Çıgarılış kiçäse öçen

Tormışıbıznı yämländerep, yortıbızga bäräkät östäp, ap-ak biläüsägä törep, koş totkanday söyenep alıp kaytkan idek bez sine şifahanädän. Yaña gına, äle yaña gına ide ul könnär.
Berençe yılmayuıñ, berençe yasagan adımıñ, berençe äytkän süzläreñ... İstä, hämmäse dä istä.
Balalar bakçasında yasap alıp kaytkan uyınçıklarıñnı da qaderle hatirä itep saklıybız äle bez.
Ä berençe ukıtuçıñ niçek yaratıp karşı aldı üzeñne. Häyer, annan soñgıların üzeñ dä beraz häterliseñder.
Gomerlär uza ikän ul,
Uza da kitä ikän...
Kay arada üsep kitteñ dä, kay arada yeget bulıp citteñ?!
Tormış mäşäqatläre belän butalıp, bez anı sizmi dä kalganbız.
Kaderle ulım! Bügen sin kulıña ölgergänlek attestatı aldıñ. Tırışıp ukuıñ, hezmät söyüeñ, namuslı, akıllı buluıñ, sportnı yaratuıñ mögällimäläreñ tarafınnan yugarı bäyälände.
Klass citäkçeñä, barlık ukıtuçılarıña, tärbiyäçeläreñä, tehnik hezmätkärlärgä, şuşı mäktäpneñ hucasına, alarnıñ ışanıçın aklagan öçen, zur rähmät sineñ üzeñä.
Bez— ätiyeñ, äniyeñ bügen sineñ belän bergäläp, şuşı mäktäp belän huşlaşabız. Onıklarıbız bulganga qadär bezneñ, zur ömetlär baglap, mäktäpkä ozatır, dulkınlanıp kötep alır keşem yuk. Şulay, bu barı tik şulay.
Kaderle ulıbız! Sine mäktäpne uñışlı tämamlavıgız belän çın küñeldän täbrik itäbez, yugarı uku yortına kerü turındagı teläkläreñ tormışka aşıp, olılaygan könnärebezdä bezneñ terägebez, ışanıçlı ir, märhämätle ata buluıñnı telibez.

Balakayım, ilgä layık keşe bulıp üs,
Maktaulardan sin iräymä, avırlıkka tüz.

Kayda gına yörsäñ, torsañ da sin,
Tik berse dä tugan cir bulmıy.
Analardan irlär tumıy— malay tua,
Alarnıñ da här tuganı ir bulmıy.

İrlär bulıp kalu öçen
Tormış bezdän bik küp närsä taläp itä.
Sabır itep här mizgellär sınau kötä—
Kıl östennän kemnär ütä... Niçäü ütä?!

Küñelkäyeñ härvakıtta çista, paq bulsın.
Balakayım, namuskayıñ söttän ak bulsın.

Yavızlıknıñ, aldaşunıñ oyıtkısı
Ul ak sötne taplamasın, kersez, saf kalsın.

Şunı bel sin: zur bähetkä
Ozın, taygak yullar kiterer.
Sin bit— minem tözep kitär,
Matur kiläçäkkä ilter,
Altın küperem. Altın küperem.
Oçraşu kiçäse öçen

Kayda da bulsa, kayçan da bulsa,
Ber küreşü— üze ber şifa.
20 yıl ütkännän soñ,
Ber küreşep, söyläşik äle,
Elaşıyk ta, cırlaşıyk äle.

Ber küreşü— üze ber şifa dip,
Eç serlärne söyläşik äle,
Häsrätlärne urtaklaşıp
Şatlıklarnı büleşik äle,
Küñellärne buşatıyk äle,
Klasstaşlar, oçraşıyk äle.
Tol kalgan änkäygä

Şulay yäş kal siksändä dä,
Tuksan, yözgä citkäç tä.
Bik qaderle sin bezgä,
Kiräkseñ hämmäbezgä.
Yanam, köyäm, utlar yotam,
Sineñ yannan kitkäç tä.

