Goroskop

(yumoreska)
Kemgä - närsä, käcägä - käbestä, digändäy, Hämzä gäcitkä goroskop öçen genä yazıla. Säyäsät-mäyäsäte dä, ädäbiyät-sängate dä häm başkaları da çurtıma da kiräk tügel aña. Atnalık goroskop bulsa, şul citkän. Şimbä könnärendä, eştän kaytkaç, divanga kırın yatıp, kiläse atnada sine nilär kötäsen faraz kılu üze ber can rähäte.

Menä bügen dä öygä kaytıp, ber çınayak çäyne kaplap kuydı da, divanga barıp audı. Gäcitneñ öçençe biten açıp, goroskopnı tapkaç, ul iñ berençe «Kısla» yoldızlıgı astında tugannar öçen yazılgannarnı ukıp çıga. Süz uñayınnan, Hämzäneñ «Kısla» ikänen äytep ütik.

Tä-ä-äk, närsä digän? «Hezmät baskıçınnan yugarı ürläü mömkinlege tuar...». Menä monısın Hämzä ber dä yaratmıy. Ul himiyä kombinatında slesar bulıp eşli. Monnan ike ay elek goroskopta näq şulay «yugarı kütärelü» turında yazgannar ide. Tsehta avariyä bulıp, aña «hezmät baskıçınnan» biyek kolonnalarga atna buyı menep-töşep yörergä turı kilde. Yuk inde, andıy «bähet»tän Hoday üze saklasın.

Tä-ä-äk, ä menä monısı äybät: «... çittän akça kötelä. Finans yagıñ yahşırıp kitäçäk...» Döres, monısına da ışanıç bik az. Törle hällär bulgalıy. Äytik, bervakıt, «Kısla»larga akça kötelä, dip yazgannar ide. Närsä buldı disez? Üç itkändäy, şul könne goroskopnı aldan hatını Hatirä alıp ukıgan bit. Ber-ike kön kırın-kırın karap yörde dä bu, ber zamannı Hämzäneñ yakasınnan yomarlap totmasınmı?! «Sin, - digän bula, - nişläp minnän akça yäşerep totasıñ?» Ezbir dä ezbir, hatını da ezbir, yukka gına «Arslan» yoldızlıgı astında tumagan. Yakasın cibärmi genä bit. Ällä soñ tege «karañgı köngä» dip, iske telogreyka eçenä tiyenläp cıyıp yäşergän biş yöz sumnıñ ezenä töşte mikän, kahär? Alay da ser birmi Hämzä. «Hätirüşkä, altınım, nindi akça turında söyliseñ? Soñ poluçkanıñ tiyenenä qadär apkaytıp biräm bit, karçıgım» - dip, hatının yumalap azaplangan buldı. Ä Hatirä tuktarga da uylamıy, gäcittän kisep algan goroskopnı Hämzäneñ borın töbendä selkep: «Monı kürmiseñme ällä?» - dip äytep salmasınmı?! Nihäl itmäk kiräk, barıber tabıp alaçak. «Uzgan atnada beraz şabaşka eşlägän idem şul», - dip, Hämzä tege biş yöz sumnı çıgarıp birergä mäcbür buldı. Äytereñ barmı, gäcittä eşläüçeläre dä inde «Kısla» belän «Arslan»nı butap utırgannar.

Şul könnän başlap goroskoplı gäcitne berençe üze ukıy. Kayvakıt öydägelärgä kürsätmiçä bätenläy cıyıp kuya torgan buldı. Änä, ber könne dä hatını gel yukka bäylänep mataştı. Niçekter, «Kısla»larga «... fälänençe çisloda balagız avırıp kitüe bar», - dip yazgannar. Hatirä monı kolagına kirtläp kuygan. Kızları yış avırıp intektergänlektän, ul-bu bulmagayı dip, hätta şul könne «mamin den» alıp eşkä dä barmadı. Ä balada «pıçak ta yuk». Kiç belän, töpçegem avırıp kitte, daru-fälänegez yukmı, dip, kürşe hatını kilep kermäsenme. Menä şunnan kitte, kitte hatın... Yugıysä, kürşeneñ ul bakır çäçle malayı Hämzägä bötenläy ohşamagan bit. Hatın tügel, ezbir präme, acdaha. Kayvakıt, hatını tugan köndä koyaş «Acdaha» yoldızlıgına ışkılıp uzgandır, dip tä uylap kuya Hämzä...

Goroskop belän alga taba tanışuın dävam itep, «Kısla»larga kiläse atnada mähäbbättä zur uñışlar kötelä, bigräk tä «Bärän» yoldızlıgı astında tuuçılar sezgä nazların bik yumart birerlär», - dip ukıdı Hämzä. Kızık bu. Kem bulır ikän ul nazın birergä atlıgıp toruçı «Bärän» - güzäl? Hämzä barlık tanışlarınıñ, tugannarınıñ, hezmättäşläreneñ kaysı yoldızlık astında tugannarın belä. Çönki ul tanışkanda keşedän berençe - isemen, ikençe, kaysı yoldızlık astında tuganlıgın sorıy...

Küñelennän barlıy torgaç, taptı Hämzä, hatın-kız zatınnan bulgan häm «Bärän» yoldızlıgı astında tugan berdänber tanışın. Bu bacasınıñ kürşese altmış biş yäşlek Ömmegölsem karçık bulıp çıktı. Ha-ha, nu bu gäcittä utıruçılarnı...

Änä şulay, här atnanıñ şimbä könendä Hämzä divanga kırın yatıp, goroskop ukıy. Başta «Kısla»nı, annan soñ «Arslan»nı, yağni hatını turındagıların. Hezmättäşläreneñ goroskopları belän dä tanışıp çıga. Master, brigadir, smena häm tseh naçalniklarınıkın da kaldırmıy, kürşe-külän, tanış-beleşlärneken dä iğtibarga ala. Işana Hämzä goroskopka. Işanırsıñ şul, kayçak turı kilgäli bit...

Click or select a word or words to search the definition