İnoplanetyan

(yumoreska)
- Käşfiyev digän adäm sin bulasıñmı?

- Äye, min! Şunnan, ni yomış, abzıy?

Kerüçe, älege cavapnı gına kötkändäy, Käşfiyev yänäşäsendäge urındıkka barıp çümäşte.

- Gäcitegezdä, çit planeta keşeläre turında närsä dä belüçelär bulsa, redaktsiyägä yazıp cibärsennär, digän yazmanı ukıgan idem. Yazarga gramıtam azrak, enekäş, menä üzem kildem äle. Mondagılar sineñ kabinetıña kertep cibärdelär.

Çınnan da, näticäsenä bik ük ışanmasa da, gazetanıñ ber sanında ukuçılarga şundıyrak ber möräcäğat belän çıkkan ide şul Käşfiyev...

- Ya, ya, söylägez, berär NLO kürgänegez barmı ällä?

- Inılosın-mazarın belmim, enekäş, tik inoplanetyannarnı gel kürep torabız, anısı.

Küñele belän sensatsiyä kötkän Käşfiyevneñ küzläre oçkınlanıp kuydı. Ul ireksezdän kulına ruçkasın aldı da, yazarga äzerlände:

- Täk, täk... Kaysı avılnıkı soñ äle sez, abzıy?

«Sez» dip endäşü abzıyga oşadı bulsa kiräk, ul, üze dä sizmästän, küplek sanda söyläşä başladı:

- Çırşıbaş avılınnan bulabız bez, enekäş, yağni mäsälän, Oltırak Häyriye inde.

«Oltırak»nıñ kuşamat ikänlegen Käşfiyev şunda uk añladı. Dimäk, Häyretdin atlı bula inde bu abzıy.

- Kayda kürdegez soñ sez ul çit planeta keşesen, Häyretdin abzıy?

Oltırak Häyriye iñnären sikertte.

- Kayda, dip, avılda inde, Çırşıbaşta. Bezneñ avılda ul inoplanetyannarnı kürmägän keşe yuktır da.

Käşfiyev gacäpkä kaldı. Sensatsiyä bit bu! Rayonnıñ ber avılında, ete dä bete dä çit planetadan kilgän zatlarnı kürsennär dä, ä gäcittä eşläüçe Käşfiyev bernärsä dä işetmäsen, imeş!

- Sez, abzıy, Çırşıbaşta inoplanetyannarnı böten keşeneñ dä kürgäne bar, dip raslamakçı bulasız inde alaysa?

- Raslamakçı bulmıybız, enekäş, çını şul anıñ!

- He, ä niçek min moñınçı bu hakta işetmädem ikän?

- Bezneñ avıl rayonga yıragrak bit, siräk kiläsez...

Cavaplarnı centekläp bloknotına «törtep» kuygaç, Käşfiyev yänä Häyrigä möräcäğat itte:

- Ul zatlarnı soñgı tapkır kayçan kürdeñ soñ?

- İnoplanetyannarnımı? Kiçä kiçke altılar tiräsendä bulır.

- Ya, ya, kayda kürdegez inde?

- Kaydamı? Bezneñ abzar artındagı kibän töbendä.

- Kibän töbendä nişli ide soñ alar?

- Ha, bez inoplanetyan belän kiçä kiç buyı söyläşep utırdık.

Älege cavaptan Käşfiyev bötenläy önsez kaldı häm, üze dä sizmästän, «sin»gä küçte:

- Sin anıñ belän kontaktka da kerdeñmeni hätta? Yağni mäsälän, söyläşteñdämeni?

Häyri dä avtomat räveştä «sin»gä küçte:

- Söyläştem känişne, söyläşmi ni! Äle inoplanetyannıñ hatını çakırıp almagan bulsa...

- Närsä, annan kilgännärneñ hatınnarı da bar, dimäkçe bulasıñmı?

- Ä sin yuk, dip uylıysıñmı ällä? Balaları da bar äle alarnıñ!

- Kayan beläseñ? Oça torgan tälinkä sezneñ abzar artına uk töşkän idemeni?

Oltırak Häyri bermäl küzlären çelt-melt yomgalap tordı da:

- Nindi tälinkä? İnoplanetyan Zäyni turında söylim, läbasa. Bezneñ avıldaş, minem kürşem Zäynulla. Kuşamatı inoplanetyan anıñ. Hatını, öç balası bar. Äle kiçä genä bezneñ abzar artında ikebezgä ber yartını böklädek. Küktän töşmäde, koyma arkılı gına sikerep töşte bezneñ yakka...

Käşfiyev Häyrineñ avızınnan çıkkan härber süzen «törtep» bargan käğaz kisägen açu belän yomarlap kärcingä tomırdı.

- Ä min küktän töşkän inoplanetyannar turında çınlap söyliseñ, dip toram tagın,- dip mıgırdandı ul.

- Soñ närsägä siña, enekäş, küktän töşkän çit planeta keşeläre? Küktäge tornaga karaganda, kuldagı pesnäk yahşırak tügelmeni? Yaz şul inoplanetyan Zäynilär turında. Bügenge avıl alar cilkäsendä bit.