Olıgaygan könnäreñdä
Bez bulırbız tayanıç,
Sin— sälamät. Canıñ tınıç,
Şunısı— bezneñ kuanıç.

Üz gomereñdä, änkäy küpme
Kiçerdeñ sin avırlık.
Sineñ kılgan izgelegeñ
Uylasañ, tañ kalırlık:
Zur kitaplar yazarlık.

Min bähetle bügen, bik bähetle,
Änkäyem bar ürnäk alırlık,
Yalgız yäşäüläre ciñel tügel,
Birsen Hoday köç häm sabırlık,
Bezneñ änkäy istä kalırlık,
Şundıy änkäy: häykäl salırlık.
Yäş ätine, änine kotlau

Bähetle, täüfıyklı itep
Üsteregez nänine.
Täüfıyk bulsa, bähet bula,
Onıtmagız şul süzne.

İtağatle, näzäqatle,
Sälamät bulıp üssen!
Yortıgızga şuşı sabıy
Çiksez bähet kiterseñ.
1 yäş tulgaç kotlau

Bezneñ öçen kemnär bulır
Sinnän dä qaderleräk?
Ulım! Sin bit bezneñ öçen
Kötep alıngan büläk.

Siña karap tuya almıy
Ätkäyeñ häm änkäyeñ.
Yazmışlarıñ ap-ak bulsın,
İmanlı bul, bäbkäyem.
Yaña yılda tugan balaga

Yaña yılnıñ ak karları,
Yaña bähet kitersen.
Ap-ak çanalarga töyäp,
Kış babay belän Kar kızı
Küçtänäç alıp kilsen—
Sine gel söyendersen.
İsem algaç

Büläklärneñ keçese yuk, dilär,
Bula anıñ, barı, olısı.
Olı büläk belän täbriklibez
Kuşıp şuña yöräk cılısın.

Siña birelgän şul olı büläk
Olı bähet kenä kitersen.
Hezmättäşläreñneñ siña bulgan
Olı ihtiramın citkersen.

Öç ulıña Hoday täüfıyk birsen,
Yöz aklıgı siña bulsınnar.
Üz parların tabıp, sezneñ kebek,
Berdäm, tatu ğailä korsınnar.

Tormış sınauları kaldı artta,
Avır, urau yullar üttegez.
Tormış çäçkäñ— ak çäçägeñ belän
Gel şatlıkta gomer itegez,
Üzeñ büläk diyep, üzeñ büläk diyep,
Çökerdäşep kenä ikegez.
Yanvarda tugannarga

Cir östeneñ cem-cem ak karların
Kilä siña büläk itäse.
Dönyadagı matur süzlärneñ dä
İñ cılısın kilä äytäse.

Tormış yulıñ härçak balkıp torsın,
Yagımlı, şat bulsın küñeleñ.
Ozın gomer, bähet-şatlık belän
Ber kaygısız ütsen gomereñ.

Foatıñnın qaderen belep kenä,
Yaşä äle cirdä kuanıp.
Sälamät bul, borçu-häsrät kürmi,
Tormışlarıñ torsın nurlanıp.

Gomer buyı yazsın äle bezgä
«Rämiläkäy!»— diyep däşärgä.
Kaygı kürmi, bähet-şatlık belän
Bergä-bergä ozak eşlärgä.

35 yäş— kız çak bit äle ul,
Yazsın 100 yäşkäçä yäşärgä,
Yäş gomereñ kitär ütep tä,
İskä alırsıñ kötep-kötep tä.

Sabır da sin, gadi, keşelekle,
Kılgannarıñ barı igelek.
Sälamätlek yuldaş bulsın siña,
Bähetkäyeñ bulsın gomerlek.
Fevraldä tugannarga

Fevralneñ salkın karı
Siña kitergän cılı.
Tugan könen här yıl sayın
Çın-çınlap bulsın kotlı.
Sagışlar bulsa mıskallı,
Şatlıklar bulsın potlı.

Bügengedäy gel yılmaep yäşä,
Küzläreñdä nurlar sünmäsen.
Yörägeñnän çıkkan yahşılıklar
İzgeleklär bulıp äylänsen.

