Ekologik Çista Agu

(yumoreska)
İt aşau öçen kesäñ kalın bulu şart. Şuña da it turında süz çıksa, Säyfetdin, teşsez avızın sıra çümeçe qadär cäyep: «İt aşau kileşmi bezgä, teş arasına kısıla ul», — dip şayartırga yarata. Pensionerlarnıñ töp azıgı närsä bulsın inde?! Bäräñge, älbättä. Şuña kürä dä ul cäy citügä üzeneñ uç töbe qadär bakçasında yata: çüben utıy, kitmänli, su sibä. Tik menä kolorado koñgızları belän genä eşe peşmi. Kulına çiläk totıp, bäräñge arasınnan ürmäläp tä, yatıp ta çüpläp karadı ul cuklarnı. Hiç beterer häl yuk. Kayan gına kilep çıktılar, kahär sukkırıları. Bäräñge yafragı aşagançı, bütän yafrak betkänmeni alarga?! Änä, ärekmänneke üze zur, üze susıl, rähätlänep aşa gına, yugıysä. Yuk şul, alar da pensionerlar şikelle bäräñge yaratalar. Çüpli torasıñ, ürçi toralar, bäräñge yafrakların kimerä toralar.

İnde bernindi çara da kalmagaç, cuklarnı agulap kararga buldı Säyfetdin. Tik agu kayan tabası? Bazarda satıla torgannarın bik kıymmät, dilär. Östävenä, zähärlege dä ällä ni tügel ikän. Cuklarnı gupçem ütermi, di. Satuçıları su kuşa torgannardır inde. Annan soñ, himikatlar kullanırga şiklänä dä ide Säyfetdin. Ul agu digäne bäräñgegä dä eläkmiçä kalmıydır. Barlı-yuklı pensiyä akçasına agu satıp al da, şunı kış buyı aşap yat, imeş!

Berkönne tuktalışta avtobus kötkändä, kürşe bakça massivınnan ber kart:

— Minem bakçamda kazılgan koyınıñ suı mamint üterä ul kalarada cukların. Menä digän ekologik çista agu. Bibicamal ciñgägez gel şunı sibä. Ber civoy cuk ta kalmıy. Napaval üterä, — dip söylänep torgan ide.

Säyfetdin baştarak ışanmasa da, tora-bara uylana kaldı. Änä bit, kaydadır dävalıy torgan üzlekkä iyä «istoçnik»lar da tabalar. Ä monıñ koyısınnan cuk üterä torgan su çıkmas dip kem äytä ala. Bälki, şuña barırgadır. Ekologik yaktan çista agu, dide ahrısı. Yatıp kalgançı, atıp kal, digändäy, bäräñgegä şunı siptersäñ, bälki...

Şularnı uylagaç, älege bakçaga yünälde Säyfetdin. Bakça hucasına gozeren söyläp birgän ide, tegese mıyık astınnan yılmaep kuydı da:

— Küpme kiräk, şunıñ qadär alıp kit, buşlay biräm, mindä isäpsez ul andıy ekologik çista agu. Nu, cuklarnı äybät üterä dä soñ. Işanmasañ, äydä kürsätäm, — dip, öy karşında torgan öste yabık çiläkneñ östen açıp cibärde. Ä anda yartı çiläktän artık kolorado koñgızı.

— Menä bit berse dä isän tügel. Barısı da ülgän, — dip hihıldadı tege adäm. — Bibicamal ciñgäñ cıyıp kergäç, östenä şul koyıdan algan sunı gına sipkän idek, yugıysä...

Anıñ süzlären kuätlägändäy, bakça kapkası açılıp kitte häm işek aldına çiläk totkan karçık kilep kerde.

— Sabircan, bu häşärätlär çıgıp kaçmasın tagın, östenä tege ekologik çista agunı — koyı suın sibep kuy, — dide ul, kıp-kızıl cuklar mıclap torgan çilägen kartı aldına utırtıp.