Cäyge Vakıt

Hikäyä

Kilen aşı kebek buldı bu, çistıy. Söyläsäñ, adäm oyatı, digändäy, söylämäsäñ — tel kıçıtıp tora.

Ul yılda cäyge vakıtka 24 nçe martta küçärgä buldılar. Aldan uk färmanın prezident äfändebez belderep kuydı. Hämmäbez meñ kat bähetle idek. Menä bit, ber säğat aldanrak toraçakbız, nikadär utka, suga, başkasına ekonomiyä bulaçak ikän, yağni dä zur baylıklarıbız yanga kalaçak, imeş. Söyenmi dimeni, bezneñ hakta küpme kaygırtuçanlık kürsätälär bit!

Vakıtnı tönge säğat ber belän ike arasında küçeräçäkbez ikän. Yoklamadım, näq şulay eşlädem.

İrtän torıp, televizornı açtım. Anda näq menä şul vakıt mäsäläsen curnalist äfände häm hanımnar belän ber böyek ğalim häl itep mataşa idelär. «Säğategezne küçerergä onıtmagız!»— dip kiñäş birdelär alar. Citmäsä: «Nikadär algarak küçersägez, şul qadär üzegez öçen dä yahşı bula!»— didelär.

Bolar döres söylilär bit! Näq şulay!

Öydäge säğatlärneñ hämmäsen tagın da berär säğatkä alga küçerep kuygaç, küñel şatlık tuldı. Ah, didem, eşemä soñga kalmagayım!

Ä bügen eşenä soñga kaluçılar buldı. Min alarga mıskıllı gına yılmaep, hällärenä kergändäy alardan eçtän genä rähätlänep kölep tä yördem. Tuktale, min äytäm, üzemnän dä kölüläre bar dip, säğatemne tagın da ber säğatkä alga küçerep kuydım. İnde eş vakıtı tämamlanıp ta kilä ide, ämma bügen beraz totkarlanırga turı kilde. Şulay da säğatneñ tiz yöreşe mine iskitkeç kuandırdı.

Yulda radio tıñlap kayttım. «Cäyge säğatkä küçärgä onıtmagız! Säğatläregezne ber säğatkä alga küçeregez!»— dide andagı curnalistka hanım. «Yuk inde, didem üz aldıma, min ul qadär ük yülärme ällä, sez äytkän sayın vakıtnı üzgärtep torırga!»

Ä şulay da rähät, cämäğat, koyaş älegä kükneñ yugarı katında, kön yaktı, min inde eştän dä kaytıp baram. Nikadär ekonomiyä, nikadär fayda!

2007.

Click or select a word or words to search the definition