Litsenziyäle Kış Babay

(yumoreska)
«Sangordormarstroy» açık aktsionerlık cämgıyatendä eşläüçelärneñ balaları öçen bıyıl da Çırşı bäyrämen zurlap uzdırırga buldılar. Zamanalar avır dip, balalarnıñ küñellären töşermässeñ bit inde. Büläklärne dä zurdan äzerlädelär - küñelläre bulsın, äydä!

Çırşı bäyräme Kış babaysız bulamıni?! Başka yıllardagı kebek, älege vazifanı svarşik Zöbäyergä yöklädelär. Berençe märtäbä tügel, räten beläseñ, balalarnıñ küñellären kür äydä, didelär aña...

31 ğıynvar könne, balalarnıñ Çırşı bäyräme iñ kızgan çagında, Zöbäyer direktor kabinetınıñ kabul itü bülmäsendä utıra ide inde. Sekretar Galya belän cıyıştıruçı Valya aña sakal-mıyık yabıştırıp, bitlären grimlap, pariklar kiderep mäc kilälär - aşıgalar, kabalanalar. Şulay bulmıy ni, Çırşı bäyräme uza torgan aktlar zalınnan inde berniçä märtäbä balalarnıñ kümäkläşep: «Kış babay, tizräk kil!»- dip kıçkırgannarı işetelde bit.

Şulay mäc kilep, Zöbäyerdän inde Kış babay yasap beteräbez, dip torganda, kinät kabul itü bülmäseneñ tışkı işege açılıp, annan çana söyräp häm artınnan hätsez genä suık iyärtep çıp-çın Kış babay kilep kermäsenme! Härhäldä, ul näq äkiyät-kinolarda kürsätelä torgan Kış babaylarga ohşagan ide.

Älege tamaşadan sekretar Galyanıñ kulındagı pumalası idängä töşep kitte, cıyıştıruçı Valya, üze dä sizmästän, Zöbäyer-Kış babayga dip äzerlängän büläklär kapçıgınnan ber prännek alıp kaptı da, anı mış-mış kilep çäyni başladı, Zöbäyer isä kauşaudan tunın tiskäre yagı belän kiyep kuydı.

Kilep kergän Kış babay açulı ide. Närsädänder kanäğat tügellege kürenep tora.

- Bu nindi başbaştaklık,- dip cikerde ul iñendäge kapçıgın idängä kuyıp. - Kem röhsät birde sezgä? Samozvantsı!

Zöbäyer, nider äytergä telägändäy, avızın ber açtı, ber yaptı. Yabıştırılgan mıyıgınıñ ber yagı kubıp, idängä töşte.

- Sin çto li, Kış babay,- dip göreldäde kerüçe.- Kış babay bulıp kiyenergä litsenziyäñ barmı soñ sineñ?

Zöbäyer ık-mık itte:

- Yıl sayın min Kış babay bulıp kiyenä idem. Berkemneñ dä litsenziyä-mazar soraganı bulmadı alay,- dide ul, süzsez kalası kilmiçä.

- Ä bıyıl başkaçarak. Ber cirdä dä litsenziyäsez Kış babay bulırga tiyeş tügel. Bıyıl älege eşne «Ded Moroz» çastnıy predpriyätiyese üz östenä aldı. Menä litsenziyäbez.

Kış babay kuyın kesäsennän sertifikat sıman närsä çıgarıp Zöbäyergä suzdı. Älege piçätle käğaz kuldan-kulga küçte, anı tegeläy dä, bolay da äyländergälägäç: «Nişlätäseñ, piçäte bulgaç, zakunnıydır inde»,- dip hucasına kire kaytarıp birdelär. Zöbäyer telär-telämäs kenä tunın saldı, sakal-mıyıgın kubardı da, grimnarın sörtergä dip, yuınu bülmäsenä çıgıp kitte. Balalarnıñ: «Kış babay, tizräk kil!» - digän avazları altınçımı-cidençeme märtäbä işetelgändä, litsenziyäle Kış babay Aktlar zalına taba atlıy ide inde...

... Yegerme minut ütteme-yukmı, Kış babay kabat kabul itü bülmäsenä kilep kerde. Çanasındagı tartmadan keçkenä genä kassa apparatı tartıp çıgardı da, eşlekle kıyafät belän, çart-çort apparat töymälärenä basa başladı. Apparatta närsäder çıcladı, närsäder gıcladı, närsäder çırkıldap kuydı da, algı öleşennän portyanka qadär käğaz suzılıp kilep çıktı. Kış babay älege käğazne sekretarga suzdı:

- Kış babay hezmätläre öçen akçanı bezneñ sçetka küçerersez. Min aşıgam, başka Çırşı bäyrämnärenä dä keräsem bar,- dip, niçek kapılt kına kergän bulsa, şulay cält-cält atlap çıgıp ta kitte.

Sekretar çek käğazenä küz saldı. Ä anda, iñ öskä «ÇP «Ded Moroz» häm «Priyätnogo prazdnika!» digän süzlär yazılgan. Annan soñ nindider añlayışsız sannar tezelep kitkän. Ä iñ aska, ere häreflär belän: «İtogo: 5500 rub»,- dip kuyılgan ide.


Click or select a word or words to search the definition