Elektron Adres

(yumoreska)
Kampitır digän närsä kilep kergäç, yäşäülär bermä-ber ciñelläşte, dilär yäşlär. Alarga şulaydır da, bälki, ä menä öç klass häm ike koridor beterep, gomere buyı Könkürmäs avılınnan çıkmagan Gıylmetdin tormışında üzgäreş sizmäde. Tiresne dä elekke kebek sänäk belän çıgara, cirne dä haman köräk belän kazıy, peçänen dä çalgı belän çaba. Bersen dä kampitır eşläp birmi. Nindi ciñellek inde bu?!

Böten eşne İnternet aşa da başkarırga bula dip, kampitır ekranına kadalıp utıruçı yäşlärne, gomumän, añlamıy ul. İnternet digän süz üze genä dä hiç başına sıymıy anıñ. Elek mäktäpkä kürşe avıldan yörep ukuçılar öçen internat bar ide. Anısın belä. Ä menä İnternet digänen küz aldına kiterä almıy. Kıskası, kampitırlaştıru Gıylmetdingä bernindi ciñellek tä kitermäde. Häyer, ul aña ällä bar, ällä yuk — artık ise dä kitmägän bulır ide...

Berkönne hatını Gölcihan, pensiyägä çıgarga tuplangan dokumentların tapşırıp kaytu öçen, sin gramıtnıyrak dip, rayon üzägenä Gıylmetdinne cibärde. Andıy eşlärne ütäü Gıylmetdin öçen berni dä tügel. Soragan dokumentları tärtiptä bulsa, kire borıp kaytarmaslar, anısı. Kayvakıt, tegese citmi, monısı yuk dip, kabat-kabat yörtälär. Şunısı beraz käyefne cibärä...

Bu yulı alay bulmadı. Dokumentlar barısı da tärtiptä ide. Alarnı tapşırıp beterergä torganda gına, kabul itüçe kız, hatınınıñ elektron adresın sorap, eşne boza yazdı! Gıylmetdin başta aptırabrak kalsa da, ser biräse kilmäde. Avılnıkı digäç tä, töşep kalgannardan tügel lä, yäş çagında Dalnıy Vostokta diñgez pehotasında hezmät itep kaytkan keşe. Telnyaşkası äle häzer dä saklana. Kiyep kiläse kalgan anı, dip uyladı ul.

Gıylmetdin alay borgalandı, tegeläy borgalandı, ahırda: «Onıtıbrak cibärgänmen, häzer, az gına sabır itegez, iskä töşerim», — digän bulıp, çitkäräk taypıldı. Kız: «İsegezgä töşergäç, kilersez», — dip, dokumentlarnı alıp kuyıp tordı.

Gıylmetdin, arırak kitep, ikençe ber täräzäçekkä çiratta toruçı yäş irgä: «Hatınnıñ elektron adresın sorıylar, nindiräk närsä soñ ul?» — dip möräcäğat itte. Tege mucik:

— Minem hatınnıkı «Maşa, sobaka, yı-mayıl, ru». Sineken belmim, niçekter, — dip cavap birde. Annan soñ, Gıylmetdinneñ hälenä kergändäy. — Ğadättä, berençe urınga isemne genä kuyalar da, kalgan öleşläre barısınıkı bertösle ul elektron adreslarda. Hatınıñnıñ iseme niçek soñ?

— Guldcihan, – dip, nigäder urısçalatıp cavap birde Gıylmetdin.

— Guldcihan, sobaka... — dip äytä başlagan muciknı, avızına uçın kuyıp, yartı süzdän bülde ul.

— Sin närsä?! Tı çto?.. Gölcihan — sobaka, digänne hatınga citkersälär, beläseñme ni bulaçagın? Avızıñnı belep aç, yäme. Avılda alarnıñ näselläre «et» kuşamatlı...

Gıylmetdin, ireksezdän, yak-yagına karangaladı. Könkürmäslelär işetmäsen, yänäse.

— Gulya diik alaysa?! Minem hatın Mahinur bulsa da, adreska Maşa dip yazabız...

Gıylmetdin rizalaştı, «yarar» digänne belderep, baş kaktı.

— «Gulya, sobaka, yı-mayıl, ru» bula inde alaysa hatınıñnıñ elektron adresı.

Gıylmetdin elektron adresnıñ ciñel genä açıklanuına üze dä kuanıp kuydı. Karale, gadi genä ikän...

Üz çiratı yanına kilgändä, anda ber-ike keşe genä kalgan ide. İke keşe öçen, käyeflären bozıp, allarına kerep tormaska, kötärgä buldı Gıylmetdin. Tik, menä kartlık ğalämäte, täräzäçek yanında utırgan operator kız karşına kilep baskanda, elektron adres baştan çıgıp ta oçkan ide. Döres, «Gulya» digänen häterli. Annan soñgı süzneñ dä tatarçasın belä. Gölcihannar näseleneñ avıldagı kuşamatları — et. Ä menä urısçası?.. «Et»neñ urısça «sobaka» ikänlegen dä belä-belüen. Tik «suka» tügel mikän, digän şige bar. Ni äytsäñ dä, Gulya censkiy rodta bit... Başlangıç klassta ukıganda, Mönirä apaları, rodlarnı butamagız, dip bik nık señdergän ide şul... Ä ana et — suka inde ul. Uylana torgaç, Gıylmetdin, soñgısı dörester, digän töple fikergä kilde dä, operator kız soragaç, çatnatıp:

— Gulya, suka, – dip, äytep tä saldı.

Operator, aña tekälep, küzlären çelt-melt yomgaladı, ni öçender, kızarıp ta çıktı, hätta. Annan soñ, barmagın çigäsendä bötergändäy itte dä, kampitır töymälärenä «şalt-şolt» baskalap, nider yazıp kuygaç, soraulı karaşın kabat Gıylmetdingä töbäde:

— Şunnan soñ, yandeksmı, yı-mayılmı?..

«Yandeks» digän süzne Gıylmetdinneñ üz gomerendä dä işetkäne yuk ide. Şuña kürä, «e-mayıl» digäne genä kolagına kerde. Ul anı üzençä «elmayamı?» dip añlap, cavabın da äytep kalırga aşıktı:

— Yılmaya, yılmaya! Osubinnı pensiyä akçası alıp kaytkan könnärdä yılmaya. Ä bolay, ezbirneñ dä ezbire inde üze. Äytep toram bit et dip...

Operator kız anı tıñlamıy da ide bulsa kiräk. Ul, üz aldına söylänä-söylänä, kompyuter töymälärenä basuın dävam itte:

— Tä-ä-äk... Yı-mail. Toçka...

«Toçka» digänen, Gıylmetdin, operator kıznıñ ışanıp citmiçä, kaytarıp soravı dip uylap:

— Toçno, toçno... Näq şulay, – dip, üz süzen kuätläde.

— ... toçka, ru?

«Ru» digän soñgı süzne dä, üzenä kuyılgan sorau dip añlap:

— Äye, toçno, böten ıruları belän et alar. Äle babaları Sälimullanı da avılda Et Säli dip yörgännären häterlim, – dide.

... Dokumentların tapşırıp uramga çıkkaç, Gıylmetdin ciñ oçı belän mañgayındagı tiren sörtep aldı. Anıñ küñele şat ide. Karale, bu kampitır digäne, ber karaganda, çınnan da, yahşı närsä ikän bit. Elektron adresıñ yuk dip, kire dä bormadılar. Barısın da şunda, täräzäçek yanında gına häl ittelär dä kuydılar, vässäläm!