Bähetkäyeñ ohşaş bulsın ide
Yaña yaugan ap-ak karlarga.
Färeştälär kunsın iñnäreñä
Tugan köneñ belän kotlarga.

Kader-hörmät siña nasıyp bulsın,
Nurlar çäçsen härçak yözläreñ,
Kiyäü belän bergä ozak-ozak
Sau-sälamät uzıp, bergäläşep,
Sikältäle tormış yulların.

Bergä buluları bik küñelle,
Dip cırlıylar bezneñ Sarmanda.
Aralaşıp kına, bergä-bergä,
Gomer itik äle haman da.
Martta tugannarga

Tugan köneñ belän, İldar!
Tugannan tugan enem.
İtağatle, igelekle,
Yuktır kilmägän cireñ.

Yumart ta sin, yärdämçel dä,
Neçkä, yomşak küñelle.
Miläüşäñ, İrek yanıñda—
Üze bähet tügelme?!

Su buyında tal-tiräk,
Tal tiräkkä su kiräk.
Ätiyeñä-äniyeñä
Tugannarga sin teräk.

Kotlı bulsın tugan könnäreñ,
Yullarıña göllär sibelsen,
Mart ayınıñ saf cilläre siña.
Bähet-şatlık kına kitersen.
Küñeleñ türendä hiçkayçan,
Mart koyaşı sünmäsen.
Bähetle yazmış yoldızı
Gomer buyı kitmäsen.

Tugan köneñ belän kotlap,
Yaz Patşası baş iyä.
Siña ak bähetlär teläp
Mishät belän Daniyä.
Apreldä tugannarga

Apreldä tugannar
Minem yakın tugannar:
Häm böyek Lenin babay.
Çınlap äytäm: bu şulay.

Abıyıma— 50 yäş,
Işanası da kilmi:
Üze çibär, üze yäş,
Yözläre nurlı, köläç.
Kompyuter «hata» cibärgän:
50 tügel, 30 yäş.

Balkır mikän abıyım,
Ciñgäçäyem bulmasa,
Tirä-yaknı nurlandırıp.
Çulpan yoldız yanmasa,
Yannarında uglannarı
Häm kızları bulmasa.

Albomımda— fotoräsem
Min keçkenä, citäktä.
Yar buyında yalgız kazlar,
İneş aga Simäktä.
Karap toram tiräkkä,
Sagındıra bigräk tä,
Hislär kaynıy yöräktä.

Gomer uzdı, ütkännärdän
İstäleklär kaldı nibarı.
Kötelmägän bähet kitersen
Siña yazgan şiğır yulları.
Mayda tugannarga

Ak maylarda ak bähetlär
Alıp kilsen kiläçäk.
Yullarıña huş is sibep.
Balkıp torsın göl-çäçäk.

Tugan köneñ kotlı bulsın,
Tınıç ütsen könnäreñ.
Yazlar kebek naz kitersen
Cäyläreñ häm közläreñ.

Gomer buyı häsrät kürmi,
Ayaz bulsın kükläreñ.
Şatlık nurı çäçep torsın
Elmayulı küzläreñ.
May belän!

May belän, yaz belän, naz belän!
Kilä torgan kiyek kaz belän!
Sez tugansız bu dönyaga
Ak çäçäklär ata torgan miläş belän,
Yaña ser, yaña kiñäş belän.

Bez— hatın-kız.
Bez mähäbbät gazapların sagınabız,
Yangan uttay, kayçak, dörläp kabınabız,
Kayçagında abınabız-egılabız,
İrtä-kiçen tuktamıybız, gel çababız,
Härçak uyau, çönki— ğailä sagında bez.

Şatlıklarnı şaşıp karşı alıp,
Kaygılarnı yäşsez kütärep,
Bala üsterep, kön-tön tormış kuıp,
Sizmibez dä yıllar ütkänen.

Alda sezne olı yullar kötä.
Bähetlärgä, dilär, yul urau.
Çäçäklärgä kırau töşsä— uzar,
Mähäbbätkä timäsen kırau.

