Dürtyullı Küreneşlär (şiğırlär)

* * *
Kayan kilgän bu saflılık kinät,
Üze ciläs, üze tanış bigräk,
Nindi nazlı häm ahäñle tele –
İrtän miña iste tatar cile...

* * *
Kışlar ütte, yazlar kilep citte,
Cılı yakka yortlar oçıp kitte
Yal itärgä, alar bit yal itmi,
Ä cäy köne divarlar kiräkmi...

* * *
Nindi güzäl tañnarım tınlıgı,
Niçek küklär belän soklanmaska!
Matur gomer – anıñ ozınlıgı
Yöz yıl bulsa ide zapasta...

* * *
Gomer – büläk, birüçe – tabiğat,
Anıñ belän büleşergä äzer min,
Kilep soragız! Min, duslar, yumart,
Belep al gına gomer qaderen...

* * *
Şiğır – ul mähabät saray,
Anda pıyala, kömeş, altın, yakut,
Ä şiğriyät – mesken yätim malay,
Şul sarayda aña poçmak ta yuk...

Şağıyr soñ saraynı tözep birä,
Üze tulay toraklarda dönya kürä...

* * *
Bez dönyaga vakıtlıça kildek,
Vakıt ciñde, uylap karasak...
Cihan inde köldä yatar ide,
Ägär dä balalar tudırmasak...

* * *
Matdi dönya üsä turı yuldan,
Keşe añı äylänmäle yöri,
Min matdädän häm añnan yasalgan,
Häm yulımnı bernärsä dä belmi...

* * *
İrtän çıksagız bakçaga,
Çıkka çılanır ayaklar –
Çıknı cıysagız çiläkkä,
Ul gadi su bulıp kalır...

* * *
Üskän sayın bez olırak,
Olıgaygaç akıllırak –
Akıllanıp añlıybız bez:
Bigräk tä az belemebez...

* * *
Yazmış bezgä östän birelmägän,
Bez yazmışnıñ külmägenä törelmägän,
Ämma yazmış – çegän hatın – sezne aldalasa,
Borçılma. Şuña ul balasın aşata läbasa...

Click or select a word or words to search the definition