Kayt, Enekäş!

(yumoreska)
Karale, enekäş!. Kotıbıznı aldıñ bit äle nimes cirennän hat cibärep. Bez andıy fasunlı konvert kürgän keşemeni? Yarıy, açıp ukıgaç añladık tagın sin sırlagan hat ikänen.

Äle yanımda, sälam yaz dip, ciñgäñ basıp tora? Tuktale, minäytäm, monda sälam kaygısı tügel, tämam aptıraş bit şundıy cähännämnän hat kilep teşkäç! İñ äüväle, enekäş, şunı äytep bir: niçek kilep eläkteñ sin nimeslär arasına? Tege çaknı avıldan mal duhtırına ukıym dip çıgıp kaçkan ideñ bit. Şul kileş ezeñ suındı. Döres, "ul germannarga eşkä yallanıp kitte", dip kaytıp lıgırdagannar ide. Ämma, kurşe Salih abzıy belän bez moña barıber ışanmadık. "Sugışta kem ciñde? Bez ciñdek! Şulay bulgaç, nimeslär üzläre bezgä kilep yallanırga tiyeş!" – dip kükräk suktı Salih abzıy.

Sin hatıñda ber baynıñ atların karıym, dip yazgansıñ. Siña ışansak, alarnıñ atları bezdän yahşırak yäşi bulıp çıga. Yarar, şulay da bulsın di. Läkin bit äle sin şul atlarnı karagan akçaga fatir belän maşina da aldım digänseñ. Äy, şıttırasıñ da inde, enekäş! Kurşe Salih abzıy, änä, gomere buyına kolhoz atların karadı. Usaktan buralgan alaçıgı belän vatık matayınnan gayre bugı da yuk. Äle ul üzen, aru yäşim dip, hökümätkä rähmät ukıy. Yartı pensiyäse gaz belän utka kitep barsa da...

Sin, enekäş, nimeslärdä akçanı köräp alalar, ä kibetlärendä canıñ ni teli, şul bar, dip şapırınasıñ. Bezgä dä Sabantuy aldınnan ike yözär sum öläştelär. Äle citmäsä prit uñış cıygaç, tagın şulkadär alırsız dip ışandırdı. Ä avıldagı fermer laregı sineñ nimes kibeteñnän ber dä kim tügel. Häzer anda çupa-çupıstan başlap kıyar losonına tikle bar.

Enekäş, ägär akılıña kilep, kire kaytırga uylasañ, pacalıstı, işeklär açık. Mal duhtırına avılda çumara däçurta häzer. Döres, kolhoz taralıp bara, anıñ karavı, yort sayın diyärlek ikeşär-öçär baş sıyır. Balda-mayda gına yözäçäkseñ.

Menä äle ciñgäñ bik nık borçıla. Ul çit il restorannarında ällä nilär aşap aşkazanın bozgançı, üzebezdä tokmaçlı tavık şulpası gına çömerep yatar ide di. Kaytışlıy buş kul belän kaytmas öçen beraz totılgan nimes maşinası apkaytırsıñ. Ozın süzneñ kıskası, sin anda, enekäş, iza çigep, nimesne bayıtıp yatma. Ciñgäñ äytmeşli, küçtänäçeñne cıy da yulga kuzgal. Siña eş mondz da citärlek. Äle menä sıyır bozaularga tora, sarıklar da bäkäylämägän. Ägär yulıña akçañ kalmasa, oyalıp torma, yaz. Kolhoz birgän tege ike yöz täñkäne telegraf belän salırmın.

Click or select a word or words to search the definition