May ayınıñ ap-ak çäçäkläre
Ak bähetlär sezgä kitersen.
Şatlık-kuanıçlar, sälamätlek,
Ozın gomer Hodayım birsen.

Bergäläşep äle bik küp tapkır
Ütkärerebez tugan könnärne.
İlle genä tügel, altmış, citmeşne dä,
Siksän, tuksan, hätta yözlärne.
Amin!
İyündä tugannarga

Cäyneñ matur könnärendä
Sin dönyaga kilgänseñ.
Ätiyeñä, äniyeñä
Söyeneç kitergänseñ.

Yözeñ ayday, süzeñ balday,
Yagımlıdır karaşıñ.
İreñ niçek yaratmasın
Sin Sandugaç balasın.

Bik küplärne könläşterep
Yäşisez bergä-bergä.
Mähäbbät yalkınnarıgız
Sürelmäsen gomergä.
Balalarıñ däümätlären
Yazsın äle kürergä.

Yomşak yıfäk çäçkäyläreñ
Cilferdäsen cillärdä.
Közläreñ dä yazlar bulıp,
Kışlarıñ da cäydäy bulsın,
Yortıñda nur balkısın,
Bähet, şatlık tulıp torsın,
Koyaş gel yılmaep torsın
Olıgaygan könnärdä.
Hoday siña nasıyp itkän
Cir yözenä tuarga.
Par atlarda apkaytkannar
Sabantuylı aylarda.
Bähetkäyeñ taşıp torsın,
Yörsäñ dä sin kaylarda.
İyüldä tugannarga

İyül— yılnıñ iñ şäfkatle
İñ bay häm mullık ayı.
Änkäyem i̇yüldä tugan,
Östäldä— balı, mayı.

Utız yäştän yalgız kalıp,
Sin bit bezne üsterdeñ.
Mähäbbäteñ tigez bülep,
Hämmäbezne üz kürdeñ.

İrtädän kiçkä qadärle
Ferma yulın taptadıñ.
Ber täğam rizıgıñ bulsa,
Bezdän başka kapmadıñ.

Änkäyebez yanda bulgaç,
Yatimlekne toymadık.
Par kanatlılar yanında
Şöker, kim-hur bulmadık.

Kay arada gomer ütkän:
Änkäyebez citmeştä.
Kemgä niçek: bezneñ öçen
Sin äle utız biştä.
Avgustta tugannarga

Kotlı bulsın tugan köneñ,
Matur bulıp atsın tañnarıñ.
İgelegen kürü nasıyp bulsın
Sez üstergän härber balanıñ.

Minem öçen härvakıt ürnäk,
Minem öçen härvakıt kiräk.
Gomer yullarımda tik sin genä
Tayanırday nıklı tal-tiräk.
Gomer ütä. İnde küpme yıllar
Sin genä dip tibä ul yöräk.

Rähmät äytäm barlık tuganga
Sin mineke genä bulganga.
Rähmät äytäm ätkäy-änkäygä
Sine miña büläk itkängä.

Gel şatlıkta, gel mullıkta
Ütsen sineñ könnäreñ.
Avgust ayı almasıday
Balkıp torsın yözläreñ.

Algı könnärdä dä bähetebez
Bulsın ide tulı, tügäräk.
Sinnän cılı alıp haman şulay
Gomer kiçsäk ide bergäläp.
Sentyabrdä tugannarga

Sentyabrdä sin dä ber,
Sentyabrdä min dä ber,
Dip äytmilär yukka gına—
Cirdä mullık bermä-ber.

Kızıl tuyıñnı ütkärdeñ
Monnan unbiş yıl elek.
Yördeñ yılmaep, kölep,
Min bik bähetle diyep.

Çın mähäbbät büläk itte
Söygän yarıñ— Atlasıñ.
Başıña da kitermädeñ
Yäş kileş tol kalasıñ.

Yuanıçıñ bulıp kaldı
Artur belän Bulatıñ.
Hodayım sabırlık birsen,
Akla sin ireñ hakın.

Bireşmiçä avırlıkka,
Sınmıyça cil-davılda,
Matur yäşä, bähetle bul,
Tagın, tagın, tagın da.

