Härkemneñ Üz Eşe

Hikäyä

İrtä tañnan torıp, çık suların eçep, çäçäktän çäçäkkä kuna-kuna uynap, biyep, cırlap Kübäläk oçkan-oçkan da häl alırga tuktalgan. Şunda tırışa-tırışa bal cıyıp yörgän Kortnı kürgän, gacäpsenep:

— İ kürşem, karendäşem, sin köne buyı irtä tañnan eştä, tuktap ta tora belmiseñ. Beraz yal itep al,— digän, küñeleneñ häm uyınıñ yahşılıkta buluın yäşermiçä.— Sineñ öçen üzem bötenesen dä başkarıp kuyarmın!

Bal Kortı eşennän tuktagan, anıñ belän sälamläşkän dä, Kübäläkneñ kileş-kilbätenä, maturlıgına soklanıp karap torgan häm näzek, keçkenä kullarına iğtibar itep, ber dä ışanıçlı tügel ikänlegen añlap algan häm:

— İ güzäl karendäşem, ägär dä sin minem öçen bal cıysañ, min sineñ öçen cırlap-biyep yörsäm, ul vakıtta dönyanıñ yäme, bolınnarnıñ maturlıgı, yäşäeşebezneñ täme betär ide. Äydä, härkaysıbız üze belgän eşne cirenä citkerep başkarsın, üz ğamäle belän gomer sörsen. Sin dä, min dä, başkalar da şunnan bähetle bulırlar,— dip cavap birgän.

Bal Kortınıñ şuşı akıllı süzläre Kübäläkne häyran kaldırgan. Bersen-bersenä karap, añlaşıp yılmaeşkannar. Saubullaşıp ayırılışkaç, härkaysı üz eşläre belän oçıp kitkännär.

Şulay şul, cir yözendä här can iyäse üz ğamäle belän yäşi. Ägär dä beräüneñ eşen ikençe kem başkara ikän, ul vakıtta tormışlar da butalıp betär ide. Ä bälki min yalgışamdır?

08.05.94.