Kärimäkäy Canaşım

Hikäyä

— Bulır siña, bar, Kärimäkäy — canaş kınamı soñ ul, üzägeñä ütep, bäğır kismägeñä äverelmägäye!
Mondıy ärläülärgä, Kärimäkäyne enä-ceptän uzdırularga Väli ällä kayçannan künegep betkän ide. İñ äüväl apası bitärläp karadı, annan çirat änisenä küçte, inde menä ätise açulana yegetne, ä ul ser birmi, “Kärimä” dip uyana, “Kärimä” dip yoklarga yata. Mägärem ki bäheten sıyır sözmäsä, bıyılga citeşmäsä dä, bir-ike yıldan aña öylänergä niyätläp tora.
— Siña bit äle unaltı da tulmagan, adäm täğanäse! Mäktäbeñne beter! “Bişle”dän “öçle”gä tägäräp mataşasıñ!
Väli barıber ser birmi.
Yarar, ike yıldan bulmasın, biştän soñ öyläner. Armiyä hezmätennän kaytuına, yegerme ber yäşlärendä!
— Sineñ äle institutta ukıysıñ bar. Kartaygan köneñdäme, barıber, diplom kiräk ul! Gomer buyı kara eştä çilänäseñ kilmäs...
Keşe ber dä üzen belmi inde ul! Ätise dä, änise dä hiç kenä utız yäşlärenä qadär cil sugarıp yörmägännär, koyaşnıñ mullı, rizıknıñ işelgän, dönyalıknıñ çäçäkkä törelgän çakların da kötep tormagannar, ni yul, ni kön özelgän mart ayında öyläneşkännär...
— Yort-cirsez nişlämäk kiräk! Öylänäm digäç tä, anıñ, yäşi başlagaç, aları da kiräk!
Närsä, kem äle fatir aluga, dönyası caylangaç öylängän? Tulay torak betkänme, hiç yugı äti-änise belän fatirların urtalay büleşer. Apası da kiyäügä çıgar, ire anı üz yanına alır. Ul diplom digänen dä çemodanında yäşerep saklamas. Kiräk bulır digännär ideme? Nigä başın çilätep ukıp yörgän äle ul!..
— Yort-cir belän genä bulmas äle ul, ulım! — dip, uyga kalgan ätise akıl birüne mäğkul kürde: — Menä min, yäşli öylänep, balalar üsterep... Sezne inde... Sezne... Ni maşinada yöri almadım keşelär kebek, ni tormışımnı caylarga ölgermädem! Kärimäkäy, bäğır, dimä, yäşrägen alırsıñ, çibärrägen! Maşinañ gına bulsın, fatirıñ da bar, eşeñ dä yahşı, äye...
Maşinañ bulu naçar tügel inde ul! Uramnardan vıclatıp kına uzasıñ, kızlar öyerläre belän artıñnan çabalar. Niyätlägän äybereñ bulgaç, ireşmi kalmıysıñ anı...
Tagın da suzarga yaramas, Kärimägä öylänergä kiräk. İke irdän ayırılıp, ikesennän dä ike balası bar, imeş. Ni bulgan, üzeñnekeläre tugançıga qadär üsä torırlar!..
— Sin närsä, şuşı kırık biş yäşeñdä keşedän kalgan hatın alıp, kırık yat balalar üsterep!
Väline kart äti belän änise tagın bitärläp taşladılar. Ullarınıñ inde başı peläşlängän, borın östenä dä küzlek menep utırgan. Ä alar haman akıl öyrättelär:
— Bu baylıklarıñnı anıñ balalarına kaldırırgamı?!.

2000.

Click or select a word or words to search the definition