Läysän yañgırları belän
Häsrätläreñ yuılsın.
Ozın gomer, sälamätlek—
Telägebez şul bulsın.
Oktyabrdä tugannarga

Ozın gomer birsen Hak Täğalä,
Tınıç bulsın härçak cannarıñ,
Koçak-koçak betmäs kuanıçlar,
Töyäp kilsen tuar tañnarıñ.

Tabiğatneñ iñ saf, çista çagı,
Yaşel ucım bolın, kırlarda
Küz timäsen holkıñ-figıleñä,
Bezgä rähät cirdä sin barda.

Bäyräm belän täbriklibez,
Telibez bähet kenä.
Nurlanıp torsın yözläreñ,
Bähetlär iñep kenä.

Kayçañ kersäñ, bülmäñdä nur börki,
Karşılıysıñ yaktı yöz belän.
Kaygı-häsrät ciñeläyep kitä
Sineñ äytkän yomşak süz belän.

Gomerne bit yıllar bilgelämi,
Yaşäü därte bulsın küñeldä.
Sälamätlek, bähet, kuanıçlar
Yuldaş bulsın siña gomergä.

Bäyräm belän sezne, yakın dustım!
Balkıp tor sin gel irtä-kiç.
Yahşılıknı cirdä yatmıy, dilär.
Gel yahşılık kına eşlä sin.
Noyabrdä tugannarga

Ni arba da, ni çana,
Ni yañgırı, ni karı—
Noyabr ul. Şuşı ayda
Tugandır söygän yarım,
Ul— minem Gazinurım.
Kürkäm yöze, tämle süze,
Mähäbbäte sürelmäs.
Yöreşe— salmak. Cilkäsendä
Ber kaşık su tügelmäs.
Çaptarlarıñ, hay, yılgırlar,
Gel ucım yagın karıy.
Yögäneñne beraz gına,
Kısıp totsañ da yarıy.
Küptänme soñ yäp-yäş yeget ideñ,
Ütte gomer: üsteñ, nıgıdıñ.
Bala canlı ata gına tügel,
Babay buldıñ: tudı onıgıñ.
Tugan köndä sineñ, Gazinur,
Çäçep torsın yözeñ yaktı nur.
Çökerdäşep yäşä yarıñ belän,
Bähetle bul, amin, şulay bul!
Dekabrdä tugannarga

Ap-ak karlar yauganda,
Dekabr urtasında
Sin dönyaga kilgänseñ,
Ätiyeñne, äniyeñne
Şulay söyendergänseñ.
Üsep citep, belem alıp,
Matur ğailä korgansıñ.
İke olan alıp kaytıp,
İrne kuandırgansıñ.

Barlık häsrätlär ontıla,
Ber yılmaep cibärsäñ.
Rähätlänep çın küñeldän
Eçkersez ber söyläşsäñ.

İ Hodayım! Kiläçägeñ
Tagı da matur bulsın.
Siña bähet-şatlık teläp
Yaña yıl karı yausın.
Öyegezneñ nurı bulıp,
İregeñ balkıp torsın.
Kızıñ, ulıñ— bägırläreñ
Amin, bähetle bulsın.

Çın yöräktän kotlavıbız
Cır bulıp sezgä barsın.
Bügenge bäyräm gomergä
İstälek bulıp kalsın.
50 yäş

Yartı ğasır disäñ, küp bulır kük.
İlle disäñ bik az toyıla.
Ütte gomer akkan sular kebek,
Ä suları kaya cıyıla?!

Akkan sular bergä kuşıla-kuşıla
Barısı bergä koya diñgezgä.
Tugan yortka, tugan nigezgä
Cıyasıñ sin şulay bezne dä.

