Klonlaşkan Gayfulla

(yumoreska)
Gayfulla eştän kaytkaç, ğadättägeçä, divanga kırın yatıp, gäcit karaştıra ide. Küze dürtençe bittäge säyer genä belderügä töşte. İmeş, nindider ber fänni-tikşerenü institutında keşene klonlaştıru (ber küzänägen alıp, aña ike tamçı su kebek ohşagan biologik küçermäsen yasau) buyınça eksperiment ütkärä başlagannar. Eksperimentka katnaşırga teläüçelärne saylau konkurs buyınça bulaçak. Ä monıñ öçen konvertka salıp, öçkä dürt zurlıktagı ike fotoräsem, avtobiografiyä yazılgan käğaz kisäge häm... çänçä barmak oçınnan kisep alıngan ber çemetem tire (anısı küzänäk alu öçen kiräkter inde) cibärü dä citä ikän.

Gayfi ike dä uylap tormadı. Näq belderüdä kürsätelgänçä eşläde dä konvertnı poçta ärcäsenä iltep saldı. Eksperimentta katnaşa almasam da ällä ni zur yugaltu bulmas, dide ul...

Ber yılga yakın vakıt uzdı mikän, Gayfulla bu vakıyga turında onıtıp ta bara ide inde, könnärneñ berendä fänni-tikşerenü institutınnan olı gına möherle konvert kilep töşmäsenme?! Açıp ukıgan ide Gayfi, şakkattı: tege eksperimentta katnaşu hokukı, ni säbäpleder, näq menä aña birelgän. Häm ul konvertka salıp cibärgän çänçä barmak tiresennän alıngan küzänäktän näq Gayfullaga ohşagan ber adäm ämälläp tä kuygannar ğalim-golämälär. İnde laboratoriyä şartlarında tiz genä üsterep, Gayfi yäşenä dä citkergännär. Menä häzer şul klon-Gayfi belän originalın çagıştıru maksatında, Gayfullanı institut laboratoriyäsenä çakıruları ikän. Gayfulla, ozak baş vatıp tormadı, älege hatnı kesäsenä saldı da, kürsätelgän adres buyınça institutka yul aldı.

Klonlaştıru gacäp närsä ikän! Gayfine ber bülmägä alıp kergännär ide, igezäge kebek üzenä ohşagan ber adämne kürep, çak kına yıgılıp kitmäde. Suygan da kaplagan Gayfi inde menä. İyäk oçındagı miñenä qadär anıkı. Tere tügelder bu, balavızdan yasalgan sın gınadır, dip çemetep karamakçı bulgan ide, tegese, telgä kilep: «Fäläneñne fälän itim...» — dip cide katlap sügenep algaç, klonnıñ kıyafäte genä tügel, holkı da üzenä ohşaganlıgın añladı Gayfi. Vät şundıy igezägeñ öydä bulsa, dip hıyallandı ul. Eşkä dä şuşı klonnı gına cibärer ide. Ä üze ul tapkan akçanı tuzdırıp, yal itep, tüşämgä tökerep kenä yatır ide. Änä şundıy tatlı hıyallar belän yandı bu vakıtta Gayfi. Ğalim-golämälär çıgıp torgan arada, uñaylı vakıt tabıp: «Sin, agayne, täcribä küsese şikelle yatma monda, minem yortka yäşärgä küç, irekle bulırsıñ», — dip, käğazgä yazıp adresın törtte...

Gayfullaga bu yulı da bähet yılmaydı: könnärdän berkönne, may koyaşıday yılmaep, klon-Gayfi anıñ yortına kilep kerde. «İnstituttan bötenläy kaçtım, tugan. Häzer sindä yäşärmen inde», — dide ul.

Barısı da min uylagança bara, dip söyende eçtän genä Gayfi. Ä üze:

— Äydä soñ, yäşik. Tik ikebez bergä hatın küzenä çalınmasak yahşırak bulır, şuña kürä, şifonerda yäşärseñ inde, yäme. Annan soñ buınnarıñnı beraz yazar öçen minem urınga eşkä dä bargalarsıñ şunda, — dip östäde.

İrtägesen, kileşengänçä, klon-Gayfi eşkä kitte, originalı öydä kaldı. Könne buşka uzdırmadı Gayfulla: başta tuygançı yokladı, soñrak barga kerep, kübengänçe sıra eçte. Ber-ike säğat plyacda sırt kızdırdı. Annan öyenä kaytıp, televizorga tökände.

Kiçen klon-Gayfi dä eştän kayttı. Döresräge, anı kaytarıp taşladılar. Eştä poluçka birgännär ikän. Hezmättäşläre belän şunı yugan. Şuña kürä, üzen beleştermäs däräcädä iserek ide. Ul mükäli-mükäli karavatka kerep audı, ä Gayfullaga şifonerga kerüdän başka çara kalmadı. Hatını Mäçtürä küzenä çalınudan şürläde ul. Klon-Gayfi yomşak divanda tägärägändä, Gayfulla tönne şifonerda gına uzdırdı.

İkençe könne klon-Gayfi eşkä bara almadı. Başı bik çatnıy ide şul. Gayfulla anı cälläp, kürşegä kerep, äcätkä ber yartı alıp çıktı da, anı igezäge aldına utırtıp, üze eşkä yögerde. Ul kiçen kaytkanda, klon-Gayfineñ käyefe kütärenke ide. Eştän häldän tayıp kaytkan Gayfullaga:

— Kärimgä yöz sum burıçıñ bar, agayne, bügen annan ike yartılık akça alıp torgan idem, — dide.

Klon-Gayfi öçençe könne dä eşkä bara almadı. Anıñ tagın mahmırdan başı çatnıy ide. Tik Gayfulla bu yulı arakı ezläp yögermäde, kiräk bulsa, tabarsıñ dip, eşkä kitep bardı.

Kiçen telen asılındırıp eştän kaytıp kergän Gayfulla, yokı bülmäsendä nindider säyer ıgı-zıgı işetep, tuktap kaldı. Menä klon-Gayfineñ aygır keşnägän kebek kölgän tavışı işetelde. Şulçak Mäçtürä dä gel yuktan gına çıtlıklanıp kıtkıldıy başladı. Gayfulla barısına da tüzgän bulır ide, yuk, monısın kütärä almadı. İşekne kiñ açıp, yokı bülmäsenä uzdı. Ä bu vakıtta, çın irem belän yatam, dip uylagan Mäçtürä, älege tamaşanı başına sıydırırga telägändäy, äle klon-Gayfigä, äle Gayfullanıñ üzenä karap tordı da, huşı kitep, karavattan idängä şuıp töşte.

Click or select a word or words to search the definition