İr digän irkä bulıp kitte bit...

(Kazah telennän irken tärcemä)
Katnaşalar:

Hörşidä,
Mörşidä - urta yäştäge ike hatın, ikeseneñ kulında tulgan sumka, bötenläy arıgannar.

Hörşidä (Mörşidäneñ artınnan torıp). Çiratnıñ artı sezme?

Mörşidä (kanäğatsezlek belän). İnde, min bulmaganda, kem bulsın soñ?!..

Hörşidä. Äy, tuktale, sin Mörşidä tügelme?

Mörşidä. İye, min Mörşidä. Üzeñneñ dä tavışıñ tanış... Tukta, tukta, sin bit Hörşidä, äyeme?

Hörşidä. Näq şunıñ üzemen! Fu-u-u, elekke vakıtta - bergä ukıp yörgän çakta - koyaş nurı kebek söykemle ideñ bit! Närsä bulgan siña?

Mörşidä (üpkäläp). Üzeñ bik uñgansıñ ikän! Näq minem äbiyemneñ iske käveşe kebek böreşkänseñ dä kalgansıñ iç!

Hörşidä. Ä üzeñ, üzeñ närsä? Çäynekneñ kitelep töşkän borını kebek käkräyep kalıp, başka keşelärdän kölgän bulasıñ tagın!

Mörşidä. İh, Hörşidäkäy! Kiyäügä çıktım digänçe başım kamıtka eläkte dip äytmäskäme?

Hörşidä. Eh, döres äytäseñ dä inde, Mörşidä!.. Yuk, uylap karale: nişläp bu bezgä kiyäügä çıgunıñ cene kagılgan ide? Yögän belmägän kırıkmış tay şikelle rähätlänep tipterep yörmäskäme şunda?

Mörşidä. Äytmä dä inde. İr digän irkä bulıp kitte bit äle...

Hörşidä. İrkä digäneñ ni? Alar bügenge könne näq “Alma, peş, avızıma töş”kä küçte bit äle. Küptän tügel genä bazardan beraz it-tavık, yäşelçä-cimeş alıp, ike sumkanı tutırıp: “Sin öygä bara tor, min parikmaherskiyga kerep çıgıym äle”, - dip, avtobuska utırtıp cibärgän idem. Kiçkä taba arıp-talıp, bötenläy häldän tayıp öygä kaytsam, sumkanıñ berse dä yuk. Ästäğfirulla, bolar kaya ikän dip, iremnän soraştırsam, mäsälä bolay ikän. Bu bezneñ miñgeräü avtobuska utırgaç, ike sumkanı ike yagına kuygan da, üze tirän uyga çumgan ikän. Şundıy ber ğadäte bar cülärskiy: küzen ber noktaga tekäp kala da şulay utıra birä. Näseldän kilgän, küräseñ: atası gomer buyı deputat bulıp, prezidiumnarda utırgan. Şulay itep, avtobus öygä yakınayganda, şul uylı kıyafäte belän töşep kalgan ikän. Ä bezneñ ber ay aşarlık azık-tölegebez – tü-tü! – avtobus belän kitep kalgan. Ya, moña ni äyterseñ inde?

Mörşidä. Hi, şunı söyliseñ! Bezneñ öydäge açık avız tamak tügel, biş yäşlek kızıbıznı tramvayda taşlap kitkän bit! “Gäcit ukıp utıra idem, balanı onıtıp tramvaydan töşep kalganmın”, - dip tora bit äle. Ber kön buyı ezläp köçkä digändä taptık bit päpätäyebezne!

Hörşidä. Ya, şunnan ni buldı?

Mörşidä. Äy, ni bulganın nişlätäseñ? Bezneñ - hatın-kızlar - köne kara töngä äverelde bit äle... Kiyäügä çıkmasañ da bäla, çıksañ da bäla! Küptän tügel: “Vannaga su tutırıp kuyçı, yuınıp alıym”, - dip vannaga cibärep, üzem beraz çerem itep alıym digän genä idem – bervakıt işekne beräü bomba şartlatkan kebek kaga başladı. Açsam, astıbızdagı kürşe karavıl kıçkırıp tora: “Öyemne su bastı, krannarıgıznı yabıgız, üldem-bettem!” - dip çäreldäp tora. Vannaga barsam, älege bezneñ miñgeräü krannı açkan da, üze pivnuşkanıñ kranına kitep kalgan ikän! Moña ni äyterseñ inde?

Hörşidä. Ya, şunnan ni buldı?

Mörşidä. Ni bulsın inde? Ber ay buyı şul kürşebezneñ su baskan öyen remontlaşıp yördek.

Hörşidä. Su digäç, isemä töşte. Min dä küptän tügel bezneñ öydäge açık avızga: “Sin dä ber keşe bulıp, öydäge kerlärne yuıp kuy äle”, - dip vannaga cibärgän idem. Bervakıt, bu nişläp yata ikän dip barsam, siña – äkiyät, miña – çın! – minem söttäy ap-ak koftamnı üzeneñ sası noskiları belän kuşıp yuıp yata ikän!

Mörşidä. Ya, şunnan ni buldı?

Hörşidä. Ni bulsın inde? Musorkaga taşlarga turı kilde.

Mörşidä. İreñneme?

Hörşidä. Yuk la, koftanı.

Mörşidä. Tege yulı: “Min munçaga barıp kilim äle, kazanga tamak salıp kuydım, karap kuyarsıñ”, - dip kitkän idem. Kaytsam, yortnıñ eçe kap-kara töten. Yarıy äle, irtä kaytkanmın, yugıysä yanıp betkän bulır idek. Üze şul kap-kara töten eçendä bik matur gına gırıldap yoklap yata, meskenkäyem! Iştannarı yana başlasa da uyana torgan töre yuk!

Hörşidä. Tuktale, Mörşidä! Min bügen bezneñ öydäge açık avızga töştän soñ öydäge kerlärne ütükläp kuy, dip kitkän idem. Anıñ da ütükne kabızıp yoklıy torgan ğadäte bar... Yuk, tormıym başka, kitim äle tizräk...

Mörşidä. Ägär çınlap ta şundıy ğadäte bulsa, ällä pocarnıynı çakırıyk mikän?

Hörşidä (eraktagı närsäneder kürergä tırışıp küzen tekäp, havanı isnäp). Ägär dä bezneñ yort yagınnan töten isen sizsäñ, şulay itärseñ inde, yäme? (Kitep barışlıy.) İ, hodayım, bu adäm imgäge belän çistıy ülä torgan buldım bit inde!..