Rähmät siña, rähmät barısı öçen,
Yugaltmıysıñ ätkäy nigezen.
Sin saklıysıñ, hiç ker kundırmıyça,
Tuganlıknıñ izge här ceben.
55 yäş

55 yıl uzıp kitkän
Sizmi-sizelmi genä.
Tormış yulın sineñ kebek
Matur ütär kem genä...
Sin bähetle: ğailäñ tigez,
İnsaflı balalarıñ.
Kılgan ğamälläre belän
Kabatlıy anaların.
Akıllı da, sabır da sin,
Tıynak häm itağatle.
Gomereñ buylarına sau-sälamät,
Bulsañ ide çiksez bähetle.

Kartlıknıñ kızlar çagı

Sarı közdä sarı yafraklar da
Cir östenä koyılıp betä.
Ciñ sızganıp eşläp yörgän çaklar
Sizelmiçä ütä dä kitä.

55 yäş. Beläsezme,
Kartlıknıñ kızlar çagı.
İ! Ber sagınırsıñ äle
Kaya diyep kız çagım.

Bügen siña bähet teli
Laçın kebek ullarıñ,
Kızlarıñ— yoldızlarıñ,
Kiyäülär, onıklarıñ,

Dus-işläreñ, yakınnarıñ,
Barça-barça tugannarıñ,
Koda-kodagıylarıñ.

Kürgän häsrätlärgä tüzdeñ,
Sabırlık birde Hoday.
Sälamät bul, kaygı kürmä,
Yäş aralaş gel yılmay.
Altmıştamı, altmışta...

Şatlık ta küp, sagış ta.
Turı yuldan taypılmadıñ,
Atlamadıñ yalgış ta.
Altmıştamı, altmışta...
Rähmät äytep yazmışka,
Kaygılarga bireşmädeñ,
Ğaşıyq buldıñ tormışka.
Altmıştamı, altmışta...
Sikerep men akbuz atka,
Ciz kıñgıraular tak ta,
Cildert ber yurtakta.
Altmıştamı, altmışta...
Al äle ber cırlap ta:
«Karurman»nı, «Gölmäryam»ne
Yaki «Abau, Gölkäyem»...
Cırlıy ide ätkäyem—
Söyenep tıñlıy änkäyem:
— Bäheteñ bulsın, bäbkäyem.
Altmıştamı, altmışta...
Şatlık ta küp, sagış ta...

Yul kuymıyça sagışka,
Yaşä, dustım, şatlıkta.
Bireşmiçä kartlıkka,
Uñış östäp «Uñış»ka
Kal sin mäñge yäşlektä,
Altmışta da, altmışta...
70 yäş

Citmeş yäş ul— kartlıknıñ urtası,
Gomer ütte diyep uylama.
Änkäy isän, balalarıñ yanda,
Bähetle sin, ätkäy, dönyada.

Sineñ kebek berkem yaratalmıy,
Onıklarıñ: Aygöl, Gölnaznı.
Sineñ kebek berkem birä almıy
İrkäläüne, söyü häm naznı.

Avırlıklar kilsä, yılmayasıñ,
Nur çäçä küzläreñ kölgändä.
Beläseñme, ätkäy, sin bit bezneñ—
Äldermeştän Älmändär.

Küpme genä bähet teläsäk tä,
Bik az bulır kebek toyıla.
Kiräk çakta yärdäm kulı suzdıñ,
Şäfkatle sin härber balaña.

Şuña sine barı da yaratalar,
Dus-işläreñ yöri kilgäläp.
Sau-sälamät bulıp, tuksannı da
Ütkärergä yazsın bergäläp.
Amin!
Kömeş tuy (25 yıl)

Kay arada gomer ütkän,
Kömeş tuyıgız citkän,
Balalar taralıp betkän,
Onıklar tugan küptän.

Kömeş bulsa da tuyıgız,
Kömeş tügel çäçegez.
Käyefegez kütärenke,
Nurlar çäçä yözegez.

Gailäñne yugaltmıy saklau—
Botka aşau tügel ul,
Bolın buylap cırlıy-cırlıy
Çäçkä cıyu tügel ul.

İr— baş, hatın— muyın bulıp,
Yäşi belergä kiräk.
Sezneñ kebek tatu bulıp
Yaşäüçelär bik siräk.

Gailä böten, nıklı bulır
Bulalsak sezdäy sabır.
Az da tügel, küp tä tügel,
Toz aşasak pot yarım.

