Fortoçkalı Käläpüş

Käläpüşne kalıplıy torgaç, Sämigulla abzıy kinät tuktadı. Miñlebikä abıstay miç aldında koymak peşerä ide.
—Tukta äle, hatın,— dide ul,— kuy äle berazga gına, üzeñä genä ber süz äytim, tege Zakir kitteme? Ul bulsa, söylämim; işetmäsen, yä üze yasar... hitri keşe ul...
— Tukta äle, kart, yödätmä, häzer Mahruy belän kiyäü kiler, änä säğat cide tula...
— Tuktasana, kuy äle! Şul tabañnı peşer dä kil!
— Menä buldı... Häzer kiläm! — dide dä Miñlebikä abıstay, kulın alyapmasına sörtä-sörtä, anıñ yanına kilde.
— Yä, närsä äytäseñ?
Sämigulla abzıy kulına kalıplap betergän käläpüşne aldı da:
— Menä min närsä uylap çıgardım: menä küräseñme? Käläpüşçe Lotfulla käläpüş östenä dürt tişek yasagan bulgan... Möselman duhtırı da maktagan, di: häzer başka hava kerep torır, häzer tatarnıñ başı avırtmas inde, hava yörep torır, dip äytä di... Ä min häzer yapun kük buldım inde, tagın başka törle äkämät çıgarmakçı bulam...
— Tizräk bulsana! Bulırsıñ menä, äcätkana, yapun! Nişlämäkçe bulasıñ tagı? — dip, Miñlebikä abıstay irennän sorap ölgermäde, Sämigulla abzıy süzendä dävam itte:
— Menä närsä eşlim: küräseñ änä täräzädä şıltır-şıltır itep furtoçka äylänep tora; yasamakçı bulam; keçkenä genä, çelter-çelter itep, sandugaç kük sayrap utıra torgan furtoçka...
— Kalfakka da yasa sin anı,— dide Miñlebikä abıstay,— bezgä dä rähät bulsın.
— Elek käläpüşkä yasıym, annan soñ sezneñ çıpçık kük bidğat (*) kalfagıgızga da yasarmın... Kaya, bir äle kayçı belän änä berkön kiyäülärgä alıp kaytkan pampasi (**) tartmasın. Häzer yasap karıym...
— Añar min sabın salıp kuydım, yuk eşkä...
— Bir, dim, häzer bir... Keşe furtoçkalı käläpüş: yasamakçı, millätneñ başı avırtuın betermäkçe bula, ä sin şunı da tabıp birmiseñ.
Miñlebikä abıstay tartmanı ezli başladı.
— Fu, koymak peşerep beterergä dä irek yuk! Siña kaldı furtoçka eşlärgä inde... äcätkana!
— Ezlä, ezlä! Menä gäzitlärdä maktıy başlasalar, sin dä söyenerseñ... Menä hämmä keşe miña zakaz birä başlar; ä minem iğlan gäzitlärdä basılıp çıgar; «Min, käläpüşçe Sämigulla äfände Gıyzzätullin, tabiplar kuşkança, mäşhür, faydalı furtoçkalı, sayrıy torgan käläpüşe eşlim... İhtiram belän Sämigulla Gıyzzätullin», dip yazdırırmın. Äydä kitsen bezneñ dan!
Miñlebikä abıstay ber kalay tartma tabıp kiterde:
— Anı keşe niçek kiyep yörer soñ? Şıgırdap yödäter iç soñ ul?!
— Alay tügel ul, hatın; elek ul başnıñ yaman ise çıkkançı sayrıy da soñınnan, baş istän tazargaç, sayramıy! Menä bezneñ furtoçka da haman şıgırdamıy bit!
— Äydä, yasa... Min koymaklarımnı peşerep beterim äle!
— Äy, siña äytäm, kiyäü kilgäç tagın sin şapıldama, ul üze yasıy başlamasın!
— Yuk, yuk, ästäğfirulla... Siña söyeneç miña da söyeneç iç!..
Sämigulla abzıy, tartmanı kisä başlap, telen çıgarıp eşlärgä totındı.
«Tukta äle, min monı bolay gına kaldırmıym... İlterski kuäte (***) belän, änä tege kinima tomannıyındagı kük (****), tiz äylänä torgannarın yasıym», dip uyladı ul eçennän...

* Bidgat — häräm.
** Pampasi — konfet tartması dimäkçe bula.
*** İlterski kuäte — elektr kuäte.
**** Kinima tomannıyındagı kuk — kinodagı sıman.