Kunak Kızı - Rezeda Şäripova

(hikäyä)
Fayagöl bar eşen taşlap avılga äbisenä kunakka kaytıp kitte. Eşe dip, şul çıgarılış kiçäsenä külmäk ezlise, medosmotr ütep beteräse inde. Şulay kapılt kına kaytıp kitüenä Büläk avılındagı Bulat isemle bik çibär yeget säbäpçe buldı. Näq Dima Bilan inde menä! Äle annan da şäbräk bulmasa! Ägär dä tege könne poliklinikadan çıkkaç matayına Gölgenäne utırtıp kitüen kürep kalmagan bulsa, bolay aşıkmas ta ide. Yuk, şundıy asıl yegetne nindider avıl kızına birergäme?!

Äbiseneñ » ay, hodayım«ına karamastan, iñ kıska itägen, örfeyadäy yuka, ütä-kürenmäle bluzkasın, kadak kebek neçkä ükçäle tüfliyen kiyep, ul kert-kert basıp, avıl klubına yeget daularga yul tottı. Daularga digäç, yuk, sugışıp yaulamayaçak Fayagöl mähäbbäten. Älbättä, kiräk bulsa Bulat öçen sugışırga da äzer, ämma mondıy kübäläktäy ciñel, yuka gäüdäse belän äbise äytkändäy, «dastuyın» Gölgenä yanında ciñü şansı nulğä tiñ ikänne ikegä ikene kuşkaç dür bulganı kebek açık belä. Yuk, Fayagöl maturlık belän aldıraçak!

Änä bit, ul klub işegennän atlap kerügä, dömber-şatır, bögelä-sıgıla biyep yatuçı yäşlär şıp tuktap, avızların açıp, Fayagölgä töbäldelär. Ul arada kızu köy tınıp, moñlısına alışındı. Yegetlär yannarında sırpalanuçı kızların onıtıp, därräü Fayagölgä taşlandılar. Härkemneñ çibär kunak kızı belän biise, tönlä anı ozatu bähetenä ireşäse kilä ide. Şulçak kunak kızı öçen kitte törteş, kitte sugış! Närsälärdär oçtı, närsälärder sındı.. Äle yarıy barısına Bulat nokta kuydı. Urtalıkta bu mähşärdän kaya kaçarga belmi aptırap-kurkıp torgan Fayagölne köçle kullarına eläkterde dä, klubtan alıp çıgıp yögerde.

...Tämle töşenä erep, hıyal kanatında tibrälüçe Fayagöl bu karañgı töndä Büläk avılında Bulat belän Gölgenäneñ kapka töbendä ber-bersenä sıyınıp, yoldızlar sanap utırganın başına da kitermi ide. 10 yortlık Büläk avılında klub ta, kunak kızları öçen ätäç kebek sugışırlık yegetläre dä kalmaganlıgın ul kayan belsen! Fayagölneñ keçkenäräk çakta kına avılga kunakka kaytkanı bar şul, anıñ äbise inde küptän yuk.

Ä Bulatnı, çınnan da, Fayagöl poliklinikada tabibka çirat kötep utırganda kürde. Şunda ber-ike kälimä süz katıştılar. Äle Gölgenäse kilep çakırmagan bulsa, kübräk tä söyläşä algan bulırlar ide, ikençe tabibka çiratları citkän ikän, alar şunda yögerdelär. Bulat öçen dönyada berençe sıynıftan uk bergä kürşe avılga citäkläşep ukırga yörgän Gölgenädän dä yakın kız yuk ide. Älegä...

İyül, 2009, Aznakay.