber dä vlastka atlıgıp tormaslar ide.

Eşennän kuıp tormadılar – kıskarttılar gına.

Kısrıklap kına atnı tärtä arasına kertep bula.

Üzemne üzem añlamagannı çitlär mine niçek añlasın.

Töşemle urın berkayçan da buş tormıy.

Cılınu öçen başta uçaknı yagarga kiräk.

Eş min äyttem belän betkängä ahırına citkerelmi.

Süzendä torgan keşe genä ışanıç yaulıy ala.

Örmägän etkä tayak ırgıtma.

Et tormışında yäşäp tä keşe bulıp kalgannar bar.

Keşenekenä kızıkma, üzeñneken urlatma.

Yul yörü kebek ük gomer itü dä ber dä rähät tügel.

Sagınıp köter keşeñ bulganda gına kaytırga omtılıp torasıñ.

Kürmägäneñne kürsäter yazmış, ägär cebep torsañ.

Agaç tamırdan, keşe duslık-tuganlıktan köç alıp yäşi.

Küñeldäge uyların küzläre äytep tora.

Küzlär – küñel täräzäläre.

Aşık-poşık eşläü vakıtta ottıra, sıyfatta yugalttıra.

Ahırınaça citkerelmägän eş – yäşäve ikele bulgan citlekmi tugan bala sıman.

Agaç biyegäygän sayın yäşen sugu kurkınıçı da arta.

Ber yaktan yahşı bulgannıñ ikençe yaktan naçar buluı da mömkin.

Problemaga küz yomıp yörsäñ irtäme-soñmı barıp törteläseñ.

Tınıç keşe belän añlaşuı da ciñel.

Vakıt äkerenläp barsın da üz urınına kuya.

Kübräk kiräkmägänne eşlägängä kirägenä vakıtı citmi.

Häramçılar kübäygän sayın yäşäü avırlaşa bara.

Söyläp ışandırgançı, eşläp kürsätep ışandır.

Akıl citmi torganda sizemläü yärdämgä kilä.

Küñel sizgerlege bäladän kotkara.

Sizger keşe toyıp, akıllı keşe uylap näticä yasıy.

Yalgış kabul itelgän karar yalgış atılıp kitkän mıltık yadräsenä tiñ.

Yalgışıñnı ğayepkä äverelgänçe tanuıñ häyerleräk.

Bez dip başkalarga kuşılıp bezeldägändä minlegeñne dä onıtma.

Tartıp alıngan hokuklar urınına burıçlar öyep birelgän.

Burıçlı ülmäs, ämma rähät tä kürmäs.

Başka can iyälärennän ayırmalı bularak keşegä akıldan tış maturlıknı toyu, köläşü, näfrätlänü, soklanu, şatlanu, sagışlanu kebek toygılar da birelgän.

Käyefle keşe belän söyläşüe küñelle.

Bu duamallıgı belän ya yırak kitä, ya bötenläy betä.

Ügez kotırganda annan yıragrak toruıñ häyerle.

Yarsıgan et hucasın gına tıñlıy.

Et kem aşatsa da kanäğat.

Appetit açıkkaç kilä.

Kulına akça eläksä koş totkanday şatlana.

İke yözle – şuña da östägelärgä koyırık bolgıy, astagılarnı tipkäläp yörtä.

Könläşep yäşämä, buldıklıga tiñläşep yäşä.

Kulınnan kilmägäç tele belän tegermän tarta.

Köçle dip toyılgan keşeneñ dä yomşak yakları bulmıy kalmıy.

Tıyıla belmäsäñ upkınga tägäräve dä ozak tügel.

Parlı sanalap ta küñelläre belän yalgızlar bar.

Yar tabu ozak tügel, üz tiñeñne tabuı gına kıyın.

Mähäbbättä variantlar küp, şuña da söygän yarlarnı saylaganda yış yalgışabız.

Kügärçennärdäy görläşep yäşäü yalkıtkangamı ara-tirä çukışıp ta algalıybız.

Üzem küñelsez bulganga dönya küñelsez toyıla.

Yahşı keşegä küñel üzennän üze tartıla.

Keşeneñ kemlege kılgan ğamällärendä kürenä.

Kırgıy atka tışau kiräkmi.

Türä üzennän uzdırgannı yaratmıy.

Üze genä tügel karaşı da çirkandıra.

Atıñ öreksä dä üzeñ örekmä.

Kükne küzätep barganda tümgäkkä abınıp yıgıldı.

Küñel kuşuı buyınça eşlängän batırlık kına – çın batırlık.

Sizgerlek bulmaganda sörlegü yäki mätälü ozak tügel.

Bügengese dä häl itelmägän kileş kiläçäkkä plan korıp bulmıy.

İrtägäge kön bügengedän tua.

Ellar ber-berenä yalganıp gomer bocrasın täşkil itälär.

Yalkau aklanır, eşçän maktalır.

Eşlärgä telämäsäñ säbäplären tabıp bula.

Bötenläy ömetsez dip sanalgan hällärdän dä çıga algan çaklar bar.

Saklanam diyä-diyä äkäm-tökämgä ohşap üz eçenä kerep biklände.

Härnärsä çamasın belgändä genä yahşı.

Kayçakta kuldan kilmägänne eşlärgä mäcbür itälär.

Maktançıknıñ kulınnan kilmäsä dä telennän kilä.

Hästärle dä inde – çalbarga hätle kayışın alıp kuygan.

Yazmıştan uzmış yuk dibez ikän, dimäk bezneñ gomer rels östendäge poyızdga ohşaş bulıp çıga.

Mömkinlege bulganda selkenep tä karamadı, mömkinlege betkäç ürle-kırlı sikerensä dä yuk inde.

Yardäm itä belmäsä dä taläp itä belä.

Başlap taşlanası eşne bezdä reforma dip atıylar.

Akça komga akkan suday – bülenep birelä, urınnarga kitä häm ezsez yugala.

Yuknı ömet itkänçe bulganınnan faydalana tor.

Bulmasın belä torıp keşene yukka ömetländermä.

Yardäm itü tügel teläktäşlek belderüçelär dä yuk.

Yaña yıl teläkläre ütälä togan bulsa bez inde küptän ocmahka tiñ tormışta yäşär idek.

Türä süz çıbırkısı, kötüçe üz çıbırkısı belän kualıy.

Mäcbür itü, kurkıtıp toru, köçläülärsez ildä vlastnı küz aldına kiterep bulmıy.

Minem hakta üzem belmägänne ğadättä çitlär yahşı belä.

Tormışta bar närsädän dä kanäğat bulu öçen tile bulıp tuu kiräk.

Tilene yumalap kına tuktatıp bula.

Teşlänäseñ kilmäsä, yarsıgan et yanınnan uzmavıñ häyerle.

Häyerçe telänep, ärtis kıylanıp tamagın tuydıra.

Sorasañ kapçıklap saran birer kaşıklap.

Gomer kıskargan sayın yäşäü teläge arta bara.


Click or select a word or words to search the definition