Дүртьюллы Күренешләр (шигырьләр)

* * *
Каян килгән бу сафлылык кинәт,
Үзе җиләс, үзе таныш бигрәк,
Нинди назлы һәм аһәңле теле –
Иртән миңа исте татар җиле...
* * *
Кышлар үтте, язлар килеп җитте,
Җылы якка йортлар очып китте
Ял итәргә, алар бит ял итми,
Ә җәй көне диварлар кирәкми...
* * *
Нинди гүзәл таңнарым тынлыгы,
Ничек күкләр белән сокланмаска!
Матур гомер – аның озынлыгы
Йөз ел булса иде запаста...
* * *
Гомер – бүләк, бирүче – табигать,
Аның белән бүлешергә әзер мин,
Килеп сорагыз! Мин, дуслар, юмарт,
Белеп ал гына гомер кадерен...
* * *
Шигырь – ул мәһабәт сарай,
Анда пыяла, көмеш, алтын, якут,
Ә шигърият – мескен ятим малай,
Шул сарайда аңа почмак та юк...
Шагыйрь соң сарайны төзеп бирә,
Үзе тулай торакларда дөнья күрә...
* * *
Без дөньяга вакытлыча килдек,
Вакыт җиңде, уйлап карасак...
Җиһан инде көлдә ятар иде,
Әгәр дә балалар тудырмасак...
* * *
Матди дөнья үсә туры юлдан,
Кеше аңы әйләнмәле йөри,
Мин матдәдән һәм аңнан ясалган,
Һәм юлымны бернәрсә дә белми...
* * *
Иртән чыксагыз бакчага,
Чыкка чыланыр аяклар –
Чыкны җыйсагыз чиләккә,
Ул гади су булып калыр...
* * *
Үскән саен без олырак,
Олыгайгач акыллырак –
Акылланып аңлыйбыз без:
Бигрәк тә аз белемебез...
* * *
Язмыш безгә өстән бирелмәгән,
Без язмышның күлмәгенә төрелмәгән,
Әмма язмыш – чегән хатын – сезне алдаласа,
Борчылма. Шуңа ул баласын ашата ләбаса...