Fenomen

Yumoreska

Şulay bervakıt, tını-köne betep, Färhetdin bacay kilep kerde. Baş tübäsenä taba şuışa başlagan mañgayı tirläp çıkkan, küzläre — piçät.
— Karadıymı kiçä? — dip kıçkırdı ul işektän kereşli ük, isänläşep tä tormıyça.
— Bik isän genä äle, bacay, — dim aña, tınıç kına kulnı suzıp.
—Ä-äy... — Yuk belän vakıt uzdırırga telämägändäy, ul tiz genä kulın tartıp aldı da, koridordan muyının suzıp zalga küz töşerde.— Televizor karadıñmı kiçä? — dim.
— Ällä tagın... Balalar karap mataşalar ide bugay, — dim, balalarnıñ kiçä şalt-şolt kanal alıştıruların häterläp. Balalar bülmäsennän kızımnıñ:
— Yu-uk, karamadak,—dip suzganı işetelde. — Bez soradık, soradık, ä siñ... yasamadıñ.
— Närsä, futbol karıy almıyça kaldıñmı ällä?
— Futbolnıñ isäben karamasam da beläm min... Kiçä ber kanadski fermer turında söylägännär. Miña Pal Stepanıç äytte. Başın sıyırga yalata ikän.
— Kit äle! Äytäm, başı peläş anıñ...
— Hi, kanadski fermernı söylim min siña. Pal Stepanıçnı tügel.
— Ya, ya, şunnan?
— Siña söyläsän dä inde... Yaña tugan bozavın imezep mataşkanda, bozavı belän bergä monıñ peläşen dä yalap algan di sıyır. Annan oşap kitkän ahrı, gel yalıy başlagan. Ber zamannı közgegä karasa, başına çäç üsä başlaganın kürgän. Añladıñmı?
— Añladım, şunnan?
—Närsä «şunnan»?
— Şunnan närsä bulgan?
— Niçek «närsä bulgan»? Fenomenal kürsneş bit bu!
— Yarıy, fenomenal da bulsın, hätta ışanıym da di. Şunnan närsä?
— Äyttererseñ ällä ni. Soñ sin minem başka kara.
Min anıñ inde yaktıra başlagan tübäsenä karadım.
— Närsä, ällä sin dä sıyırga yalatıp kararga uylıysıñmı? — dip şarkıldap kölep cibärdem.
— Köl äydä, köl. Ber zamannı abzañ bödrälären cilferdätep kilep kersä, küzeñ şakmak bulır äle!
Uynap äytkänderme, uylapmı, añlamıy da kaldım. Bacay, isänläşep tä tormıyça, işekne şapıldatıp yabıp çıgıp kitte. Hotta otpuskıga çıgıp ta, üzeneñ ni izge dip isäplägän traditsiyäsenä hilaflık itte, otpuskasın «yuarga» kilmäde.

Bu söyläşü turında min inde onıtkan da idem. Hätta bacay üze yartısın kıstırıp kilep kergändä dä, iskä töşmäde. Ämma başındagı eşläpäsen salıp çöygä elgäç, «ah» ittem. Farhetdin bacayiıñ başı... tavık yomırkası şikelle şop-şoma, fäqat kolakları gına tırpayıp kalgan ide

Click or select a word or words to search the definition