Koralıñ Korılganmı?

(hikäyä)
Dönyası bik kurkınıçka äylände, şuña kürä Gapteri pistolet satıp alırga uyladı. Ämma koral yörtüneñ kolak işetmägän “eski”läre bar ikän. Başta Gapterigä psih tügel digän beleşmä tabarga turı kilde. Koralnı saklar öçen öyeñdä seyf bulu da mäcbüri, di. Kiräk bulgaç, kiräk inde, taptı Gapteri seyfın da. Annan ul pistoletnı öydä häm uramda korılmagan kileş yörtergä dip kul kuydı. Kıskası, Gapteri pistoletlı buldı.

Yuraganga yuş kilä digändäy, äyterseñ, Gapterineñ pistolet alganın gına kötep torgannar, könnärdän ber tönne bakçada täräzä töbendä kemnärneñder kıştırdaganına, çış-pış söyläşkänenä uyanıp kitte ul. "Älbättä, karaklar!" - dip uyladı Gapteri. Ul yatagınnan sikerep torıp, seyfka yögerde. Kauşaudanmı, seyfnıñ aça torgan kodnı onıttı. "Min kaysı yılnı öylängän idem soñ äle?" - dip mañgay tiren sörtä-sörtä berni belmi-sizmi mış-mış yoklap yatuçı hatınına töbälde.

Ul öylängän yılın isenä töşerep, seyfnı açkanda burlar kuhnya täräzäsennän ürmäli başlagannar ide inde. İnstruktsiyä buyınça korılmagan pistoletnı alıp, anı ışanıçlı saklanu däräcäsenä citkergänçe ugrılar Gapterineñ kolagına bastılar.

- Kulıñnı kütär! - dide öygä töşkän ay yaktısında kara oyık arasınnan ike küze genä yıltırap torgan ozın buylısı.

- He, pistoletı da bar! - dip mıskıllı kölde saraydagı sugım ügeze kebek äzmäverdäy gäüdälese.

-Egetlär, närsä buldı, ni kiräk? -dip köçkä huşın cıyıp süz kata aldı Gapteri.

- Canıñmı, malıñmı? - dip ozını Gapterineñ ör-yaña pistoletın der-der kaltırap torgan kulınnan tartıp aldı da, ber sekundta çık-çık korıp, hucasınıñ baş çigäsenä teräde.

- Tönlä mendär astına kuyıp yoklıylar anı! - dip söylände tegelär.

Şau-şuga moñarçı yoklap yatkan häläl cefete uyandı häm karañgıda ber kötü şäüläne kürep, närsä bulganın da añışmıyça, militsiyä serenasınnan da bitär gülärgä totındı. Anıñ tavışına uramda kürşe-tirä etlär kuşıldı. Karaklar hälneñ bolayga kitäsen kötmägännär ide, ahrı, aptıraşta kaldılar. Kinolarda kürgänçä, Gapteri momenttan faydalanıp, ayagı belän ozın buylınıñ kulınnan pistoletın bärep töşerde häm anıñ östenä sikerde. Hatını da ireneñ batırlıgınnan kalışmadı.

- Militsiyä! Talıylar, üterälär! - dip yuanınıñ östenä taşlandı.

Kıyafäte genä kurkınıç buldı, ahrı, baskan cirennän ut çıgara torgan taza hatın sikerügä, yuan karak şapıldap idängä audı häm añın yugalttı.

- Gapteri, ällä ülde inde bu närsä?! -dip kıçkırdı hatın.

Ozını belän ber genä kıtay häm yapon köräşendä dä kürelmägänçä äş-mäveş kilep yatuçı Gapteri:

- Ülsä, monda yärdämgä kil, yatma anıñ östendä cäyelep, - dip yärdämgä çakırdı.

Hälneñ katlaulana töşkänlegen çamalap, ugrı açık täräzägä yögerde.

- Kaya, kaya aşıgasıñ, canım! - dip bar kurkuın onıtkan hatın anıñ ike balagına yabıştı.

Ugrınıñ bu ärsezlektän kotı botına citte, ul çalbarınnan şuıp çıgıp, bakçaga, karañgılıkka kerep çumdı.

Kaçtı, şaytan! - dip özgälände hatın ugrınıñ töşep kalgan çalbarın selki-selki.

Militsiyä näräde kilep citkändä alar yuan ugrınıñ ayak-kulların bäyläp, ikäüläp anıñ östendä tirlären sörtep utıralar ide. Ä pistoletnı Gapterineñ hatını köçkä karavat astınnan ezläp taptı.

Click or select a word or words to search the definition