Cil-davıldan, kar-bozlardan
Saklap tormış çäçägen.
Yalgızlık açısın toymıy,
Yäşlek mähäbbäteñ cuymıy
Ozak-ozak yäşägez.

Buydakmı sin, par kanatmı
Tormışıñnı caylap kal.
Yazmışlardan uzmış yasap,
Telägäneñ saylap al.

Bulır äle, kötik äle,
Çıgar berzaman färman:
«Hatınga çıdasa— orden,
İrgä tüzgängä— medal».
Altın tuy

Ätkäy-änkäy! Yartı ğasır elek
İkäü bergä tormış kordıgız.
Niçä yıllar buyı bezneñ öçen
Soklanırlık ürnäk buldıgız.

Aktı sular, iste yomşak cillär,
İnde bez illegä citäbez.
Par kanatlı itep üsterdegez,
Rähmät sezgä, rähmät, diyäbez.

Nindi tämle rizık, nindi matur äyber—
Çıgarasız bezgä öleşen.
Ällä niçek ütep kitä gomer,
Bulmıy şunda bik yış küreşep.

İ kaytası kilä kayçagında,
Töşläremä kilep keräsez.
Uyanıp kitsäm— irem, ike ulım,
Özelep sagınganmın, küräseñ.

Äle yarıy, bezneñ barıbıznıñ
Tormışları buldı tügäräk.
İ Hodayım, brilliant tuynı da
Ütkärergä yazsın bergäläp.
Brilliant tuy (75 yıl)

Un meñ parnıñ tik bersenä
Brilliant tuy nasıyptır.
Sanaulı kön tiz ütä ul,
Ütkärergä aşıktır.

Cıyıldılar onıkları,
Alarnıñ balaları,
Balalarnıñ balaları,
Kemnärder kalgannarı.

Ap-ak bulıp utıralar
Babay belän Aqäbi.
—Äçe!— dilär. İşetmilär,
Äytsälär dä ällä ni.

İşetälär: babay ütken,
Äbine aldı koçıp,
Kuydı «çüp» itep übep,
Tora ketkeldäp kölep.
Aqäbi yaulık çitenä
Kuydı avızın sörtep.

Ber onıkçık söyli başlıy şunda,
Ütä şayan, äye, ütä cor.
— Äyter süzlär äle äytelmägän
Cırlanmagan äle sezneñ cır.

Tormış cilenä bireşmi
Ozın yullar üttegez.
Ber sukmaktan atladıgız
Gel yänäşä ikegez.

Hoday küpme gomer birsä,
Bergä yäşärgä yazsın.
Brilliant tuy bulsa bulsın,
Tik soñgı tuy bulmasın.

Ak babam, Ak äbiyem!
Gomeregez ozın bulsın.
Bezlärgä dä sezneñ kebek
Yözgä yäşärgä yazsın.
Öy tuyı

Adäm balasına farız
Ütkärergä öç tuynı:
Kızıl tuynı, bäbi tuyın,
Öçençese— soñgı yulga
Zurlap ozatu tuyın.

Päygämbärebez sönnäte—
Ütkärergä öy tuyın.

Yaña yortnıñ nigeze
Korıçtay nıklı bulsın,
Ut-küzlärdän, yavızlardan
Färeştälär saklasın.

Cannarıgız tınıç bulıp,
Kuanıçı küp bulsın.
Üzegezneñ nigezdä
Kartayu nasıyp bulsın.

Bäräkätle yort bulsın,
Duslarıgız çın bulsın.
Tugannar nıklı bulsın
Doşmanıgız yuk bulsın.

Balalar imanlı bulsın,
Küñelläre saf bulsın.
Olılıygan könegezdä
Sezgä tayanıç bulsın.

Onıklar da sezneñ öçen
Olı yuanıç bulsın.
Yaşägez bergä gomergä,
Amin, ul şulay bulsın.

Yaña saugan cılı söttäy,
Karaşlar cılı bulsın.
Bähetegez tulı bulsın,
Yaña yort kotlı bulsın.